Los, Nrog Kuv Mus
Tej Yam Ntxim Xav Txog: Lub Tuam Tsev Ntaub thiab Kev Txi

“Tej Yam Ntxim Xav txog: Lub Tuam Tsev Ntaub thiab Kev Txi,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Lub Tuam Tsev Ntaub thiab Kev Txi,” Los, Nrog Kuv Mus: Phau Qub 2026

lub cim rau tej kev xav

Tej Yam Ntxim Xav Txog

Lub Tuam Tsev Ntaub thiab Kev Txi

Thaum peb nyeem Phau Qub, qee zaum peb nrhiav tau tej zaj ntev tsawv hais txog tej yam uas yav thaud tseem ceeb heev rau tus Tswv tiam sis zoo li tsis raug rau peb lub neej niaj hnub nim no. Khiav Dim 25–30; 35–40 thiab Levis Kev Cai 1–9; 16–17 yog piv txwv txog qhov no. Tej tshooj no piav txog haiv neeg Ixayees lub tuam tsev ntaub nyob tom roob moj sab qhua thiab tej kev txi tsiaj txhu uas yuav tsum txi rau haud. Lub tuam tsev ntaub yog ib lub tuam tsev uas nqa mus los yooj yim, tus Tswv lub tsev hauv Nws haiv neeg.

Peb tej tuam tsev niaj hnub nim no muaj ntsis zoo ib yam li haiv neeg Ixayees lub tuam tsev ntaub, tiam sis peb cov tuam tsev tsis zoo li lub tuam tsev uas paiv txog hauv phau Khiav Dim. Thiab peb tsis tua tsiaj txhu hauv peb tej tuam tsev—tus Cawm Seej txoj Kev Theej Txhoj ua rau txoj kev txi tsiaj tso tseg yuav luag 2,000 xyoo dhau los. Txawm tias muaj tej kev sib txawv txav no los, yeej muaj feem rau peb heev kom nyeem txog Ixayees yav thaum ub tej kev teev tiam, twb yog tias peb xav saib lawv ib yam li Vajtswv cov neeg hauv Phau Ntawv Maumoos saib lawv—ua ib txoj kev “pab kom lawv txoj kev ntseeg Khetos muaj zog” (Amas 25:16). Thaum peb to taub saib tej cim ntawm lub tuam tsev ntaub thiab txoj kev txi tsiaj txhu txhais li cas, peb yuav txais kev tshoov siab ntawm sab ntsuj plig thiab ntxiv dag zog rau peb txoj kev ntseeg rau ntawm Khetos.

Cov neeg Ixayees coj ib tug me nyuam yaj los rau lub tuam tsev ntaub

Kev Txi ib tug Me Nyuam Yaj, los ntawm Robert T. Barrett

Lub Tuam Tsev Ntaub Ntxiv Dag Zog rau txoj Kev Ntseeg rau ntawm Yexus Khetos

Thaum Vajtswv txib kom Mauxes ua ib lub tuam tsev ntaub hauv haiv neeg Ixayees lub yeej, Nws qhia yog vim li cas Nws hais kom ua li ntawd: “kuv thiaj nrog lawv nyob” (Khiav Dim 25:8). Nyob hauv lub tuam tsev ntaub, lub phij xab rau kev khi lus yog ua piv txwv tias Vajtswv nrog lawv nyob—yog ib lub phij sab ntoos, uas muaj kub lo rau, thiab nyob haud yog ib daim ntawv sau cia saib Vajtswv tau nrog Nws haiv neeg sib khi lus li cas. Lawv muab lub phij xab no cia hauv chav dawb huv tshaj plaws, uas muaj ib daim ntaub thaiv npog thiab nyob cais tawm ntawm lwm qhov chaw hauv lub tuam tsev ntaub. Daim ntaub thaiv no muab piv tau rau qhov uas peb nyob nrug deb ntawm Vajtswv vim yog txoj Kev Poob, thiab kuj yog lub qhov rooj rov qab mus cuag Nws—dhau ntawm tus Cawm Seej.

Tsis hais Mauxes, peb tsuas paub txog lwm tus neeg ib leeg xwb uas nkag tau qhov chaw uas “dawb huv kawg nkaus” ntawd (Khiav Dim 26:34)—tus pov thawj hlob. Ib yam li lwm tus pov thawj, tus pov thawj hlob yuav tsum tau ntxuav thiab pleev roj rau thiab hnav tsoos tsho dawb ceev uas phim nws lub luag hauj lwm. Ib xyoos ib zaug, thaum hnub uas hu ua Hnub Theej Txhoj, tus pov thawj hlob yuav txi tsiaj txhu theej txhoj rau cov neeg ua ntej nws nkag lub tuam tsev ntaub nws ib leeg xwb. Nyob ntawm daim ntaub thaiv, nws yuav hlawv xyab. Cov pa xyab ncho lug mus saum ntuj ntawd piv rau haiv neeg tej kev thov txog Vajtswv. Ces tus pov thawj hlob, nqa ib co ntshav los ntawm txoj kev txi tsiaj txhu, yuav mus dhau daim ntaub thaiv thiab mus rau ntawm Vajtswv lub theej kiab, uas yog lub phij xab ntawm txoj kev khi lus ua piv txwv txog.

Vim koj paub tej yam koj paub txog Yexus Khetos thiab Nws lub luag hauj lwm hauv Leej Txiv Saum Ntuj Ceeb Tsheej txoj hau kev, koj puas pom tau saib lub tuam tsev ntaub ua li cas taw peb mus rau tus Cawm Seej? Ib yam li lub tuam tsev ntaub, thiab lub phij xab nyob haud, ua piv txwv rau qhov uas Vajtswv nrog Nws haiv neeg nyob ua ke, Yexus Khetos yog Vajtswv qhov kev tshwm sim nyob hauv Nws haiv neeg. Ib yam li tus pov thawj hlob, Yexus Khetos yog tus Neeg Nruab Nrab ntawm peb thiab Vajtswv Leej Txiv. Nws mus dhau ntawm daim ntaub thaiv kom theej peb lub txhoj vim yog cov ntshav ntawm Nws txoj kev txi Nws tus kheej.

Tej zaum muaj tej yam ntawm haiv neeg Ixayees lub tuam tsev ntaub uas koj paub txog lawm, twb yog tias koj tau mus tom tuam tsev thiab txais tej kab ke rau koj tus kheej lawm. Lub tuam tsev ntaub yog tus Tswv lub tsev—Nws lub tsev nyob hauv Nws haiv neeg. Ib yam li lub tuam tsev ntaub qhov chaw dawb huv tshaj plaws, peb lub tuam tsev chav xilethi-aus piv tau rau Vajtswv qhov kev tshwm sim. Kom thiaj nkag tau, peb yuav tsum xub raug ntxuav thiab pleev roj rau. Peb hnav tej tsoos tsho dawb ceev. Peb khi lus. Peb thov Vajtswv rau ntawm ib lub thaj thiab peb cov lus thov nce mus txog Vajtswv. Thiab thaum kawg peb mus dhau ntawm ib daim ntaub thaiv rau hauv Vajtswv qhov kev tshwm sim.

Tej zaum qhov tseem ceeb tshaj plaws hais txog qhov uas zoo sib xws ntawm cov tuam tsev niaj hnub nim no thiab lub tuam tsev ntaub yav thaum ub yog qhov uas ob lub, yog tias to taub zoo, ntxiv dag zog rau peb txoj kev ntseeg rau ntawm Yexus Khetos thiab ua rau peb ris Nws txiaj rau Nws txoj kev theej txhoj. Vajtswv xav kom tag nrho Nws cov me nyuam los rau ntawm Nws lub xub ntiag; Nws xav kom muaj “ib lub nceeg vaj ntawm cov pov thawj” thiab niam pov thawj (Khiav Dim 19:6). Tiam sis peb tej kev txhaum tav kev rau peb txais txoj koob hmoov ntawd, vim “tus uas tsis huv nrog Vajtswv nyob tsis taus” (1 Nifais 10:21). Ces Vajtswv Leej Txiv xa Yexus Khetos, peb tus “pov thawj hlob rau tej yam zoo uas yuav los” (Henplais 9:11). Nws qhib daim ntaub thaiv rau peb thiab pab peb txhua tus uas yog Vajtswv haiv neeg muaj cuab kav los rau ntawm Vajtswv lub theej kiab ntawm kev tshav ntuj, xwv kom peb thiaj txais tau kev hlub tshua (Henplais 4:16).

Niaj hnub nim no, lub tuam tsev lub ntsiab yeej ntau tshaj qhov uas txais kev tsa nto rau peb tus kheej nkaus xwb. Tom qab uas peb txais tej kab ke thiab nrog Vajtswv khi lus rau peb tus kheej, peb sawv cev tam peb cov poj koob yawm txwv txais tej kab ke rau lawv thiab. Ua piv txwv, peb rais los mus ua ib tug pov thawj hlob li yav thaud—thiab tus Pov Thawj Hlob Tshaj—qhib kev rau Vajtswv lub xub ntiag rau lwm tus neeg.

Kev Txi Ntxiv Dag Zog rau txoj Kev Ntseeg rau ntawm Yexus Khetos

Tej ntsiab cai ntawm txoj kev theej txhoj thiab txoj kev rov qab hais sib haum muaj piv txwv hauv txoj kev txi tsiaj txhu yav thaum ub, uas muaj ntau xyoo ua ntej Mauxes txoj kev cai. Adas thiab Evas ua kev cai txi. Nkawd to taub hais tias txoj kev txi no piv rau tus Cawm Seej txoj kev txi zoo li cas. Thiab nkawd qhia qhov no rau nkawd cov me nyuam.

Qhov uas txoj kev txi tsiaj txhu ua ib lub cim tej zaum tseem ceeb heev thaum haiv neeg Ixayees yav thaum ub ua koob tsheej nco txog Hnub Theej Txhoj (Ua lus Henplais yog “Yom Kippur”). Lub ntsiab rau txoj kev ua koob tsheej no yog hais txog hauv Levis Kev Cai 16:30: “Hnub ntawd yuav tsum ua kev cai daws tag nrho nej tej kev txhaum, nej thiaj li ua tau neeg huv.” Ua li no cia Vajtswv nyob hauv cov neeg. Txoj kev theej txhoj no muaj los dhau ntawm ob peb txoj kab ke. Hauv ib txoj kab ke no, ib tug tshis yog muab tua tuag kom thiaj theej txhoj rau haiv neeg tej kev txhaum, thiab tus pov thawj hlob nqa tus tshis cov ntshav mus rau hauv qhov chaw dawb huv. Tom qab ntawd, tus pov thawj hlob muab nws ob txhais tes tso saum ib tug tshis uas tseem muaj sia nyob thiab lees txim txhaum ntawm haiv neeg Ixayees—ua yam ntxwv tias nws muab tej kev txhaum ntawd tso nrog tus tshis ntawd mus. Ces lub yeej Ixayees yuav ntiab tus tshis tawm ntawm lawv mus.

Hauv tej kab ke no, cov tshis ua yam ntxwv txog Yexus Khetos, theej cov neeg txhaum lub txhoj. Yuav tsum tsis txhob muaj kev txhaum nyob hauv qhov chaw Vajtswv nyob. Tiam sis Vajtswv tsis ua rau cov neeg txhaum puam tsuaj mus los sis ntiab lawv tawm, Nws npaj lwm txoj kev dim—yuav muaj ib tug tshis raug tua tuag los sis ntiab tawm. “Tus tshis yuav ris tag nrho lawv tej kev ua phem” (Levis Kev Cai 16:22).

Tej kab ke taw kev rau txoj hau kev uas Vajtswv npaj tseg kom coj peb rov qab mus cuag Vajtswv—Yexus Khetos thiab Nws txoj Kev Theej Txhoj. Tus Cawm Seej tau “tiv peb tej kev nyuaj siab, thiab nqa peb tej kev tu siab mus,” twb yog “peb lub txim uas tsim nyog peb raug” (Ixayees 53:4, 6). Nws sawv hauv peb qhov chaw, muab Nws txoj sia them tus nqi txhaum, thiab kov yeej kev tuag dhau ntawm Nws txoj Kev Sawv Rov Los. Yexus Khetos txoj kev txi yog “txoj kev txi kawg uas tseem ceeb; muaj tseeb tiag, tsis yog ib txoj kev txi tib neeg, thiab tsis yog txi tej tsiaj, los sis txi tej noog; vim yuav tsis yog ib txoj kev txi tib neeg” (Amas 34:10). Nws yog qhov tiav tas ntawm txhua yam uas tej kab ke yav thaum ub hais tias yuav muaj los.

Yexus nqa tus ntoo khaub lig

Yog vim li ntawd, tom qab Nws txoj kev txi tiav tas, Nws hais tias, “Nej tsis txhob tua tsiaj txi rau kuv ntxiv lawm; muaj tseeb tiag, tso tseg nej tej kev txi. … Thiab nej yuav muab lub siab mob thiab lub siab xav ua zoo ua kev txi rau kuv” (3 Nifais 9:19–20).

Ces thaum koj nrhiav tau tej nqe hauv Phau Qub hais txog tej kev txi thiab lub tuam tsev ntaub (los sis, tom qab no, lub tuam tsev)—thiab koj yuav nrhiav tau ntau nqe—nco qab ntsoov hais tias qhov tseem ceeb tshaj yog kom ntxiv dag zog rau koj txoj kev ntseeg rau ntawm tus Mexiyas, Yexus Khetos. Xav txog tej yam koj nyeem thiab kawm thaum koj teev tiam hauv Nws lub tsev. Cia koj lub siab lub ntsws tig mus rau Nws. Xav txog tej yam Nws tau ua kom coj koj rov qab mus cuag Vajtswv—thiab saib koj yuav ua li cas kom thiaj ua raws li Nws hais.

Lus Cim

  1. Khiav Dim 33:7–11 hais txog ib lub tsev ntaub uas yog “qhov chaw sib ntsib,” es nyob ntawd Mauxes nrog tus Tswv sib tham, tiam sis qhov chaw no tsis yog qhov uas ua tej kab ke uas hais txog hauv phau Khiav Dim thiab Levis Kev Cai. Tej kab ke ntawd yog ua hauv lub tuam tsev ntaub uas piav txog hauv Khiav Dim 25–30, uas Vajtswv txib kom Mauxes thiab Ixayees cov me nyuam txhim tsa (saib Khiav Dim 35–40). Lub tuam tsev ntaub no, uas yog qhov chaw uas Aloos thiab nws cov tub txi tej tsiaj txhu, kuj muaj lub npe ua “tsev ntaub uas yog qhov chaw sib ntsib” (saib, ua piv txwv, Khiav Dim 28:43; 38:30; Levis Kev Cai 1:3).

  2. Kuj saib Yakhauj 4:5; Yaloos 1:11.

  3. Saib Khiav Dim 25:10–22.

  4. Saib Henplais 10:19–20.

  5. Saib Khiav Dim 40:12–13.

  6. Saib Khiav Dim 28.

  7. Saib Levis Kev Cai 16:12.

  8. Saib Phau Ntawv Nkauj 141:2.

  9. Saib Levis Kev Cai 16:14–15.

  10. Saib Yauhas 1:14.

  11. Saib Henplais 8–10.

  12. Saib Mauxes 5:4–12; kuj saib Chiv Keeb 4:4.

  13. Saib Mauxiyas 15:8–9.