“Marso 30–Abril 5. ‘Ginlamon Niya sing Dayon ang Kamatayon’: Paskwa sang Pagkabanhaw,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Marso 30–Abril 5. ‘Ginlamon Niya sing Dayon ang Kamatayon,’” Dali, Magsunod sa Akon: Daan nga Katipan 2026
Drowing sang wala unod nga lulubngan
Marso 30–Abril 5: “Ginlamon Niya sing Dayon ang Kamatayon”
Paskwa sang Pagkabanhaw
Ang kabuhi ni Jesucristo “amo ang sentro sang tanan nga kasaysayan sang tawo” (“Ang Buhi nga Cristo: Ang Panaksihon sang mga Apostoles,” Librarya sang Ebanghelyo). Ano ang kahulugan sina? Sa pila ka bahin, nagakahulugan ini nga ang kabuhi sang Manluluwas nagaimpluwensya sang wala katapusan nga kapalaran sang tagsa ka tawo nga nagkabuhi ukon magakabuhi pa. Mahimo nga masiling mo man nga ang Pagkabanhaw ni Jesucristo, sa sinang una nga Domingo sang Paskwa sang Pagkabanhaw nagakonekta sang tanan nga katawhan sang Dios sa bilog nga kasaysayan: ang mga natawo antes sang Iya Pagkabanhaw naghulat sini nga may pagtuo (tan-awa sa Jacob 4:4, kag ang mga natawo pagkatapos nagadumdom sini nga may pagtuo. Sa aton pagbasa sang mga panaysayon kag mga propesiya sa Daan nga Katipan, indi naton makita ang ngalan nga Jesucristo, pero makita naton ang ebidensya sang pagtuo sang dumaan nga mga tumuluo kag ang ila paghulat sa ila Mesias kag Manunubos. Gani kita nga ginaagda sa pagdumdom sa Iya makabatyag sang koneksyon sa ila nga naghulat sa Iya. Kay matuod gid nga ginpas-an ni Jesucristo “ang kalautan naton nga tanan” (Isaias 53:6; emphasis gindugang), kag “kay Cristo ang tanan buhion” (1 Mga Taga-Corinto 15:22; emphasis gindugang).
Mga Ideya sa Pagtuon sa Balay kag sa Simbahan
Ang mga propeta sang una kag subong nagapamatuod sa nagabayad-sala nga sakripisyo sang Manluluwas.
Madamo nga mga dinalan sa Daan nga Katipan ang nagatudlo sa pag-alagad kag nagabayad-sala nga sakripisyo sang Manluluwas. Ang tsart sa idalom nagalista sang pila sining mga dinalan. Samtang imo ginabasa ining mga bersikulo, ano nga mga panghunahuna ang nagaabot sa imo parte sa Manluluwas?
|
Daan nga Katipan |
Bag-ong Katipan |
|---|---|
Daan nga Katipan Zacarias 9:9 | Bag-ong Katipan Mateo 21:1–11 |
Daan nga Katipan Zacarias 11:12–13 | Bag-ong Katipan Mateo 26:14–16; 27:3–8 |
Daan nga Katipan Isaias 53:4 | Bag-ong Katipan Mateo 8:16–17; 26:36–39 |
Daan nga Katipan Isaias 53:7 | Bag-ong Katipan Marcos 14:60–61 |
Daan nga Katipan Salmo 22:16 | Bag-ong Katipan Juan 19:17–18; 20:25–27 |
Daan nga Katipan Salmo 22:18 | Bag-ong Katipan Mateo 27:35 |
Daan nga Katipan Salmo 69:21 | Bag-ong Katipan Mateo 27:34, 48 |
Daan nga Katipan Salmo 118:22 | Bag-ong Katipan Mateo 21:42 |
Daan nga Katipan Isaias 53:9, 12 | Bag-ong Katipan Mateo 27:57–60; Marcos 15:27–28 |
Daan nga Katipan Isaias 25:8 | Bag-ong Katipan Marcos 16:1–6; Lucas 24:6 |
Daan nga Katipan Daniel 12:2 | Bag-ong Katipan Mateo 27:52–53 |
Mas madamo pa gid kag klaro ang mga propesiya nga nagatudlo parte sa Manluluwas sa Libro ni Mormon. Pamensara kon paano ginpabakod ang imo pagtuo sang mga dinalan pareho sini: 1 Nefi 11:31–33; 2 Nefi 25:13; Mosias 3:2–11; Alma 7:10–13.
Ang mga propeta sa ulihing mga adlaw padayon nga nagahatag sang ila pinasahi nga saksi kay Jesucristo kag sa Iya misyon sang pagbayad-sala. Samtang nagapamati ka sa pangkabilogan nga komperensya sini nga Paskwa sang Pagkabanhaw, tandai ang mga testimonya parte kay Cristo nga imo mabatian. Ano ang ginatudlo sang mga ini sa imo parte sa Iya?
Si Jesucristo nagahatag sa akon sang kalinong kag kalipay.
Ang Paskwa sang Pagkabanhaw malipayon nga tion, tungod tion ini sa pagselebrar sang Pagbayad-Sala kag Pagkabanhaw sang Manluluwas. Pero, bisan sa tion sang Paskwa sang Pagkabanhaw, kadamo sang mga tawo nga wala nagakalipay sa nagkalainlain nga rason. Ano ang sarang mo himuon agud mapalapnag ang kalinong kag kalipay sang Manluluwas sini nga Paskwa sang Pagkabanhaw?
Isa ka ideya amo ang magpangita sang mga mensahe sa balaan nga mga kasulatan parte sa kalinong kag kalipay nga ginatanyag ni Jesucristo pareho sang mga ini: Mga Salmo 16:8–11; 30:2–5; Isaias 12; 25:8–9; 40:28–31; Juan 14:27; 16:33; Alma 26:11–22. Pamensara kon paano mo pwede ipakigbahin ining mga mensahe sa iban. Halimbawa, basi pwede ka maghimo sang Paskwa sang Pagkabanhaw nga mga kard para ipanghatag, base sa sining mga mensahe. Mangin mapangamuyuon parte sa kon sin-o ang nagakinahanglan nga magbaton sang imo panamyaw sa Paskwa sang Pagkabanhaw. Mahimo ka man magdesisyon nga ipakigbahin ang imo mga mensahe sa social media, kon sa diin madamo nga mga tawo ang makakita sini.
Ang mga himno parte kay Cristo kag sa Pagkabanhaw, pareho sang “He Is Risen!” (Hymns, no. 199), makabulig man sa aton mga makabatyag sang kalinong kag kalipay sa Paskwa sang Pagkabanhaw. Magpangita sang mga dinalan sa sinang himno, nga sa imo opinyon, nagalarawan sang kalipay sang Paskwa sang Pagkabanhaw.
Tan-awa man sa Jeffrey R. Holland, “Indi Subong sang Paghatag sang Kalibutan,” Liahona, Mayo 2021, 35–38.
Why Weepest Thou [Ngaa Nagahibi Ka], ni Simon Dewey (detalye)
Tungod sang Iya Pagbayad-Sala, may gahum si Jesucristo nga buligan ako nga malampuwasan ang sala, kamatayon, mga pagtilaw, kag mga kahuyang.
Ari ang isa ka aktibidades nga makabulig sa imo nga makita ang madamo nga mga bugay nga maangkon paagi kay Jesucristo kag Iya Pagbayad-Sala. Basaha ang balaan nga mga kasulatan sa idalom parte sa kon ano ang ginabuligan ni Jesucristo nga aton malampuwasan. Tilawi nga klasehon ang mga dinalan sa sini nga mga kategorya: sala, kamatayon, mga pagtilaw, kag mga kahuyang (ang pila ka mga dinalan mahimo nga bagay sa masobra isa ka kategorya). Samtang nagabasa ka, ano ang imo mga impresyon parte sa gahum sang Manluluwas?
-
Isaias 61:1–3
-
Ezequiel 36:26–28
-
Mateo 11:28–30
-
Lucas 1:46–55
-
Mga Taga-Roma 8:35–39
Paano mo ipaathag sa isa ka abyan nga indi Kristiyano kon ngaa importante si Jesucristo sa imo?
Ginbayran ni Jesucristo sang [Iya] kamatayon ang akon kaluwasan.
Ano ang matun-an mo sa masunod nga mga bersikulo parte sa bili nga ginbayran ni Jesucristo para sa imo kaluwasan: Isaias 53:3–5; Mosias 3:7; Doktrina kag mga Kasugtanan 19:16–19? Ano ang bili nga ginbayran sang Amay nga Langitnon? (tan-awa sa Juan 3:16).
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Nag-antos kag napatay si Jesucristo para sa akon.
-
Ang semana sang Paskwa sang Pagkabanhaw maayo nga tion para itudlo sa imo kabataan kon ano ang ginhimo sang Manluluwas para sa aton sa Getsemani kag sa krus. Mahimo mo sugdan paagi sa pagpakita sa ila sang mga litrato sa idalom kag pahambala sila kon ano ang nagakatabo sa mga litrato. Samtang nagatan-aw ang imo kabataan sa mga litrato, pwede mo basahon ang mga bersikulo nga nagalaragway sining mga hitabo (tan-awa sa Mateo 26:36–46; 27:35–50; Lucas 22:39–46; Juan 19:16–30). Mahimo itudlo sang imo kabataan ang mga detalye sa mga litrato nga mabatian nila nga ginamitlang sa mga bersikulo.
Wala: Christ in Gethsemane [Si Cristo sa Getsemani], ni Harry Anderson. Tuo: The Crucifixion [Ang Paglansang sa Krus], ni Harry Anderson
-
Paano kita ginbugayan tungod sang sakripisyo ni Jesucristo para sa aton? Buligi ang imo kabataan nga pangitaon ang mga tinaga kag mga dinalan nga nagasabat sining pamangkot sa Isaias 53:4–12; Alma 7:11–13; Doktrina kag mga Kasugtanan 19:16–19. Iistorya sa isa kag isa ang inyo nabatyagan parte sa Manluluwas pagkatapos mabasa ining balaan nga mga kasulatan.
Nabanhaw si Jesucristo para sa akon.
-
Mahimo mo gamiton ang pahina sang aktibidades sini nga semana ukon iban pa nga mga litrato sa sini nga outline para isugid sa imo kabataan ang istorya sang Pagkabanhaw. Dayon tugoti ang imo kabataan nga isugid liwat sa imo ang istorya.
-
Pamensara kon paano mo buligan ang imo kabataan nga makakita sang kalipay kay Cristo sini nga Paskwa sang Pagkabanhaw. Halimbawa, pwede kamo magkanta sang inyo paborito nga himno sa Paskwa sang Pagkabanhaw, pareho sang “Christ the Lord Is Risen Today” (Hymns, no. 200). Para magpangita sang iban pa nga kanta parte sa Pagkabanhaw, pwede kamo magtan-aw sa topical index sang Hymns kag Children’s Songbook. Pwede ninyo istoryahan sang imo kabataan kon ngaa nanamian kamo sini nga kanta kag kon ano ang inyo nabatyagan kon ginakanta ninyo ini. Ano ang ginatudlo sining mga kanta sa aton parte sa Amay nga Langitnon kag kay Jesucristo?
Ang kabataan sarang makabatyag sang Espiritu pero mahimo nga magakinahanglan sang bulig nga kilalahon ang Iya impluwensya. “Tudloi ang kabataan parte sa lainlain nga paagi nga nagapakighambal ang Espiritu sa aton. Buligi sila nga makilala ang Iya tingug kon nagapakighambal Sia sa ila. Mabuligan sila sini nga magpatubo sang pangginawi sa pagpangita kag pag-akto sa personal nga rebelasyon sa bilog nila nga kabuhi” (Pagtudlo sa Paagi sang Manluluwas, 32). Halimbawa, samtang nagakanta kamo sang imo kabataan sang mga kanta parte sa Manluluwas, nagatan-aw sang Iya mga litrato, ukon nagabasa sang mga istorya parte sa Iya, isugid sa isa kag isa ang inyo espirituhanon nga mga balatyagon.
Ang mga propeta nagapamatuod parte kay Jesucristo kag sa Iya Pagbayad-Sala.
-
Samtang ulupod kamo sang imo kabataan nga nagatan-aw sang pangkabilogan nga komperensya sini nga semana, buligi sila nga tandaan ang testimonya nga ginahatag sang pinasahi nga mga saksi sang Manluluwas parte sa Pagkabanhaw. Basi pwede kamo maghimo sang hampang parte sini—hagara sila nga magtindog tagsa nga mabatian nila ang mga tinaga pareho sang Paskwa sang Pagkabanhaw ukon Pagbayad-Sala ukon Pagkabanhaw. Isugid sa isa kag isa kon ngaa nagapasalamat kamo sa mga testimonya sang buhi nga mga propeta parte sa Manluluwas.
Para sa dugang nga mga ideya, tan-awa sa isyu sang Abyan nga magasin sini nga bulan.