Exodo 14–18

Samtang imo ginabasa ang Exodo 14:1–10, hunahunaa kon ano ayhan ang nabatyagan sang mga Israelnon sang nakita nila nga amat-amat sila nga ginapalibutan sang mga soldado ni Faraon. Siguro pamatyag mo kinahanglan mo sing milagro para malampuwasan ang mabudlay nga hangkat nga imo ginaatubang. Ano ang imo nakita sa Exodo 14:13–31 nga nagainspirar sa imo nga pangitaon ang gahum sang Dios sa imo kabuhi? Binagbinaga kon paano mo nakita ang Iya gahum sang nagligad. Ano ang imo natun-an parte sa Iya sa sining mga eksperiyensya?

Ang Exodo 15:1–19 isa ka kanta sang pagdayaw nga ginkanta sang mga Israelnon pagkatapos nga gintunga sang Ginuo ang Dagat nga Pula. Ano nga mga dinalan sa sining kanta ang makahulugan gid para sa imo? Basi may himno nga gusto mo kantahon sang ang Ginuo nakahimo sang butang nga dalayawon para sa imo pareho sang “Redeemer of Israel” (Hymns, no. 6). Pamensara nga kantahon ukon pamatian ini bilang parte sang imo pagsimba subong.

Tan-awa man sa Doktrina kag mga Kasugtanan 8:2–3.

Ang pagbasa parte sa pagpanglakaton sang Israel mahimo nga magtulod sa imo sa pagpanumdum sang mga butang sa imo kabuhi nga daw “mapait” pareho sa mga tubig sang Mara (tan-awa sa Exodo 15:22–27). Paano ginhimo sang Ginuo ang mga mapait sa imo kabuhi nga matam-is? Ano ang balor sining mga eksperiyensya sa imo kabuhi?

Makatalupangod ka sang dugang nga mga halimbawa sang mapait nga mga eksperiyensya para sa mga Israelnon sa Exodo 16 kag 17. Makapatentar ang magpakalain sang ila pagkumod ukon pagreklamo, pero samtang nagabasa ka, pamensara kon bala nakahimo ka man sang pareho nga butang. Ano ang imo matun-an sa mga eksperiyensya sang mga Israelnon nga makabulig sa imo nga buhinan ang pagkumod kag mas magsalig sa Dios? Ano ang ginatudlo sining mga bersikulo sa imo parte sa Dios?

Tan-awa man sa 1 Nefi 2:11–12.

Tungod kinahanglan naton tanan magkaon, masami ginakumparar sang Ginuo ang espirituhanon nga mga butang sa pagkaon. Pangitaa ang Iya espirituhanon nga mga leksyon sa mga eksperiyensya sang mga Israelnon parte sa mana sa Exodo 16. Halimbawa, ano ang makita mo sa mga sugo sang Ginuo sa Exodo 16:16, 19, 22–26 nga mapuslanon sa imo espirituhanon nga sustansya?

Para madiskubrehan ang iban pa nga mga leksyon nga basi gusto sang Ginuo nga imo matun-an paagi sini nga milagro, pamensara sing maayo ang pareho sini nga mga pamangkot:

• Ano ang ginahatag sa akon sang Ginuo nga pareho sa adlaw-adlaw nga mana nga ginhatag Niya sa mga Israelnon?

• Ano ang pwede ko mahimo nga pareho sa pagpanipon sang mana?

2:52

3:12

3:0

Magpanumdum sang iban pa nga mga butang, wala labot sang magkaon, nga ginahimo mo adlaw-adlaw. Ngaa ang pila ka butang kinahanglan himuon adlaw-adlaw agud mangin epektibo? Ano ang ginainspirar sa imo nga imo himuon para makakita sang espirituhanon nga mga eksperiyensya?

5:27

Pamensara ang Manluluwas samtang imo ginabasa ang Exodo 17:1–7. Sa ano si Jesucristo nangin daw pareho sang bato sa imo? (tan-awa sa Salmo 62:6–7; Helaman 5:12). Paano Sia mapaanggid sa tubig? (tan-awa sa Juan 4:10–14; 1 Mga Taga-Corinto 10:1–4; 1 Nefi 11:25).

Mahimo nga may mga tinion sa imo kabuhi nga daw pareho ka kay Moises—nga ang iban nagadepende sa imo, pero ang imo “mga kamot [ginakapoy]” (Exodo 17:12). Sa iban nga tinion, mahimo nga mas pareho ka kay Aaron, Hur, kag Jetro, nga nagsuporta kay Moises. Ibutang ang imo kaugalingon sa lugar sang tagsa sining mga tawo samtang imo ginabasa ang Exodo 17:8–16; 18:13–26, kag tan-awa kon ano ang ginatudlo sa imo sang Ginuo parte sa Iya buluhaton.

Tan-awa man sa Mosias 4:27; 18:8–9.

• Sang gintunga sang Ginuo ang Dagat nga Pula, nakita ni Moises kag sang mga Israelnon kon ano Sia kagamhanan. Pabuliga sa imo ang imo kabataan sa pagpanumdum sang masadya nga paagi sa pagdrama-drama sang istorya sa Exodo 14:5–22 (tan-awa man sa “Ang Pascua (Passover)” sa Mga Sugilanon sa Daan nga Katipan, 70–74). Basi pwede kamo magplastar sang mga bangko ukon mga habol kag “tungaon” ang mga ini pareho sang Dagat nga Pula. Dayon pwede ninyo iistorya sa isa kag isa kon paano ninyo nakita ang gahum sang Dios sa inyo mga kabuhi.

  

  2:54

• Ano ang ginadugang sang Doktrina kag mga Kasugtanan 8:2–3 sa imo paghangop sang istorya sa Exodo 14? Pamensara ang pagsugid sa imo kabataan parte sa eksperiyensya sang may ginhambal sa imo ang Balaan nga Espiritu sa imo hunahuna ukon tagipusuon, kag hagara sila nga iistorya ang ila mga eksperiyensya. Magkanta sang kanta parte sa Balaan nga Espiritu.

• Basi pwede kamo sang imo kabataan mag-inom sang matam-is kag mapait samtang ginatun-an ang Exodo 15:22–25 sing ululupod. Paano ginahimo sang Manluluwas ang “mapait” nga mga eksperiyensya sa aton mga kabuhi nga “matam-is”?

• Samtang ginabasa ninyo sang imo kabataan ang Exodo 15:23–25; 16:14–15; 17:1–6, pabuliga sila sa imo sa pagpangita sang mga bagay nga makabulig sa pagsugid sang tagsa ka sugilanon—pareho sang sanga (para sa pag-ayo sang tubig sa Mara), garapon ukon kolon (nga suludlan sang mana), kag bato (para sa tubig sa Horeb). Paano kita ginapadumdum sining mga istorya sang ginhimo ni Jesucristo para sa aton? Bilang bahin sang inyo paghambalanay, pwede ninyo basahon ang Mateo 7:24–27; Juan 4:10–14; 6:29–35, 48–51; Helaman 5:12; Doktrina kag mga Kasugtanan 20:77, 79.

• Samtang imo ginabasa ang Exodo 17:8–16, pwede mo hagaron ang imo kabataan nga alsahon paibabaw ang ila mga kamot. Kon kapuyon ang bata, ang iban nga kabataan mahimo magbulig pareho nga ginbuligan ni Aaron kag Hur si Moises. Ano ang ginatudlo sini nga istorya sa aton parte sa kon paano naton mabuligan ang ginharian sang Dios nga magmadinalag-on? Pwede man ninyo basahon ang Exodo 18:13–26 kag hambalan ang mabug-at nga mga responsibilidad sang mga tawo nga nagaserbe sa inyo ward. Ano ang mahimo naton karon agud buligan ang aton mga lider sa Simbahan pareho nga ginbuligan ni Aaron kag Hur ang propetang si Moises?