“Marso 2–8. ‘Tugoti ang Dios nga Magpangibabaw’,” Dali Magsunod sa Akon—Para sa Balay kag Simbahan: Daan nga Katipan 2026 (2026)
“Marso 2–8. ‘Tugoti ang Dios nga Magpangibabaw’,” Dali, Magsunod sa Akon: 2026
Esau Sells His Birthright to Jacob [Ginabaligya ni Esau ang Iya Pagkapanganay kay Jacob], ni Glen S. Hopkinson (detalye)
Marso 2–8: “Tugoti ang Dios nga Magpangibabaw”
Genesis 24–33
Paano mo sigurohon para sa imo kaugalingon ang bugay halin sa Dios? Makasiling ka nga ang istorya ni Jacob, apo ni Abraham kag Sara, istorya sang tawo nga nakahibalo sang sabat sa sinang pamangkot. Sa kultura nga ang panganay nga anak nga lalaki nagabaton sang bugay sang pagkapanganay, si Jacob natawo nga ika-duha, nga nagakapyot sa tikod sang iya kapid nga si Esau. Ang ngalan nga “Jacob” nagakahulugan “tal-os”—tawo nga nagabulos sa lugar sang isa ka tawo. Si Jacob nanindugan sa sina nga ngalan paagi sa pagtinguha, masobra kaisa, nga agawan si Esau bilang manunubli sang bugay sang pagkapanganay tungod si Esau indi nagakaangay para diri (tan-awa sa Genesis 25:30–34; 26:34–35; 27:36). Nagresulta ini sa pagkinagamo sa pamilya, kag si Jacob nagpalagyo sa kamingawan agud maluwas ang iya kabuhi.
Pagligad sang tinuig, ginsugo sang Dios si Jacob nga magpauli. Sa dalanon, si Jacob, nga mapainubuson, liwat nga nagpangayo sang pagpakamaayo sa Dios. Ang balaan nga mga kasulatan naglaragway sining tion bilang “pagpakigdumog” para kay Jacob, kag naghambal sia nga indi sia mag-untat “kon indi [sia] pagpakamaayohon” (Genesis 32:26). Dayon nag-abot ang leksyon—kag ang bendisyon. Gin-islan sang Dios ang ngalan ni Jacob sa Israel—nga ang buot silingon upod sa iban pa, “tugoti ang Dios nga magpangibabaw.” Natun-an ni Israel nga para mabaton ang pinakamalahalon nga mga bugay sang Dios, ang Iya mga bugay sa kasugtanan, indi kinahanglan nga agawan ang bisan sin-o pa man. Ang Iya mga bugay wala ginabakal ukon ginaagaw ukon ginadaug. Bugana Niya ini nga ginahatag sa tanan nga nagakabagay sa ngalan nga Israel—inang mga nagatugot sa Dios nga magpangibabaw sa ila mga kabuhi.
Mga Ideya sa Pagtuon sa Balay kag sa Simbahan
Genesis 24
Ang pag-asawahay sa kasugtanan importante sa wala katapusan nga plano sang Dios.
Samtang ginabasa mo ang Genesis 24, pamangkota ang imo kaugalingon kon ngaa ginkabig ni Abraham ang pagpangasawa sang iya anak nga si Isaac nga tama kaimportante. Ngaa tama kaimportante sang pag-asawahay sa Dios?
Ano nga mga kinaiya ang imo makita kay Rebeca nga makabulig pabakod sang pag-asawahay kag pamilya? (tan-awa labi na sa mga bersikulo 15–28, 57–61).
Genesis 25:29–34
Mahimo ko hatagan bili ang wala katapusan nga mga butang labaw sa mga butang nga kalibutanon.
Sa kultura ni Isaac kag Rebeca, ang kamagulangan nga anak nga lalaki ang nagabaton sang pagkapanganay, nga nagakahulugan sang mas dako nga palanublion, upod ang mas dako nga responsibilidad sa pagtatap sang pamilya. Samtang imo ginabasa ang Genesis 25:29–34, binagbinaga kon ngaa ayhan nga handa si Esau nga ibaylo ang iya pagkapanganay sa pagkaon. Ano nga mga leksyon ang imo nakita para sa imo kaugalingon sa sining sinulatan? Basi makabulig ang paghimo sang duha ka listahan: (1) wala katapusan nga mga bugay nga gusto ihatag sang Dios sa imo kag (2) kalibutanon nga mga butang nga mahimo mag-agaw sang imo atensyon. Dayon pwede mo basahon ang dinalan, nga ginaislan ang “pagkapanganay” sang tinaga nga ara sa una nga listahan kag “linaga” sang tinaga nga ara sa ika-duha. Paano ka magtutok sa Manluluwas kag sa wala katapusan nga mga bugay sang Iya ebanghelyo?
Tan-awa man sa Mateo 6:19–33.
Jacob at Bethel [Si Jacob sa Bet-el], ni James Smetham
Genesis 28
Ang mga kasugtanan sang balay sang Ginuo nagadala sang gahum sang Dios sa akon kabuhi.
Samtang nagakatulog sa ulonan nga bato, si Jacob may makabag-o kabuhi nga damgo. Sagrado ato katamo nga eksperiyensya sa bagay nga ginhingadlan ni Jacob ang lugar nga Bet-el, ukon “balay sang Dios,” nga nagasiling, “Sa pagkamatuod ang Ginuo yari sa sining duog” (Genesis 28:16).
Samtang ginabasa mo ang Genesis 28, mahimo mo pamangkoton ang imo kaugalingon kon ano ang naghimo sini nga eksperiyensia nga tama kasagrado kay Jacob. Ano ang iya ginaagyan [sa iya kabuhi] sadto nga tion? Ano ayhan ang iya nabatyagan? Pwede ka man magpangita sang mga tinaga kag mga dinalan sa mga bersikulo 10-22 nga nagapadumdom sa imo sang balay sang Ginuo. Ano nga mga pagpabatyag ang imo nabaton parte Dios, sa Iya balay, kag sa Iya mga kasugtanan?
Sa katapusan sining outline may larawan nga nagapakita sang damgo ni Jacob; pwede mo ini lantawon samtang nagabasa ka. Kon pahimuon ka sang imo kaugalingon nga drowing sang iya damgo, ano ang himuon mo? Ano nga mga kamatuoran halin sa istorya ang tinguhaan mo nga ilaragway?
Ang himno nga “Nearer, My God, to Thee” (Hymns, no. 100) ginbase sa eksperiyensya ni Jacob. Ano nga mga koneksyon ang nakita mo sa sining kanta kag sa Genesis 28:10–22? Paano ka ginabuligan sang templo nga makabatyag nga mas malapit sa Dios? Pamensara nga pangitaon ang mga sabat sa sining pamangkot sa mensahe ni Pangulong Russell M. Nelson “Ang Templo kag ang Inyo Espiritwal nga Pundasyon” (Liahona, Nob. 2021, 93–96). Basi gusto mo man rebyuhon ang mga kasugtanan kag mga bugay sang balay sang Ginuo sa Mga Pinili nga Bahin halin sa Libro sang Pangkabilogan nga Pagsulundan: Pag-alagad sa Ang Simbahan ni Jesucristo sang mga Santos sa Ulihing mga Adlaw, 27.2 (Librarya sang Ebanghelyo). Paano ang pagtuman sining mga kasugtanan nagadala sang gahum sang Dios sa imo kabuhi?
Mangin matugahon [creative]. May madamo nga paagi nga makatuon sa balaan nga mga kasulatan wala labot sa pagbasa sang mga ini. Mas maintiendihan sang iban nga tawo ang balaan nga mga kasulatan kon drowingon nila ang mga istorya. Ang iban makakita sang espirituhanon nga paghangop sa sagrado nga musika nga angot sa balaan nga mga kasulatan. Indi paglimitahi ang imo kaugalingon sa isa lang ka paagi sang pagtuon; mangin bukas sa pagtilaw sang lainlain nga mga pamaagi.
Genesis 29:31–35; 30:1–24
Ginadumdom ako sang Ginuo sa akon mga pagtilaw.
Samtang imo ginabasa ang Genesis 29:31–35 kag 30:1–24, pangitaa ang mga tinaga nga nagalaragway sang kaluoy sang Dios kay Raquel kag Lea. Binagbinaga kon paano “gintulok sang [Dios] ang [imo] kapipit-an” kag “nagdumdom” sa imo (Genesis 29:32; 30:22).
Genesis 32–33
Ang Manluluwas sarang magpaayo sang akon pamilya.
Sang magbalik si Jacob sa Canaan, “hinadlukan [sia] sing dako kag nalisang” sa kon paano sia batunon sang iya utod nga si Esau (Genesis 32:7). Samtang imo ginabasa ang Genesis 32–33, pamensara ang imo kaugalingon nga mga relasyon sa pamilya—ayhan labi nga gid inang nagakinahanglan sang pag-ayo. Basi mainspirar ka sining istorya nga makig-angot sa isa ka tawo. Mahimo nga makagiya sang imo pagbasa ang mga pamangkot pareho sini:
-
Paano ginhandaan ni Jacob ang pag-atubang kay Esau?
-
Ano ang nagtatak sa imo parte sa pangamuyo ni Jacob nga makita sa Genesis 32:9–12?
-
Ano ang imo matun-an parte sa kapatawaran sa ehemplo ni Esau?
-
Paano kita mabuligan sang Manluluwas nga mag-ayo ang mga kaangtanan sa pamilya?
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Genesis 24:10–21
Sarang ako mangin maayo sa iban.
-
Agud talupangdon ang dalayawon nga ehemplo sang kaayo ni Rebeca, mahimo mo ipakita sa imo kabataan ang litrato sa idalom ukon ang pahina sa aktibidades sini nga semana samtang imo ginapalip-ot ang istorya sa Genesis 24:10–21. Mahimo nga masadyahan ang imo kabataan sa pagdrama-drama sang sugilanon. Mahimo nga magresulta ini sa paghambalanay parte sa mga buhat sang kaayo nga nakita mo kag sang imo kabataan.
-
Pamensara ang pagkanta sing ululupod sang kanta parte sa kaayo, pareho sang “Kindness Begins with Me” (Children’s Songbook, 145). Mahimo pamatian sang imo kabataan ang pagmitlang sang tinaga nga “kindness” (ukon kaanggid nga tinaga) kag magtindog kon mabatian nila ini. Paano kita mangin maayo pareho kay Rebeca?
Old Testament Heroes [Mga Baganihan sang Daan nga Katipan], ni Dillen Marsh (detalye)
Genesis 25:21–34
Ang wala katapusan nga mga butang mas importante sangsa kalibutanon nga mga butang.
-
Pamensara nga gamiton ang “Si Jacob kag Esau” (sa Mga Sugilanon sa Daan nga Katipan, 38–41) agud buligan ang imo kabataan nga maintiendihan ang istorya sa Genesis 25:21–34. Basi pwede ipahunahuna sa imo kabataan nga nagpangayo si Esau sang laygay sa ila kon bala ibaylo niya ang iya pagkapanganay sa linaga. Ano ang ihambal nila sa iya?
2:5Jacob and Esau
-
Ano ang mga butang nga wala katapusan ang kaimportante sa imo kag sa imo kabataan? Pwede magpangita ang imo kabataan sang mga litrato ukon mga bagay nga nagasimbolo sining mga butang. Paano naton ipakita sa Ginuo nga importante sa aton ining mga butang?
Genesis 28:10-22
Ang mga kasugtanan makabulig sa akon nga magbalik sa Amay nga Langitnon.
-
Samtang ginabasa ninyo sing ululupod ang Genesis 28:10–22, pwede ka maggamit sang hagdan (ukon litrato pareho sang ara sa katapusan sining outline) para hambalan kon paano ang aton mga kasugtanan daw pareho sa hagdan. Pwede ang imo kabataan mag-akto nga kuno abi nagasaka [sila] sa hagdan, kag sa tagsa ka tikang, maghambal parte sa mga tion nga nagapromisa kita nga tumanon ang Dios, pareho sang tion nga ginbunyagan kita, nagaambit sang sakramento, ukon nagakadto sa templo. Paano ang aton mga kasugtanan mas nagapalapit sa aton sa Dios?
Genesis 32:6–1; 33:1–4
Ang Amay nga Langitnon kag si Jesucristo makabulig sa akon nga palanggaon ang akon pamilya.
-
Agud ipakilala ining mga bersikulo, mahimo mo ipaathag nga pagkatapos sang madamo nga tinuig sang paghinakit, si Jacob magapakigkita liwat kay Esau. Basaha sing ululupod ang Genesis 32:6–11. Ano ang nabatyagan ni Jacob? Ano ang iya ginhimo para makabaton sang bulig? Basaha sing ululupod ang Genesis 33:1–4 para diskubrehon kon paano ginsabat sang Ginuo ang pangamuyo ni Jacob. Kon makahambal sa aton si Jacob kag Esau karon, ano ayhan ang ila ihambal para mabuligan kita kon may di-paghangpanay sa aton pamilya?
Para sa dugang nga mga ideya, tan-awa sa isyu sang Abyan nga magasin sini nga bulan.