Los, Nrog Kuv Mus
Tej Yam Ntxim Xav Txog: Tej Phau Keeb Kwm hauv Phau Qub

“Tej Yam Ntxim Xav Txog: Tej Phau Keeb Kwm hauv Phau Qub,” Los, Nrog Kuv Mus—Siv hauv Tsev thiab lub Koom Txoos: Phau Qub 2026 (2026)

“Tej Phau Keeb Kwm hauv Phau Qub,” Los, Nrog Kuv Mus: Phau Qub 2026

lub cim rau tej kev xav

Tej Yam Ntxim Xav Txog

Tej Phau Keeb Kwm hauv Phau Qub

Tej phau ntawv txij ntawm Yausuas mus rau Exethaws yog tej phau hu ua “tej phau keeb kwm” ntawm Phau Qub. Nov tsis yog hais tias lwm phau hauv Phau Qub tsis muaj tej keeb kwm nyob hauv thiab. Tiam sis, peb hu tej phau keeb kwm li ntawd vim cov uas sau tej phau ntawd lub hom phiaj yog kom qhia tias Vajtswv yog tus pab cov neeg Ixayees hauv lawv keeb kwm. Lub hom phiaj tsis yog kom qhia txog Mauxes txoj kev cai ib yam li Levis Kev Cai thiab 2 Kev Cai tau ua. Thiab tsis yog sau paj lug kom qhuas Vajtswv los sis quaj nyiav ib yam li Phau Ntawv Nkauj thiab Nkauj Quaj Ntsuag. Thiab tsis yog kom sau cov yaj saub tej lus ib yam li Yaxayas thiab Exekees tej phau ntawv. Tiam sis, tej phau keeb kwm qhia tej dab neeg.

Nyob ntawm Kev Xav

Tej dab neeg no yeej qhia raws li tus sau txoj kev xav. Ib yam li yus ntsia tau ib lub paj, lub pob zeb, los sis tus ntoo rau ib sab thaum ib lub sij hawm xwb, hauv ib zaj keeb kwm, koj yuav kawm txog ib tug neeg los sis ib pab neeg txoj kev xav uas sau zaj keeb kwm ntawd xwb. Cov uas sau tej zaj ntawd sau raws li lawv caj ceg thiab raws li tej yam lawv ua hauv lawv tej kev cai thiab tej kev ntseeg. Kev paub li no yuav pab peb to taub tias cov uas sau tej phau keeb kwm sau tej yam uas tseem ceeb rau lawv thiab tsis sau tej uas tsis tseem ceeb rau lawv. Lawv xav txog tej yam uas lwm tus yuav tsis xav. Thiab lawv tau txiav txim siab los ntawm tej yam xav thiab tej yam lawv pom xwb. Peb kuj pom ntau yam kev xav sib txawv thoob plaws tej phau nyob hauv phau Vaj Lug Kub Npaivnpaum (thiab tej lub sij hawm nyob hauv ib phau). Thaum peb to taub tias muaj ntau yam kev xav li no, yuav pab peb to taub tej phau keeb kwm zoo ntxiv.

Ib txoj kev xav uas tag nrho cov neeg hauv Phau Qub tej phau ntawv keeb kwm muaj yog txoj kev xav ntawm tsev neeg Ixayees, Vajtswv cov neeg khi lus. Lawv txoj kev ntseeg tus Tswv pab lawv pom Nws txoj kev pab nyob hauv lawv lub neej thiab hauv lawv lub teb chaws. Txawm yog tej phau sau zaj keeb kwm ntawm lub ntiaj teb no tsis xav txog tej yam no, txoj kev sau ntawv txog sab ntsuj plig yeej yog ib feem uas ua kom Phau Qub tej phau ntawv keeb kwm muaj nqis heev rau cov neeg uas xav txhawb lawv txoj kev ntseeg kom muaj zog.

Lub Hauv Paus rau Lwm Phau Ntawv hauv Phau Qub

Tej phau keeb kwm pib thaum phau 2 Kev Cai tas, thaum ntawd cov neeg Ixayees kev mus ub mus no hauv roob moj sab qhuas tau ntau xyoo twb yuav tiav lawm. Phau ntawv Yausuas qhia txog thaum tsev neeg Ixayees npaj yuav nkag teb chaws Kana-as, lawv thaj av uas tau cog lus cia lawm, thiab piav tias lawv tau ua li cas kom kov yeej thaj av ntawd. Tej phau ntawv tom qab, Cov Thawj Tswj mus txog 2 Xwm Txheej Vaj Ntxwv, qhia txog tej xwm txheej uas cov neeg Ixayees raug hauv thaj av uas tau cog lus cia lawm, txij thaum lub sij hawm lawv tau mus hauv thaj av ntawd mus txog thaum cov Neeg Axilias thiab Npanpiloos kov yeej lawv. Phau ntawv Exalas thiab Nehemis qhia txog tej pab neeg Ixayees uas rov qab los rau lawv lub nroog, Yeluxalees, ntau xyoo tom qab ntawd. Thaum kawg, phau ntawv Exethaws qhia ib zaj dab neeg txog cov neeg Ixayees thaum cov neeg Pawxias tau kav lawv.

Thiab keeb kwm raws caij nyoog ntawm Phau Qub xaus li ntawd. Ib txhia uas nyeem phau Vaj Lug Kub Npaivnpaum thawj zaug xav tsis thoob vim lawv twb nyeem zaj dab neeg ntawm Phau Qub tas lawm ua ntej lawv tau nyeem txhua phab ntawv ib nrab. Tom qab Exethaws, tsis muaj tej yam ntxiv txog cov Neeg Ixayees zaj keeb kwm. Tiam sis, tej phau ntawv tom qab—qhov tseem ceeb yog cov yaj saub tej phau ntawv—yeej haum lub sij hawm uas tej phau keeb kwm tau qhia peb. Ua piv txwv, tus yaj saub Yelemis txoj hauj lwm qhuab qhia twb yog thaum sau tej xwm txheej nyob rau hauv 2 Vaj Ntxwv 22–25 (thiab lwm zaj hais txog qhov no nyob hauv 2 Xwm Txheej Vaj Ntxwv 34–36). Thaum koj paub li no yuav pab koj nyeem tej phau keeb kwm thiab tej phau uas qhia txog cov yaj saub tej lus qhia.

Thaum Ib Yam Dab Tsi Tsis Haum

Thaum koj nyeem Phau Qub, ib yam li nyeem lwm zaj lus keeb kwm, koj yuav nyeem txog tej yam uas cov neeg ua los sis hais uas txawv heev rau peb hauv lub caij nyoog niaj hnub no. Yeej yuav muaj li no—cov uas sau ntawv hauv Phau Qub muaj ib txoj kev rau lawv saib lub ntiaj teb uas txawv ntawm tej yam peb xav. Kev sib ntaus sib tua, tej caj ceg txoj kev sib raug zoo, thiab tej yam uas poj niam ua tau kuj yog tej yam uas cov sau ntawv puag thaum ub tau xav txawv ntawm peb niaj hnub no.

Ces peb yuav tsum ua dab tsi thaum peb nyeem tej nqe hauv vaj lug kub uas ua rau peb ntxhov siab? Qhov tib ib, thaum nyeem txhua zaj tej zaum yuav pab koj yog koj xav txog lub ntiaj teb uas tib neeg nyob thaum ntawd. Zaj lus ntawd puas haum Vajtswv txoj hau kev cawm seej? Qhov ntawd puas haum tej yam uas koj paub txog Leej Txiv Saum Ntuj Ceeb Tsheej thiab Yexus Khetos tus cwj pwm? Qhov ntawd puas haum tej lus tseeb hauv lwm nqe vaj lug kub los sis cov yaj saub niaj hnub no tej lus qhia? Thiab qhov ntawd puas haum tus Ntsuj Plig tej lus ntxhi uas hais rau koj lub siab?

Tej lub sij hawm, yuav muaj tej nqe vaj lug kub uas tsis haum tej yam no tag nrho li. Tej lub sij hawm tej nqe yuav zoo li ib daim uas xav muab sib dhos ua ke tiam sis tsis muaj chaw nrog tej daim uas tau muab tso ua ke lawm. Kev yuam kom muab daim ntawd sib dhos ua ke yeej tsis yog ib yam uas yuav pab. Thiab koj kuj tsis tas muab daim duab tag nrho tso pov tseg thiab. Tiam sis, tej zaum koj yuav tsum muab ib daim tso rau ntawm ib sab rau ib lub sij hawm. Ces thaum koj kawm ntxiv thiab muab tej daim duab sib dhos ua ke ntxiv, koj yuav nkag siab tias yuav tsum muab tej daim ntawd tso rau qhov twg.

Kuj yuav pab yog tias koj nco qab tias tsis tas li ntawd xwb tej keeb kwm vaj lug kub tsis yog saib los ntawm ib txoj kev xwb tiam sis ntshe tib neeg sau ua yuam kev thiab. Piv txwv tias, Ib tiam dhau ib tiam, “ntau yam uas meej thiab muaj nuj nqis heev [tau raug] tshem tawm ntawm phau [Npaivnpaum],” tsis hais tej lus tseeb txog tej lus qhuab qhia, tej kab ke, thiab tej kev khi uas tseem ceeb heev (1 Nifais 13:28; kuj saib nqe 26, 29, 40). Tiam sis, peb yuav tsum txaus siab lees hais tias peb txoj kev saib yeej muaj ciaj ciam thiab; yeej muaj tej yam uas peb tsis to taub tag nrho thiab tej lus nug uas peb tseem tsis txawj teb.

ib tug muab tag nrho tej daim sib dhos ua ke

Muaj tej nqe hauv vaj lug kub uas zoo li tej daim uas yuav muab sib dhos ua ke es peb tsis paub yuav tso rau qhov twg hauv ib daim duab.

Nrhiav tej Yam uas Muaj Nqi

Tiam sis thaum peb tseem tos, peb yuav tsum tsis txhob cia tej lus nug uas tsis muaj lus teb cia peb tsis nrhiav tej lus tseeb uas muaj nqis nyob hauv Phau Qub—txawm yog tias tej lus muaj nqis no nyob hauv tej zaj uas ntxhov siab thiab los ntawm tej tib neeg tsis zoo tag nrho uas xaiv tej yam tsis zoo. Tej zaum tej lus muaj nqis tshaj yog tej dab neeg thiab tej nqe uas ua tim khawv txog Vajtswv txoj kev hlub—qhov tseem ceeb tshaj yog tej uas pab peb xav txog Yexus Khetos txoj kev txi. Txawm koj saib sab twg los, tej lus muaj nqis no ci ntsa iab hnub no ib yam li puag thaum ub. Thiab vim tej zaj no qhia txog Vajtswv cov neeg khi lus—txiv neej thiab poj niam uas muaj kev qaug zog tiam sis hlub thiab ua Tus Tswv txoj hauj lwm—tej phau keeb kwm hauv Phau Qub muaj tej lus tseeb uas muaj nqis heev thoob plaws haud.

pob ze uas muaj nqi

Lus Cim

  1. Tej phau keeb kwm ntawm Phau Npaivnpaum uas peb tau hnub no yog los ntawm cov neeg sau ntawv thiab cov muab ntawv sib sau ua ke uas peb tsis paub lawv npe, cov uas tej lub sij hawm tau sau ntau xyoo, ntau pua xyoo, tom qab tej yam uas lawv sau txog. Lawv nrhiav kev pab los ntawm ntau tej zaj keeb kwm thiab txiav txim siab seb yuav sau dab tsi rau lawv zaj thiab yuav tsis sau dab tsi.

  2. Piv txwv hais tias, txawm tias 1–2 Xwm Txheej Vaj Ntxwv qhia txog lub caij nyoog ib yam li 1 Xamuyees 31 mus txog 2 Vaj Ntxwv qhia txog los, zaj nyob hauv 1–2 Xwm Txheej qhia tej yam txawv me ntsis thiab qhia lwm yam, tsuas qhia txog Yudas lub Nceeg Vaj Nyob Sab Qab Teb xwb thiab tsis qhia txog tej zaj dab neeg uas hais txog Daviv thiab Xalumoos tej kev txhaum (ua piv txwv, muab 2 Xamuyees 10–12 piv rau 1 Xwm Txheej Vaj Ntxwv 19–20 thiab 1 Vaj Ntxwv 10–11 piv rau 2 Xwm Txheej Vaj Ntxwv 9). Los, Nrog Kuv Mus tsom ntsoov rau kev kawm zaj lus nyob hauv 1 thiab 2 Vaj Ntxwv, tiam sis yeej muaj nqis yog muab 1 thiab 2 Xwm Txheej Vaj Ntxwv piv rau ob phau ntawd thiab. Tej zaum yuav pab koj kom paub tias tej hauj lwm hauv 1 Xamuyees–2 Vaj Ntxwv tej zaum pib ua ntej lub teb chaws Npanpiloos tau kav Yudas thiab tau xaus thaum Npanpiloos tau kav lawv. Tiam sis tej zaj ua tau los ua 1–2 Xwm Txheej Vaj Ntxwv los muab sau los ua ke tom qab cov Neeg Yudais rov qab nkag rau hauv lawv lub nroog Yeluxalees tom qab lawv tau raug kav. Thaum koj nyeem, tej zaum koj yuav xav seb tej xwm txheej txawv ntawd tau ua li cas kom hloov cov neeg uas muab tej zaj lus ntawd sau los ua ke txoj kev xav.

  3. Thaum pib ntaub ntawv pab no koj nrhiav tau “Zaj Ntsiab Lus txog Phau Qub,” ib txoj kev qhia caij nyoog uas qhia tias txhua tus yaj saub ua tej hauj lwm qhuab qhia thaum twg hauv Ixayees zaj keeb kwm (zoo npaum li paub tau). Koj yuav pom tias ntau phau uas muaj cov yaj saub tej lus qhia nyob hauv Phau Qub nyob ntawm qhov kawg ntawm kev qhia caij nyoog—ua ntej thiab tom qab tsev neeg Ixayees raug kov yeej, raug ntiab mus, thiab raug lawv cov yeeb ncuab ua rau lawv tawg khiav ri niab.

  4. Saib Tej Nqe Kev Ntseeg 1:8.