Exodo 7–13

Kabay kuntani, ang imo pagbuot indi supak sa pagbuot sang Dios pareho sang sa iya ni Faraon. Sa gihapon, tanan kita may mga tiyempo nga ang aton mga tagipusuon indi pareho kahumok sangsa nagakadapat. Ano ang natalupangdan mo sa mga reaksyon ni Faraon sa mga kalalat-an sa Exodo 7:14–25; 8:5–32; 9:1–26; 10:12–29; 12:29–33? Talupangda ang pagklaro sang Paglubad ni Joseph Smith sang Exodo 7:3, 13; 9:12.

Ngaa ang “matig-a” maayo nga paglaragway sang tagipusuon ni Faraon? Panumduma kon ano ang imo matun-an sa sining mga bersikulo parte sa pag-angkon sang mahumok nga tagipusuon: 1 Nefi 2:16; Mosias 3:19; Alma 24:7–8; 62:41; Eter 12:27. Samtang ginabasa mo ang mga konsikwensya sang katig-a sang tagipusuon ni Faraon, binagbinaga ang kondisyon sang imo tagipusuon. Ano nga mga pagbag-o ang nabatyagan mo nga kinahanglan mo himuon?

Ang solo nga paagi para maluwas ang mga Israelnon sa ikapulo nga kalalat-an, nga ginlaragway sa Exodo 11:4–5, amo ang insakto nga pagsunod sang mga instruksyon nga ginhatag sang Ginuo kay Moises sa Exodo 12, isa ka ritwal nga ginkilala nga Pascua (Passover). Ginatudlo sa aton sang Pascua paagi sa mga simbolo nga sa amo man nga ginhilway sang Ginuo ang mga Israelnon sa pagkabihag sa Egipto, sarang man Niya kita hilwayon sa pagkabihag sa sala. Para usisaon ining simbolismo sa Exodo 12:1–42, mahimo ka maggamit sang tsart nga pareho sini:

Ano pa gid ang imo nakita sa mga instruksyon kag mga simbolo sang Pascua nga nagapadumdom sa imo kay Jesucristo kag sa Iya Pagbayad-Sala? Ano ang ginapanugyan sa imo sining mga simbolo kon paano batunon ang mga bugay sang Iya Pagbayad-Sala?

Ginsugo sang Manluluwas ang mga Israelnon nga saulogon ang Pascua kada tuig para buligan sila nga madumduman nga Iya sila ginhilway, bisan pagkatapos nga ang ila pagkabihag nangin malayo na nga handurawan. Samtang imo ginabasa ang Iya mga instruksyon sa Exodo 12:14–17, 24–27; 13:1–16, hunahunaa kon ano ang imo ginahimo para dumdumon ang mga bugay sang Dios sa imo. Paano mo matipigan inang handumanan “sa bug-os ninyong nga mga kaliwatan”? (tan-awa sa Exodo 12:14, 26–27).

Ano ang pagpalareho nga imo makita sa pista sang Pascua kag sa sakramento? Ano ang pwede mo himuon para “dumdumon pirme” si Jesucristo? (Moroni 4:3; 5:2).

Mahimo mo man binagbinagon ang iban nga gusto sang Ginuo nga imo dumdumon; tan-awa, halimbawa sa, Helaman 5:6–12; Moroni 10:3; Doktrina kag mga Kasugtanan 3:3–5, 10; 18:10; 52:40.

Tan-awa man sa Kevin W. Pearson, “Handa Ka Pa Bala?,” Liahona, Nob. 2022, 67–69.

5:27

• Ang mga kalalat-an nga ginlaragway sa Exodo 7–11 nagapakita sa mga Egiptohanon kag mga Israelnon nga ang Ginuo may daku nga gahum. Ang Ginuo magabulig sa imo kabataan sa bilog nila nga kabuhi kon may pagtuo sila sa Iya gahum. Para buligan sila nga makatuon sa sining istorya, pwede mo hatagan ang kada bata sang papel nga natunga sa 10 ka seksyon, kag hagara sila nga magdrowing sang mga larawan sang mga kalalat-an nga ginalaragway sa sining mga bersikulo: Exodo 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7 (tan-awa man sa “Ang mga Kalalat-an sa Egipto” sa Mga Sugilanon sa Daan nga Katipan, 67–69). Basaha sing ululupod ang Genesis 7:5 kag 9:14 para ipaathag kon ngaa ginpadala sang Ginuo ang mga kalalat-an.

  

  2:3

• Iistorya sa imo kabataan kon paano ka ginpakita sang Ginuo “nga wala na gid sing iban nga kaangay sa [Iya] sa bug-os nga duta” (Exodo 9:14). Tugoti sila nga iistorya kon paano nila nahibal-an nga gamhanan ang Ginuo.

• Para buligan ang imo kabataan nga makita ang buot silingon sang mahumok nga tagipusuon, masadya siguro nga ipakita sa ila ang isa ka bagay nga matig-a pareho sang bato, kag isa man nga mahumok kag makasalupsop, pareho sang espongha. Pwede mo man bubuan sang tubig ining mga bagay para ipakita kon paano ginabaton sang mahumok nga tagipusuon ang pulong sang Dios. Pwede ninyo dayon basahon sing ululupod ang pila ka mga bersikulo nga nagalaragway kon ano ang reaksyon ni Faraon sa mga kalalat-an nga ginpadala sang Ginuo (tan-awa sa Exodo 8:28–32; 9:7). Diin sining mga bagay ang nagarepresentar sing pinakamaayo sang tagipusuon ukon panimuot ni Faraon? Ano ang buot silingon sang mag-angkon sang mahumok nga tagipusuon? (tan-awa sa Mosias 3:19).

• Mahimo kamo sang imo kabataan maglista sang pila ka mga buhat nga pwede magpakita kon may matig-a kita nga tagipusuon (halimbawa, paghambal sang masakit nga mga tinaga ukon indi magpanghatag). Paano naton ipakita sa Ginuo nga gusto naton sang mahumok nga mga tagipusuon?

• Ang Pascua nagtudlo sa mga Israelnon nga magpaabot sa Manluluwas kag sa Iya sakripisyo para sa aton. Pagkatapos nga basahon ang Exodo 12:1-13 sing dulungan, buligi ang imo kabataan nga makita ang koneksyon sa mga detalye sang Pascua kag sang Pagbayad-Sala ni Jesucristo (tan-awa man sa “Ang Pascua (Passover)” sa Mga Sugilanon sa Daan nga Katipan, 70-74). Halimbawa, paano si Jesus daw pareho sang cordero nga ginalaragway sa bersikulo 5?

  

  2:54

• Sa sini nga panahon, nagaambit kita sang sakramento agud dumdumon ang sakripisyo ni Jesus. Mahimo ka magpakita sang larawan sang sakramento sa imo kabataan kag maghambal kon paano ining ordinansa nagabulig sa aton nga dumdumon si Jesucristo. Pwede mo buligan ang imo kabataan nga pangitaon ang tinaga nga “dumdum” sa mga pangamuyo para sa sakramento (tan-awa sa Moroni 4–5). Ukon magkanta sing ululupod sang paborito nga himno parte sa sakramento, kag buligan ang imo kabataan nga tandaan ang ila malinong nga balatyagon kon panumdumon nila ang Manluluwas. Paano naton pangitaon inang balatyagon kon mag-ambit kita sang sakramento?