Khiav Dim 19–20; 24; 31–34

Thawj Tswj Hwm Russell M. Nelson tau qhia tias: “Nyob hauv Phau Qub, lo lus Henplais uas txhais tias tshwj xeeb yog segullah, uas txhais tias, ‘thaj av uas muaj nqis,’ los yog ‘tej yam uas muaj nqi.’ … Qhov uas tus Tswv cov tub qhe hais tias peb yog nws cov neeg tshwj xeeb yeej yog ib lo lus qhuas uas zoo tshaj plaws” (“Children of the Covenant,” Ensign, Tsib Hlis Ntuj 1995, 34). Thawj Tswj Hwm Nelson tej lus Khiav Dim 19:3–6? Tus Tswv tau ua li cas kom koj kawm tias Nws saib koj rau nqi?

Tus Tswv tau qhia Mauxes tias cov Neeg Ixayees yuav tsum npaj siab ua ntej lawv “ntsib Vajtswv” (Khiav Dim 19:10–11, 17) thiab ua zoo li cov lus sib khi nrog Nws (saib Khiav Dim 19:5). Koj ua li cas kom npaj txais tej yam dawb huv, tsis hais lub cim nco txog thiab cov kab ke hauv lub tuam tsev los yog? Koj yuav ua li cas kom pab lwm tus npaj siab? Koj kawm dab tsi txog txoj kev npaj los ntawm Lukas 6:12–13; Enos 1:2–6; Amas 17:2–3?

Thaum cov neeg Ixayees sib sau ua ke ntawm lub Roob Xinais, lawv tau hnov Vajtswv lub suab hais Kaum Nqe Lus txib (saib 2 Kev Cai 4:12–13). Tiam sis, tej nqe no tsis yog Vajtswv tib co lus txib xwb—muaj ntau txoj lus txib ntxiv nyob hauv cov vaj lug kub. Yog li ntawd thaum koj nyeem Khiav Dim 20:1–17, cia li nug koj tus kheej seb vim li cas Vajtswv tau hais kaum nqe no. Nov yog ib daim uas koj siv tau thaum koj xav txog qhov uas Kaum Nqe Lus Txib tseem ceeb npaum li cas hauv koj lub neej:

• Qhov uas koj ua raws li kaum nqe lus txib no pab koj li cas koj thiaj ua raws li ob txoj lus txib tseem ceeb uas Yexus hais nyob hauv Mathais 22:34–40?

• Koj raug ntxias kom saib tej yam twg tseem ceeb dua li Vajtswv? Koj tau koom hmoov dab tsi thaum koj tau tsom ntsoov rau Vajtswv?

• Koj yuav hais li cas rau ib tug neeg uas hais tias twb muab Kaum Nqe Lus Txib ntev dhau los lawm thiab tsis muaj nqis rau peb hnub no? Muaj tej lub sij hawm twg hauv koj lub neej uas koj yuav qhia tus ntawd thaum koj teb nws? Zaj nkauj “Vajtswv Lus Txib Mos Muag” (Cov Nkauj Qhuas Vajtswv, zaj 46) yuav pab koj li cas kom piav tau txog Vajtswv cov lus txib rau lwm tus?

• Tus Tswv tau ua li cas kom muaj raws li kev cog lus nyob hauv Khiav Dim 20:6 nyob hauv koj lub neej?

Kuj saib “The Great Commandment—Love the Lord,” nyob hauv Teachings of Presidents of the Church: Ezra Taft Benson (2014), 37–45; Dallin H. Oaks, “No Other Gods,” Liyahaunas, Kaum Ib Hlis Ntuj 2013, 72–75; Tej Ntsiab Lus thiab tej Lus Nug, “Lus Txib,” Txoj Moo Zoo cov Ntawv.

Thaum koj nyeem Khiav Dim 24:3–8, cia li xav txog tej kev khi lus uas koj tau nrog Vajtswv khi. Txawm yog Ixayees txoj kev khi lus muaj tej kab ke uas txawv ntawm tej yam uas Vajtswv txib kom koj ua niaj hnub no, tej zaum koj yuav pom tej yam uas zoo ib yam. Piv txwv hais tias, nqe 4, 5, and 8 hais txog ib lub thaj, kev muab cov tsiaj txi, thiab cov ntshav. Tej no sawv cev tam tej yam twg, thiab yog tej lub cim dab tsi txog koj tej kev khi lus?

Cia li xav seb yuav zoo li cas yog koj yog ib tug neeg Ixayees—koj nyob hauv roob moj sab qhua, Mauxes twb mus ntev li 40 hnub lawm, thiab thaum yav tom ntej nej yuav tawm tsam cov neeg Kana-as kom tau thaj av uas cog lus cia (saib Khiav Dim 32:1–8). Koj xav tias yog vim li cas cov neeg Ixayees xav tau ib tug mlom kub? Muaj dab tsi uas tshoov koj lub siab los ntawm Mauxes tej lus thov tus Tswv nyob hauv Khiav Dim 33:11–17?

Txawm yog cov neeg Ixayees txoj kev txhaum loj heev, zaj dab neeg muaj ib zaj lus txog Vajtswv txoj kev siab hlub thiab kev zam txim. Khiav Dim 34:1–10 qhia dab tsi rau koj txog tus Cawm Seej? (saib Khiav Dim 32:30–32; Mauxiyas 14:4–8; 15:9; Lus Qhuab Qhia thiab Kev Khi Lus 45:3–5).

Thawj Tswj Hwm Russell M. Nelson piav tias: “Thaum kuv tseem hluas, kuv tau kawm txog tej yam uas neeg sau hais tias yuav tsum tsis txhob ua thaum Hnub Caiv. Tom qab ntawd kuv twb kawm los ntawm cov vaj lug kub hais tias tej yam kuv ua thiab kuv tus xeeb ceem thaum Hnub Caiv yog ib lub cim uas kuv ua rau kuv Leej Txiv Saum Ntuj Ceeb Tsheej [saib Khiav Dim 31:13; Exekhees 20:12, 20]. Thaum kuv to taub li ntawd, kuv tsis tas sau hais tias kuv yuav ua dab tsi thiab tsis ua dab tsi. Thaum kuv yuav tsum txiav txim siab hais tias ib yam puas tsim nyog ua thaum Hnub Caiv, kuv cia li nug kuv tus kheej, ‘Kuv xav ua lub cim twg rau Vajtswv?’ Lo lus nug ntawd ua yooj yim rau kuv paub xaiv ua dab tsi thaum Hnub Caiv” (“Hnub Caiv Yog Ib Hnub Zoo Siab,” Liyahaunas, Tsib Hlis Ntuj 2015, 130). Xav seb koj xav ua lub cim twg rau Vajtswv thaum koj hwm Hnub Caiv.

Thaum Mauxes nqe lub roob los, nws tau nqa txoj kev cai uas twb muab sau rau ob daim txiag zeb los. Tom qab nws kawm tias cov neeg Ixayees tau rhuav lawv txoj kev khi lus, Mauxes muab ob daim txiag zeb tsoo tawg (saib Khiav Dim 31:18; 32:19). Tom qab ntawd, Vajtswv txib Mauxes ua ob daim phiaj zeb ntxiv thiab nqe mus pem roob (saib Khiav Dim 34:1–4). Joseph Smith Kev Txhais Khiav Dim 34:1–2 (nyob hauv phau Npaivnpaum cov ntawv ntxiv tom kawg) piav tias thawj ob daim phiaj zeb muaj cov kab ke ntawm Vajtswv “tus txheej txheem dawb huv,” los yog lub Pov Thawj Hwj Mekhixedes. Ob daim phiaj zeb thib ob muaj “txoj kev cai ntawm lus txib txog sab cev nqaij daim tawv.” Nov yog ib txoj kev cai yau zog uas yog muab los ntawm “lub pov thawj hwj yau zog” (saib Lus Qhuab Qhia thiab Kev Khi Lus 84:17–27), uas twb yuav npaj cov neeg Ixayees kom txais tau txoj kev cai siab dua thiab lub pov thawj hwj siab dua lawv thiaj li yuav muaj cai mus rau Vajtswv lub xub ntiag.

• Koj yuav ua li cas kom pab koj cov me nyuam muaj kev lom zem thaum lawv kawm txog Kaum Nqe Lus Txib? Thaum nej nyeem Khiav Dim 20:3–17 ua ke, cia koj cov me nyuam pab koj nrhiav ib daim duab los sis kos duab uas piv txog txhua lo lus txib ntawm Kaum Nqe Lus Txib. Ces tej zaum koj cov me nyuam yuav xav xaiv ib daim duab zuj zus thiab sib tham txog tej yam lawv ua tau kom ua raws li lo lus txib ntawd. Nej ib leeg cia li qhia ib leeg hais tias vim li cas kev ua raws li lo lus txib ntawd ua rau nej zoo siab.

• Tej zaum nej kuj yuav xav hu ib zaj nkauj xws li “Keep the Commandments” (Children’s Songbook, 146–47). Cia li pab koj cov me nyuam nrhiav tej lus hauv zaj nkauj no uas qhia lawv vim li cas Vajtswv xav kom peb ua raws li Nws cov lus txib.

• Pab koj cov me nyuam kawm cov lus no “Yuav tsum hwm nej niam nej txiv” (Khiav Dim 20:12). Tej zaum koj yuav xav piav tias kev “hwm” ib tug neeg txhais tias yus saib taus nws los sis xav kom nws zoo siab. Yexus tau ua dab tsi kom hwm Nws niam hauv lub ntiaj teb thiab Nws Leej Txiv Saum Ntuj Ceeb Tsheej? (saib Lukas 2:48–51; Yauhas 19:26–27). Tej zaum koj cov me nyuam yuav xav ua yeeb yam txog tej yam lawv ua tau kom hwm lawv niam lawv txiv, es cia lwm tus me nyuam twv seb lawv ua dab tsi.

• Tej zaum koj cov me nyuam yuav nyiam saib tej yam uas ua yam txwv txog tej lub cim—xws li tej lub cim ntawm txoj kev los sis tej daim uas muab dai rau ib lub tsev loj. Vim li cas peb muaj tej lub cim? Tej zaum koj cov me nyuam yuav xav nrhiav lo lus “lub cim” nyob hauv Khiav Dim 31:13, 16–17. Tus Tswv tau hais tias qhov twg yog ib lub cim rau peb thiab Nws? Qhia txog tej yam uas koj thiab koj tsev neeg ua kom qhia tias nej hlub tus Tswv nyob rau Hnub Caiv.

• Xav seb puas siv “Mauxes Nyob Saum Roob Xinais” (nyob hauv Cov Dab Neeg hauv Phau Qub, 77–82) kom pab koj cov me nyuam kawm zaj dab neeg nyob hauv Khiav Dim 32:1–8, 19–24. Vim li cas cov neeg Ixayees ua txhaum thaum lawv pe hawm ib tug mlom thiab tsis pe hawm Vajtswv?

  

  2:55

• Tej zaum nej yuav nyiam tsim ib txoj kev (los sis nrhiav ib txoj kev ze nej lub tsev) kom qhia txog tej lus no los ntawm Khiav Dim 32:8: “Lawv tso txoj kev uas kuv kom lawv taug tseg lawm.” Thaum nej taug txoj kev ntawd, tej zaum koj cov me nyuam yuav xav hais txog tej kev ntxias uas peb raug thaum peb tso txoj kev uas nej taug ntawd tseg. Tej yam twg pab peb taug Vajtswv txoj kev—thiab rov qab mus taug Vajtswv txoj kev yog peb ua yuam kev? (saib Khiav Dim 34:6–7).