M̧weo Im̧ōn Israel

Ijoko ilo āne jem̧aden iturear in Canaan, Jekab eaar mijak in ioon ļeo jein, Iso. Āliktata in an Jekab kar lo Iso, emaron̄ 20 iiō m̧oktaļo̧k, Iso eaar kōņaan m̧an e. Jekab ekar oktaak aolepen bon̄on eo ilo āne jem̧aden, pukot kōjeraam̧m̧an jān Anij. Āinwōt tōprak in tōmak eo an Jekab, dim, im pen, Anij eaar uwaake jar eo an. Bon̄en eo me etan Jekab ekar oktak n̄an Israel, juon āt me meļeļein, ilubwiljin men ko jet, “ekar kijenmej ippān Anij” (Jenesis 32:28, footnote b).

En̄in ej jinountata in an āt eo Israel waļo̧k ilo Baibōļ, im ej juon āt me ej jutak pen ilo aolepen bok in im ilo bwebwenato. . Jet iien tokālik āt eo eaar letok n̄an elōn̄ļo̧k jen juon em̧m̧aan. Israel ewōr 12 nejin ļaddik, im bwij ko aer kar jeļā ņaetaer “m̧weeo imōn Israel,” ak “bwijjin Israel,” ak “ro nejin Israel,” ak “ri Israel ro.”

Ilo bwebwenato, ro nejin Israel raar kaorōk bwij eo aer jān juon iaan bwij ko jon̄oulruo an Israel. Bwij eo aer ekar m̧ōttan eo eaorōk ilo piktokin kallim̧ur eo aer. Rijilōk Paul ekar kean̄ bwe ekar “jen bwijjin Benjamin” (Rom 11:1). Juon un Liai ear jilkinļo̧k ļōm̧are ro nejin n̄an Jerusalem n̄an bōk pileij brass ko ej kōnke pileij ko ewōr ie “juon menmenbwij an ro jemān” (1 Nipai 5:14). Liai eaar lo bwe ekar jen bwijjin Josep, im ro ineen raar meļeļe kōn aer iokļo̧k m̧weeo im̧ōn Israel kar juon kam̧ool eaorōk n̄an er ilo iiō ko rej itok.

Ilo Kabun̄ in rainin, komaron̄ ron̄ naan in Israel āinwōt “aintok eo an Israel.” Jej al kōn “Dri Binmuren Israel,” “Hope of Israel,” im “Ye Elders of Israel.” Ilo jekjek kein, jejjab kōnono im al wōt kōn aelōn̄ in kiin̄ eo an Israel etto ak laļ eo raan kein kar ņaetan Israel. Ijoke, jej ba kōn ro em̧ōj aer aintok doon jen aolepen laļin tok n̄an Kabun̄ in an Jisōs Kraist. Jej ba kōn armej ro rej mour ippān Anij, ro rej kappukot kōjeraam̧m̧an ko An, im ro, kōn peptaij, raar erom̧ armej in bujen ro An. Ilo naan ko an Būreejtōn Russell M. Nelson, n̄an itok jān Israel meļeļein “kālet bwe Anij en anjo̧ ilo mour ko ad, … kālet bwe kajoor eo an Anij en un̄ūr mour ko ad.”

Kōjeraam̧m̧an in petriak eo am ej kwaļo̧k jemdoon eo am n̄an juon iaan ro bwijjin m̧weeo im̧ōn Israel. Ej juon m̧ōttan meļeļe eo ekaitoktoklimo kōn menmenbwij an baam̧le. Ebar wōr meļeļein n̄an mour eo am̧ kiiō im ilju im jekļaj, Āinwōt juon m̧ōttan m̧weeo im̧ōn Israel meļeļein bwe ewōr juon am̧ bujen jemjerā ippān Jemedwōj Ilan̄ im Jisōs Kraist. Meļeļein bwe kwe, āinwōt Ebream, naaj “kōjeraam̧m̧an” n̄an ro nejin Anij (Jenesis 12:2; Ebream 2:9–11). Meļeļein bwe, ilo naan ko an Piter, bwe “kom̧ epepen em̧ōj kāālōte, pris ro im irooj ro, ri aelōn̄ re kwōjarjar, armej ro an Anij wōt; bwe kom̧win kōnnaanōkļo̧k men ko rem̧m̧an an Eo e ar kūr kom̧ jān marok im n̄an ilowaan meram eo An” (1 Piter 2:9). Meļeļein bwe kwōj kōtļo̧k an “Anij anjo̧”—bwe kwoj juon eo ej “kijenmej ippān Anij” ilo am̧ kautiej bujen ko am̧ Ippān.