Ijtō

Elōn̄ eoon ko ilo Kalim̧m̧ur M̧okta rej jitōn̄ļo̧k jerbal in karejar eo an Rilo̧mo̧o̧r eo im pinmuur in en̄taan eo. Tebōļ in itulaļ ej kōlaajrake jet iaan eoon kein. Ilo am̧ riiti eoon kein, ta en̄jake ko rej itok n̄an kwe kōn Rilo̧mo̧o̧r eo?

Kanaan ko im katak ko kōn Rilo̧mo̧o̧r eo em̧ool rej ļapļo̧k aer lutōkleplep im alikkar ilo Bok in Mormon. Ļōmņak kōn ekōjkan an tōmak eo am̧ kar kajoorļo̧k jān eoon ko āinwōt kein: 1 Nipai 11:31–33; 2 Nipai 25:13; Mosaia 3:2–11; Alma 7:10–13.

Rikanaan ro raan ko āliktata rej wōnm̧aanļo̧k in kam̧ool kōn Jisōs Kraist im mijen in pinmuur eo An. Ilo am̧ ron̄jak kweilo̧k eo eļap ilo Ijtō in, keememej naan in kam̧ool ko kwoj ron̄ kōn Kraist. Ta eo rej katakin eok kake E?

Ijtō ej juon iien lan̄lōn̄, kōnke ej juon iien n̄an kemem e Pinmuur im Jerkakpeje eo an Rilo̧mo̧o̧r eo. Ijoke, jekdoon ilo iien Ijtō, elōn̄ armej ro rejjab en̄jake lan̄lōn̄ kōn elōn̄ un ko. Ta eo komaron̄ kōm̧m̧ane n̄an kajedeed aenōm̧m̧an im lan̄lōn̄ eo an Rilo̧mo̧o̧r eo Ijtō in?

Juon ļōmņak ej n̄an kappukot enaan ko ilo jeje ko rekwojarjar kōn aenōm̧m̧an im lan̄lōn̄ Jisōs Kraist ej letok, āinwōt kein: Sam Ko 16:8–11; 30:2–5; Aiseia 12; 25:8–9; 40:28–31; Jon 14:27; 16:33; Alma 26:11–22. Ļōmņak ekōjkan am̧ maron̄ kwaļo̧k enaan kein ippān ro jet. N̄an waanjon̄ak, bōlen komaron̄ kōm̧m̧an kaat in Ijtō n̄an ajeej, pedped ioon enaan kein. Jar kōn ro rej aikuji iakwe in Ijtō eo am̧. Komaron̄ bar kāālet in kajedeed enaan eo am̧ ilo social media, ijo elōn̄ armej remaron̄ loe.

Al ko kōn Kraist im Jerkakpeje eo, āinwōt “He Is Risen!” (Hymns, no. 199), emaron̄ jipan̄ kōj en̄jake aenōm̧m̧an im lan̄lōn̄ ilo Ijtō. Pokut naan ko ilo al eo me, ilo ļōmņak eo am̧ ej pijaik lan̄lōn̄ eo an Ijtō.

Bar lale Jeffrey R. Holland, “Jab Āinwōt an Laļ Lewōj,” Liaona, Māe 2021, 35–38; Mark S. Palmer, “Ad Būrom̧ōj Enaaj Oktak n̄an Lan̄lōn̄,” Liaona, Māe 2021, 88–90.

Juon in m̧akūkūt emaron̄ jipan̄ eok lo elōn̄ kōjeraam̧m̧an ko rej itok jān Jisōs Kraist im Pinmuur eo An. Riiti eoon ke ilaļ kōn ta ko Jisōs Kraist ej jipan̄ kōn anjo̧ ie. Kajjieon̄ karōk eoon ko ilo laajrak kein: jerawiwi, mej, māllejon̄, im m̧ōjņo̧ ko (jet eoon remaron̄ ekkar n̄an elōn̄ļo̧k jān juon laajrak). Ilo am̧ riit, ta im̧we ko am̧ kōn kajoor eo an Rilo̧mo̧o̧r?

• Aiseia 61:1–3

• Ezekiel 36:26–28

• Matu 11:28–30

• Luk 1:46–55

• Rom 8:35–39

• Alma 7:10–13

• Alma 11:42–45

• Alma 58:11

• Moronai 10:32–33

• Katak im Bujen Ko 19:15–19

• Moses 5:9–12

Ekōjkan am̧ naaj kōmeļeļe n̄an juon m̧ōttam̧ eo ejjab Ri Kūrijtin etke Jisōs Kraist eaorōk ippam̧? Enaan eo an Elder Ahmad S. Corbitt “Kwojeļā Etke N̄a Āinwōt juon Rikūrijtin Ij Tōmak ilo Kraist?” (Liaona, Māe 2023, 119–21) emaron̄ jipan̄.

Bar lale Reyna I. Aburto, “Lōb Ejjeļo̧k An Anjo̧,” Liaona, Māe 2021, 85–87; Topics and Questions, “Atonement of Jesus Christ,” “Resurrection,” Gospel Library.

Ta ko kwoj ekkatak jān eoon ko laajraki kōn wōņāān eo Jisōs Kraist ear kōļļaik n̄an lo̧mo̧o̧ren eo am̧: Aiseia 53:3–5; Mosaia 3:7; Katak im Bujen Ko 19:16–19? Ta wōņāān eo Jemedwōj Ilan̄ eaar kōļļāik? (lale Jon 3:16).

• Wiik in Ijtō ej juon iien em̧m̧an n̄an katakin ajri ro kōn ta eo Rilo̧mo̧o̧r ear kōm̧m̧ane n̄an kōj ilo Getsemane im ioon drebwāāl. Komaron̄ jino ilo am̧ kwaļo̧k pija ko ilaļ im kōtļo̧k bwe ren kōnono kōn ta ko rej waļo̧k ilo pija ko. Ilo an ajri ro lale pija ko, komaron̄ riiti eoon ko me rej kōmeļeļeik iien kein (lale Matu 26:36–46; 27:35–50; Luk 22:39–46; Jon 19:16–30). Kajjitōk ippān ajri ro n̄an jitōn̄ kōmeļeļe ko ilo pija ko n̄e rej ron̄ ilo eoon ko.

• Elmen ad jeraam̧m̧an kōn en̄taan eo an Jisōs kōn kōj? Jipan̄ ajri ro pukot naan ak eoon ko me rej uwaake kajjitōk in Aiseia 53:4–12; Alma 7:11–13; im Katak im Bujen Ko 19:16–19. Kwaļo̧k n̄an doon en̄jake ko ami kōn Rilo̧mo̧o̧r eo ālkin ami riiti eoon ko.

• Komaron̄ kōjerbal peij in m̧akutkut eo an wiik in ak pija ko jet ilo unin tōl in n̄an jiron̄ ajri ro kōn bwebwenato in Jerkakpeje eo (bar lale “Jisōs Ej Jerkak,” ilo Bwebwenato ko an Kallim̧ur Ekāāl, 139–44). Innem kōtļo̧k bwe ajri ro ren bwebwenato waj n̄an kwe.

• Ļōmņak ekōjkan am maron̄ jipan̄ ajri ro pukot lan̄lōn̄ ilo Kraist Ijtō in. N̄an waanjon̄ak, kom̧ maron̄ al ippān doon juon al in Ijtō em̧m̧antata ippami, āinwōt “Christ the Lord Is Risen Today” (Hymns, no. 200) or “Gethsemane” (Gospel Library). N̄an pukot al ko jet kōn Jerkakpeje eo, komaron̄ lale ilo topical index eo an Hymns im Children’s Songbook. Kwe im ajri ro maron̄ kwaļo̧k n̄an doon etke em̧m̧an ippami al kein im elmen ami en̄jake ilo ami al kaki. Ta eo al kein rej katakin kōj kōn Jemedwōj Ilan̄ im Jisōs Kraist?

• Ewōr ilo Gospel Library Easter videos ko me ajri ro nejum̧ remaron̄ itok limoier kaki. Bōlen komaron̄ kōtļo̧k bwe ren kāālet juon iaer n̄an alooje. Kajjitōk ippaer ta eo raar ekkatak kōn Jisōs Kraist jān pija eo. Komaron̄ bar kajjitōk bwe ren kōkaduuk enaan eo ilo pija eo n̄an juon jantōj.

• Ilo am̧ im ajri ro nejum̧ alooej kweilo̧k eo eļap ippān doon Ijtō in, jipan̄ er lale n̄e rikam̧ool ro an Rilo̧mo̧o̧r eo rejenolo̧k rej kam̧ool kōn Jerkakpeje eo. Bōlen komaron̄ kōm̧m̧ane juon ikkure jāne—karuwaineneik er bwe ren jutak aolep iien rej ron̄ naan ko āinwōt Ijtō ak Pinmuur ak Jerkakepeje. Kwaļo̧k n̄an doon etke komij kam̧oolol kōn naan in kam̧ool ko an rikanaan ro remour kōn Rilo̧mo̧o̧r eo.