Genesis 37–41

Sing liwat-liwat, daw gintalikdan na si Jose sang maayo nga kapalaran, pero ang Ginuo wala gid nagtalikod sa iya. Samtang imo ginabasa ang istorya ni Jose, binagbinaga ang mga pamangkot nga pareho sini: Ano ang ginhimo ni Jose para magpabilin nga malapit sa Ginuo? Paano ang Ginuo “nag-upod sa iya”? (tan-awa sa Genesis 39; 40:1–19; 41:9–45). Ano ang imo natun-an sa istorya ni Jose nga makabulig sa imo nga makita ang presensya sang Dios sa imo kabuhi?

Mahimo ka man magpamangkot sing pareho nga mga pamangkot parte sa imo kabuhi. Ano ang nakita mo nga ebidensya nga wala ka gintalikdan sang Ginuo sa tion sang imo nga pagtilaw? Pamensara kon paano mo ipakigbahin ang imo mga eksperiyensya sa mga miyembro sang pamilya kag sa palaabuton nga mga henerasyon (tan-awa sa 1 Nefi 5:14).

Siyempre, may iban ka pa nga mga pagtilaw sa palaabuton. Ano ang pwede mo himuon subong agud masiguro nga ining mga pagtilaw indi magdala sa imo palayo sa Ginuo? Pamensara nga maghimo sang sulat para paisugon ang imo kaugalingon sa palaabuton nga magpabilin nga malapit sa Iya bisan ano pa ang matabo.

Tan-awa man sa Juan 14:18; Mga Taga-Roma 8:28; Alma 36:3; Doktrina kag mga Kasugtanan 121:7–8.

Si Jose may dulot sa paghangop sang mga mensahe halin sa Ginuo paagi sa mga damgo. Ano ang imo matun-an sa Genesis 37:5–11; 40:5–8; 41:14–25, 37–38 parte sa pagbaton kag pag-intiendi sang rebelasyon halin sa Ginuo? Halimbawa, ano ang imo matun-an sa ehemplo ni Jose kon daw mabudlay intiendihon ang rebelasyon? (tan-awa sa Genesis 40:8; 41:16).

Binagbinaga kon paano ginapahayag sang Ginuo ang Iya pagbuot sa imo. Ano ang imo ginahimo para aksyunan ang rebelasyon nga Iya ginhatag sa imo? Paano ka nagapangayo sang dugang nga giya sa Iya?

Kon pwede maghatag sang laygay si Jose sa kon paano pakigbatoan ang tentasyon nga maghimo sang sekswal nga sala, ano sa banta mo ang iya ihambal? Panumduma ini samtang imo ginabasa ang parte sa iya eksperiyensya sa Genesis 39. Halimbawa, pamensara kon ano ayhan ang himuon ni Jose sa mga kahangawa pareho sini:

• Kon wala man lang sang iban nga nakahibalo sang akon ginahimo, ano gid ang problema? (tan-awa sa mga bersikulo 8-9).

• Ginatinguhaan ko nga makigbato, pero ang tentasyon daw wala gid nagauntat (tan-awa sa bersikulo 10).

• Ano ang himuon ko kon ara ako sa sitwasyon nga ang tentasyon tama gid kabaskog? (tan-awa sa bersikulo 12).

Paano mo ipaathag kon ngaa ang pagtuman sang layi sang kaputli importante? (tan-awa sa Para sa Kusog sang mga Lamharon: Giya sa Paghimo sang mga Pagpili, 23–28).

Ang ehemplo ni Jose, siyempre, magamit sa iban pa nga klase sang tentasyon. Nga ginapanumdom ang ehemplo ni Jose, pamensara ang paghimo sang plano para malikawan kag mapakigbatuan ang tentasyon. Halimbawa, pwede ka magpamensar sang isa ka tentasyon kag isulat ang mga sitwasyon nga dapat likawan kag kon paano ka “magpalagyo” kon mag-abot ang tentasyon.

Ari ang iban pa nga balaan nga mga kasulatan nga mas makapaayo sa imo plano. Ano ang imo natun-an sa kada isa parte sa kon paano ang Manluluwas makabulig sa imo nga mabatuan ang tentasyon? Mateo 4:1–11; 1 Mga Taga-Corinto 10:13; 1 Nefi 15:23–24; 3 Nefi 18:17–18.

Sa paghimo mo sang imo plano, basi makabulig man nga magpamensar parte sa nagliligad nga tinion sang madinalag-on mo nga nalikawan ukon napagkigbatuan ang tentasyon. Paano ka ginbuligan sang Manluluwas? (tan-awa sa 2 Nefi 4:18-33).

Ang interpretasyon ni Jose sang damgo sang Faraon nagresulta sa pila ka tuman kaalam kag praktikal nga laygay para malampuwasan ang tiggulutom (tan-awa sa Genesis 41:15-57). Pamensara kon ano ang espirituhanon nga mga mensahe sang Ginuo para sa imo sa sining sugilanon. Ano sa pamatyag mo ang luyag Niya nga imo himuon agud maghanda sa mga kabudlayan sa imo palaabuton?

Tan-awa man sa David A. Bednar, “Tilawan Naton Sila sa Sini,” Liahona, Nob. 2020, 8–11.

• Ang pagbasa parte sa mga hinakit sa pamilya ni Jose mahimo magbukas sang paghinambalanay parte sa kon paano naton tratuhon ang mga miyembro sang pamilya. Para isugid ang istorya ni Jose kag iya mga utod sa Genesis 37, mahimo ka maggamit sang mga litrato sa sini nga outline ukon sa “Ang Inspirado nga mga Damgo ni Jose” (sa Mga Sugilanon sa Daan nga Katipan, 47-51). Tugoti ang imo kabataan nga isaysay ang mga detalye nga ila nahibal-an parte sa istorya. Pwede mo pangabayon ang imo kabataan nga pamensaron nga kuno abi miyembro sila sang pamilya ni Jose. Ano ayhan ang ila ihambal ukon himuon agud mangin makighidaiton sa pamilya? Halimbawa, ano ang buot silingon sang “[maghambal] sing mahidaiton” sa aton pamilya? (bersikulo 4). Paano si Jesucristo isa ka makighidaiton sa pamilya sang Dios?

  

  2:17

• Kon ang imo kabataan nagaatubang sang mga kabudlayan, kinahanglan nila mahibal-an nga ang Ginuo magaupod sa ila, pareho nga nag-upod Sia kay Jose. Basi mabuligan mo ang imo kabataan nga maghimo sang lista sang mga kabudlayan nga natabo kay Jose (tan-awa sa Genesis 37:23-28; 39:20; ukon “Ang Inspirado nga mga Damgo ni Jose” kag “Si Jose sa Egipto,” sa Mga Sugilanon sa Daan nga Katipan, 47–51, 52–56). Pagkatapos sang tagsa ka kabudlayan nga ila makita, imbitara ang imo kabataan nga suliton hambal, “Ang Ginuo nag-upod kay Jose” (Genesis 39:2).

  

  2:17

  

  2:50

• Basi pwede pangitaon sang imo kabataan sa Genesis 39:1–3, 20–23 ang tagsa ka pagsambit sang dinalan nga “Ang Ginuo nag-upod kay Jose” kag amo-amo nga mga dinalan. Ipaistorya sa ila kon ano sa banta nila ang kahulugan sini nga dinalan. Paano naton mahibal-an nga ang Ginuo kaupod naton? Sugiri ang isa kag isa parte sa kon paano ninyo nabatyagan nga ang Dios kaupod ninyo sa mabudlay nga tinion.

• Ari ang leksyon nga nagagamit sang isa ka bagay nga makabulig sa imo kabataan nga sundon ang ehemplo ni Jose sa pagpalagyo sa asawa ni Potifar: Maggamit sang duha ka magnet nga magrepresentar kay Jesucristo kag Satanas. Maggamit sang gamay nga metal, pareho sang paper clip, nga magtiglawas sa aton. Dayon tugoti ang imo kabataan nga makita kon paano ang impluwensya sang magnet sa metal mas mabaskog kon mas ginapalapit diri ang bagay. Paano ang eksperiyensya ni Jose sa Genesis 39:7–12 nagapakita sining kamatuoran? Ano ang pwede naton himuon para magpalayo sa sala kag mas magpalapit kay Jesus? Ang himno pareho sang “I Need Thee Every Hour” (Hymns, no. 98) makabulig sa sining paghambalanay.

  

  2:58

  Maggamit sang musika. “Ang mga himno kag iban pa nga sagrado nga mga kanta makabulig sa kabataan nga mabatyagan ang pagpalangga sang Dios, mabatyagan ang Espiritu, kag matun-an ang mga kamatuoran sang ebanghelyo. Ang tono, ritmo, kag simple nga pagbagay sang mga tinaga makabulig sa kabataan nga madumduman ang mga kamatuoran sang ebanghelyo sa maabot nga mga tinuig. Samtang nagakanta ka upod sa kabataan, buligi sila nga diskubrehon kag maintiendihan ang mga prinsipyo nga ginatudlo sa mga kanta” (Pagtudlo sa Paagi sang Manluluwas, 32).

• Buligi ang imo kabataan nga magpanumdom sang mga tentasyon nga mahimo nila atubangon. Ipadrama-drama sa ila kon paano sila “makapalagyo” sa sining mga tentasyon.