Exodo 1–6

Ano ang nanamian mo sa mga babayi nga ginalaragway sa Exodo 1–2? Paano nila ginbuligan nga matuman ang plano sang Dios para sa Iya katawhan? Ano ang ginatudlo sa imo sang ila mga paghimakas parte sa pagserbisyo sa buluhaton sang Ginuo?

Antes mo sugdan ang pagbasa sang Exodo, basi pwede ka magpanumdom sang kabudlayan nga imo ginaagyan—isa nga ginalauman mo nga ang Ginuo magahilway sa imo. Ano nga mga tinaga kag mga dinalan sa Exodo 1–3 ang kaanggid pamatian sa espirituhanon nga pagkabihag kag iban pa nga mga butang nga ginaatubang naton sa karon? Tandai kon paano ang mga anak sang Israel nagpangayo sang kahilwayan kag kon ano ang sabat sang Ginuo (tan-awa, halimbawa sa, Exodo 2:23–25; 3:7–8). Paano ang Ginuo “nagpanaog sa pagluwas” sa imo?

Sa bilog nga libro sang Exodo, mahimo mo man matalupangdan ang pila ka mga pagpalareho ni Moises kag Jesucristo (tan-awa sa Deuteronomio 18:18–19; 1 Nefi 22:20–21). Halimbawa, ano nga mga pagpalareho ang imo makita sa Exodo 1:22; 2:1–10 kag Mateo 2:13–16? Ukon sa Exodo 24:18 kag Mateo 4:1–2? Ano sa pamatyag mo ang gusto ipahangop sa imo sang Ginuo parte sa Iya kag sa Iya gahum?

Makapanumdom ka bala sang tion nga napuno ka sang pagdayaw kag kahalawhaw? Ano ang imo ginhimo? Paano mo ilaragway ang mga emosyon nga imo nabatyagan?

Nga ginapanumdom ina, basaha ang Exodo 3:1–6. Ano ang nanamian mo sa makainspirar nga eksperiyensya ni Moises? Ano ang ginhimo ni Moises agud magpakita sang pagtahod sa Dios? Ano nga mga koneksyon ang makita mo sa iya mga aksyon kag pagtahod sa sagrado nga mga butang?

Ang pagbasa sining mga bersikulo makatulod sa imo sa pagpanumdom sang balaan nga mga butang kag balaan nga mga lugar sa imo kabuhi. Ngaa sagrado ang mga ini sa imo? Paano mo ginatrato ang mga ini nga lain sangsa mga butang nga kinaandan? Pwede ka man magkanta ukon mamati sa himno nga nagapukaw sang imo pagdayaw, pareho sang “I Stand All Amazed” (Hymns, no. 193) kag binagbinagon ko ano ang ara sa ebanghelyo nga nanamian mo gid kaayo.

Siyempre, bisan may manami kita katama nga espirituhanon nga mga eksperiyensya, may peligro gihapon kita nga mangin kaswal sa sagrado nga mga butang. Paano mo malikawan ini?

Tan-awa man sa Doktrina kag mga Kasugtanan 6:10–12; 63:64.

Sa karon ginakilala naton si Moises bilang bantog nga propeta kag lider. Pero indi amo sina ang pagkabig ni Moises sa iya kaugalingon sang una sia nga gintawag sang Ginuo. Samtang imo ginabasa ang Exodo 3–4, ilista kon ano ang mga kabalaka ni Moises kag kon paano ginsabat sang Ginuo ang kada isa. Ano ang imo makita sa sining mga kapitulo nga makainspirar sa imo kon pamatyag mo daw indi ka makasarang? San-o mo nakita ang Dios nga nagapabaskog sa imo ukon sa iban sa paghimo sang Iya buluhaton?

Makapaluya sang buot kon ang aton sinsero nga mga paghimakas sa paghimo sang maayo daw wala epekto—kon nagatinguha kita nga himuon ang pagbuot sang Ginuo pero indi naton makita ang ginapaabot nga mga resulta. Agud tun-an ang kaanggid nga eksperiyensya ni Moises, basaha ang Exodo 5:4–9, 20–23. Paano ginbuligan si Moises sang Ginuo nga daugon ang iya balatyagon sang kaluya sang buot? (tan-awa sa Exodo 6:1–13). Paano ka ginbuligan sang Ginuo nga magpadayon sa paghimo sang Iya pagbuot?

• Si Moises may dako nga papel sa paghilway sang Israel sa pagkaulipon. Pero wala niya kuntani ini nahimo kon ang iya nanay, iya utod nga babayi, bata nga babayi sang Faraon, kag iban pa nga matinuohon nga mga babayi wala nagprotekta kag nag-atipan sa iya. Buligi ang imo kabataan nga magtuon parte sining mga babayi sa Exodo 1:15–20; Exodo 2:2–10 (tan-awa man sa Numeros 26:59); kag Exodo 2:16–21. Pwede mo man gamiton ang pahina sang aktibidades sini nga semana kag “Ang Lapsag nga si Moises” (sa Mga Sugilanon sa Daan nga Katipan, 61–63) para isugid ang ila mga istorya. Paano ginbuligan sining mga babayi nga matuman ang plano sang Dios? Mag-istoryahanay parte sa iban nga tawo nga inyo ginadayaw nga nagabulig sa buluhaton sang Dios, dala na sa magagmay kag simple nga mga paagi. Paano naton sundon ang ila ehemplo?

  

  1:36

• Pagkatapos nga basahon ang Exodo 3:1–5 sing ululupod, pangabaya ang imo kabataan nga palip-oton ining mga bersikulo sa ila kaugalingon nga pulong (tan-awa man sa “Si Moises nga Propeta” sa Mga Sugilanon sa Daan nga Katipan, 64–66). Paano ginpakita ni Moises ang pagtahod sa presensya sang Ginuo? Paano gusto sang Ginuo nga ipakita naton ang pagtahod? Pwede mo man pangabayon ang imo kabataan nga buligan ka pangita (ukon drowing) sang mga larawan sang sagrado nga mga lugar ukon mga aktibidades kon diin dapat kita magmatinahuron. Ano ang pwede naton himuon agud ang aton balay mangin sagrado nga lugar?

  

  1:26

• Magkanta sing ululupod sang kanta parte sa pagtahod parehon sang “Reverence Is Love” (Children’s Songbook, 31). Mientras ginahimo ninyo ini, pwede nga pangitaon sang imo kabataan ang mga tinaga ukon dinalan nga nagapaathag kon ano ang buot silingon sang mangin matinahuron. Kon may dal-on kita nga abyan sa simbahan sa una nga tion, paano naton i-eksplikar ang kahulugan sang mangin matinahuron?

• Nga ginagamit ang sugilanon sa Exodo 3; 4:1–17, pabulos-bulosa ang imo kabataan nga mag-akto nga kuno abi si Moises. Basi masadya nga iupod ang mga bagay ukon simple nga mga kagamitan pareho sang flashflight kag tanom agud irepresentar ang nagadabadaba nga sapinit. Buligi ang imo kabataan nga diskubrehon kon ano ang balatyagon ni Moises parte sa buluhaton nga ginhatag sang Ginuo sa iya (tan-awa sa Exodo 3:11; 4:1, 10). Pwede ninyo iistorya sa isa kag isa ang mga tinion nga may amo man kamo sina nga mga balatyagon. Ano nga laygay ang aton ihatag kay Moises agud mabuligan sia? Basaha kon paano ginpaisog sang Ginuo si Moises sa Exodo 3:12; 4:2–9, 11–12. Sugiri ang kabataan kon paano ka ginbuligan sang Manluluwas nga tumanon ang isa ka calling, sundon ang isa ka pagpabatyag, ukon himuon ang isa ka butang nga mabudlay para sa imo.