Эхлэл 42–50

Иосефын амьдрал, Есүс Христийн цагаатгах үүрэг хоёрын ижил төстэй шинжийг та анзаарч байсан уу? Эдгээр ижил төстэй зарим жишээг харахын тулд дараах судруудыг харьцуулахыг хичээ:

• Эхлэл 37:3-ыг Матай 3:17-той.

• Эхлэл 37:26–28-ыг Матай 26:14–16-тай.

• Эхлэл 45:5–7-г Лук 4:18-тай.

• Эхлэл 47:12-ыг Иохан 6:35-тай.

Эдгээр шүлгийг уншихад танд Аврагчийн тухай мөн Түүний зорилгын талаар ямар сэтгэгдэл төрж байна вэ?

Иосефын ах нарынхаа өөрт нь хийсэн аймшигт зүйлсийг уучилсан талаар унших нь одоо таныг уучлах гэж хичээж байгаа хүнийхээ талаар бодоход хүргэж болох юм. Энэ зарчмыг хэрэгжүүлэхийг хичээхэд тань дараах асуултууд тусалж болно. Тухайлбал:

• Иосефт ах нараа уучлах нь яагаад хэцүү байсан бэ? (тэдний түүнд юу хийснийг харахын тулд Эхлэл 37-г үзнэ үү). Ямар хандлага буюу туршлага Иосефт уучлах хүч чадал өгсөн бэ? (Жишээ болгож Эхлэл 45:1–15 эсвэл 50:15–21-ийг үзнэ үү).

• Ах нараа уучилснаар Иосефт ямар ямар адислал ирсэн бэ? Жишээлбэл: Уг түүхийн эхэнд гарч буй Иаковын гэр бүлийн харилцааг (жишээ болгож Эхлэл 37:3–11-ийг үзнэ үү) төгсгөлд нь гарах тэдний харилцаатай (Эхлэл 45:9–15; 50:15–21-ийг үзнэ үү) харьцуул. Хэрэв Иосеф уучлахад бэлэн байгаагүй бол байдал хэр өөр байж болох байсан бэ?

• Танаас уучлал гуйсан эсэхээс үл хамааран та уучлах хэрэгтэй байгаа хүнийхээ нэрийг бичихийг бод. Та ийм нөхцөл байдалд Аврагчийн эдгээх хүчийг урихын тулд юу хийж болох вэ? Уучлахад хэцүү байвал ахлагч Гэррит В.Гонгийн “Үүрд мөнхөд аз жаргалтай” (Лиахона, 2022 оны 11 сар, х.83–85) хэмээх захиасны сүүлийн зургаан догол мөрөн дэх зөвлөгөөг эргэн харахыг бод. Танд уучлах итгэл найдвар өгсөн юуг та олж мэдсэн бэ?

Мөн Сургаал ба Гэрээнүүд 64:9–11-ийг үзнэ үү; “Forgiveness: My Burden Was Made Light” видеог Gospel Library-аас үзнэ үү.

8:26

Иаковын үр удамд ирэх адислал тод томруун дүрслэлийг агуулдаг ч тэдгээрийг ойлгоход амаргүй байдаг. Бурханы авралаар, сэргээгдсэн сайн мэдээ бидэнд тусалдаг. Та Эхлэл 49:22–26 дээрх Иосефт өгөгдсөн адислалын тухай уншихдаа дараах шүлгүүдийг ч бас уншаад эдгээр нь ямар ойлголт өгч байгааг хараарай: 1 Нифай 15:12; 2 Нифай 3:4–5; Иаков 2:25; Сургаал ба Гэрээнүүд 50:44.

Эхлэл 49:8–12 дахь Иудагийн адислалын тухай уншихдаа Есүс Христ Иудагийн үр удам гэдгийг санаарай. Та эдгээр шүлгээс Аврагчийг сануулах юуг олж мэдсэн бэ? (Илчлэл 5:5–6, 9; 1 Нифай 15:14–15; Сургаал ба Гэрээнүүд 45:59; 133:46–50-ийг үзнэ үү).

Эдгээр адислалыг унших нь патриархын адислалаа эргэн харахад эсвэл хэрэв танд байхгүй бол адислалаа хүлээн авахад сүнслэгээр нөлөөлж болно. Таны адислал дахь ямар үг, хэллэг бодлыг тань Есүс Христэд хандуулсан бэ?

Мөн Рандалл К.Бэннэттийн “Таны патриархын адислал бол Тэнгэрлэг Эцэгийн өгсөн сүнслэг удирдамж юм” хэмээх захиасыг Лиахона, 2023 оны 5 сар, х.42–44-өөс үзнэ үү.

Иосефыг зовлон бэрхшээл туулж байх үед энэ бүхэн тодорхойгүй байсан ч тэр эцсийн эцэст Египет дэх зовлон бэрхшээлээ эргэн хараад, “Бурхан түүнийг сайнаар эргүүлснийг” (Эхлэл 50:20) ойлгосон юм. Хэрэв танд Иосефыг нүхэнд эсвэл шоронд байхад нь очиж үзэх боломж олдсон бол түүнийг та хэрхэн тайтгаруулах байсан бэ? Эхлэл 50:19–21 нь сорилт бэрхшээлтэй үед танд хэрхэн туслах вэ?

Мөн Сургаал ба Гэрээнүүд 122; “Бат бөх суурь”, Дуулал, х. 41-ийг үзнэ үү.

Эхлэл 50:24–25 болон Иосеф Смитийн Орчуулга, Эхлэл 50:24–38-ыг (Библийн Иосеф Смитийн Орчуулгаас авсан түүврүүд) уншихдаа Иосефт Мосе, Иосеф Смит хоёрын талаар олон зуун жилийн өмнөөс мэдэх нь яагаад чухал байсныг тунгаан бод. Иосеф Смит өөрийнх нь талаарх Иосефын бошиглолуудыг хэрхэн биелүүлсэн бэ? (Сургаал ба Гэрээнүүд 1:17–23; 20:7–12; 39:11; 135:3-ыг үзнэ үү).

• Хүүхдүүдэд тань Иосеф гэр бүлтэйгээ эргэн нэгдсэн түүхийг жүжигчлэн үзүүлэх нь зугаатай байж болно (Эхлэл 42–44-ийг үзнэ үү.) Эсвэл тэд “Иосеф ба өлсгөлөн” (Хуучин Гэрээний түүхүүд, х.57–60) эсвэл энэ тоймын зургуудыг ашиглан бие биедээ зааж болно. Дараах хэдэн асуулт хүүхдүүдэд тань энэ түүхээс суралцахад нь тусалж чадна. Үүнд:

  • Иосеф гэр бүлдээ хайртайгаа харуулахын тулд юу хийсэн бэ? (Эхлэл 45:4–15-ыг үзнэ үү).

  • Иосеф ах нараа яагаад уучилсан гэж та бодож байна вэ?

  • Өөрсдийг нь уучилсныг мэдээд Иосефын ах нарт ямар санагдсан гэж та нар бодож байна вэ? Та амьдралдаа хэнийг уучлах хэрэгтэй байна вэ? Та хэрхэн хайраа үзүүлж, мөн уучилж болох вэ?

  

  2:26

• Та болон танай хүүхдүүд хэн нэгнийг уучилсан эсвэл хэн нэгэн тэднийг уучилсан туршлагаасаа хуваалцаж болно. Дараа нь та нар “Бие биеэ хайрлаач” (Хүүхдийн дууны ном, 74) эсвэл “Эцэг минь гуйя, надад туслаач” (Хүүхдийн дууны ном, 52) гэх зэрэг дууг дуулж болно.

• Та хүүхдүүдтэйгээ энэхүү тоймын төгсгөлд байгаа хөвгүүдээ адисалж буй Иаковын зургийг харж, юу болж байгааг ярилцаж болно (Эхлэл 48:8–9-ийг үзнэ үү). Шаардлагатай бол Иосефын эцэг Иаков гэр бүлдээ санваарын адислал өгөхийг хүссэн гэдгийг тайлбарла. Та нар санваарын адислалаар дамжуулан Бурханаас тусламж хүлээн авч байсан туршлагаа бие биетэйгээ хуваалцаж болох юм. Бид ямар шалтгаанаар санваарын адислал авахыг хүсэж болох вэ?

• Та Иосефын гэр бүлээ өлсгөлөнгөөс аварсан түүхээс Аврагчийг олж харахад нь хүүхдүүддээ хэрхэн тусалж чадах вэ? Иосеф, Есүс Христ гэсэн хоёр баганатай хүснэгт хийхийг бод. Дараах хос судруудыг судлаад, Иосеф, Есүс хоёрын хооронд буй ижил төстэй зүйлээр хүснэгтийг бөглөхөд нь хүүхдүүдэд тусал: Эхлэл 37:3 ба Матай 3:17; Эхлэл 37:26–28 ба Матай 26:14–16; Эхлэл 45:5–7 ба Лук 4:18; Эхлэл 47:12 ба Иохан 6:35.

• Хэн нэгнийг аврах, тэдэнд туслах гэдэг нь юу гэсэн утгатай үг болохыг хүүхдүүдээсээ асуу. Хэрэв тэдний дунд аюулаас аврагдаж эсвэл аюултай нөхцөл байдлаас гарахад тусламж авч байсан хүн байвал тэднийг хуваалцахад урь. Иосеф ах нараа хэрхэн аварсан бэ? (Эхлэл 42:1–3; 45:5–7-г үзнэ үү). Дараа нь та нар хамтдаа Аврагчийн зургийг хараад, Есүс биднийг хэрхэн авардаг тухай ярихыг хүүхдүүдээсээ хүсэж болно.