Exodus 1–6

Ta eo ej un̄ūr eok kōn kōrā ro kwaļo̧k kadkadiern ilo Exodus 1–2? Ekōjkan aer kar kakūrm̧ool karōk eo an Anij n̄an armej ro An? Ta ko kijejeto ko aer rej katakin eok kōn jipan̄ ilo jerbal eo an Anij?

M̧okta jān am̧ jino riiti Exodus, komaron̄ ļōmņak kōn juon men epen kwoj jelm̧ae—juon men me kwoj kōjatdikdk bwe Irooj enaaj kanemwkoj eok jāne. Ta naan im eoon ko ilo Exodus 1–3 me rainwōt kōmakoko ilo jetōb ak men ko jet jej jelm̧ae rainin? Bar lale elmen an kar ajri in Israel ro pukot anemkwoj im ekōjkan an kar Irooj uwaak (lale, n̄an waanjon̄ak , Exodus 2:23–25; 3:7–8). Ekōjkan an Irooj “wanlaḷtok bwe [En] lo̧mo̧o̧r” e kwe?

Ilo aolep bok in Exodus, komaron̄ bar lale men ko rejokkin wōt juon ikōtaan Moses im Jisōs Kraist (lale Duteronomi 18:18–19; 1 Nipai 22:20–21) N̄an waanjon̄ak, ta men ko kwoj loi ikōtaan Exodus 1:22; 2:1–10 im Matu 2:13–16? ak ikōtaan Exodus 24:18 im Matu 4:1–2? Ta eo kwoj en̄jake ke Irooj ekōņaan bwe kwon meļeļe kōn E Make im kajoor eo An?

Komaron̄ ļōmņake juon iien me juon men ear kobrak eok kōn kabwilōn̄lōn̄? Ta eo kwaar kōm̧m̧ane? Elmen am̧ maron̄ kōmeļeļeik en̄jake eo kwaar en̄jake?

Ilo ad ļōmnak kake, riiti Exodus 3:1–6. Ta eo ear un̄ūr eok kōn en̄jake eo an Moses? Ta eo Moses ear kōm̧m̧ane n̄an kwaļo̧k kautiej n̄an Anij? Ta ekkeijel ko kwoj loi ikōtaan wāween an m̧akūtkūt im kwaļok kautiej n̄an men ko rekwojarjar?

Riiti eoon kein emaron̄ karreiļokeok n̄an ļōmņak kōn men ko rekwojarjar im jikin ko rekwojarjar ilo mour eo am̧ Etke rekwojarjar n̄an kwe? Ekōjkan am̧ kea kaki jān men bajjōk ko? N̄an tōl kōļmenļo̧kjen eo am̧, komaron̄ lale jekjōn eo kar ņaetan “Remembering the Promises” ilo enaan eo an Elder David A. Bednar “Exceeding Great and Precious Promises” (Liaona, Nov. 2017, 91–93). Komaron̄ bar al ak ron̄jake juon al me ej kabwilōn̄ eok, āinwōt “Ij Ļokjenaō” (Al Ko Al in Ajri, no. 14)

Em̧ool, jekdoon n̄e ekar wōr en̄jake in jetōb ko rem̧m̧an, ewōr kauwōtata in jab kea kōn men ko rekwojarjar. Ekōjkan am̧ eļļo̧k jān men in? Erkein enaan ko ruo me rej iokļo̧k jekjek in; kāālet juon, im pukot enaan ko me rej jipan̄ eok: Ulisses Soares, “Bwilōn̄ kōn Jisōs Kraist im gospel eo An” (Liaona, Māe 2022, 115–17); Gérald Caussé, “Is It Still Wonderful to You?” (Liahona, May 2015, 98–100).

Bar lale Katak im Bujen Ko 6:10–12; 63:64.

Rainin jejeļā kajjien Moses āinwōt juon rikanaan im ritōl eļap. Bōtaab Moses ekar jab loe e make ilo wāween in ke Irooj ekar kūr e ilo jinoin. Ilo am̧ riiti Exodus 3–4, kōllaajraki abņōņō ko an Moses im ekōjkan an kar Irooj uwaak kajjojo iaer. Ta eo kwoj loe ilo jepta kein me remaron̄ karreilok eok n̄e kwoj en̄jake likjab? N̄āāt eo kwaar lo an Anij kōkajoor eok im ro jet n̄an kōm̧m̧ane jerbal eo An?

Bar lale “The Church Gives Us Opportunities to Assist in God’s Work” ilo “Church Organization” in Topics and Questions, Gospel Library.

Emaron̄ kabweerer n̄e kijejeto ko ad rem̧ool n̄an kōm̧m̧an em̧m̧an rejjab jerbal—n̄e jej kajjieon̄ kōm̧m̧ane Ankilaan Irooj ak jejjab lo tōprak ko jej kōtmāni. N̄an ekkatak kōn ejja āinwōt en̄jake in Moses ear en̄jaake, riiti Exodus 5:4–9, 20–23 Elmen an kar Irooj jipan̄ Moses anjo jān en̄jake in pere ko an? (lale Exodus 6:1–13 Ekōjkan an Irooj kar jipan̄ eok kijin̄en̄e wōt n̄an kōm̧anm̧an Ankilan?

Bar lale Jeffrey R. Holland, “Kōttar wōt Irooj,” Liaona, Nob. 2020, 115–17.

• Moses ekar wōr juon an jerbal eļap n̄an kanemkwoj ri-Israel jān kamakoko. Ak eban kar maron̄ kadedeikļo̧k men in eļan̄n̄e jinen, sister eo an, lio eo nejin Potipar, im kōrā ro jet retiljek ren kar jab kōjparok im kea kōn e. Jipan̄ ajri ro nejum̧ ekkatak kōn kōrā rein ilo Exodus 1:15–20; Exodus 2:2–10 (bar lale Bōnbōn 26:59); im Exodus 2:16–21. Komaron̄ bar kōjerbal peij in makūtkūt eo an wiik in im “Nin̄nin̄ Moses” (ilo Bwebwenato ko jān Kallim̧ur M̧okta, 61–63) Elmen an kar kōrā rein jipan̄ kakūrm̧ool karōk eo an Anij? Kōnnaan ippān doon kōn armej ro jet kwoj reilōn̄ļo̧k n̄an er me rej jipan̄ ilo jerbal eo an Anij, ekoba ilo wāween ko reddik im lam waan. Ekōjkan ad maron̄ ļoor waanjon̄ak eo aer?

  

  1:36

• Ālkin riit Exodus 3:1–5 ippān doon, kajjitōk ippān ajri ro nejum̧ n̄an kōkaduuk eoon ko aer ilo naan ko aer make (bar lale “Rikanaan Moses” ilo Bwebwenato ko jān Kallim̧ur M̧okta, 64–66). Elmen an kar Moses kwaļo̧k kautiej im̧aan mejān Anij? Ekōjkan an Irooj kōņaan bwe jen kwaļo̧k kautiej? Komaron̄ kajjitōk ippān ajri ro nejum̧ n̄an jipan̄ eok pukot (ak jin̄aik) pija in jikin ko rekwojarjar ak m̧akutkut ko ijo rej aikuj kautieji. Ta ko jemaron̄ kōm̧m̧ane n̄an kōm̧m̧an bwe m̧weeo m̧ōd en juon jikin ekwojarjar?

  

  1:26

• Al ippān doon juon al kōn kautiej, āinwōt “Reverence Is Love” (Children’s Songbook, 31). Ilo am̧ naaj, ajri ro nejum̧ remaron̄ pukot naan ak eoon ko rej kōmeļeļe ta meļeļein kautiej. N̄e jen kar boktok juon m̧ōttad n̄an m̧ōn jar in kein kajuon, ekōjkan ad maron̄ kōmeļeļe ta melelein kautiej.

• Kōjerbal bwebwenato eo ilo Exodus 3; 4:1–17, kōtļo̧k bwe ajri ro nejum̧ ren kajjojo bōk koņaer n̄an erōm̧ āinwōt Moses. Emaron̄ limo n̄an kobaik kein katak ko, āinwōt juon teen̄ki im juon mennin eddōk n̄an bōk jikin wōjke eo euruur. Jipan̄ ajri ro pukot ekōjkan an kar Moses en̄jake kōn eddo eo Irooj ear leļo̧k n̄an e (lale Exodus 3:11; 4:1, 10). Bōlen komaron̄ kwaļo̧k n̄an doon bar jet iien ko me kwaar en̄jake ejja en̄jake ko. Ta kabilōk ko jemaron̄ kwaļok ippān Moses n̄an jipan̄ e? Riit kōn ekōjkan an Irooj kōketak Moses ilo Exodus 3:12; 4:2–9, 11–12. Jiron̄ ajri ro ekōjkan an Rilo̧mo̧o̧r eo kar jipan̄ eok kakūrm̧ool juon kūr, ļoor juon im̧we, ak kōm̧m̧ane bar juon men me ear pen n̄an kwe.