“Abril 20–26. ‘Ang Tanan nga Napamulong sang Ginuo Himuon Namon’: Exodo 19–20; 24; 31–34,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Abril 20–26. ‘Ang Tanan nga Napamulong sang Ginuo Himuon Namon,’” Dali, Magsunod sa Akon: Daan nga Katipan 2026
Moses and the Tablets [Si Moises kag ang mga Tapi-tapi nga Bato], ni Jerry Harston (detalye)
April 20–26: “Ang Tanan nga Napamulong sang Ginuo Himuon Namon”
Exodo 19–20; 24; 31–34
Bisan pa nga nagkumod sila kag nagduha-duha sang una, sang ginbasa ni Moises ang layi sa tiilan sang Bukid Sinai, naghimo sila sining kasugtanan: “Ang tanan nga napamulong sang Ginuo himuon namon, kag kami magmatinumanon” (Exodo 24:7). Dayon gintawag sang Dios si Moises sa bukid, nga ginasilingan sia nga magpatindog sang santuaryo “agud nga ako makapuyo sa tunga nila” (Exodo 25:8).
Pero samtang ato si Moises sa ibabaw sang bukid nga nagatuon kon paano makaupod sang mga Israelnon ang presensya sang Dios sa tunga nila, ang mga Israelnon sa idalom sang bukid nagahimo sang bulawan nga dios-dios nga simbahon. Bag-o lang sila nagpromisa nga “dili maghupot sing iban nga mga dios,” pero “sa madali naglipas sila sa dalanon” sang ila promisa (Exodo 20:3; 32:8; tan-awa man sa Exodo 24:3). Wala ini ginapaabot nga hitabo, pero nahibal-an naton sa eksperiyensya nga ang pagtuo kag pangako kon kaisa ginadaog sang kawala-sing-pasensya, kahadlok, kag pagduha-duha. Samtang ginahandum naton ang presensya sang Ginuo sa aton mga kabuhi, makapaisog sang buot ang mahibaloan nga ang Ginuo wala nangampo sa dumaan nga Israel kag indi Sia magpangampo sa aton kag sa mga tawo nga aton mga ginapalangga—kay Sia “maluluy-on kag mainayuhon, [mahinay] sa pagpangakig, kag bugana sa malig-on nga paghigugma kag sa pagkatutom” (Exodo 34:6).
Mga Ideya sa Pagtuon sa Balay kag sa Simbahan
Exodo 19:3–6
Ang katawhan sang Ginuo sa kasugtanan mga manggad sa Iya.
Si Pangulong Russell M. Nelson nagtudlo: “Sa Daan nga Katipan, ang tinaga sa Hebreo kon sa diin ginlubad ang pinasahi amo ang segullah, nga buot silingon ‘malahalon nga propyedad,’ ukon ‘manggad.’ … Ang kilalahon kita sang mga alagad sang Ginuo nga iya pinasahi nga katawhan isa ka pagdayaw nga may pinakamataas nga importansya” (“Children of the Covenant,” Ensign, Mayo 1995, 34). Paano nagaapekto ang ginhambal ni Pangulong Nelson sang imo pag-intiendi sang Exodo 19:3–6? Paano ginpakita sang Ginuo sa imo nga ginapakamahal ka Niya?
Exodo 19:10–11, 17
Ang sagrado nga mga eksperiyensya nagakinahanglan sang paghanda.
Ginsiling sang Ginuo kay Moises nga kinahanglan sang mga anak sang Israel nga magmangin handa sila antes “sa pagsugata sa Dios” (Exodo 19:10–11, 17) kag magbantay sang Iya [kasugtanan] (tan-awa sa Exodo 19:5). Paano ka maghanda para sa espirituhanon nga mga eksperiyensya, dala na ang mga ordinansa sa sakramento kag sa templo? Paano mo buligan ang iban nga maghanda? Ano ang natun-an mo parte sa paghanda halin sa Lucas 6:12–13; Enos 1:2–6; Alma 17:2–3?
Ining bukid sa Egipto madugay na nga ginapatihan nga amo ang Bukid nga Sinai.
Exodo 20:1–17
Ang pagtuman sang mga kasugoan sang Dios nagadala sang mga bugay.
Samtang ang mga Israelnon natipon sa tiilan sang Bukid nga Sinai, nabatian nila ang tingug sang Dios nga ginahatag ang Pulo ka Sugo (tan-awa sa Deuteronomio 4:12–13). Ang mga ini, siyempre, indi lang ang mga kasugoan sang Dios—may madamo nga iban pa sa balaan nga mga kasulatan. Gani samtang imo ginabasa ang Exodo 20:1–17, pamangkota ang imo kaugalingon kon ngaa ginahatagan sing labi nga importansya sang Dios ining pulo. Ari ang halimbawa sang tsart nga pwede mo gamiton sa imo pagbinagbinag sang importansya sang Pulo ka Sugo sa imo kabuhi:
|
Kasugoan |
Kon sayuron, ginapangabay ako sang Ginuo nga … |
Mga bugay nga mabaton sa pagtuman sini nga kasugoan |
|---|---|---|
-
Paano ang pagtuman sining pulo ka sugo nagabulig sa imo nga tumanon ang duha ka dakong sugo nga ginhatag ni Jesus sa Mateo 22:34–40?
-
Ano ang mga butang nga pwede ka matentar nga unahon sangsa Dios? Ano nga mga bugay ang imo nakita sa pag-una sa Dios?
-
Paano mo sabton ang tawo nga nagasiling nga ang Pulo ka Sugo madugay na nga ginhatag kag indi na kinahanglanon subong? Ano nga mga halimbawa halin sa imo kabuhi ang imo ipaambit bilang bahin sang imo sabat?
-
Paano gintuman sang Manluluwas ang promisa sa Exodo 20:6 sa imo kabuhi?
Exodo 24:1–11
Ang paghimo sang mga kasugtanan nagapakita sang akon kahanda sa pagtuman sang layi sang Dios.
Samtang imo ginabasa ang Exodo 24:3–8, binagbinaga kon ano ang mga kasugtanan nga imo ginhimo sa Dios. Bisan pa nga ang mga kasugtanan sang Israel may upod nga mga ritwal nga lain sangsa ginapangayo sang Dios sa karon nga panahon, mahimo nga makatalupangod ka sang pila ka mga pagkaanggid. Halimbawa, ang mga bersikulo 4, 5, kag 8 nagamitlang sang altar, sang sapat nga mga halad, kag dugo. Ano ayhan ang ginasimbolo sang mga ini, kag ano ang relasyon sini sa imo mga kasugtanan?
Exodo 32–34
Ang sala amo ang pagtalikod sa Dios; ang paghinulsol pagliso pakadto sa Iya kag palayo sa kalainan.
Hunahunaa ang imo kaugalingon sa lugar sang mga Israelnon—ara ka sa kamingawan, si Moises 40 ka adlaw na nga wala, kag may palaaboton nga pag-inaway sa mga Canaanhon nahanungod sa duta nga ginpangako (tan-awa sa Exodo 32:1–8). Ngaa sa banta mo nga gusto sang mga Israelnon sang bulawan nga dios-dios? Ano ang nanamian mo sa pangabay ni Moises sa Ginuo sa Exodo 33:11–17?
Wala sapayan nga seryoso ang sala sang mga Israelnon, may dala man ining istorya nga mensahe sang kaluoy kag kapatawaran sang Dios. Ano ang ginatudlo sa imo sang Exodo 34:1–10 parte sa Manluluwas? (tan-awa sa Exodo 32:30–32; Mosias 14:4–8; 15:9; Doktrina kag mga Kasugtanan 45:3–5).
Exodo 31:13–16
Ang Adlaw nga Inugpahuway isa ka tanda.
Si Pangulong Nelson nagpaathag: “Sang mas hubin pa ako, gintun-an ko ang ginabuhat sang iban nga naghimo sang listahan sang mga dapat kag indi dapat himuon kon Adlaw nga Inugpahuway. Sang ulihi ko na lang natun-an halin sa balaan nga mga kasulatan nga ang akon paggawi kag panimuot sa Adlaw nga Inugpahuway isa ka tanda sa tunga ko kag sang akon Amay nga Langitnon. [tan-awa sa Exodo 31:13; Ezequiel 20:12, 20]. Upod ina nga paghangop, indi ko na kinahanglan sang listahan sang mga pwede kag indi pwede himuon. Kon kinahanglan ko nga magdesisyon kon ang isa ka buluhaton pwede ukon indi pwede sa Adlaw nga Inugpahuway, ginapamangkot ko na lang ang akon kaugalingon, ‘Ano nga tanda ang gusto ko ihatag sa Dios?’ Ina nga pamangkot nagklaro sang akon mga pagpili parte sa Adlaw nga Inugpahuway” (“The Sabbath Is a Delight,” Liahona, Mayo 2015, 130). Pamensara sing maayo ang tanda nga gusto mo ihatag sa Dios sa imo pagtuman sang Adlaw nga Inugpahuway.
Exodo 34:1–4
Ano ang kinalain sang duha ka grupo sang tapi-tapi nga bato nga ginhimo ni Moises?
Sang nagpanaog si Moises sa bukid, gindala niya ang layi nga nasulat sa mga tapi-tapi nga bato. Sang makita nga ginlapas sang mga Israelnon ang ila kasugtanan, ginbuka ni Moises ang mga tapi-tapi (tan-awa sa Exodo 31:18; 32:19). Sang ulihi, ginsugo sang Dios si Moises nga maghimo sang lain nga pares sang tapi-tapi nga bato kag dalhon liwat pasaka sa bukid (tan-awa sa Exodo 34:1–4). Ang Paglubad ni Joseph Smith sang Exodo 34:1–2 nagaklaro nga ang una nga pares sang tapi-tapi nga bato nagaunod sang mga ordinansa sa “balaan nga paagi,” ukon sa Pagkapari ni Melquisedec. Ang ikaduha nga pares nagaunod sang “kasuguan sa lawasnon nga kaliwatan.” Ining mas manubo nga layi ginadumalahan paagi sa “mas manubo nga priesthood” (tan-awa sa Doktrina kag mga Kasugtanan 84:17–27), nga gintuyo sa paghanda sang mga Israelnon para sa mas mataas nga layi kag mas mataas nga priesthood agud makasulod sila sa presensya sang Dios.
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Exodo 20:3–17
Ginahatagan ako sang Dios sang mga kasugoan tungod gusto Niya nga mangin malipayon ako.
-
Paano mo himuon nga masadya ang pagtuon sang Pulo ka Sugo para sa imo kabataan? Samtang ululupod ninyo nga ginabasa ang Exodo 20:3–17, pabuliga sa imo ang imo kabataan nga magdrowing sang larawan nga nagarepresentar sang tagsa sang Napulo ka Sugo. Dayon pwede nga magbulos-bulos ang imo kabataan sa pagpili sang larawan kag maghambal parte sa kon paano nila matuman inang kasugoan. Iistorya sa isa kag isa kon paano ang pagtuman sinang kasugoan nagadala sa inyo sang kalipay.
-
Pwede man kamo magkanta sang kanta pareho sang “Keep the Commandments” (Children’s Songbook, 146–47). Buligi ang imo kabataan nga pangitaon ang mga tinaga sa kanta nga nagatudlo sa ila kon ngaa gusto sang Dios nga tumanon naton ang Iya mga kasuguan.
Kon ginapakigbahin sang kabataan ang ila espirituhanon nga mga eksperiyensya, ang ila testimonya nagatubo. Ang imo mga pamangkot makapaisog sang imo kabataan nga ipakigbahin ang ila balatyagon parte sa Manluluwas kag kon paano ang pagpangabuhi sang ebanghelyo nagbugay sa ila (tan-awa sa Pagtudlo sa Paagi sang Manluluwas, 32). Kon ila ini ginahimo, nagahatag sila sang ila testimonya. Pamensara kon paano mo ini himuon samtang inyo ginahambalan ang mga bugay nga maangkon sa pagtuman sang Pulo ka Sugo.
Exodo 20:12
Luyag sang Ginuo nga tahuron ko ang akon mga ginikanan.
-
Buligi ang imo kabataan nga tun-an ang dinalan “Tahura ang imo amay kag ang imo iloy” (Exodo 20:12). Basi gusto mo ipaathag nga ang “tahuron” ang isa ka tawo nagakahulugan sang pagpakita sang respeto sa ila ukon paghatag sa ila sang kalipay. Ano ang ginhimo ni Jesus para tahuron ang Iya mortal nga iloy kag Iya Amay nga Langitnon? (tan-awa sa Lucas 2:48–51; Juan 19:26–27). Pwede magbulos-bulos ang imo kabataan sa pagdrama-drama sang mga butang nga pwede nila himuon para tahuron ang ila mga ginikanan, samtang ginapakot sang iban nga kabataan kon ano ang ila ginahimo.
Exodo 31:13, 16–17
Ang pagtuman sang Adlaw nga Inugpahuway isa ka tanda sang akon pagpalangga sa Ginuo.
-
Mahimo nga masadyahan ang imo kabataan sa pagtan-aw sang mga halimbawa sang mga tanda—pareho sang mga tanda sa dalan ukon mga tanda sa bilding. Ano ang katuyoan sang mga tanda? Dayon pwede pangitaon sang imo kabataan ang tinaga nga “tanda” sa Exodo 31:13, 16–17. Ano ang siling sang Ginuo nga tanda sa tunga naton kag Niya? Isugid sa isa kag isa ang pila ka mga paagi nga ikaw kag ang imo pamilya nagatinguha nga ipakita ang inyo pagpalangga sa Ginuo sa Adlaw nga Inugpahuway.
Larawan ni Moises nga nagakapyot sang Pulo ka Sugo, ni Sam Lawlor (detalye)
Exodo 32:1–8, 19–24; 34:6–7
Indi ako “maglipas” sa dalanon sang Dios.
-
Pamensara nga gamiton ang “Si Moises sa Bukid nga Sinai” (sa Mga Sugilanon sa Daan nga Katipan, 77-82) agud buligan ang imo kabataan nga maintiendihan ang istorya sa Exodus 32:1–8, 19–24. Ngaa sala para sa mga Israelnon ang magsimba sa estatwa imbes sang sa Dios?
2:55Moses on Mount Sinai
-
Masadya siguro ang maghimo sang banas sa salog (ukon magpangita sang isa nga malapit sa inyo balay) agud ipakita ining mga pulong sa Exodo 32:8: “sa madali naglipas sila sa dalanon.” Samtang nagalakat sa banas, ang imo kabataan mahimo mag-istorya parte sa mga tentasyon nga aton ginaatubang nga magpalayo sa Ginuo. Ano ang nagabulig sa aton nga magpabilin sa dalanon sang Dios—kag magbalik diri kon nagtalang kita? (tan-awa sa Exodo 34:6–7).
Para sa dugang nga mga ideya, tan-awa sa isyu sang Abyan nga magasin sini nga bulan.