“M̧aaj 2–8. ‘Anij En Anjo̧’,” Itok, Ļoor Eō—N̄an M̧weeo im Kabun̄ in: Kallim̧ur M̧okta 2026 (2026)
“M̧aaj 2–8. ‘Anij En Anjo̧’,” Itok, Ļoor Eō: 2026
Iso ej Wia kake Jolet eo An, jān Glen S. Hopkinson (kōmeļeļe)
M̧aaj 2–8:“Anij En Anjo̧”
Jenesis 24–33
Elmen am̧ kakoņ eok make n̄an juon kōjeraam̧m̧an jān Anij. Komaron̄ ba ke bwebwenato in Jekab, ļeo jibun Ebream im Sera, ej juon bwebwenato in juon em̧m̧aan eo ekar ekkatak uaak n̄an kajjitōk eo. Ilo m̧anit eo ijo ļaddik eo eritto tata ej bōk juon kōjeraam̧m̧an in jolet, Jekab ear lo̧tak kein karuo, dāpdep ilo neen po eo an jein, Iso. Āt eo Jekab “Jacob” meļeļein “ribōk jikin— juon eo ej bōk jikin bar juon armej. Jekab ear mour kōn āt eo ilo an kajjieon̄, elōn̄ļo̧k jān juon katten, n̄an bōk jikin Iso āinwōt eo ej bōk kōjeraam̧m̧an in jolet eo kōnke Iso ekar jab pepat n̄ani (lale Jenesis 25:30–34; 26:34–35; 27:36). Tōprak eo ear juon tarpok ilo baam̧le eo, Jekab ear ko n̄an āne jem̧dān bwe en jab mej.
Iiō ko tokelik, Anij ear kakien Jekab bwe en rool n̄an ijo jikin. Ilo iaļ eo an ļo̧k, Jekab, ilo ettā, ekar bar pukot kōjeraam̧m̧an jān Anij. Jeje ko rekwojarjar rej kōmeļeļe iien in āinwōt juon “wrestle” n̄an Jekab, im ekar kallikar ke eban ebbweer “eḷan̄n̄e kwō jab jare eō” (Jenesis 32:26). Innem ear itok katak eo—im kōjeraam̧m̧an eo. Anij ear ukōt etan Jekab n̄an Israel—meļeļein, ibwiljin men ko jet, “Anij en anjo̧.” Israel ear katak ke n̄an bōk kōjeraām̧m̧an ko reļļap an Anij, kōjeraam̧m̧an in bujen ko An, ejjab aorōk n̄an bōk jikin bar juon armej. Kōjeraam̧m̧an ko an jejjab maron̄ wiak ak kooti ak wiini. E ej letok ilo ejjeļo̧k wōņāān n̄an aolep ro rej mour ekkar n̄an āt eo Israel—ro rej kōtļo̧k bwe Anij en anjo̧ ilo mour ko aer.
Ļōmņak ko n̄an Ekkatak ilo M̧weeo im ilo Kabun̄ in
Jenesis 24
Bujen m̧are emenin aikuj n̄an karōk eo an Anij ejjeļok jem̧ļokin.
Ilo am̧ riiti Jenesis 24, kajjitōk ippam̧ make etke Ebream eaar ļōmņak m̧are eo an ļeo nejin Aisek ej juon men eaorōk. Etke m̧are ej juon men eaorōk ippān Anij?
Ta jinōkjej ko kwoj loe ippān Rebeka me renaaj jerbal n̄an juon mare im baam̧le ekajoor (eļaptata lale eoon 15–28, 57–61).
Bar lale Topics and Questions, “Marriage,” Gospel Library.
Jenesis 25:29–34
Imaron̄ kaorōk men ko raorōk an indeo ioon men ko an laļin.
Ilo m̧anit eo an Aisek im Rebeka, ļaddik eo eritto tata neier ej bōk jolet,meļeļein an jolet eļap, ippānļok ej eddo ko reļļap n̄a lale baam̧le eo. Ilo am̧ riiti Jenesis 25:29–34, kōļmenļo̧kjen etke Iso emaron̄ kar kōņaan joļo̧k an jolet kōn juon m̧ōn̄ā. Ta katak ko kwoj loi kōn kwe make ilo bwebwenato in? Imaron̄ jipan̄ n̄an kōm̧m̧ane ruo laajrak: (1) kōjeraam̧m̧an ko ejjeļo̧k jem̧ļo̧kier Anij ekōņaan lewaj n̄an kwe im (2) men ko an laļin me rej kōm̧ad eok. Innem komaron̄ riiti eoon eo, jāniji jān “ ṃaanje” n̄an juon men jān laajrak eo kein kajuon im “jokkob” ippān juon men jān eo kein karuo. Ekōjkan am̧ naaj mije Rilo̧mo̧o̧r eo im kōjeraam̧m̧an ko ejjeļo̧k jem̧ļo̧kier an gospel eo An?
Bar lale Matu 6:19–33; M. Russell Ballard, “Keememej Ta eo Eaorōktata,” Liaona, Māe 2023, 105–7.
Jekab ilo Bethel, jān James Smetham
Jenesis 28
Bujen eo an m̧weeo im̧ōn Irooj ej boktok kajoor eo an Anij n̄an mour eo aō.
Ke ej kiki ilo pet dekā, Jekab eaar tōņake juon tōnak me ekar ukōt an mour. Ekar juon en̄jake ekwojarjar me Jekab ekar ņaetan ijo Bethel, ak “m̧weeo im̧ōn Anij” kalikkar ke, “E m̧ool Jeova ej pād ijin” (Jenesis 28:16).
Ilo am̧ riiti Jenesis 28, komaron̄ kajjitōk ippam make ta eo ear kōm̧m̧an an en̄jake in ekwojarjar n̄an Jekab. Ta eo eaar jelm̧ae ilo iien eo. Ekōjkan an maron̄ kar en̄jake? Komaron̄ bar pokut naan ko ilo eoon 10–22 me rej kakeememej eok kōn m̧weeo im̧ōn Irooj. Ta im̧we ko kōn Anij kwaar buki, m̧weeo Im̧ōn, im bujen ko An?
Ilo jem̧ļo̧kin unin tōl in juon jin̄a ej kwāļo̧k ettōņak eo an Jekab; komaron̄ lale ilo am̧ riit. N̄e kwon kar make ejaake juon am̧ kōmeļeļe kake ettōņak eo am̧, ta eo kwon kar kōm̧m̧ane? Ta m̧ool koilo bwebwenato eo kwon kar kajjieon̄ kwaļo̧ke?
Al eo “Nearer, My God, to Thee” (Hymns, no. 100) ej pedped ioon en̄jake eo an Jekab. Ta ekkeijel eo kwoj loe ikōtaan al in im Jenesis 28:10–22? Ekōjkan an tampeļ eo jipan̄ eok en̄jake am̧ epaake Anij? Ļōmņak in pukot uwaak in kajjitōk in ilo enaan eo an Russell M. Nelson “Tampeļ eo im Pedped eo Am iIo Jetōb” (Liaona, Nob. 2021, 93–96). Komaron̄ bar kōņaan etale bujen im kōjeraam̧m̧an ko an m̧weeo im̧ōn Irooj ilo Bok in Bōk Meļeļe Eļap, 27.2 (Gospel Library). Elmen an kōjpārok bujen kein boktok kajoor eo an Anij ilo mour eo am̧?
Kwōn mejādik. Elōn̄ wāween ko n̄an ekkatak jān jeje ko rekwojarjar ijelo̧kin riit wōt. Jet armej rej lo bwe em̧m̧anļo̧k aer meļeļe jeje ko rekwojarjar n̄e rej jin̄aik bwebwenato ko. Ro jet rej lo im̧we in jetōb ko jān al ko rej ekkeijelļo̧k jeje ko. Jab jem̧ļo̧k wōt ilo juon wōt wāween ekkatak n̄an kwe make; kwōn kōtļo̧k am̧ kajjieon̄ wāween ko jet.
Jenesis 29:31–35; 30:1–24
Irooj ej keememej eō ilo melejjion̄ ko aō.
Ilo am̧ riiti Jenesis 29:31–35 im 30:1–24, pukot naan ko im jentōj ko me rej kōmeļeļeiki tūriam̧o eo an Anij n̄an Rejel im Lia. Kejōkļo̧kjeņ kōn ekōjkan an Anij kar “lo en̄taan eo [am̧]” im “keememej” eok (Jenesis 29:32; 30:22).
Jenesis 32–33
Rilo̧mo̧o̧r emaron̄ kōmour baam̧le eo aō.
Ke Jekab ekar bar jepļaak n̄an Canaan, ekar “kanooj mijak im lōļn̄o̧n̄” kōn wāween an Esau naaj wōnm̧aeik e (Jenesis 32:7). Ilo am̧ riiti Jenesis 32–33, ļōmņak kōn jemjerā eo an baam̧le eo am̧ make—bōlen eļaptata eo me eaikuj kōmour. Bōlen bwebwenato in emaron̄ un̄ūr eok n̄an laleļo̧k juon armej. Kajjitōk rōt kein remaron̄ tōl am̧ riit.
-
Ekōjkan an Jekab kar ioon Esau?
-
Ta eo ej jiktok n̄an kwe kōn jar eo an Jekab me ej pād ilo Jenesis 32:9–12?
-
Ta eo kwoj ekkatak kōn jeorļo̧k bōd jān waanjon̄ak eo an Esau?
-
Ekōjkan an Rilo̧mo̧o̧r eo jipan̄ kōj kōmour jem̧jerā ko an baam̧le eo?
N̄an eļapļo̧k, lale ennaan eo an allōn̄ in ilo Liaona im N̄an Kōkajoorļo̧k Jodikdik ro māākjiin.
Ļōmņak ko n̄an Katakin Ajri ro
Jenesis 24:10–21
Imaron̄ jouj n̄an ro jet.
-
N̄an kalikkar waanjon̄ak in jouj eo an Rebeka, komaron̄ kwaļo̧k n̄an ajri ro pija eo ilaļ ak peij in m̧akutkut eo an week in ilo am̧ kōkaduik bwebwenato eo ilo Jenesis 24:10–21. Ajri ro remaron̄ m̧ōņōņō in kōm̧m̧an tieta kōn bwebwenato eo. Men in emaron̄ tōl n̄an juon ekōnono kōn jerbal in jouj ko kwe im ajri ro kom̧ kar loi.
-
Ļōmņak in al ippan doon juon al kōn jouj, āinwōt “Kindness Begins with Me” (Children’s Songbook, 145). Ajri ro remaron̄ ron̄jake naan ko “jouj” (ak juon bar naan āinwōt) im jutak n̄e rej ron̄ naan eo. Ekōjkan ad maron̄ jouj āinwōt Rebeka?
Old Testament Heroes, jān Dilleen Marsh (kōmelele)
Jenesis 25:21–34
Men ko an indeo raorōkļo̧k jān men ko an laļin.
-
Ļōmņak in kōjerbal “Jekab im Iso” (ilo Bwebwenato ko jān Kallim̧ur M̧okta, n̄an jipan̄ ajri ro meļeļe kōn bwebwenato eo ilo Jenesis 25:21–34. Bōlen ajri ro remaron̄ ļōm̧ņak ke Iso ej kajjitōk naan in rōjan̄ ippaer kōn eļan̄n̄e e en wia kake menin jolet eo an kōn juon m̧ōn̄ā. Ta eo renaaj kar ba n̄an e?
2:5Jacob and Esau
-
Ta ko raorōk n̄an indeo n̄an kwe im ajri ro nejum̧? Bōlen ajri ro remaron̄ pukot pija ko ak men ko me jutak kōn men kein. Ekōjkan ad maron̄ kwaļo̧k n̄an Irooj ke men kein raorōk ippad?
Jenesis 28:10–22
Bujen ko rej jipan̄ eō jepļaakļo̧k n̄an ippān Jemedwōj Ilan̄.
-
Ilo am̧ riiti Jenesis 28:10–22 ippān doon, komaron̄ kōjerbal juon jikin uwe (ak juon pija āinwōt pija eo jem̧ļo̧k in unin tōl in) n̄an kōnono kōn etke bujen ko ad rej āinwōt juon jikin uwe. Bōlen ajri remaron̄ arin ke rej talōn̄e juon jikin uwe, im ilo kajojo ne, kōnono kōn iien ko me jej kallim̧ur in pokake Anij, āinwōt ien eo me jej peptaij, bōk kwojkwoj eo, ak etal n̄an tampeļ. Ekōjkan an bujen ko ad kepaakļo̧k kōj n̄an Anij?
Jenesis 32:6–11; 33:1–4
Jemedwōj Ilan̄ im Jisōs Kraist remaron̄ jipan̄ eō iakwe baam̧le eo aō.
-
N̄an kwaļo̧k kadkad in eoon kein, komaron̄ kōmeļeļe bwe ālkin elōn̄ iiō in en̄jake ko renana, Jekab ear bar tōn ioon Iso. Riit ippān doon Jenesis 32:6–11. Ekōjkan an kar Jekab en̄jake? Ta eo ekar kōm̧m̧ane n̄an bōk jipan̄? Riit ippān doon Jenesis 33:1–4 n̄an lo wāween an Irooj kar uwaake jar eo an Jekab. Eļan̄n̄e Jekab im Esau remaron̄ kar kōnono n̄an kōj rainin, ta eo remaron̄ kar ba n̄an jipan̄ kōj n̄e ej lōn̄ aitwerōk ilo baam̧le ko ad?
N̄an eļapļo̧k meļeļe, lale ennaan eo an allōn̄ in ilo eo Jera māākjiin.