Гэтлэл 1–6

Гэтлэл 1–2 дээр гарч буй эмэгтэйн юу нь таны анхаарлыг татсан бэ? Тэд Бурханд Өөрийн хүмүүст зориулсан төлөвлөгөөгөө биелүүлэхэд нь хэрхэн тусалсан бэ? Тэдний хичээл зүтгэл танд Бурханы ажилд үйлчлэх талаар юу заасан бэ?

Та Гэтлэл номыг уншиж эхлэхээсээ өмнө, Их Эзэн таныг чөлөөлнө гэж найдаж буй өөрийн даван туулж байгаа нэг бэрхшээлийн талаар бодож болох юм. Гэтлэл 1–3 дахь ямар ямар үг хэллэг өнөөдөр бидэнд тулгарч буй сүнслэг боолчлолтой эсвэл бусад зүйлтэй адил сонсогдож байна вэ? Түүнчлэн Израилын хүүхдүүд хэрхэн чөлөөлөлтийг эрэлхийлж, Их Эзэн хэрхэн хариулсныг анхаар (жишээ нь, Гэтлэл 2:23–25; 3:7–8-ыг үзнэ үү). Их Эзэн таныг “чөлөөлөхөөр хэрхэн бууж ирсэн бэ?”

Гэтлэл номоос та Мосе, Есүс Христ хоёрын зарим төстэй шинжийг олж харж болно (Дэд хууль 18:18–19; 1 Нифай 22:20–21-ийг үзнэ үү). Жишээлбэл: Гэтлэл 1:22; 2:1–10 болон Матай 2:13–16-аас та ямар төстэй зүйлсийг олж харсан бэ? Эсвэл Гэтлэл 24:18, Матай 4:1–2 дээр ямар төстэй зүйлс байна вэ? Их Эзэн танаас Өөрийнх нь тухай мөн Өөрийнх нь хүчний талаар юуг ойлгоосой хэмээн хүсэж байна гэж та бодож байна вэ?

Ямар нэгэн зүйлд гайхаж, бахдаж байсан үеэ та бодож чадах уу? Та хэрхэн хариу үйлдэл үзүүлсэн бэ? Та мэдэрсэн сэтгэл хөдлөлөө хэрхэн дүрслэх вэ?

Үүнийг бодож, Гэтлэл 3:1–6-г унш. Мосегийн сүнслэг туршлагын юу нь таныг гайхшируулдаг вэ? Мосе Бурханд хүндэтгэл бишрэлээ үзүүлэхийн тулд юу хийсэн бэ? Түүний үйлдэл, ариун нандин зүйлсэд хүндэтгэлтэй хандах хоёроос та ямар уялдаа холбоо харж байна вэ?

Эдгээр шүлгийг унших нь амьдралынхаа ариун зүйлсийн тухай болон ариун газруудын талаар бодоход тань түлхэц болж болох юм. Эдгээр нь танд яагаад ариун нандин байдаг вэ? Та эдгээрт нийтлэг зүйлсээс хэр өөр ханддаг вэ? Та тунгаан бодоход чиглүүлэхийн тулд ахлагч Дэвид А.Бэднарын “Үнэтэй бөгөөд гайхамшигт амлалтууд” (2017 оны 10-р сарын Ерөнхий чуулган, 87–90) хэмээх захиасны “Амлалтуудыг санах нь” гэсэн гарчигтай хэсгийг харж болно. Та нар бас “Би гайхширна” (Дуулал, 98) гэх мэт хүндэтгэл бишрэлийг төрүүлсэн дууллыг дуулж эсвэл сонсож, сайн мэдээний юу нь таны гайхширлыг төрүүлдэг тухай тунгаан бодож болно.

Мэдээж бидэнд гайхамшигт сүнслэг туршлага тохиолдсон байлаа ч ариун нандин зүйлсийг үл тоомсорлох аюул байсаар байдаг. Та үүнээс хэрхэн зайлсхийдэг вэ? Энэ асуудлыг хөндсөн хоёр захиасыг доор дурдсан бөгөөд нэгийг нь сонгон авч, өөрт туслах мэдэгдлийг хайж ол: Үлиссэс Соарэс, “Христийг болон Түүний сайн мэдээг бишрэн шүтэхүй” (Лиахона, 2022 оны 5-р сар, 115–117); Жэралд Коссэй, “Та нарын хувьд сайн мэдээ гайхамшигтай хэвээрээ байна уу?” (2015 оны 4-р сарын Ерөнхий чуулган, 86–88).

Мөн Сургаал ба Гэрээнүүд 6:10–12; 63:64-ийг үзнэ үү.

Өнөөдөр бид Мосег агуу бошиглогч, удирдагч гэдгийг мэддэг. Гэхдээ Мосе Их Эзэн түүнийг анх дуудахад өөрийгөө ийм байдлаар хараагүй. Гэтлэл 3–4-ийг уншихдаа Мосегийн санаа зовнилыг болон Их Эзэн хүн бүрд хэрхэн хандсаныг жагсаан бич. Та эдгээр бүлгээс өөрийгөө хангалтгүй хэмээн бодох үедээ таныг урамшуулах юуг олж мэдэх вэ? Бурхан Өөрийнх нь ажлыг хийхэд таныг эсвэл бусдыг хүчирхэгжүүлэхийг та хэзээ харж байсан бэ?

Бид Их Эзэний хүслийг биелүүлэхээр хичээж байгаа ч хүсэн хүлээсэн үр дүнгээ харахгүй байхад буюу бидний чин сэтгэлийн хүчин чармайлт үр дүнгээ өгөхгүй байгаа үед урам хугарч болно. Мосед тохиолдсон иймэрхүү туршлагын талаар мэдэж авахын тулд Гэтлэл 5:4–9, 20–23-ыг унш. Их Эзэн Мосед урам хугарсан мэдрэмжээ даван туулахад нь хэрхэн тусалсан бэ? (Гэтлэл 6:1–13-ыг үзнэ үү). Их Эзэн танд Өөрийнх нь хүслийг биелүүлэхэд тууштай байхад тань хэрхэн тусалсан бэ?

Мөн Жэффри Р.Холландын “Их Эзэнийг хүлээх” хэмээх захиасыг 2020 оны 10-р сарын Ерөнхий чуулган, х.128–130-аас үзнэ үү.

• Мосе Израилыг боолчлолоос гаргахад томоохон үүрэг гүйцэтгэсэн. Гэхдээ түүний ээж, эгч, Фараоны охин, мөн бусад итгэлтэй эмэгтэй түүнийг хамгаалж, асарч халамжлаагүй бол үүнийг гүйцэлдүүлж чадахгүй байх байсан. Гэтлэл 1:15–20; Гэтлэл 2:2–10 (мөн Тооллого 26:59-ийг үзнэ үү) болон Гэтлэл 2:16–21-ээс эдгээр эмэгтэйн тухай мэдэж авахад нь хүүхдүүддээ тусал. Та тэдний түүхүүдийг ярихдаа энэ долоо хоногийн үйл ажиллагааны хуудсыг болон “Нялх Мосе” (Хуучин Гэрээний түүхүүд, 61–63) хэсгийг ашиглаж болно. Эдгээр эмэгтэй Бурханы төлөвлөгөөг хэрхэн гүйцэлдүүлсэн бэ? Энгийн хийгээд жижиг арга замуудыг оролцуулаад Бурханы ажилд тусалж байгааг нь хүндэлж биширч явдаг хүмүүсийнхээ талаар бие биетэйгээ ярилц. Бид хэрхэн тэдний жишээг дагаж болох вэ?

  

  1:36

• Гэтлэл 3:1–5-ыг хамтдаа уншсаны дараа хүүхдүүдээсээ эдгээр шүлгийг өөрийнхөө үгээр тоймлон ярихыг хүс (Мөн Хуучин Гэрээний түүхүүд дэх “Бошиглогч Мосе” хэсгийг 64–66-р хуудаснаас үзнэ үү). Мосе Их Эзэний оршихуйд хэрхэн хүндэтгэл үзүүлсэн бэ? Их Эзэн биднээс хэрхэн хүндэтгэл үзүүлэхийг хүсдэг вэ? Та бас бидний хүндэтгэлтэй хандах ёстой ариун газруудын эсвэл үйл ажиллагаануудын зургийг олоход (эсвэл зурахад) туслахыг хүүхдүүдээсээ хүсэж болно. Бид гэр орноо ариун газар болгохын тулд юу хийж болох вэ?

  

  1:26

• “Хүндэтгэл бол хайр” (Хүүхдийн дууны ном, 12) гэх зэрэг хүндэтгэлийн тухай дууг хамтдаа дуул. Ингэснээр хүүхдүүд тань хүндэтгэлтэй байх гэдэг нь юу гэсэн үг болохыг тайлбарласан үг, хэллэгийг олж болно. Хэрэв бид найзыгаа сүмд анх удаа авчирч байгаа бол хүндэтгэлтэй байх гэдэг нь юу гэсэн үг болохыг хэрхэн тайлбарлах байсан бэ?

• Гэтлэл 3; 4:1–17 дахь түүхийг ашиглан Мосегийн дүрийг хүүхдүүдээрээ ээлжлүүлэн тоглуул. Гар чийдэн, шатах бутыг төлөөлөх ургамал зэрэг эд зүйлс эсвэл энгийн зүйлсийг оролцуулах нь хөгжилтэй байж болох юм. Мосе Их Эзэний өөрт нь өгсөн даалгаврын талаар юу мэдэрснийг олж мэдэхэд нь хүүхдүүддээ тусал (Гэтлэл 3:11; 4:1, 10-ыг үзнэ үү.) Та нар бас ийм мэдрэмжтэй байсан үеэ бие биетэйгээ хуваалцаж болох юм. Мосед туслахын тулд бид ямар зөвлөгөө түүнд өгөх байсан бэ? Их Эзэн Мосег хэрхэн урамшуулсан талаар Гэтлэл 3:12; 4:2–9, 11–12-оос унш. Аврагч танд дуудлагаа биелүүлж, өдөөлтийг дагахад эсвэл өөрт тань хэцүү ямар нэгэн зүйлийг хийхэд тань хэрхэн тусалж байсан талаар хүүхдүүдэд ярьж өг.