“Plaub Hlis Ntuj 13–19. ‘Nyob Twj Ywm Ntsia Saib tus Tswv Yuav Pab Nej Li Cas: Exodus 14–18,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Plaub Hlis Ntuj 13–19. ‘Nyob Twj Ywm Ntsia Saib tus Tswv Yuav Pab Nej Li Cas,’” Los, Nrog Kuv Mus: Phau Qub 2026

April 13–19: “Nyob Twj Ywm Ntsia Saib tus Tswv Yuav Pab Nej Li Cas”

Khiav Dim 14–18

Haiv neeg Ixayees mag lawm. Dej Hiav Txwv Liab nyob ntawm ib sab, es Vaj Ntxwv pab tub rog tab tom tuaj ntawm lwm sab tuaj. Zoo nkaus li, lawv txoj kev dim Iyiv teb chaws yuav kav ib nyuag pliag xwb. Tiam sis Vajtswv muaj ib zaj xov rau haiv neeg Ixayees uas Nws xav kom lawv yuav nco ntsoov rau ntau tiam neeg tom ntej hais tias: “Nej tsis txhob ntshai. … Tus Tswv yuav pab nej tawm tsam” (Khiav Dim 14:13–14).

Txij thaum ntawd los, thaum Vajtswv haiv neeg xav tau txoj kev ntseeg thiab kev ua siab loj, lawv tau qhia txog zaj dab neeg no. Thaum Nifais xav txhawb pab nws cov tij laug, nws hais tias, “Cia peb ua khov kho zoo li Mauxes; vim muaj tseeb tias nws hais lus rau cov dej ntawm Dej Hiav Txwv Liab thiab cov dej ntawd tau faib hlo rau ob sab, thiab peb cov yawg koob thiaj tau los dhau, tawm ntawm txoj kev poob cev qhev, rau saum tej av qhuav los” (1 Nifais 4:2). Thaum Vaj Ntxwv Leehais xav kom nws cov neeg uas raug kaw ua tub qhev kom “tsa [lawv] lub taub hau, thiab zoo siab,” nws rov qhia lawv txog tib zaj dab neeg no (Mauxiyas 7:19). Amas tau ua tib yam li no, thaum nws xav hais lus tim khawv rau nws cov tub txog Vajtswv lub hwj chim (saib Amas 36:28). Thiab thaum twg zoo nkaus li peb tsis muaj kev cia siab lawm—thaum twg peb xav tau kev ntseeg ntxiv kom “saib hnub no tus Tswv yuav pab nej li cas”—peb yuav nco qab tias “hnub ntawd tus Tswv pab cov Ixayees dim” (Khiav Dim 14:13, 30).

Tej Tswv Yim Pab Qhia hauv Tsev thiab lub Koom Txoos

Khiav Dim 14; Khiav Dim 15:1–21

Tus Tswv ua tau tej hauj lwm “tseem ceeb” hauv kuv lub neej.

Thaum koj nyeem Khiav Dim 14:1–10, sim xav seb haiv neeg Ixayees yuav xav li cas thaum lawv pom Vaj Ntxwv pab tub rog tab tom caum lawv qab. Tej zaum koj xav tias koj xav tau ib qho txuj ci loj thiab tseem ceeb koj thiaj nyiaj tau ib qho teeb meem hauv koj lub neej tas sim no. Koj nrhiav tau dab tsi hauv Khiav Dim 14:13–31 uas txhib tau koj lub siab thaum koj tab tom thov kom muaj Vajtswv lub hwj chim hauv koj lub neej? Ntsuam xav txog tej lub sij hawm yav tas los lawm uas koj tau pom Nws lub hwj chim. Koj tau kawm dab tsi txog Nws los ntawm tej yam zoo li no?

Khiav Dim 15:1–19 yog ib zaj nkauj qhuas Vajtswv uas haiv neeg Ixayees tau hu tom qab tus Tswv muab tus Dej Hiav Txwv Liab faib rau ob sab. Koj nyiam tej kab lus twg hauv zaj nkauj no? Tej zaum muaj ib zaj nkauj uas koj nyiam hu thaum tus Tswv tau ua ib yam txuj ci tseem ceeb rau koj, ib yam li “Ixayees tus Cawm Seej” (Cov Nkauj Qhuas Vajtswv, zaj 5). Hnub no sim hu los sis mloog zaj ntawd ua ib qho ntawm koj txoj kev teev ntuj.

Kuj saib Lus Qhuab Qhia thiab Kev Khi Lus 8:2–3.

Khiav Dim 15:22–27; 16:1–15; 17:1–7

Tus Tswv txawj ua rau tej yam iab hloov ua qab zib.

Thaum xav txog haiv neeg Ixayees txoj kev khiav teb chaws tej zaum koj yuav xav txog tej yam hauv koj lub neej uas zoo nkaus yog ib yam uas “iab” zoo li cov dej Malas (saib Khiav Dim 15:23–27). Tus Tswv ua li cas pab kom tej yam iab hauv koj lub neej tau hloov los ua ib qho qab zib? Tej no muaj nqi li cas hauv koj lub neej?

Koj yuav pom lwm yam piv txwv txog tej yam uas iab rau hauv neeg Ixayees nyob rau hauv Khiav Dim 16 thiab 17. Ib txhia yeej yuav xav thuam qhov uas lawv pheej yws yws los sis tsis txaus siab, tiam sis thaum koj nyeem, sim xav seb koj puas tau ua ib yam li lawv dua. Koj kawm tau dab tsi los ntawm haiv neeg Ixayees zaj no uas yuav pab kom koj tsis txhob yws yws thiab haj yam tso siab rau Vajtswv? Tej nqe no qhia koj dab tsi txog Vajtswv?

Kuj saib 1 Nifais 2:11–12.

Cov neeg Ixayees sau cov manas los — Haiv neeg Ixayees sau cov manas los. Neo-gothic fresco, Trnava (sau tau meej)

Khiav Dim 16

Tus Tswv xav tu kuv sab ntsuj plig txhua txhia hnub.

Vim peb sawv daws yuav tsum noj mov, feem ntau tus Tswv muab tej yam ntawm sab ntsuj plig piv rau zaub mov. Saib seb muaj tej zaj lus qhia ntawm sab ntsuj plig dab tsi rau haiv neeg Ixayees thaum hais txog cov manas hauv Khiav Dim 16. Piv xam hais tias, koj kawm tau dab tsi los ntawm tus Tswv cov lus qhuab qhia hauv Khiav Dim 16:16, 19, 22–26 uas qhia txog txoj kev tu koj sab ntsuj plig?

Yog xav paub txog lwm zaj lus qhia uas tus Tswv xav kom koj kawm los ntawm qhov txuj ci no, sim xav txog tej lo lus nug zoo li no:

Tus Tswv muab dab tsi rau kuv txhua hnub zoo li cov manas uas Nws muab pub rau haiv neeg Ixayees?
Kuv ua tau tej yam dab tsi uas zoo li txoj kev sau cov manas ua ke?

Tej zaum koj kawm tau tej yam ntxiv hauv ib los sis ob peb qhov vidi-aus no: “Daily Bread: Pattern,” “Daily Bread: Experience,” thiab “Daily Bread: Change” (Txoj Moo Zoo cov Ntawv).

Xav txog lwm yam, uas tsis yog kev noj mov, uas koj ua txhua txhua hnub. Vim li cas muaj tej yam uas yus yuav tsum ua txhua txhua hnub thiaj pab tau? Koj txais kev tshoov siab los ua dab tsi txhua txhua hnub rau koj sab ntsuj plig?

Kuj saib Dieter F. Uchtdorf, “Muab Kho Txhua Txhua Hnub,” Liyahaunas, Kaum Ib Hlis Ntuj 2021, 77–79; “Daily Restoration” (vidi-aus), Txoj Moo Zoo cov Ntawv.

Khiav Dim 17:1–7

Yexus Khetos yog kuv sab ntsuj plig lub pob zeb thiab dej uas cawm txoj sia.

Xav txog tus Cawm Seej thaum koj nyeem Khiav Dim 17:1–7. Yexus Khetos ua li cas thiaj yog ib lub pob zeb rau koj? (saib Phau Ntawv Nkauj 62:6–7; Hilamas 5:12). Nws zoo li dej li cas? (saib Yauhas 4:10–14; 1 Kauleethaus 10:1–4; 1 Nifais 11:25).

Nrhiav seb muaj tej yam khoom dab tsi uas ua tim khawv txog Khetos. Thaum twg cov vaj lug kub piav txog tej yam khoom uas ua cim txog Yexus Khetos, zoo li Khiav Dim 17:1–7 qhia, tej zaum qhov ntawd yog ib zaj lus qhia zoo rau koj siv. Ntsia los sis kov ib lub pob zeb los sis dej yuav pab yus haj yam to taub tias tej no zoo li Yexus Khetos li cas. Yog tias yus siv ob peb yam kawm ib yam dab tsi, ces yus haj yam yuav nco qab thiab to taub qhov ntawd.

Khiav Dim 17:8–16; 18:13–26

Cov thwj tim ib leeg pab ib leeg “ris lub nra” khiav tus Tswv txoj hauj lwm.

Tej zaum yuav muaj tej lub sij hawm hauv koj lub neej uas koj yuav xav tib yam li Mauxes—thaum uas luag tej vam koj, tiam sis koj “tsaug npab lawm” (Khiav Dim 17:12). Lwm lub sij hawm ces, tej zaum koj yuav zoo li Aloos, Hules, thiab Yethoos, cov uas tau txhawb nqa Mauxes. Cia li xav seb yuav zoo li cas yog koj yog txhua tus neeg no thaum koj nyeem Khiav Dim 17:8–16; 18:13–26, thiab saib seb tus Tswv qhia koj dab tsi txog Nws txoj hauj lwm.

Kuj saib Mauxiyas 4:27; 18:8–9.

Yog xav tau ntxiv, saib tej phau xov xwm Liyahaunas thiab Ntxiv Dag Zog rau cov Tub Hluas Ntxhais Hluas rau lub hli no.

Tej Tswv Yim Pab Qhia cov Me Nyuam

Khiav Dim 14:5–22

Tus Tswv ua tau tej hauj lwm “tseem ceeb” hauv kuv lub neej.

Thaum tus Tswv muab tus Dej Hiav Txwv Liab faib ua ob sab, Mauxes thiab haiv neeg Ixayees pom tias Nws muaj hwj chim npaum li cas. Cia koj cov me nyuam pab koj ntaus tswv yim seb yuav ua yeeb yam li cas txog zaj dab neeg hauv Khiav Dim 14:5–22 (kuj saib “Kev Cai Hlau Dhau” hauv Cov Dab Neeg hauv Phau Qub, 70–74). Tej zaum koj mam li teeb ob peb lub rooj zaum los sis pua ib daim pam thiab “muab faib” rau ob sab zoo li tus Dej Hiav Txwv Liab. Ces koj mam li ib leeg qhia ib leeg seb nej tau pom Vajtswv lub hwj chim li cas hauv nej lub neej.

2:54
The Passover
Dab tsi hauv Lus Qhuab Qhia thiab Kev Khi Lus 8:2–3 qhia peb ntxiv txog zaj dab neeg hauv Khiav Dim 14? Sim seb puas tsim nyog qhia koj cov me nyuam txog ib lub sij hawm thaum tus Vaj Ntsuj Plig Dawb Huv qhia koj ib yam dab tsi hauv koj lub paj hlwb los sis lub siab, thiab caw lawv los qhia txog tej yam uas lawv tau txais yav tas los lawm thiab. Koj kuj hu tau ib zaj nkauj txog tus Vaj Ntsuj Plig Dawb Huv, zoo li “Cia tus Ntsuj Plig Dawb Huv Coj” (Cov Nkauj Qhuas Vajtswv, zaj 58).

Khiav Dim 15:22–25

Tus Tswv txawj ua rau tej yam iab hloov ua qab zib.

Tej zaum koj thiab koj cov me nyuam yuav xav haus ib yam qab zib thiab ib yam iab thaum nej tab tom kawm txog Khiav Dim 15:22–25 ua ke. Tus Cawm Seej ua li cas thiaj kom tej yam “iab” hauv peb lub neej uas ib yam “qab zib”?

Khiav Dim 15:23–25; 16:14–15; 17:1–6

Yexus yog kuv cov Dej uas Cawm Txoj Sia, kuv cov Mov Mog Muab Sia Nyog, thiab kuv lub Pob Zeb.

Thaum koj thiab koj cov me nyuam nyeem Khiav Dim 15:23–25; 16:14–15; 17:1–6, cia lawv pab koj nrhiav tej yam khoom uas pab qhia txhua zaj dab neeg—zoo li ib ceg ntoo (uas kho cov dej Malas), ib hwj los sis lauj kaub (uas tso cov manas rau hauv), thiab ib lub pob zeb (rau cov dej Haulenpes). Tej dab neeg no qhia peb dab tsi txog tej uas Yexus ua rau peb? Thaum nej sib tham, tej zaum koj yuav xav nyeem Mathais 7:24–27; Yauhas 4:10–14; 6:29–35, 48–51; Hilamas 5:12; Lus Qhuab Qhia thiab Kev Khi Lus 20:77, 79.

daim duab txog Mauxes, Aloos, thiab Hules — Ib tug Sawv Ntawm Vajtswv, los ntawm Joseph Brickey (ib feem)

Khiav Dim 17:8–16; 18:13–26

Kuv muaj cuab kav pab “ev lub nras” uas yog khiav tus Tswv txoj hauj lwm.

Thaum koj tab tom nyeem Khiav Dim 17:8–16, koj mam li caw ib tug me nyuam tsa nws ob txhais tes kom siab. Thaum tus me nyuam peb nkees, lwm cov me nyuam mam li los pab nws, ib yam li Aloos thiab Haws pab Mauxes. Zaj dab neeg no qhia dab tsi seb peb yuav ua li cas thiaj pab tau Vajtswv lub nceeg vaj yuav huaj vam? Koj kuj nyeem tau Khiav Dim 18:13–26 thiab tham txog tej ntiag tug hauj lwm hnyav uas cov neeg hauv koj pawg ntseeg ua kom thiaj ua tau lawv tej hauj lwm. Niaj hnub no peb yuav ua li cas thiaj pab tau peb lub Koom Txoos cov thawj coj, ib yam li Aloos thiab Haws pab tus yaj saub Mauxes?

Yog xav tau ntxiv, saib phau xov xwm Phooj Ywg rau lub hli no.

Mauxes faib tus Dej Hiav Txwv Liab — Hla tus Dej Hiav Txwv Liab, los ntawm Otto Semler

Lub Koom Haum Me Nyuam Yaus phab ntawv ntxim ua: Tus Tswv ua tau ib “txoj hauj lwm tseem ceeb” hauv kuv lub neej — Hla tus Dej Hiav Txwv Liab, los ntawm Otto Semler