Plaub Hlis Ntuj 27–Tsib Hlis Ntuj 3. ‘Kev Dawb Huv rau tus Tswv: Khiav Dim 35–40; Levis Kev Cai 1; 4; 16; 19,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

Plaub Hlis Ntuj 27–Tsib Hlis Ntuj 3. ‘Kev Dawb Huv rau tus Tswv,’” Los, Nrog Kuv Mus: Phau Qub 2026

Lub Tuam Tsev Rio de Janeiro Brazil

Plaub Hlis Ntuj 27–Tsib Hlis Ntuj 3: “Kev Dawb Huv rau tus Tswv”

Khiav Dim 35–40; Levis Kev Cai 1; 4; 16; 19

Kev khiav tawm ntawm Iyiv Teb—yeej yog ib qhov uas tseem ceeb—tiam sis tsis yog tag nrho Vajtswv lub hom phiaj rau cov neeg Ixayees. Ib lub neej uas xis nyob nyob hauv thaj av uas cog lus cia tsis yog Vajtswv lub hom phiaj loj tshaj plaws rau lawv. Tej yam no pab lawv mus ze qhov uas Vajtswv xav tau rau Nws cov neeg: “Nej yuav tsum ua neeg dawb huv: rau qhov kuv yog tus Tswv uas yog nej tus Vajtswv, kuv yog tus dawb huv” (Levis Kev Cai 19:2). Vajtswv yuav pab Nws cov neeg dawb huv li cas tom qab lawv raug poob cev qhev ntau tiam neeg lawm? Nws tau txib lawv kom lawv tsim ib qhov chaw dawb huv nyob hauv roob moj sab qhua—ib lub tuam tsev ntaub. Nws muab kev khi lus thiab tej kev cai rau lawv kom pab lawv ua zoo thiab hloov lawv lub siab. Thiab Nws txib lawv kom lawv muab tsiaj tua ua kev txi qhia lawv txog kev theej txhoj rau lawv tej kev txhaum. Tag nrho tej no yuav ua rau lawv muab siab npuab tus Cawm Seej thiab tsom ntsoov rau Nws. Nws yog txoj kev dawb huv tiag tiag, rau cov neeg Ixayees thiab rau peb. Peb sawv daws twb muaj tej lub sij hawm thaum peb tau raug kev poob cev qhev ntawm kev txhaum, thiab Vajtswv tau caw peb sawv daws kom tsis txhob ua kev txhaum ntxiv lawm thiab coj raws li Yexus Khetos, tus uas cog lus tias, “Kuv muaj peev xwm ua kom nej dawb huv” (Lus Qhuab Qhia thiab Kev Khi Lus 60:7).

Yog xav nyeem ib zaj lus piav txog phau Levis Kev Cai, saib “Levis Kev Cai” nyob hauv Phau Qhia txog Vaj Lug Kub.

Tej Tswv Yim Pab Qhia hauv Tsev thiab lub Koom Txoos

Khiav Dim 35–40; Levis Kev Cai 19

Tus Tswv xav kom kuv los ua neeg dawb huv.

Khiav Dim 35–40 qhia txog cov neeg Ixayees tej kev siv zog ua ib lub tuam tsev ntaub, kom thiaj li ua tau cov kab ke dawb ceev uas yuav pab lawv los ua ib cov neeg dawb huv. Thaum koj nyeem tej tshooj no, nyeem seb tus Tswv tau hais kom nws cov neeg muab tej khoom dab tsi tso rau hauv lub tuam tsev ntaub. Tej khoom no piv txog dab tsi? Tej no qhia dab tsi rau koj txog txoj kev muaj kev dawb huv zuj zus ntxiv? Qhov tseem ceeb cia li xav seb tej khoom no yuav pab koj xav txog tus Cawm Seej. Ib daim phiaj zoo li no tej zaum yuav pab tau koj:

Koj nrhiav tau khoom dab tsi?	Qhov no piv txog dab tsi?
Koj nrhiav tau khoom dab tsi? Lub phij xab rau kev khi lus(Khiav Dim 37:1–9; 40:20–21)	Qhov no piv txog dab tsi? (Saib Khiav Dim 25:20–22; Saib Phau Qhia txog Vaj Lug Kub, “Lub Phij Xab rau Kev Khi Lus”)
Koj nrhiav tau khoom dab tsi? Lub thaj uas hlawv hmoov tshuaj tsw qab (Khiav Dim 40:26–27; kuj saib Khiav Dim 30:1, 6–8)	Qhov no piv txog dab tsi? (Saib Tshwm Sim 8:3–4).
Koj nrhiav tau khoom dab tsi? Tus ncej uas txawb teeb (Khiav Dim 37:17–24)	Qhov no piv txog dab tsi? (Saib Mathais 5:14–16; Yauhas 8:12)
Koj nrhiav tau khoom dab tsi? Lub thaj uas hlawv hmoov tshuaj tsw qab (Khiav Dim 38:1–7; kuj saib Khiav Dim 27:1; 29:10–14)	Qhov no piv txog dab tsi? (Saib Phau Qhia txog Vaj Lug Kub, “Kev Txi”)
Koj nrhiav tau khoom dab tsi? Lub phiaj rau dej (Khiav Dim 30:17–21)	Qhov no piv txog dab tsi? (Saib 2 Xwm Txheej Vaj Ntxwv 4:6; Yaxayas 1:16; Yelemis 33:8)

Txoj kev nyob hauv tej qhov chaw dawb huv tsis ua rau peb dawb huv. Levis Kev Cai 19 qhia tej kev cai thiab cov lus txib uas tus Tswv muab kom pab cov neeg Ixayees muaj kev dawb huv zuj zus ntxiv. Koj nrhiav tau dab tsi los ntawm tej lus txib no uas pab tau koj nrhiav kev dawb huv los ntawm tus Tswv? Koj txais kev tshoov siab ua dab tsi kom ua raws nraim li tej lub ntsiab cai no?

Kuj saib Henry B. Eyring, “Kev Ua Dawb Huv thiab txoj Hau Kev Zoo Siab,” Liyahaunas, Kaum Ib Hlis Ntuj. 2019, 100–103; “The Tabernacle” (vidi-aus), Txoj Moo Zoo cov Ntawv.

Siv cov nkauj dawb ceev. Cov nkauj muaj hwj chim loj caw tus Ntsuj Plig los thiab pab muaj kev ntseeg Yexus Khetos ntxiv. Tej zaj lus hauv cov nkauj qhuas Vajtswv ntau zaus qhia txog tej lus qhuab qhia nyob hauv cov vaj lug kub. Piv txwv hais tias, hu ib zaj nkauj xws li “Pab Kuv Ua Dawb Huv Ntxiv” (Cov Nkauj Qhuas Vajtswv, zaj 49) kom pab qhia txog tej zaj lus nyob hauv Levis Kev Cai 19. Qhov ntawd kuj pab tau koj xav txog seb kev hloov los ua neeg dawb huv ntxiv ib yam li tus Cawm Seej txhais li cas thiab xav seb Nws pab koj li cas kom muaj kev dawb huv ntxiv.

Khiav Dim 35:4–35; 36:1–7

Tus Tswv hais kom kuv txaus siab muab kuv tej yam txi.

Lub xyoo tom qab tawm ntawm Iyiv teb chaws, muaj tej lub sij hawm uas cov neeg Ixayees mloog Yehauvas lus thiab muaj tej lub sij hawm lawv tsis mloog. Tiam sis thaum koj nyeem Khiav Dim 35:4–35 thiab 36:1–7, nyeem seb cov neeg Ixayees teb li cas rau txoj lus txib kom ua ib lub tuam tsev ntaub. Koj kawm dab tsi los ntawm cov neeg Ixayees uas pab tau koj ua hauj lwm rau tus Tswv zoo dua ntxiv?

Tej zaum Nws yuav tsis hais kom koj muab tej yam hlau muaj nuj nqis, tej ntaub, los sis ntoo ua ib lub tuam tsev ntaub. Tus Tswv tau muab dab tsi rau koj thiab Nws nug kom koj ua dab tsi rau Nws? Thaum twg koj tau “txaus siab pab tuaj”?

Kuj saib Tej Ntsiab Lus thiab tej Lus Nug, “Kev Txi,” Txoj Moo Zoo cov Ntawv.

Cov neeg Ixayees sau lawv tej kev hlawv tsiaj los rau lub tuam tsev ntaub — Cov neeg Ixayees muab tej kev hlawv tsiaj rau lub tuam tsev ntaub nrog “kev txaus siab ua” (Khiav Dim 35:5). Daim duab los ntawm Corbert Gauthier, © Lifeway Collection/tau txoj cai los ntawm goodsalt.com

Khiav Dim 40:12–14

Cov kab ke thiab tej kev khi lus ntawm lub tuam tsev los muab puag thaum ub.

Khiav Dim 40:12–14 qhia txog cov kab ke puag thaum ub uas tseem ua lub caij nyoog no nyob hauv tus Tswv lub tsev. Ntawm no yog tej nqe ntxiv uas pab tau koj kawm txog seb tej kab ke no ua tim khawv li cas txog Yexus Khetos:

Kev ntxuav: Phau Ntawv Nkauj 51:2; Exekees 36:25–27
Hnav cev tsoos tsho dawb huv: Yaxayas 61:10; Mathais 22:11–14; Tshwm Sim 19:7–8
Kev cai pleev roj: Lukas 4:18–19; Tes Hauj Lwm 10:38

Levis Kev Cai 1:1–9; 4; 16

Vim Yexus Khetos tau theej txhoj lawm, kuv txais tau kev zam txim.

Phau ntawv Levis Kev Cai feem ntau txawv rau peb to taub—kev muab tsiaj txi, tej kab lig kev cai nrog ntshav thiab dej, thiab tej kev cai kav ntau yam hauv lub neej. Tiam sis tej kab lig kev cai thiab tej kev cai no pab qhia tej ntsiab cai uas lawv twb paub lawm—kev hloov siab lees txim, kev dawb huv, thiab tus Cawm Seej txoj Kev Theej Txhoj. Kom nrhiav tau tej ntsiab cai no thaum koj nyeem Levis Kev Cai 1:1–9; 4; 16, xav txog tej lus nug zoo li no:

Kuv nrhiav tau tej lus los sis tej nqe twg uas pab kuv nco txog Yexus Khetos thiab Nws txoj kev theej txhoj?
Kuv kawm dab tsi los ntawm tej kev txi no txog tus Cawm Seej txoj kev txi?
Kuv zoo li cas thiaj li zoo li cov neeg uas tau ua tej kev txi no?

Tus Tswv tsis txais tsiaj tua ua kev txi ntxiv lawm. Tiam sis kev txi tseem yog ib lub ntsiab cai uas tseem ceeb heev hauv txoj moo zoo. Kom kawm seb tus Tswv xav txais tej kev txi dab tsi, nyeem 3 Nifais 9:19–20; Lus Qhuab Qhia thiab Kev Khi Lus 64:34. Koj ua li cas kom muab tej kev txi no rau Vajtswv? Mauxes 5:7 qhia koj dab tsi txog seb koj yuav tsum saib koj tej kev txi li cas?

Kuj saib “Tej Yam Ntxim Xav Txog: Lub Tuam Tsev Ntaub thiab Kev Txi.”

Tej Tswv Yim Pab Qhia cov Me Nyuam

Khiav Dim 35:20–29; 36:1

Vajtswv tau muab tej txiaj ntsim rau kuv kom pab Nws txoj hauj lwm.

Nyob hauv tus txheej txheem qhia no muaj ib daim duab txog cov neeg Ixayees lub tuam tsev ntaub nyob hauv roob moj sab qhua. Tej zaum koj yuav xav saib nrog koj cov me nyuam thiab nug lawv seb cov neeg Ixayees yuav siv tej yam dab tsi ua lub tuam tsev ntaub. Ces nej nyeem tau Khiav Dim 35:20–29 ua ke kom saib seb lawv nrhiav tej yam no qhov twg los. Tus Tswv tau caw peb ua li cas kom pab txhim tsa Nws lub nceeg vaj?
Xav seb puas nyeem Khiav Dim 36:1 nrog koj cov me nyuam kom nrhiav seb tus Tswv muab dab tsi rau Npexalees thiab Auhauli-as kom pab nkawd txhim tsa lub tuam tsev ntaub. Ces tej zaum koj yuav xav nrog koj cov me nyuam tham txog tej yam uas koj xav tias tus Tswv tau muab rau lawv kom pab txhim tsa Nws lub nceeg vaj. Peb yuav siv tej yam no li cas kom foom koob hmoov rau lwm tus?

Khiav Dim 40:17–34

Kuv hnov tau tus Tswv nyob hauv tej chaw dawb huv.

Khiav Dim 40:17–34 sau tej yam uas nyob hauv cov neeg Ixayees lub tuam tsev ntaub. Tej zaum koj thiab koj cov me nyuam yuav xav nrhiav tej ntawd nyob hauv tej nqe no thiab hauv daim duab txog lub tuam tsev ntaub uas nyob hauv tus txheej txheem qhia no. Sib tham txog tej yam hauv lub tuam tsev ntaub uas qhia txog tus Cawm Seej los sis Leej Txiv Saum Ntuj Ceeb Tsheej. Piv txwv tias, lub phij xab uas ntim Vajtswv tej lus cog tseg pab peb nco qab Vajtswv tej lus txib, lub thaj kuj pab peb nco qab txog Yexus Khetos txoj kev txi, thiab li ntawd.
Hnub no peb muaj tej chaw dawb huv qhov twg uas pab peb muab siab npuab Yexus Khetos? Thaum nej sib tham txog tej no, tej zaum koj yuav xav saib qhov vidi-aus “Temples” (Txoj Moo Zoo cov Ntawv) ua ke. Tej zaum nej kuj yuav xav hu ib zaj nkauj xws li “Holy Places” (Txoj Moo Zoo cov Ntawv). Qhia tias nej xav li cas txog tej qhov chaw dawb ceeb xws li lub tuam tsev.

Levis Kev Cai 1:1–4

Vim Yexus Khetos tau theej txhoj lawm, kuv txais tau kev zam txim.

Tej kev muab tsiaj tua ua kev txi hauv Phau Qub twb yog kom qhia cov neeg Ixayees txog txoj kev zam txim los ntawm Yexus Khetos. Xav seb kev nyeem txog tej kev txi no kuj yuav ua li ntawd rau koj cov me nyuam ib yam thiab. Tej zaum koj yuav xav muab cov duab txog Yexus Khetos thaum Nws nyob hauv Khexemanes thiab saum tus ntoo khaub lig rau lawv saib (saib Phau Muaj Duab txog Txoj Moo Zoo, najnpawb 56, 57) thaum koj nrog koj cov me nyuam nyeem Levis Kev Cai 1:1–4. Pab lawv nrhiav tej lus los sis tej nqe uas pab lawv nco qab txog Yexus Khetos txoj kev txi.
Tej zaum nej yuav xav nyeem 3 Nifais 9:19–20 ua ke kom nrhiav seb peb tau txais kev txib kom yuav tsum siv dab tsi rau kev txi es tsis txhob siv cov tsiaj. Muaj ib lub siab mob thiab lub siab xav ua zoo rau tus Tswv txhais li cas? Saib Phau Qhia txog Vaj Lug Kub, “Siab Mob” (Txoj Moo Zoo cov Ntawv) kom pab teb lo lus nug no.

Yog xav tau ntxiv, saib phau xov xwm Phooj Ywg rau lub hli no.

lub tuam tsev puag thaum ub — Lub Tuam Tswv Puag Thaum Ub, los ntawm Bradley Clark

Lub Koom Haum Me Nyuam Yaus phab ntawv ntxim ua: Kuv hnov tau tus Tswv hauv tej qhov chaw dawb huv — Lub Tuam Tswv Puag Thaum Ub, los ntawm Bradley Clark