Nomery 11–14; 20–24; 27

Jereo ao amin’ny Nomery 11:11–17, 24–29 ny olana natrehan’i Mosesy sy ny vahaolana naroson’ Andriamanitra. Inona araka ny hevitrao no tian’i Mosesy nolazaina rehefa nilaza izy hoe “enga anie ka ho mpaminany avokoa ny olon’i Jehovah rehetra”? (andininy 29). Rehefa misaintsaina io fanontaniana io ianao dia tadiavo izay mety ho valin’izany ao amin’ny hafatry ny Filoha Russell M. Nelson hoe “Fanambarana ho an’ny Fiangonana, fanambarana ho an’ny fiainantsika” (Liahona, mey 2018, 93–96).

Ny filazana fa afaka mandray fanambarana avokoa isika rehetra nefa dia tsy midika fa afaka mitarika ny vahoakan’ Andriamanitra araka ny fomba nanaovan’i Mosesy izany isika rehetra. Manazava tsara izany ilay zavatra nitranga ao amin’ny Nomery 12. Inona avy ireo fampitandremana hitanao ao amin’io toko io? Inona no tsapanao fa tian’ny Tompo ho takatrao momba ny fanambarana ho an’ny tena manokana sy ny fanarahana ny mpaminaniny?

Jereo koa ny 1 Nefia 10:17; Fotopampianarana sy Fanekempihavanana 28:1–7; Dallin H. Oaks, “Lalam-pifandraisana roa,” Liahona, nôv. 2010, 83–86.

Ny olona sasany dia gaga raha nahafantatra fa i Mosesy, ilay mpitarika mahery izay nijoro teo anoloan’i Farao ary nanatanteraka fahagagana mahatalanjona tamin’ny herin’ny Tompo, dia “nalemy fanahy” koa (Nomery 12:3). Inona no dikan’ny hoe malemy fanahy? Hevero ny handalina ny fanazavana nentin’ny Loholona David A. Bednar ao amin’ny hafany hoe “Malemy fanahy sy mietry am-po” (Liahona, mey 2018, 30–33) na ao amin’ny “Halemem-panahy” ao amin’ny Torolalana ho an’ny Soratra Masina (scriptures.ChurchofJesusChrist.org).

Inona no ianaranao avy amin’ny ohatra ahitana ny halemem-panahy nasehon’i Mosesy ao amin’ny Eksodosy 18:13–25; Nomery 11:26–29; Nomery 12; Hebreo 11:24–27; ary Mosesy 1:10–11? Azonao atao koa ny mandalina ny fomba nanehoan’ny Mpamonjy halemem-panahy (jereo ny Matio 11:29; 27:11–14; Lioka 22:41–42; Jaona 13:4–5). Inona no ampianarin’ireo ohatra ireo anao?

Eo am-pamakianao ny Nomery 13–14, dia andramo apetraka eo amin’ny toeran’ny Isiraelita ny tenanao. Nahoana izy ireo araka ny eritreritrao no naniry ny “[h]iverina ho any Egypta”? (Nomery 14:3). Ahoana no hamaritanao ilay “fanahy” hafa izay tao amin’i Kaleba? (Nomery 14:24). Inona no nanaitra anao mikasika ny finoan’i Kaleba sy i Josoa, ary ahoana no azonao ampiharana ny ohatra nasehon’izy ireo eo amin’ireo toe-javatra izay iainanao?

Nahafantatra ilay tantara hita ao amin’ny Nomery 21:4–9 ireo mpaminany ao amin’ny Bokin’i Môrmôna ary nahatakatra ny lanjan’izany ara-panahy. Vakio ny fampianaran’izy ireo momba io tantara io ao amin’ny 1 Nefia 17:40–41; Almà 33:18–22; ary Helamàna 8:13–15. Ireto misy fanontaniana vitsivitsy mba hosaintsainina eo am-pamakianao izany:

• Mety maneho inona ilay menarana varahina?

• Mety maneho inona ireo kaikitry ny menarana?

• Tsy maintsy “nijery ilay menarana varahina” (Nomery 21:9) ny Isiraelita mba hahasitranany. Nahoana araka ny eritreritrao no nandà tsy hijery izany ny olona sasantsasany? Moa ve misy zavatra mitovitovy amin’izany mitranga aminao?

• Inona no tsapanao fa tokony hataonao mba “hiandrandra [feno kokoa] ny Zanak’ Andriamanitra amin’ny finoana” ka ho sitrana? (Helamàna 8:15).

Ny famakiana ireo andinin-tsoratra masina ireo dia mety hampahatsiahy anao ireo fotoana hafa ao amin’ny soratra masina rehefa nila nifantoka tamin’i Kristy ny olona. Ohatra, ampitahao ny hafatra ao amin’ny Nomery 21:4–9 sy ny ao amin’ny Matio 14:25–31 ary ny 1 Nefia 8:24–28 (jereo koa ireo sary any amin’ny faran’ny rindran-damina ho an’ity herinandro ity). Inona no mampirona antsika hanalavitra an’i Kristy? Ahoana no hitahiany ireo olona izay mifantoka Aminy?

Jereo ihany koa ny “O Jésus quand je pense à toi” (Cantiques, no. 76).

Rehefa fantatr’i Balaka mpanjakan’i Moaba fa nihananatona ny Isiraelita dia nampiantso an’i Balama izay lehilahy malaza amin’ny fanomezana tsodrano sy ozona izy. Tian’i Balaka hanozona ny Isiraelita izy. Jereo ny fomba niezahan’i Balaka nandresy lahatra an’i Balama (jereo ny Nomery 22:5–7, 15–17), ary eritrereto ireo fakam-panahy izay mety atrehinao mba hanoherana ny sitrapon’ Andriamanitra. Inona no manaitra anao mikasika ny valintenin’i Balama ao amin’ny Nomery 22:18, 38; 23:8, 12, 26; 24:13? Indrisy fa nilefitra tamin’ny tsindry natao azy i Balama nony farany ka namadika an’i Isiraely (jereo ny Nomery 31:16; Joda 1:11). Saintsaino ny fomba ahafahanao mijanona ho mahatoky amin’ny Tompo na dia eo aza ny tsindry avy amin’ny hafa.

• Anontanio ny zanakao raha toa izy ireo ka mahatadidy ny sasany amin’ireo fahagagana nataon’ny Tompo mba hanampiana ny Isiraelita (jereo ny “Ireo loza tany Egypta” sy “Ny Paska” ao amin’ny Tantara ao amin’ny Testamenta Taloha, 67–74). Avy eo dia azonao fintinina ho azy ireo ny Nomery 11:4–10, ka manamafy fa hadinon’ireo Isiraelita ireo fitahiana azony ary nimonomonona izy ireo. Inona avy ireo fitahiana izay hadinontsika indraindray?

• Rehefa mihira na mihaino hira iray momba ny fankasitrahana ianareo, toy ny “Isao ireo fitahiana” (Fihirana sy Hiran’ny Ankizy, lah. 16) dia afaka manao ny sarin’ireo fitahiana nomen’ny Tompo azy ireo ny zanakao.

• Mba hampidirana ny Nomery 12, dia azonao lazaina amin’ny zanakao fa tsy faly tamin’i Arona sy i Miriama, izay rahalahin’i Mosesy sy anabavin’i Mosesy, ny Tompo. Asao izy ireo hamaky ny Nomery 12:1–8 mba hahafantarana ny antony. Azonao atao ny mampiasa ny Boky mirakitra sary momba ny filazantsara mba hanampiana ny zanakao hahita ohatra momba ireo olona ao amin’ny soratra masina izay nanaja ny mpaminanin’ny Tompo ka voatahy. Inona no fitahiana azontsika rehefa manaraka ny mpaminanin’ny Tompo isika?

• Azonao ampiasaina ny “Mosesy sy ny menarana varahina” ao amin’ny Tantara ao amin’ny Testamenta Taloha, 83–84, mba hanampiana ny zanakao hahafantatra ny zava-nitranga tao amin’ny Nomery: 21:6–9. Amin’ny fomba ahoana no itovian’ilay menarana varahina amin’i Jesoa Kristy? (jereo ny Jaona 3:14–15). Mety ho tian’ny zanakao ny hanamboatra bibilava amin’ny taratasy ary hanoratra zavatra tsotra vitsivitsy azon’izy ireo atao eo amin’zany mba “hiandrandra[na] ny Zanak’ Andriamanitra amin’ny finoana” (Helamàna 8:15).

  

  1:2

• Afaka misafidy iray amin’ireto soratra masina manaraka ireto ny ankizy lehibe ary mizara ny zavatra hampitomboan’izany ny fahatakaran’izy ireo ilay tantara :1 Nefia 17:41; Almà 33:18–20; Helamàna 8:13–15; Fotopampianarana sy Fanekempihavanana 6:36.

• Fintino amin’ny zanakao ny Nomery 22:1–18, ka hamafiso ny fomba nandavan’i Balama ny hanozona ny vahoakan’ Andriamanitra, na dia notoloran’i Balaka mpanjakan’i Moaba voninahitra sy harena aza izy. Avy eo dia azonao atao ny manampy an’ireo zanakao hikaroka ireo andian-teny izay tsapan’izy ireo fa mampiseho ny fanirian’i Balama hanaraka an’ Andriamanitra ao amin’ireto andinin-tsoratra masina manaraka ireto: Nomery 22:18; 23:26; 24:13. Angamba mety haka andian-teny iray tian’izy ireo ny zanakao ary hanoratra izany ao amina taratasy kely mba hanampy azy ireo hahatsiaro ny hankatò ny Tompo.