Exodo 1–6

E aha te mea tā ’outou e fa’ahiahia nei nō ni’a i te mau vahine i fa’ata’ahia i roto te Exodo 1–2 ? Nāhea rātou i te tauturura’a nō te fa’atupu i te fa’anahora’a a te Atua nō tōna mau ta’ata ? E aha tā tā rātou mau tauto’ora’a e ha’api’i nei ia ’outou nō ni’a i te tāvinira’a i roto i te ’ohipa a te Atua ?

Hou ’outou ’a ha’amata ai i te tai’o i te Exodo, e nehenehe ’outou e feruri i te hō’ē fifi tā ’outou e fa’aruru nei—te hō’ē mea ’o tā ’outou e ti’aturi nei e fa’aora te Fatu ia ’outou. E aha te mau ta’o ’e te mau pereota i roto te Exodo 1–3 e tū’ati nei i te tītīra’a pae vārua ’aore rā i te tahi atu mau mea tā tātou e fa’aruru nei i teie mahana ? ’A hi’o ato’a nāhea te mau tamari’i a ’Īserā’ela i te ’imira’a i te fa’aorara’a ’e e mea nāhea tō te Fatu pāhonora’a mai (hi’o, ’ei hi’ora’a, Exodo 2:23–25 ; 3:7–8). Nāhea tō te Fatu « haerera’a mai e fa’aora » ia ’outou ?

I te roara’a o te buka a Exodo, e ’ite ato’a mai paha ’outou te tahi mau tū’atira’a i rotopū ia Mose ’e ia Iesu Mesia (hi’o Deuteronomi 18:18–19 ; 1 Nephi 22:20–21). ’Ei hi’ora’a, e aha te mau tū’atira’a tā ’outou e ’ite mai i rotopū te Exodo 1:22 ; 2:1–10 ’e Mataio 2:13–16 ? ’Aore rā i rotopū i te Exodo 24:18 ’e te Mataio 4:1–2 ? I tō ’outou mana’o e aha tā te Fatu e hina’aro ’ia māramarama ’outou nō ni’a iāna iho ’e tōna mana ?

E nehenehe ānei ’outou e feruri i te hō’ē taime ’a fa’a’ī ai te hō’ē mea ia ’outou i te mata’u ’e te māere ? Mai te aha tō ’outou huru ? Nāhea ’outou ’ia fa’ata’a mai i te mau ’ā’āina [’emotion] tā ’outou i putapū ?

Ma te tāpe’ara’a i te reira i roto i te ferurira’a, ’a tai’o Exodo 3:1–6. E aha tā ’outou e fa’ahiahia nei nō ni’a te ’itera’a fa’auruhia o Mose ? E aha tā Mose i rave nō te fa’a’ite i te fa’atura nō te Atua ? E aha te tū’atira’a tā ’outou e ’ite nei i rotopū i tāna mau ’ohipa ’e te fa’aturara’a nō te mau mea mo’a ?

E nehenehe te tai’ora’a i teie mau ’īrava e fa’auru ia ’outou ’ia feruri i te mau mea ’e te mau vāhi mo’a i roto i tō ’outou orara’a. Nō te aha e mea mo’a te reira nō ’outou ? Nāhea ’outou i te fa’ariro i te reira ’ei mea ta’a ’ē i te mau mea mātauhia ? Nō te arata’i i tō ’outou ferurira’a, e nehenehe ’outou e hi’o atu i te tuha’a tei pi’ihia « Ha’amana’ora’a i te mau parau fafau » i roto i te a’ora’a a Elder David A. Bednar « Te mau parau fafau rahi ’e te faufa’a rahi » (Liahona, Novema 2017, 91–93). E nehenehe ato’a ’outou e hīmene ’aore rā e fa’aro’o i te hō’ē hīmene ’o tē fa’auru i te fa’ahiahiara’a, mai te « Tē māere nei au » (Te mau Hīmene, N 111) ’e ’ia feruri e aha te mea e ha’amāere nei ia ’outou i roto i te ’evanelia.

’Oia mau, ’oia ato’a i te taime ’a ora ai tātou i te mau ’itera’a pae vārua fa’ahiahia, tē vai ra hō’ē fifi nō te tāu’a-’ore-ra’a tātou i te mau mea mo’a. Nāhea ’ia ’ape i te reira ? Teie e piti parau poro’i ’o tē parau nei nō te reira fifi ; ’a mā’iti hō’ē, ’e ’a ’imi mai i te mau fa’ahitira’a parau ’o tē tauturu ia ’outou : Ulisses Soares, « Ma te fa’ahiahia i te Mesia ’e i tāna ’evanelia », (Liahona, Mē 2022, 115–17) ; Gérald Caussé, « E mea fa’ahiahia ānei nō ’outou ? » (Liahona, Mē 2015, 98–100).

Hi’o ato’a Te Ha’api’ira’a Tumu ’e te mau Fafaura’a 6:10–12 ; 63:64.

I teie mahana tē ’ite nei tātou ia Mose ’ei hō’ē peropheta rahi ’e ’ei ti’a fa’atere. ’Aita rā Mose i hi’o iāna iho mai te reira te huru, ’a pi’i ai te Fatu iāna i te taime mātāmua ’A tai’o ai ’outou te Exodo 3–4, ’a tāpura i te mau māna’ona’ora’a o Mose ’e nāhea tō te Fatu pāhono-tāta’itahi-ra’a i te reira. E aha tā ’outou i ’ite mai i roto i teie mau pene ’o tē nehenehe e fa’auru ia ’outou i te taime ’a mana’o ai ’outou e’ita e ti’a ia ’outou ? E aha te taime ’a ’ite ai ’outou i te Atua i te hōro’ara’a mai te mana ia ’outou ’aore rā ia vetahi ’ē nō te rave i tāna ’ohipa ?

Hi’o ato’a « Tē hōro’a nei te ’Ēkālesia ia tātou i te mau rāve’a nō te tauturu i te ’ohipa a te Atua » i roto « Fa’anahora’a a te ’Ēkālesia » i roto Mau Tumu parau ’e te mau uira’a, Vaira’a buka ’evanelia.

E nehenehe te reira e riro ’ei ha’aparuparura’a ’ia ’ite ana’e i tā tātou mau tauto’ora’a mau nō te rave i te maita’i e au ra ’aita i manuia—’ia tāmata ana’e tātou i te rave i te hina’aro o te Fatu, ’aita rā tātou e ’ite ra i te mau hope’ara’a tā tātou i mana’o. Nō te ha’api’i mai nō ni’a i te hō’ē ā ’ohipa i tupu ia Mose, ’a tai’o te Exodo 5:4–9, 20–23. Nāhea te Fatu i te tauturura’a ia Mose ’ia upo’oti’a i ni’a i tōna mau tarapapera’a ? (hi’o Exodo 6:1–13). Nāhea tō te Fatu tauturura’a ia ’outou ’ia tāmau noa i te rave i tōna hina’aro ?

Hi’o ato’a Jeffrey R. Holland, « Tīa’ira’a i te Fatu », Liahona, Novema 2020, 115–17.

• E ’ohipa rahi tā Mose i rave i roto i te fa’aorara’a ia ’Īsera’ela i te fa’atītīra’a. Terā rā, e’ita e roa’a iāna ’ia rave i te reira ’āhiri ’aita tōna metua vahine, tōna tuahine matahiapo, te tamāhine a Phara’o, ’e te tahi atu mau vahine ha’apa’o maita’i i pāruru ’e i aupuru iāna. ’A tauturu i tā ’outou mau tamari’i ’ia ha’api’i mai nō ni’a i teie mau vahine i roto te Exodo 1:15–20 ; Exodo 2:2–10 (hi’o ato’a Nūmera 26:59) ; ’e Exodo 2:16–21. E nehenehe ato’a ’outou e fa’a’ohipa i te ’api ’ātivite nō teie hepetoma ’e « Te ’aiū Mose » (i roto Te mau ’ā’amu o te Faufa’a Tahito, 61–63) nō te fa’ati’a i tō rātou ’ā’amu. Nāhea teie mau vahine i te tauturura’a nō te fa’atupu i te fa’anahora’a a te Atua ? ’A paraparau i te tahi ’e te tahi nō te tahi atu mau ta’ata tā ’outou e fa’ahiahia nei, ’o tē tauturu nei i te ’ohipa a te Atua, ’oia ato’a ma te mau rāve’a ha’iha’i ’e te ’ōhie. Nāhea e ti’a ai ia tātou e peʼe i tō rātou hiʼoraʼa maitaʼi ?

  

  1:36

• I muri a’e i te tai’o-’āmui-ra’a te Exodo 3:1–5, ’a ani i tā ’outou mau tamari’i ’ia ha’apoto mai i teie mau ’īrava nā roto i tā rātou iho mau parau (hi’o ato’a « Mose te peropheta » i roto Te mau ’ā’amu o te Faufa’a Tahito, 64–66). Nāhea Mose i te fa’a’itera’a i te fa’atura i mua i te aro o te Fatu ? Nāhea te Fatu e hina’aro ai ’ia fa’a’ite tātou i te fa’atura ? E nehenehe ato’a ’outou e ani i tā ’outou mau tamari’i ’ia tauturu mai ia ’outou ’ia ’ite mai (’aore rā, ’ia pāpa’i hōho’a) i te mau hōho’a nō te mau vāhi ’aore rā te mau ’ātivite mo’a i reira tātou e fa’a’ite ai te fa’atura. E aha tā tātou e nehenehe e rave nō te fa’ariro i tō tātou ’utuāfare ’ei vāhi mo’a ?

  

  1:26

• ’A hīmene ’āmui i te hō’ē hīmene nō ni’a i te fa’atura, mai te « Le recueillement, c’est l’amour » (Chant pour les enfants,, 12). ’A nā reira ai ’outou, e ’ite mai paha tā ’outou mau tamari’i i te mau ta’o ’aore rā te mau pereota, ’o tē fa’ata’a nei e aha te aura’a ’ia vai fa’atura. Mai te mea e ’āfa’i mai ra tātou i te hō’ē hoa i te fare purera’a nō te taime mātāmua, nāhea tātou ’ia fa’ata’a i te aura’a ’ia vai fa’atura ?

• Ma te fa’a’ohipa i te tuha’a parau i roto te Exodo 3 ; 4:1–17, ’a vaiiho i tā ’outou mau tamari’i te tahi i muri mai i te tahi ’ia fa’ahua ’o Mose rātou. E mea ’ārearea paha te reira ’ia tu’u atu i te mau tao’a ’aore rā te mau ’ohipa ’ōhie, mai te hō’ē mōrī pata ’e te hō’ē tumu rā’au nō te fa’ahōho’a i te pū ’aihere auahi. ’A tauturu i tā ’outou mau tamari’i ’ia ’ite mai i te mea tā Mose i putapū nō ni’a i te fa’auera’a tā te Fatu i hōro’a iāna (hi’o Exodo 3:11 ; 4:1, 10). E nehenehe paha ’outou e fa’a’ite i te tahi ’e te tahi, i te mau taime ’a putapū ai ’outou i te hō’ē ā nīno’a mana’o. E aha te parau a’o tā tātou e hōro’a ia Mose nō te tauturu iāna ? ’A tai’o e mea nāhea tō te Fatu fa’aitoitora’a ia Mose i roto te Exodo 3:12 ; 4:2–9, 11–12. ’A parau i te mau tamari’i nāhea tō te Fa’aora tauturura’a ia ’outou ’ia rave fa’aoti i te hō’ē pi’ira’a, ’ia pe’e i te hō’ē muhumuhura’a, ’aore rā ’ia rave i te tahi atu ’ohipa e mea fifi nō ’outou.