“ວັນທີ 23–29 ເດືອນມີນາ. ‘ເຮົາຈົດຈຳພັນທະສັນຍາຂອງເຮົາ’: ອົບພະຍົບ 1–6,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 23–29 ເດືອນມີນາ. ‘ເຮົາຈົດຈຳພັນທະສັນຍາຂອງເຮົາ’,” ຈົ່ງຕາມເຮົາມາ: 2026

Moses and the Burning Bush [ໂມເຊ ແລະ ໄຟຢູ່ໃນກາງຟຸ່ມໄມ້], ໂດຍ ແຈຣີ ທອມສັນ

ວັນທີ 23–29 ເດືອນມີນາ: “ເຮົາຈົດຈຳພັນທະສັນຍາຂອງເຮົາ”

ອົບພະຍົບ 1–6

ການເຊື້ອເຊີນໃຫ້ໄປອາໄສຢູ່ປະເທດເອຢິບ ໄດ້ຊ່ວຍໂຜດຊີວິດຄອບຄົວຂອງຢາໂຄບ. ແຕ່ຫລັງຈາກຫລາຍຮ້ອຍປີ, ເຊື້ອສາຍຂອງເຂົາເຈົ້າໄດ້ກາຍເປັນຂ້າທາດ ແລະ ຖືກຂູ່ເຂັນໂດຍຟາໂຣອົງໃໝ່ “ຜູ້ບໍ່ຮູ້ເລື່ອງຫຍັງກ່ຽວກັບໂຢເຊັບ” (ອົບພະຍົບ 1:8). ມັນຄົງເປັນເລື່ອງປົກກະຕິສຳລັບຊາວອິດສະຣາເອນທີ່ຈະສົງໄສວ່າ ເປັນຫຍັງພຣະເຈົ້າຈຶ່ງປ່ອຍໃຫ້ສິ່ງນີ້ເກີດຂຶ້ນກັບເຂົາເຈົ້າ, ຜູ້ຄົນແຫ່ງພັນທະສັນຍາຂອງພຣະອົງ. ພຣະອົງຍັງຈື່ຈຳພັນທະສັນຍາທີ່ພຣະອົງໄດ້ເຮັດໄວ້ກັບເຂົາເຈົ້າຫລືບໍ່? ເຂົາເຈົ້າຍັງເປັນຜູ້ຄົນຂອງພຣະອົງຢູ່ບໍ? ພຣະອົງເຫັນຄວາມທຸກທໍລະມານຂອງເຂົາເຈົ້າຫລືບໍ່?

ຄົງມີເວລາເມື່ອທ່ານຮູ້ສຶກຢາກຖາມຄຳຖາມທີ່ຄ້າຍຄືກັນນີ້. ທ່ານອາດສົງໄສວ່າ, “ພຣະເຈົ້າຮູ້ຢູ່ບໍວ່າ ເຮົາກຳລັງປະເຊີນກັບສິ່ງໃດ? ພຣະອົງໄດ້ຍິນຄຳອ້ອນວອນຂໍຄວາມຊ່ວຍເຫລືອຂອງເຮົາຢູ່ບໍ?” ການປົດປ່ອຍຊາວອິດສະຣາເອນຈາກເອຢິບ ຕອບຄຳຖາມເຊັ່ນນັ້ນຢ່າງແຈ່ມແຈ້ງ ທີ່ວ່າ: ພຣະເຈົ້າບໍ່ໄດ້ລືມໄລຜູ້ຄົນຂອງພຣະອົງ. ພຣະອົງຈົດຈຳພັນທະສັນຍາຂອງພຣະອົງກັບເຮົາ ແລະ ຈະບັນລຸມັນໃນເວລາ ແລະ ໃນວິທີທາງຂອງພຣະອົງເອງ. “ເຮົາຈະຊ່ວຍກູ້ເອົາພວກເຈົ້າ,” ພຣະອົງປະກາດ. “ເຮົາແມ່ນພຣະຜູ້ເປັນເຈົ້າ ພຣະເຈົ້າຂອງພວກເຈົ້າ, ເຮົາຈະປົດປ່ອຍພວກເຈົ້າໃຫ້ເປັນອິດສະລະຈາກການເປັນທາດ [ຂອງພວກເຈົ້າ]” (ອົບພະຍົບ 6:6–7).

ສຳລັບພາບລວມຂອງພຣະທຳອົບພະຍົບ, ໃຫ້ເບິ່ງ “ອົບພະຍົບ” ໃນ ຄູ່ມືພຣະຄຳພີ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ອົບພະຍົບ 1–2

ພຣະເຈົ້າສາມາດທຳງານຜ່ານທາງເຮົາເພື່ອບັນລຸຈຸດປະສົງຂອງພຣະອົງ.

ແມ່ນຫຍັງທີ່ປະທັບໃຈທ່ານກ່ຽວກັບພວກຜູ້ຍິງທີ່ບັນຍາຍຢູ່ໃນ ອົບພະຍົບ 1–2? ພວກນາງໄດ້ຊ່ວຍບັນລຸແຜນຂອງພຣະເຈົ້າສຳລັບຜູ້ຄົນຂອງພຣະອົງແນວໃດ? ຄວາມພະຍາຍາມຂອງພວກນາງສິດສອນທ່ານຫຍັງແດ່ກ່ຽວກັບການຮັບໃຊ້ໃນວຽກງານຂອງພຣະເຈົ້າ?

ອົບພະຍົບ 1–3

ພຣະເຢຊູຄຣິດຄືພຣະຜູ້ປົດປ່ອຍຂອງເຮົາ.

ກ່ອນທ່ານເລີ່ມອ່ານອົບພະຍົບ, ທ່ານອາດຄິດກ່ຽວກັບຄວາມຍາກລຳບາກທີ່ທ່ານກຳລັງປະເຊີນຢູ່—ບາງສິ່ງທີ່ທ່ານຫວັງວ່າພຣະຜູ້ເປັນເຈົ້າຈະປົດປ່ອຍທ່ານ. ມີຖ້ອຍຄຳ ຫລື ວະລີໃດແດ່ຢູ່ໃນ ອົບພະຍົບ 1–3 ທີ່ຄ້າຍຄືກັນກັບການເປັນຊະເລີຍທາງວິນຍານ ຫລື ສິ່ງອື່ນໆທີ່ເຮົາປະເຊີນໃນທຸກວັນນີ້? ໃຫ້ສັງເກດວິທີທີ່ລູກຫລານອິດສະຣາເອນໄດ້ສະແຫວງຫາການປົດປ່ອຍນຳອີກ ແລະ ວ່າພຣະຜູ້ເປັນເຈົ້າໄດ້ຕອບສະໜອງແນວໃດ (ເບິ່ງ, ຍົກຕົວຢ່າງ, ອົບພະຍົບ 2:23–25; 3:7–8). ພຣະຜູ້ເປັນເຈົ້າໄດ້ “ສະເດັດມາເພື່ອປົດປ່ອຍ” ທ່ານແນວໃດ?

ຕະຫລອດພຣະທຳອົບພະຍົບ, ທ່ານອາດສັງເກດເຫັນບາງສິ່ງທີ່ຄ້າຍຄືກັນລະຫວ່າງໂມເຊ ແລະ ພຣະເຢຊູຄຣິດນຳອີກ (ເບິ່ງ ພຣະບັນຍັດສອງ 18:18–19; 1 ນີໄຟ 22:20–21). ຍົກຕົວຢ່າງ, ທ່ານເຫັນຫຍັງແດ່ທີ່ຄ້າຍຄືກັນລະຫວ່າງ ອົບພະຍົບ1:22; 2:1–10 ແລະ ມັດທາຍ 2:13–16? ຫລື ລະຫວ່າງ ປະຖົມມະການ 24:18 ແລະ ມັດທາຍ 4:1–2? ທ່ານຮູ້ສຶກວ່າພຣະຜູ້ເປັນເຈົ້າຢາກໃຫ້ທ່ານເຂົ້າໃຈຫຍັງແດ່ກ່ຽວກັບພຣະອົງເອງ ແລະ ອຳນາດຂອງພຣະອົງ?

ຊອກຫາສັນຍາລັກທີ່ເປັນພະຍານເຖິງພຣະເຢຊູຄຣິດ. “ທ່ານສາມາດ … ຊອກຫາຄວາມຄ້າຍຄືກັນກັບຊີວິດຂອງພຣະຜູ້ຊ່ວຍໃຫ້ລອດໃນຊີວິດຂອງສາດສະດາ ແລະ ຊາຍ ແລະ ຍິງທີ່ຊື່ສັດຄົນອື່ນໆ ຢູ່ໃນພຣະຄຳພີນຳອີກ. [ການເຮັດເຊັ່ນນັ້ນ] ຈະເປີດເຜີຍຄວາມຈິງກ່ຽວກັບພຣະຜູ້ຊ່ວຍໃຫ້ລອດ ໃນບ່ອນທີ່ທ່ານອາດມອງຂ້າມ” (ເບິ່ງ ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 7; ເບິ່ງ ໂຮເສອາ 12:10) ນຳອີກ.

ພວກຜູ້ຍິງກຳລັງດຶງກະຕ່າອອກຈາກແມ່ນ້ຳ — Faith at Water’s Edge [ສັດທາຢູ່ທີ່ແຄມນ້ຳ], ໂດຍ ແອນ ມາຣີ ໂອບອນ

ອົບພະຍົບ 3:1–6

ເຮົາສາມາດສະແດງຄວາມຄາລະວະຕໍ່ສິ່ງ ແລະ ສະຖານທີ່ສັກສິດ.

ທ່ານສາມາດນຶກເຖິງເວລາຕອນທີ່ບາງສິ່ງໄດ້ເຮັດໃຫ້ທ່ານເຕັມໄປດ້ວຍຄວາມຕົກຕະລຶງ ແລະ ຄວາມປະຫລາດໃຈໄດ້ບໍ? ທ່ານໄດ້ມີປະຕິກິລິຍາແນວໃດ? ທ່ານຈະບັນຍາຍອາລົມທີ່ທ່ານໄດ້ຮູ້ສຶກແນວໃດ?

ດ້ວຍມີສິ່ງນັ້ນຢູ່ໃນໃຈ, ໃຫ້ອ່ານຂະນະທີ່ທ່ານອ່ານ ອົບພະຍົບ 3:1–6. ແມ່ນຫຍັງທີ່ປະທັບໃຈທ່ານກ່ຽວກັບປະສົບການທີ່ດົນໃຈຂອງໂມເຊ? ໂມເຊໄດ້ເຮັດສິ່ງໃດເພື່ອສະແດງຄວາມຄາລະວະແດ່ພຣະເຈົ້າ? ທ່ານເຫັນການເຊື່ອມໂຍງຫຍັງແດ່ລະຫວ່າງການກະທຳ ແລະ ຄວາມຄາລະວະຂອງເພິ່ນຕໍ່ສິ່ງສັກສິດ?

ການອ່ານຂໍ້ເຫລົ່ານີ້ອາດກະຕຸ້ນທ່ານໃຫ້ຄິດກ່ຽວກັບສິ່ງສັກສິດ ແລະ ສະຖານທີ່ສັກສິດໃນຊີວິດຂອງທ່ານ. ເປັນຫຍັງມັນຈຶ່ງສັກສິດຕໍ່ທ່ານ? ທ່ານປະຕິບັດຕໍ່ມັນຢ່າງແຕກຕ່າງຈາກສິ່ງທຳມະດາແນວໃດ? ເພື່ອນຳພາການໄຕ່ຕອງຂອງທ່ານ, ທ່ານສາມາດອ້າງເຖິງພາກທີ່ມີຊື່ວ່າ “Remembering the Promises” ໃນຂ່າວສານຂອງແອວເດີ ເດວິດ ເອ ແບ໊ດນາ “Exceeding Great and Precious Promises” (Liahona, Nov. 2017, 91–93). ທ່ານອາດຮ້ອງເພງ ຫລື ຟັງເພງສວດທີ່ດົນໃຈຄວາມປະຫລາດໃຈ, ດັ່ງເຊັ່ນ “ຂ້າເຝົ້າພິສະຫວົງ” (ເພງສວດ ແລະ ເພງຂອງເດັກນ້ອຍ, 14) ແລະ ໄຕ່ຕອງວ່າແມ່ນຫຍັງກ່ຽວກັບພຣະກິດຕິຄຸນທີ່ເຮັດໃຫ້ທ່ານປະຫລາດໃຈ.

ແນ່ນອນ, ແມ່ນແຕ່ເມື່ອເຮົາໄດ້ມີປະສົບການທີ່ປະເສີດທາງວິນຍານ, ກໍຍັງມີອັນຕະລາຍໃນການບໍ່ເອົາຈິງເອົາຈັງກ່ຽວກັບສິ່ງສັກສິດ. ທ່ານຈະຫລີກລ້ຽງສິ່ງນີ້ແນວໃດ? ຕໍ່ໄປນີ້ແມ່ນຂ່າວສານສອງບົດທີ່ກ່າວເຖິງເລື່ອງນີ້; ໃຫ້ເລືອກບົດໜຶ່ງ, ແລະ ຊອກຫາຖ້ອຍຄຳທີ່ຊ່ວຍທ່ານ: Ulisses Soares, “In Awe of Christ and His Gospel” (Liahona, May 2022, 115–17); Gérald Caussé, “Is It Still Wonderful to You?” (Liahona, May 2015, 98–100).

ເບິ່ງ ຄຳສອນ ແລະ ພັນທະສັນຍາ 6:10–12; 63:64 ນຳອີກ.

ອົບພະຍົບ 3–4

ພຣະເຈົ້າປະທານອຳນາດໃຫ້ແກ່ຜູ້ທີ່ພຣະອົງເອີ້ນໃຫ້ເຮັດວຽກງານຂອງພຣະອົງ.

ທຸກວັນນີ້ເຮົາຮູ້ວ່າໂມເຊເປັນສາດສະດາ ແລະ ຜູ້ນຳທີ່ຍິ່ງໃຫຍ່. ແຕ່ໂມເຊບໍ່ໄດ້ເຫັນຕົວເອງວ່າເປັນແນວນັ້ນ ຕອນພຣະຜູ້ເປັນເຈົ້າເອີ້ນເພິ່ນເທື່ອທຳອິດ. ຂະນະທີ່ທ່ານອ່ານ ອົບພະຍົບ 3–4, ໃຫ້ຂຽນຄວາມເປັນຫ່ວງຂອງໂມເຊລົງໄວ້ ແລະ ວ່າພຣະຜູ້ເປັນເຈົ້າຕອບຮັບຕໍ່ແຕ່ລະຢ່າງແນວໃດ. ທ່ານພົບເຫັນຫຍັງແດ່ຢູ່ໃນບົດເຫລົ່ານີ້ ທີ່ອາດດົນໃຈທ່ານ ເມື່ອທ່ານຮູ້ສຶກບໍ່ພຽບພ້ອມ? ເມື່ອໃດແດ່ທີ່ທ່ານໄດ້ເຫັນພຣະເຈົ້າເສີມພະລັງໃຫ້ແກ່ທ່ານ ຫລື ຄົນອື່ນເພື່ອຈະເຮັດວຽກງານຂອງພຣະອົງ?

ເບິ່ງ “The Church Gives Us Opportunities to Assist in God’s Work” ໃນ “Church Organization” ຢູ່ໃນ Topics and Questions, ຫ້ອງສະມຸດພຣະກິດຕິຄຸນ.

ອົບພະຍົບ 5–6

ຈຸດປະສົງຂອງພຣະຜູ້ເປັນເຈົ້າຈະປະສົບຄວາມສຳເລັດໃນເວລາຂອງພຣະອົງເອງ.

ມັນສາມາດເປັນເລື່ອງທີ່ໜ້າທໍ້ຖອຍໃຈເມື່ອຄວາມພະຍາຍາມທີ່ຈິງໃຈທີ່ຈະເຮັດຄວາມດີຂອງເຮົາເບິ່ງຄືວ່າໃຊ້ການບໍ່ໄດ້—ເມື່ອເຮົາກຳລັງພະຍາຍາມຈະເຮັດຕາມພຣະປະສົງຂອງພຣະຜູ້ເປັນເຈົ້າ ແຕ່ເຮົາບໍ່ເຫັນຜົນຮັບທີ່ໄດ້ຄາດຫວັງ. ເພື່ອຮຽນຮູ້ກ່ຽວກັບທີ່ຄ້າຍຄືກັນທີ່ໂມເຊໄດ້ປະເຊີນ, ໃຫ້ອ່ານ ອົບພະຍົບ 5:4–9, 20–23. ພຣະຜູ້ເປັນເຈົ້າໄດ້ຊ່ວຍໂມເຊເອົາຊະນະຄວາມຮູ້ສຶກທໍ້ຖອຍໃຈຂອງເພິ່ນແນວໃດ? (ເບິ່ງ ອົບພະຍົບ 6:1–13). ພຣະຜູ້ເປັນເຈົ້າໄດ້ຊ່ວຍທ່ານໃຫ້ທົນກັບການເຮັດຕາມພຣະປະສົງຂອງພຣະອົງແນວໃດ?

ເບິ່ງ Jeffrey R. Holland, “Waiting on the Lord,” Liahona, Nov. 2020, 115–17 ນຳອີກ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ເພາະວັນອາທິດນີ້ເປັນວັນອາທິດທີຫ້າຂອງເດືອນ, ຄູສອນປະຖົມໄວຖືກຊຸກຍູ້ໃຫ້ນຳໃຊ້ກິດຈະກຳການຮຽນຮູ້ທີ່ຢູ່ໃນ “ພາກຫ້ອຍທ້າຍ ຂ: ການກະກຽມເດັກນ້ອຍໃຫ້ຢູ່ໃນເສັ້ນທາງແຫ່ງພັນທະສັນຍາຂອງພຣະເຈົ້າໄປຕະຫລອດຊີວິດ.”

ອົບພະຍົບ 1–2

ພຣະເຈົ້າສາມາດທຳງານຜ່ານທາງເຮົາເພື່ອບັນລຸຈຸດປະສົງຂອງພຣະອົງ.

ໂມເຊໄດ້ມີບົດບາດທີ່ຍິ່ງໃຫຍ່ໃນການປົດປ່ອຍຊາວອິດສະຣາເອນຈາກຄວາມເປັນທາດ. ແຕ່ເພິ່ນຈະບໍ່ສາມາດສຳເລັດສິ່ງນີ້ໄດ້ ຖ້າແມ່ຂອງເພິ່ນ, ເອື້ອຍຂອງເພິ່ນ, ລູກສາວຂອງຟາໂຣ, ແລະ ພວກຜູ້ຍິງທີ່ຊື່ສັດຄົນອື່ນໆບໍ່ໄດ້ປົກປ້ອງ ແລະ ດູແລເພິ່ນ. ຊ່ວຍລູກໆຂອງທ່ານຮຽນຮູ້ກ່ຽວກັບພວກຜູ້ຍິງເຫລົ່ານີ້ໃນ ອົບພະຍົບ 1:15–20; ອົບພະຍົບ 2:2–10 (ເບິ່ງ ຈົດບັນຊີ 26:59); ແລະ ອົບພະຍົບ 2:16–21 ນຳອີກ. ທ່ານຍັງສາມາດໃຊ້ໜ້າກິດຈະກຳຂອງອາທິດນີ້ ແລະ “ແອນ້ອຍໂມເຊ” (ໃນ ເລື່ອງພຣະຄຳພີເດີມ, 61–63) ເພື່ອເລົ່າເລື່ອງລາວຂອງພວກເພິ່ນນຳອີກ. ພວກຜູ້ຍິງເຫລົ່ານີ້ຊ່ວຍບັນລຸແຜນຂອງພຣະເຈົ້າແນວໃດ? ເວົ້າລົມນຳກັນກ່ຽວກັບຄົນອື່ນທີ່ທ່ານຊົມເຊີຍ ຜູ້ທີ່ຊ່ວຍໃນວຽກງານຂອງພຣະເຈົ້າ, ລວມທັງໃນວິທີທີ່ເລັກນ້ອຍ ແລະ ລຽບງ່າຍ. ເຮົາຈະເຮັດຕາມຕົວຢ່າງຂອງເຂົາເຈົ້າແນວໃດ?

1:36
Baby Moses

ອົບພະຍົບ 3:1–5

ເຮົາສາມາດປະຕິບັດຕໍ່ສະຖານທີ່ສັກສິດດ້ວຍຄວາມຄາລະວະ.

ຫລັງຈາກໄດ້ອ່ານ ອົບພະຍົບ 3:1–5 ນຳກັນແລ້ວ, ຂໍໃຫ້ລູກໆຂອງທ່ານສະຫລຸບຂໍ້ເຫລົ່ານີ້ດ້ວຍຖ້ອຍຄຳຂອງພວກເຂົາເອງ (ເບິ່ງ “ສາດສະດາໂມເຊ” ໃນ ເລື່ອງພຣະຄຳພີເດີມ, 64–66). ໂມເຊສະແດງຄວາມຄາລະວະຕໍ່ການປະທັບຢູ່ຂອງພຣະຜູ້ເປັນເຈົ້າແນວໃດ? ພຣະຜູ້ເປັນເຈົ້າຢາກໃຫ້ເຮົາສະແດງຄວາມຄາລະວະແນວໃດ? ທ່ານອາດຂໍໃຫ້ລູກໆຂອງທ່ານຊ່ວຍທ່ານຊອກຫາ (ຫລື ແຕ້ມ) ຮູບສະຖານທີ່ ຫລື ກິດຈະກຳສັກສິດ ບ່ອນທີ່ເຮົາຄວນມີຄວາມຄາລະວະນຳອີກ. ເຮົາສາມາດເຮັດສິ່ງໃດແດ່ເພື່ອໃຫ້ບ້ານເຮືອນຂອງເຮົາເປັນສະຖານທີ່ສັກສິດ?

1:26
Moses the Prophet
ຮ້ອງເພງກ່ຽວກັບຄວາມຄາລະວະນຳກັນ, ເຊັ່ນ “ອະທິຖານແລ້ວບໍ່” (ເພງສວດ ແລະ ເພງຂອງເດັກນ້ອຍ, 52). ຂະນະທີ່ພວກທ່ານຮ້ອງເພງ, ລູກໆຂອງທ່ານສາມາດຊອກຫາຖ້ອຍຄຳ ຫລື ວະລີທີ່ອະທິບາຍວ່າ ຄວາມຄາລະວະໝາຍຄວາມວ່າແນວໃດ. ຖ້າຫາກເຮົາພາເພື່ອນຄົນໜຶ່ງມາໂບດເປັນເທື່ອທຳອິດ, ເຮົາຈະອະທິບາຍວ່າ ຄວາມຄາລະວະໝາຍຄວາມວ່າແນວໃດ?

Moses and Aaron Speak to the People [ໂມເຊ ແລະ ອາໂຣນກ່າວຕໍ່ຜູ້ຄົນ], ໂດຍ ເຈມສ໌ ເຈ ທີຊອດ

ອົບພະຍົບ 3–4

ເມື່ອພຣະຜູ້ເປັນເຈົ້າຂໍໃຫ້ເຮົາເຮັດບາງສິ່ງ, ພຣະອົງຈະຊ່ວຍເຫລືອເຮົາ.

ໂດຍການໃຊ້ເລື່ອງລາວຢູ່ໃນ ອົບພະຍົບ 3; 4:1–17, ໃຫ້ລູກໆຂອງທ່ານປ່ຽນຜຽນກັນທຳທ່າເປັນໂມເຊ. ມັນອາດເປັນເລື່ອງມ່ວນຊື່ນທີ່ຈະລວມທັງສິ່ງຂອງ ຫລື ເຄື່ອງຂອງທີ່ລຽບງ່າຍ, ເຊັ່ນໄຟສາຍ ແລະ ຕົ້ນໄມ້ເພື່ອເປັນຕົວແທນໃຫ້ແກ່ໄຟຢູ່ໃນກາງຟຸ່ມໄມ້. ຊ່ວຍລູກໆຂອງທ່ານໃຫ້ຄົ້ນພົບວ່າ ໂມເຊໄດ້ຮູ້ສຶກແນວໃດກ່ຽວກັບການມອບໝາຍທີ່ພຣະຜູ້ເປັນເຈົ້າໄດ້ມອບໃຫ້ເພິ່ນ (ເບິ່ງ ອົບພະຍົບ 3:11; 4:1, 10). ບາງທີພວກທ່ານສາມາດແບ່ງປັນນຳກັນເຖິງເວລາທີ່ພວກທ່ານໄດ້ມີຄວາມຮູ້ສຶກທີ່ຄ້າຍຄືກັນ. ເຮົາຈະແບ່ງປັນຄຳແນະນຳຫຍັງແດ່ກັບໂມເຊເພື່ອຊ່ວຍເພິ່ນ? ອ່ານກ່ຽວກັບວິທີທີ່ພຣະຜູ້ເປັນເຈົ້າໄດ້ໃຫ້ກຳລັງໃຈໂມເຊແນວໃດຢູ່ໃນ ອົບພະຍົບ 3:12; 4:2–9, 11–12. ບອກລູກໆວ່າພຣະຜູ້ຊ່ວຍໃຫ້ລອດໄດ້ຊ່ວຍທ່ານບັນລຸການເອີ້ນ, ເຮັດຕາມການກະຕຸ້ນ, ຫລື ເຮັດບາງສິ່ງທີ່ຍາກສຳລັບທ່ານແນວໃດ.

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

The Mother of Moses [ແມ່ຂອງໂມເຊ], ໂດຍ ຊີມຽນ ໂຊໂລມອນ

ໜ້າກິດຈະກຳປະຖົມໄວ: ເຮົາສາມາດໃຫ້ອະໄພ — The Mother of Moses [ແມ່ຂອງໂມເຊ], ໂດຍ ຊີມຽນ ໂຊໂລມອນ