Teev Npe 11–14; 20–24; 27

Nyob hauv Teev Npe 11:11–17, 24–29, ua zoo saib Mauxes muaj teeb meem dab tsi thiab saib Vajtswv yuav pab kho li cas. Koj xav hais tias Mauxes txhais li cas thaum nws hais tias kheev lam tag nrho tus Tswv cov neeg yuav ua cov yaj saub? (saib nqe 29). Thaum koj xav txog lo lus nug no, nrhiav kom tau lus teb hauv Thawj Tswj Hwm Russell M. Nelson zaj lus “Kev Tshwm Sim rau lub Koom Txoos, Kev Tshwm Sim rau Peb lub Neej” (Liyahaunas, Tsib Hlis Ntuj 2018, 93–96).

Txawm yog li ntawd, hais tias peb txhua tus txais tau kev tshwm sim tsis txhais tau tias peb txhua tus coj tau Vajtswv cov neeg ib yam li Mauxes coj. Qhov uas muaj los hauv Teev Npe 12 qhia txog qhov no yam meej meej li. Koj nrhiav tau tej lus ceeb toom dab tsi nyob hauv tshooj no? Koj xav hais tias tus Tswv xav kom koj to taub dab tsi txog kev tshwm sim rau yus tus kheej thiab txog kev ua raws li Nws tus yaj saub?

Kuj saib 1 Nifais 10:17; Lus Qhuab Qhia thiab Kev Khi Lus 28:1–7; Dallin H. Oaks, “Two Lines of Communication,” Liyahaunas, Kaum Ib Hlis Ntuj 2010, 83–86.

Ib txhia neeg xav tsis thoob thaum lawv kawm tias Mauxes, tus thawj coj muaj zog uas sawv rau ntawm Falaus lub xub ntiag thiab siv tus Tswv lub hwj chim ua tej txuj ci tseem ceeb, kuj yog ib tug neeg “txo hwj chim heev” (Teev Npe 12:3). Ua ib tug neeg siab mos siab muag txhais li cas? Xav saib puas kawm Txwj Laug David A. Bednar qhov kev piav txog hauv “Muaj lub Siab Mos Siab Muag thiab Txo Siab Txo Ntsws” (Liyahaunas, Tsib Hlis Ntuj 2018, 30–33) or “Siab Mos Siab Muag, Kev Muaj Siab Mos Siab Muag” nyob hauv Phau Qhia txog Vaj Lug Kub (Txoj Moo Zoo cov Ntawv).

Koj kawm dab tsi los ntawm Mauxes tus yam ntxwv ua neeg siab mos siab muag hauv Khiav Dim 18:13–25; Teev Npe 11:26–29; Teev Npe 12; Henplais 11:24–27; thiab Mauxes 1:10–11? Tej zaum koj xav txog saib tus Cawm Seej ua ib tug neeg siab mos siab muag li cas (saib Mathais 11:29; 27:11–14; Lukas 22:41–42; Yauhas 13:4–5). Tej tug yam ntxwv no qhia koj dab tsi?

Thaum koj nyeem Teev Npe 13–14, sim xav hais tias koj yog ib tug neeg Ixayees. Yog vim li cas lawv xav “rov qab mus nram teb chaws Iyiv”? (Teev Npe 14:3). Koj yuav piav hais tias “lub siab” Kalej muaj yog dab tsi? (Teev Npe 14:24). Koj txais kev tshoov siab li cas txog Kalej thiab Yausuas txoj kev ntseeg, thiab koj yuav ua li cas siv nkawd ob tug yam ntxwv pab koj hauv koj lub neej?

Cov yaj saub hauv Phau Ntawv Maumoos paub zaj dab neeg uas muaj hauv Teev Npe 21:4–9 thiab to taub yog vim li cas thiaj tseem ceeb rau sab ntsuj plig. Nyeem lawv cov lus qhia txog zaj dab neeg no hauv 1 Nifais 17:40–41; Amas 33:18–22; thiab Hilamas 8:13–15. Nov yog tej lus nug rau koj xav txog thaum koj kawm:

• Tus nab tooj txhais tau li cas?

• Qhov uas nab tom lawv txhais tau li cas?

• Cov neeg Ixayees yuav tsum “[saib] tus nab tooj” (Teev Npe 21:9) thiaj yuav zoo mob. Yog vim li cas ib txhia neeg tsis kam saib li? Puas muaj ib yam dab tsi zoo li ntawd raug rau koj?

• Koj tau tej kev tshoov siab li cas saib koj yuav “muaj siab ntseeg saib Vajtswv tus Tub” thiab zoo mob ntau dua? (Hilamas 8:15).

Tej zaum thaum koj nyeem tej nqe vaj lug kub no yuav ua rau koj xav txog lwm lub sij hawm hauv cov vaj lug kub thaum cov neeg yuav tsum tsom ntsoov Khetos. Piv txwv hais tias, muab lub ntsiab lus ntawm Teev Npe 21:4–9 piv rau Mathais 14:25–31 thiab 1 Nifais 8:24–28 (kuj saib cov duab nyob ntawm tus txheej txheem qhia no qhov kawg). Muaj dab tsi uas coj peb mus nrug deb ntawm Khetos? Nws ua li cas foom koob hmoov rau cov neeg uas tsom ntsoov Nws?

Kuj saib “Yexus, Thaum Kuv Tsuas Xav txog Koj” (Cov Nkauj Qhuas Vajtswv, zaj 56).

Thaum Npalaj, tus vaj ntxwv ntawm Mau-am, kawm tias cov neeg Ixayees tab tom tuaj ze, nws hu kom Npala-as, ib tug neeg uas muaj peev xwm foom koob hmoov thiab foom phem, tuaj rau nws. Npalaj xav kom Npala-as foom phem rau cov neeg Ixayees. Ua zoo saib Npalaj ua li cas sim yaum kom Npala-as ua raws li nws xav (saib Teev Npe 22:5–7, 15–17), thiab xav txog tej kev ntxias uas tej zaum koj ntsib kom ua tsis raws li Vajtswv lub siab nyiam. Koj txais kev tshoov siab dab tsi txog Npala-as cov lus teb hauv Teev Npe 22:18, 38; 23:8, 12, 26; 24:13? Ntxim tu siab, nyob nyob Npala-as nyoo thaum kawg thiab ntxeev siab rau Ixayees (saib Teev Npe 31:16; Yudas 1:11). Cia li xav saib koj yuav ua li cas ua ruaj nrees muaj siab ntseeg tus Tswv txawm tias lwm tus neeg yaum kom koj tsis ua li ntawd.

• Nug koj cov me nyuam saib lawv puas nco qab txog tus Tswv tej txuj ci tseem ceeb uas pab cov neeg Ixayees (saib “Tej Kev Foom Phem rau Iyiv Teb” thiab “Kev Cai Hla Dhau” nyob hauv Cov Dab Neeg hauv Phau Qub, 67–74). Ces koj mam li tshab xyuas zaj lus hauv Teev Npe 11:4–10, thiab qhia lawv hais tias cov neeg Ixayees tsis nco qab txog lawv tej koob hmoov thiab tab tom yws yws. Qee zaum peb tsis nco qab txog tej koob hmoov twg?

• Thaum koj hu nkauj los sis mloog ib zaj nkauj txog kev ris Vajtswv txiaj, xws li “Suav Nej cov Koob Hmoov Ntau” (Cov Nkauj Qhuas Vajtswv, zaj 112), koj cov me nyuam kos tau duab txog tej koob hmoov uas tus Tswv tau muab pub rau lawv.

• Kom pib qhia txog Teev Npe 12, koj qhia tau koj cov me nyuam hais tias tus Tswv tsis zoo siab rau Aloos thiab Milias, Mauxes tus tij laug thiab tus muam. Caw lawv nyeem Teev Npe 12:1–8 kom paub yog vim li cas. Xav saib puas siv Phau Muaj Duab txog Txoj Moo Zoo kom pab koj cov me nyuam nrhiav tau yam ntxwv txog cov neeg hauv cov vaj lug kub uas saib tus Tswv tus yaj saub rau nqi thiab tau koob hmoov. Peb tau koob hmoov li cas thaum peb ua raws li tus Tswv tus yaj saub?

• Koj siv tau “Mauxes thiab tus Nab Tooj” hauv Cov Dab Neeg hauv Phau Qub, 83–84, kom pab koj cov me nyuam kawm saib tau muaj dab tsi los hauv Teev Npe 21:6–9. Tus nab tooj zoo li Yexus Khetos li cas? (saib Yauhas 3:14–15). Tej zaum koj cov me nyuam yuav nyiam muab ntawv los ua ib tug nab thiab sau rau daim ntawv ntawd ob peb yam lawv ua tau kom “ntsia Vajtswv Leej Tub nrog txoj kev ntseeg” (Hilamas 8:15).

  

  1:2

• Cov me nyuam hlob xaiv tau ib nqe vaj lug kub ntawm tej nqe vaj lug kub nram qab no thiab qhia saib nws pab lawv to taub zaj dab neeg zoo dua li cas: 1 Nifais 17:41; Amas 33:18–20; Hilamas 8:13–15; Lus Qhuab Qhia thiab Kev Khi Lus 6:36.

• Tshab xyuas Teev Npe 22:1–18 rau koj cov me nyuam, qhia saib Npala-as tsis kam foom phem rau Vajtswv haiv neeg, txawm hais tias Npalaj, tus vaj ntxwv ntawm Mau-as muab yeeb koob thiab nyiaj txiag pub rau nws. Ces koj pab tau koj cov me nyuam nrhiav tej nqe vaj lug kub nram qab no rau tej lus uas qhia tias Npala-as xav ua raws li Vajtswv hais: Teev Npe 22:18; 23:26; 24:13. Tej zaum koj cov me nyuam xaiv tau ib txoj kab lus uas lawv nyiam thiab sau rau hauv ib daim me nyuam ntawv kom pab tau lawv nco qab ua raws li tus Tswv hais.