“ວັນທີ 2–8 ເດືອນມີນາ. ‘ໃຫ້ພຣະເຈົ້າໄຊຊະນະ’,” ຈົ່ງຕາມເຮົາມາ—ສຳລັບບ້ານ ແລະ ໂບດ: ພຣະຄຳພີເດີມ 2026 (2026)

“ວັນທີ 2–8 ເດືອນມີນາ. ‘ໃຫ້ພຣະເຈົ້າໄຊຊະນະ’,” ຈົ່ງຕາມເຮົາມາ: 2026

Esau Sells His Birthright [ເອຊາວຂາຍສິດທິອ້າຍກົກຂອງເພິ່ນ], ໂດຍ ກະເລັນ ແອັສ ຮອບຄິນສັນ (ລາຍລະອຽດ)

ວັນທີ 2–8 ເດືອນມີນາ: “ໃຫ້ພຣະເຈົ້າໄຊຊະນະ”

ປະຖົມມະການ 24–33

ທ່ານຈະຮັກສາພອນຈາກພຣະເຈົ້າໄວ້ໃຫ້ຕົວທ່ານເອງແນວໃດ? ທ່ານອາດກ່າວວ່າເລື່ອງລາວຂອງຢາໂຄບ, ຫລານຊາຍຂອງອັບຣາຮາມ ແລະ ນາງຊາຣາ, ເປັນເລື່ອງລາວຂອງຊາຍຄົນໜຶ່ງທີ່ໄດ້ຮຽນຮູ້ຄຳຕອບຕໍ່ຄຳຖາມນັ້ນ. ໃນວັດທະນະທຳບ່ອນທີ່ລູກຊາຍກົກໄດ້ຮັບພອນຂອງສິດທິອ້າຍກົກ, ຢາໂຄບເກີດມາເປັນລູກຄົນທີສອງ, ຈັບສົ້ນໜ່ອງຂອງອ້າຍຝາແຝດຂອງເພິ່ນ, ເອຊາວ. ຊື່ “ຢາໂຄບ” ໝາຍຄວາມວ່າ “ຜູ້ທົດແທນ”—ຜູ້ທີ່ມາແທນຄົນອື່ນ. ຢາໂຄບໄດ້ດຳລົງຊີວິດສົມກັບຊື່ນັ້ນໂດຍການພະຍາຍາມ, ຫລາຍກວ່າໜຶ່ງເທື່ອ, ເພື່ອຈະທົດແທນເອຊາວໃນຖານະຜູ້ຮັບມໍລະດົກທີ່ເປັນພອນຂອງສິດທິອ້າຍກົກ ເພາະວ່າເອຊາວບໍ່ມີຄ່າຄວນທີ່ຈະໄດ້ຮັບມັນ (ເບິ່ງ ປະຖົມມະການ 25:30–34; 26:34–35; 27:36). ຜົນທີ່ຕາມມາຄືຄວາມບໍ່ປອງດອງກັນໃນຄອບຄົວ, ແລະ ຢາໂຄບຕ້ອງໄດ້ປົບໜີເພື່ອໃຫ້ລອດຊີວິດເຂົ້າໄປຢູ່ໃນຖິ່ນແຫ້ງແລ້ງກັນດານ.

ຫລາຍປີຕໍ່ມາ, ພຣະເຈົ້າໄດ້ບັນຊາຢາໂຄບໃຫ້ກັບຄືນບ້ານ. ລະຫວ່າງທາງ, ຢາໂຄບ, ໃນຄວາມຖ່ອມຕົວ, ໄດ້ສະແຫວງຫາພອນຈາກພຣະເຈົ້າອີກຄັ້ງ. ຂໍ້ພຣະຄຳພີບັນຍາຍເວລານີ້ວ່າເປັນການ “ປໍ້າສູ້” ສຳລັບຢາໂຄບ, ແລະ ເພິ່ນໄດ້ປະກາດວ່າ ເພິ່ນຈະບໍ່ປ່ອຍ “ຈົນກວ່າເຈົ້າຈະອວຍພອນຂ້ອຍ” (ປະຖົມມະການ 32:26). ແລ້ວບົດຮຽນກໍໄດ້ມີມາ—ແລະ ພອນ. ພຣະເຈົ້າໄດ້ປ່ຽນຊື່ຂອງຢາໂຄບເປັນ ອິດສະຣາເອນ—ໝາຍຄວາມວ່າ, ໃນຖ່າມກາງສິ່ງອື່ນໆວ່າ “ໃຫ້ພຣະເຈົ້າໄຊຊະນະ.” ອິດສະຣາເອນໄດ້ຮຽນຮູ້ວ່າ ການທີ່ຈະໄດ້ຮັບພອນທີ່ມີຄ່າຫລາຍທີ່ສຸດຂອງພຣະເຈົ້າ, ພອນແຫ່ງພັນທະສັນຍາຂອງພຣະອົງ, ມັນບໍ່ຈຳເປັນຕ້ອງແຍ້ງຊີງເອົາຈາກຄົນອື່ນ. ພອນຂອງພຣະອົງນັ້ນຊື້ບໍ່ໄດ້ ຫລື ຍຶດເອົາ ຫລື ຊະນະມາບໍ່ໄດ້. ພຣະອົງປະທານໃຫ້ໂດຍບໍ່ຄິດຄ່າກັບທຸກຄົນທີ່ດຳລົງຊີວິດໃຫ້ຄູ່ຄວນກັບຊື່ຂອງອິດສະຣາເອນ—ທີ່ປ່ອຍໃຫ້ພຣະເຈົ້າໄຊຊະນະໃນຊີວິດຂອງເຂົາເຈົ້າ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ປະຖົມມະການ 24

ການແຕ່ງງານແຫ່ງພັນທະສັນຍາແມ່ນຈຳເປັນຕໍ່ແຜນນິລັນດອນຂອງພຣະເຈົ້າ.

ໃນຂະນະທີ່ອ່ານ ປະຖົມມະການ 24, ໃຫ້ຖາມຕົວທ່ານເອງວ່າ ເປັນຫຍັງອັບຣາຮາມຈຶ່ງໄດ້ຖືການແຕ່ງງານຂອງອີຊາກ ລູກຊາຍຂອງເພິ່ນ ວ່າເປັນເລື່ອງສຳຄັນ. ເປັນຫຍັງການແຕ່ງງານຈຶ່ງສຳຄັນຕໍ່ພຣະເຈົ້າ?

ທ່ານພົບເຫັນຄຸນສົມບັດໃດແດ່ຂອງນາງເຣເບກາ ທີ່ເປັນສ່ວນປະກອບຂອງການແຕ່ງງານ ແລະ ຄອບຄົວທີ່ເຂັ້ມແຂງ? (ເບິ່ງ ໂດຍສະເພາະ ຂໍ້ທີ 15–28, 57–61).

ເບິ່ງ Topics and Questions, “Marriage,” ຫ້ອງສະໝຸດພຣະກິດຕິຄຸນ ນຳອີກ.

ປະຖົມມະການ 25:29–34

ເຮົາສາມາດໃຫ້ຄຸນຄ່າສິ່ງນິລັນດອນຫລາຍກວ່າສິ່ງຂອງທາງໂລກ.

ໃນວັດທະນະທຳຂອງອີຊາກ ແລະ ນາງເຣເບກາ, ລູກຊາຍກົກໄດ້ຮັບສິດທິອ້າຍກົກ, ຊຶ່ງໝາຍເຖິງການໄດ້ຮັບມໍລະດົກທີ່ຫລາຍກວ່າ, ພ້ອມທັງໜ້າທີ່ຮັບຜິດຊອບທີ່ມີຫລາຍຂຶ້ນ ເພື່ອຈະດູແລຄອບຄົວ. ຂະນະທີ່ທ່ານອ່ານ ປະຖົມມະການ 25:29–34, ໃຫ້ໄຕ່ຕອງວ່າ ເປັນຫຍັງເອຊາວອາດເຕັມໃຈທີ່ຈະສະລະສິດທິອ້າຍກົກຂອງເພິ່ນ ເພື່ອແລກກັບອາຫານຄາບດຽວ. ທ່ານພົບເຫັນບົດຮຽນຫຍັງແດ່ສຳລັບຕົວທ່ານເອງ ຢູ່ໃນເລື່ອງລາວນີ້? ມັນອາດມີປະໂຫຍດທີ່ຈະຂຽນລາຍການ: (1) ພອນນິລັນດອນທີ່ພຣະເຈົ້າຢາກປະທານໃຫ້ທ່ານ ແລະ (2) ສິ່ງຂອງທາງໂລກທີ່ອາດລົບກວນທ່ານ. ແລ້ວທ່ານສາມາດອ່ານຂໍ້ພຣະຄຳພີ, ເອົາ “ສິດທິອ້າຍກົກ” ມາແທນບາງສິ່ງຈາກລາຍການທີໜຶ່ງ ແລະ ເອົາ “ແກງໝາກຖົ່ວ” ໃສ່ແທນບາງສິ່ງຈາກລາຍການທີສອງ. ທ່ານຈະສຸມໃຈໃສ່ພຣະຜູ້ຊ່ວຍໃຫ້ລອດ ແລະ ພອນນິລັນດອນຂອງພຣະກິດຕິຄຸນຂອງພຣະອົງແນວໃດ?

ເບິ່ງ ມັດທາຍ 6:19–33; M. Russell Ballard, “Remember What Matters Most,” Liahona, May 2023, 105–7 ນຳອີກ.

Jacob at Bethel [ຢາໂຄບຢູ່ທີ່ເບັດເອນ], ໂດຍ ເຈມສ໌ ສະແມັດແຮມ

ປະຖົມມະການ 28

ພັນທະສັນຍາຂອງວິຫານຂອງພຣະຜູ້ເປັນເຈົ້ານຳອຳນາດຂອງພຣະເຈົ້າມາສູ່ຊີວິດຂອງເຮົາ.

ໃນຂະນະທີ່ໃຊ້ກ້ອນຫີນໝູນຕາງໝອນ, ຢາໂຄບໄດ້ມີຄວາມຝັນທີ່ປ່ຽນແປງຊີວິດ. ມັນເປັນປະສົບການສັກສິດຈົນຢາໂຄບໄດ້ຕັ້ງຊື່ໃຫ້ທີ່ນັ້ນວ່າ ເບັດເອນ, ຫລື “[ບ້ານ] ຂອງພຣະເຈົ້າ,” ໂດຍປະກາດວ່າ, “[ພຣະຜູ້ເປັນເຈົ້າ] ສະຖິດຢູ່ບ່ອນນີ້ແທ້ໆ” (ປະຖົມມະການ 28:16).

ຂະນະທີ່ທ່ານອ່ານ ປະຖົມມະການ 28, ທ່ານອາດຖາມຕົວເອງວ່າ ແມ່ນຫຍັງໄດ້ເຮັດໃຫ້ປະສົບການນັ້ນສັກສິດຕໍ່ຢາໂຄບ. ເພິ່ນກຳລັງປະເຊີນກັບສິ່ງໃດຢູ່ໃນເວລານັ້ນ? ເພິ່ນອາດໄດ້ມີຄວາມຮູ້ສຶກແນວໃດ? ທ່ານຍັງສາມາດຊອກຫາຖ້ອຍຄຳ ແລະ ວະລີ ຢູ່ໃນ ຂໍ້ທີ 10–22 ທີ່ເຕືອນໃຈທ່ານເຖິງບ້ານຂອງພຣະຜູ້ເປັນເຈົ້າ. ທ່ານໄດ້ຮັບຄວາມປະທັບໃຈຢ່າງໃດແດ່ກ່ຽວກັບພຣະເຈົ້າ, ບ້ານຂອງພຣະອົງ, ແລະ ພັນທະສັນຍາຂອງພຣະອົງ?

ໃນທ້າຍຂອງໂຄງຮ່າງນີ້ແມ່ນຮູບພາບທີ່ບັນຍາຍເຖິງຄວາມຝັນຂອງຢາໂຄບ; ທ່ານອາດອ້າງເຖິງມັນຂະນະທີ່ທ່ານອ່ານ. ຖ້າຫາກທ່ານຈະແຕ່ງການບັນຍາຍທາງສິລະປະຂອງທ່ານເອງເຖິງຄວາມຝັນຂອງເພິ່ນ, ທ່ານຈະເຮັດຫຍັງແດ່? ມີຄວາມຈິງຫຍັງແດ່ຈາກເລື່ອງລາວທີ່ທ່ານຈະພະຍາຍາມສະແດງໃຫ້ເຫັນ?

ເພງສວດ “Nearer, My God, to Thee” (Hymns, no. 100) ແມ່ນອີງຕາມປະສົບການຂອງຢາໂຄບ. ທ່ານເຫັນການເຊື່ອມໂຍງຫຍັງແດ່ລະຫວ່າງເພງນີ້ ແລະ ປະຖົມມະການ 28:10–22? ພຣະວິຫານຊ່ວຍໃຫ້ທ່ານຮູ້ສຶກວ່າຢູ່ໃກ້ພຣະເຈົ້າຫລາຍຂຶ້ນແນວໃດ? ໃຫ້ພິຈາລະນາທີ່ຈະຊອກຫາຄຳຕອບຕໍ່ຄຳຖາມນີ້ຢູ່ໃນຂ່າວສານຂອງປະທານຣະໂຊ ເອັມ ແນວສັນ “The Temple and Your Spiritual Foundation” (Liahona, Nov. 2021, 93–96). ທ່ານອາດຍັງຢາກທົບທວນພັນທະສັນຍາ ແລະ ພອນຂອງບ້ານຂອງພຣະຜູ້ເປັນເຈົ້ານຳອີກ ຄູ່ມືທົ່ວໄປ, 27.2 (ຫ້ອງສະໝຸດພຣະກິດຕິຄຸນ). ການຮັກສາພັນທະສັນຍາເຫລົ່ານີ້ນຳອຳນາດຂອງພຣະເຈົ້າມາສູ່ຊີວິດຂອງທ່ານແນວໃດ?

ມີຄວາມຄິດສ້າງສັນ. ມີຫລາຍວິທີທາງທີ່ຈະຮຽນຮູ້ຈາກພຣະຄຳພີນອກເໜືອໄປຈາກພຽງແຕ່ການອ່ານມັນເທົ່ານັ້ນ. ບາງຄົນພົບເຫັນວ່າ ເຂົາເຈົ້າເຂົ້າໃຈພຣະຄຳພີດີຂຶ້ນຖ້າຫາກເຂົາເຈົ້າແຕ້ມຮູບຂອງເລື່ອງລາວນັ້ນ. ອີກບາງຄົນພົບເຫັນຄວາມຮູ້ແຈ້ງທາງວິນຍານໃນເພງສັກສິດທີ່ກ່ຽວພັນກັບພຣະຄຳພີ. ຢ່າຈຳກັດຕົວທ່ານເອງຢູ່ກັບການຮຽນຮູ້ໃນວິທີທາງດຽວ; ໃຫ້ເປີດໃຈລອງຮຽນຮູ້ໃນຫລາກຫລາຍວິທີ.

ປະຖົມມະການ 29:31–35; 30:1–24

ພຣະຜູ້ເປັນເຈົ້າຈື່ຈຳເຮົາໃນການທົດລອງຂອງເຮົາ.

ຂະນະທີ່ທ່ານອ່ານ ປະຖົມມະການ 29:31–35 ແລະ 30:1–24, ໃຫ້ຊອກຫາຄຳທີ່ບັນຍາຍເຖິງຄວາມເມດຕາຂອງພຣະເຈົ້າ ຕໍ່ນາງຣາເຊັນ ແລະ ນາງເລອາ. ໃຫ້ໄຕ່ຕອງວິທີທີ່ພຣະເຈົ້າໄດ້ “ເຫັນຄວາມທຸກລຳບາກ [ຂອງທ່ານ]” ແລະ “[ຈື່ຈຳ]” ທ່ານແນວໃດ (ປະຖົມມະການ 29:32; 30:22).

ປະຖົມມະການ 32–33

ພຣະຜູ້ຊ່ວຍໃຫ້ລອດສາມາດປິ່ນປົວຄອບຄົວຂອງເຮົາ.

ຂະນະທີ່ຢາໂຄບກັບຄືນໄປຍັງດິນແດນການາອານ, ເພິ່ນ “ຢ້ານ ແລະ ອຸກໃຈ” ບໍ່ຮູ້ວ່າ, ເອຊາວ, ອ້າຍຂອງເພິ່ນຈະຕ້ອນຮັບເພິ່ນແນວໃດ (ປະຖົມມະການ 32:7). ຂະນະທີ່ທ່ານອ່ານ ປະຖົມມະການ 32–33, ໃຫ້ໄຕ່ຕອງຄວາມສຳພັນຂອງຄອບຄົວຂອງທ່ານເອງ—ບາງທີໂດຍສະເພາະຄວາມສຳພັນທີ່ຕ້ອງການການປິ່ນປົວ. ບາງທີເລື່ອງນີ້ສາມາດດົນໃຈທ່ານໃຫ້ເອື້ອມອອກໄປຫາບາງຄົນ. ຄຳຖາມແບບດັ່ງຕໍ່ໄປນີ້ສາມາດນຳພາການອ່ານຂອງທ່ານ:

ຢາໂຄບກະກຽມທີ່ຈະພົບກັບເອຊາວແນວໃດ?
ສິ່ງໃດທີ່ເດັ່ນພິເສດຕໍ່ທ່ານກ່ຽວກັບຄຳອະທິຖານຂອງຢາໂຄບ ຢູ່ໃນ ປະຖົມມະການ 32:9–12?
ທ່ານຮຽນຮູ້ຫຍັງແດ່ກ່ຽວກັບການໃຫ້ອະໄພຈາກຕົວຢ່າງຂອງເອຊາວ?
ພຣະຜູ້ຊ່ວຍໃຫ້ລອດສາມາດຊ່ວຍເຮົາປິ່ນປົວຄວາມສຳພັນໃນຄອບຄົວຂອງເຮົາແນວໃດ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ປະຖົມມະການ 24:10–21

ເຮົາສາມາດມີເມດຕາຕໍ່ຄົນອື່ນ.

ເພື່ອສະແດງໃຫ້ເຫັນຕົວຢ່າງຂອງຄວາມເມດຕາທີ່ໜ້າປະທັບໃຈຂອງນາງເຣເບກາ, ທ່ານສາມາດສະແດງຮູບພາບທີ່ຢູ່ຂ້າງລຸ່ມ ຫລື ໃນໜ້າກິດຈະກຳຂອງອາທິດນີ້ ຂະນະທີ່ທ່ານສະຫລຸບເລື່ອງລາວຢູ່ໃນ ປະຖົມມະການ 24:10–21. ລູກໆຂອງທ່ານອາດມ່່ວນຊື່ນກັບການສະແດງຕາມເລື່ອງລາວ. ນີ້ອາດນຳໄປສູ່ການສົນທະນາກ່ຽວກັບການກະທຳທີ່ມີເມດຕາທີ່ທ່ານ ແລະ ລູກໆຂອງທ່ານໄດ້ເຫັນມາ.
ໃຫ້ຄິດທີ່ຈະຮ້ອງເພງກ່ຽວກັບຄວາມເມດຕາ, ເຊັ່ນ “ຄວາມເມດຕາເລີ່ມຈາກເຮົາ” (ເພງສວດ ແລະ ເພງຂອງເດັກນ້ອຍ, 69). ລູກໆຂອງທ່ານສາມາດຟັງເພື່ອຫາຄຳທີ່ວ່າ “ຄວາມເມດຕາ” (ຫລື ຄຳທີ່ຄ້າຍຄືກັນ) ແລະ ຢືນຂຶ້ນເມື່ອພວກເຂົາໄດ້ຍິນຄຳນັ້ນ. ເຮົາສາມາດເປັນຄົນມີເມດຕາເໝືອນດັ່ງນາງເຣເບກາໄດ້ແນວໃດ?

ຮູບພາບຂອງນາງເຣເບກາ — Old Testament Heroes [ວິລະຊົນໃນພຣະຄຳພີເດີມ], ໂດຍ ດຽວລີນ ມາສ໌ (ລາຍລະອຽດ)

ປະຖົມມະການ 25:21–34

ສິ່ງນິລັນດອນແມ່ນສຳຄັນກວ່າສິ່ງຂອງທາງໂລກ.

ໃຫ້ພິຈາລະນາທີ່ຈະໃຊ້ “ຢາໂຄບ ແລະ ເອຊາວ” (ໃນ ເລື່ອງພຣະຄຳພີເດີມ, 38–41) ເພື່ອຊ່ວຍລູກໆຂອງທ່ານໃຫ້ເຂົ້າໃຈເລື່ອງລາວໃນ ປະຖົມມະການ 25:21–34. ບາງທີລູກໆຂອງທ່ານສາມາດຈິນຕະນາການວ່າ ເອຊາວໄດ້ຂໍຄຳແນະນຳຈາກພວກເຂົາກ່ຽວກັບວ່າ ເພິ່ນຄວນເອົາສິດທິອ້າຍກົກແລກກັບແກງໝາກຖົ່ວຫລືບໍ່. ພວກເຂົາຈະບອກຫຍັງກັບເພິ່ນ?

2:5
Jacob and Esau
ແມ່ນຫຍັງເປັນສິ່ງສຳຄັນຊົ່ວນິລັນດອນຕໍ່ທ່ານ ແລະ ລູກໆຂອງທ່ານ? ບາງທີລູກໆຂອງທ່ານສາມາດພົບເຫັນຮູບພາບ ຫລື ສິ່ງຂອງທີ່ເປັນຕົວແທນໃຫ້ແກ່ສິ່ງເຫລົ່ານີ້. ເຮົາຈະສະແດງໃຫ້ພຣະຜູ້ເປັນເຈົ້າເຫັນວ່າສິ່ງເຫລົ່ານີ້ສຳຄັນຕໍ່ເຮົາໄດ້ແນວໃດ?

ປະຖົມມະການ 28:10–22

ພັນທະສັນຍາຊ່ວຍເຮົາກັບຄືນໄປຫາພຣະບິດາເທິງສະຫວັນ.

ຂະນະທີ່ພວກທ່ານອ່ານ ປະຖົມມະການ 28:10–22 ນຳກັນ, ທ່ານສາມາດໃຊ້ຂັ້ນໄດ ຫລື ຮູບຂັ້ນໄດ (ຫລື ຮູບພາບທີ່ຄືກັນກັບຮູບທີ່ຢູ່ທ້າຍໂຄງຮ່າງນີ້) ເພື່ອເວົ້າລົມກັນກ່ຽວກັບວິທີທີ່ພັນທະສັນຍາຂອງເຮົາເປັນເໝືອນດັ່ງຂັ້ນໄດແນວໃດ. ບາງທີລູກໆຂອງທ່ານສາມາດທຳທ່າປີນຂັ້ນໄດ, ແລະ ດ້ວຍແຕ່ລະຂັ້ນ, ເວົ້າລົມກ່ຽວກັບເວລາຕອນທີ່ເຮົາສັນຍາຈະເຊື່ອຟັງພຣະເຈົ້າ, ເຊັ່ນຕອນທີ່ເຮົາໄດ້ຮັບບັບຕິສະມາ, ຮັບສ່ວນສິນລະລຶກ, ຫລື ໄປພຣະວິຫານ. ພັນທະສັນຍາຂອງເຮົານຳເຮົາໃຫ້ເຂົ້າໃກ້ພຣະເຈົ້າຫລາຍກວ່າເກົ່າແນວໃດ?

ປະຖົມມະການ 32:6–11; 33:1–4

ພຣະບິດາເທິງສະຫວັນ ແລະ ພຣະເຢຊູຄຣິດສາມາດຊ່ວຍໃຫ້ເຮົາຮັກຄອບຄົວຂອງເຮົາ.

ເພື່ອແນະນຳຂໍ້ເຫລົ່ານີ້, ທ່ານອາດອະທິບາຍວ່າ ຫລັງຈາກເວລາຫລາຍປີຂອງຄວາມຄຽດແຄ້ນຂົມຂື່ນ, ຢາໂຄບກຳລັງຈະໄປພົບເອຊາວອີກຄັ້ງ. ອ່ານ ປະຖົມມະການ 32:6–11 ນຳກັນ. ຢາໂຄບໄດ້ຮູ້ສຶກແນວໃດ? ເພິ່ນໄດ້ເຮັດສິ່ງໃດ ເພື່ອຈະໄດ້ຮັບຄວາມຊ່ວຍເຫລືອ? ອ່ານ ປະຖົມມະການ 33:1–4 ນຳກັນ ເພື່ອຄົ້ນພົບວ່າ ພຣະຜູ້ເປັນເຈົ້າໄດ້ຕອບຄຳອະທິຖານຂອງຢາໂຄບແນວໃດ? ຖ້າຫາກຢາໂຄບ ແລະ ເອຊາວສາມາດເວົ້າກັບເຮົາໃນທຸກວັນນີ້, ພວກເພິ່ນຈະເວົ້າຫຍັງ ເພື່ອຊ່ວຍເຫລືອເຮົາ ເມື່ອມີການຜິດຖຽງກັນຢູ່ໃນຄອບຄົວຂອງເຮົາ?

ສຳລັບຂໍ້ມູນເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຢາໂຄບກຳລັງຝັນເຖິງຂັ້ນໄດ ແລະ ທູດສະຫວັນທີ່ກຳລັງລົງມາຈາກສະຫວັນ — Jacob’s Dream [ຄວາມຝັນຂອງຢາໂຄບ], ໂດຍ ເຈ ເຄັນ ສະເປັນເຊີ

ໜ້າກິດຈະກຳປະຖົມໄວ: ເຮົາສາມາດມີເມດຕາຕໍ່ຄົນອື່ນ — Jacob’s Dream [ຄວາມຝັນຂອງຢາໂຄບ], ໂດຍ ເຈ ເຄັນ ສະເປັນເຊີ