Dali, Magsunod sa Akon
Marso 16–22. “Gintuyo Ini sang Dios sa Kaayohan”: Genesis 42–50

“Marso 16–22. ‘Gintuyo Ini sang Dios sa Kaayohan’: Genesis 42–50,” Dali, Magsunod sa Akon—Para sa Balay kag Simbahan: Daan nga Katipan 2026 (2026)

“Marso 16–22. ‘Gintuyo Ini sang Dios sa Kaayohan’,” Dali, Magsunod sa Akon: 2026

Si Jose nga ginapatawad ang iya mga utod nga lalaki

Forgiveness [Pagpatawad], ni Megan Rieker

Marso 16–22: “Gintuyo Ini sang Dios sa Kaayohan”

Genesis 42–50

Mga 22 ka tuig na ang nagligad sang ginbaligya si Jose sang iya mga utod sa pagkaulipon. Nag-antos si Jose sang madamo nga mga pagtilaw, dala na ang mabutang-butangan kag mapriso. Sang ulihi nga nakita niya liwat ang iya mga kauturan, si Jose amo na ang gobernador sang bilog nga Egipto, ikaduha lamang sa faraon. Mahapos lang kuntani niya nga matimalusan ang iya mga utod, kag kon hunahunaon ang ila ginhimo kay Jose, daw maintiendihan gid ini. Pero ginpatawad sila ni Jose. Indi lamang ina, kundi ginbuligan niya sila nga makita ang diosnon nga katuyoan sang iya pag-antos. “Gintuyo ini sang Dios sa kaayohan” (Genesis 50:20), siling niya sa ila, kay ginbutang sia sini sa posisyon para maluwas “ang bug-os nga panimalay sang iya amay” (Genesis 47:12) sa tiggulutom.

Sa madamo nga paagi, si Jose may pagkapareho kay Jesucristo. Bisan pa nga ang aton mga sala naghatag sa Iya sang dako nga pag-antos, nagatanyag Sia sang kapatawaran, nga ginaluwas kita tanan sa kapalaran nga mas malala pa sangsa tiggulutom. Bisan man kon kinahanglan naton nga magbaton sang kapatawaran ukon maghatag sini—sa isa ka punto kinahanglan naton tanan nga himuon ang duha—ang ehemplo ni Jose nagatudlo sa aton sa Manluluwas, ang matuod-tuod nga ginhalinan sang pagpang-ayo kag pag-uliay.

icon sang pagtuon

Mga Ideya sa Pagtuon sa Balay kag sa Simbahan

Genesis 45:5–7; 47:12

“Ang Dios nagpadala sa akon sing una sa inyo sa pagtipig sa inyo.”

Nakatalupangod ka bala sang mga pagpalareho sa kabuhi ni Jose kag sa nagabayad-sala nga misyon ni Jesucristo? Agud makakita sang pila ka halimbawa sining mga pagpalareho, tilawi nga ikumparar ang:

  • Genesis 37:3 sa Mateo 3:17.

  • Genesis 37:26–28 sa Mateo 26:14–16.

  • Genesis 45:5–7 sa Lucas 4:18.

  • Genesis 47:12 sa Juan 6:35.

Ano ang imo mga panghunahuna parte sa Manluluwas kag Iya misyon samtang ginabasa mo ining mga dinalan?

Genesis 45; 50:15–21

seminary icon
Ang pagpatawad nagadala sing pag-ayo.

Ang pagbasa parte sa pagpatawad ni Jose sa iya kauturan sa malain nga mga ginpanghimo nila sa iya mahimo nga makapapanumdum sa imo sang tawo nga ginabudlayan ka sa pagpatawad sa karon. Ang masunod nga mga pamangkot mahimo makabulig sa imo nga magtinguha sa paggamit sining prinsipyo:

  • Ngaa ayhan mahimo nga nangin mabudlay kay Jose nga patawaron ang iya mga utod? (para rebyuhon ang ila ginhimo sa iya, tan-awa sa Genesis 37). Ano ayhan nga mga eksperiyensya ukon mga panimuot ang mahimo naghatag kay Jose sang kusog nga magpatawad? (tan-awa, halimbawa sa Genesis 45:1–15 ukon 50:15–21).

  • Ano nga mga bugay ang nagresulta sa pagpatawad ni Jose sa iya mga utod? Halimbawa, ikumparar ang mga relasyon sa pamilya ni Jacob sa pagsugod sang istorya (tan-awa, halimbawa, sa Genesis 37:3–11) sa ila mga relasyon sa katapusan (tan-awa sa Genesis 45:9–15; 50:15–21). Paano ayhan ang nangin resulta kon si Jose indi handa magpatawad?

  • Pamensara ang pagsulat sang ngalan sang tawo nga basi nagakinahanglan sang imo pagpatawad—bisan man nagpangayo sila sang patawad ukon wala. Ano ang sarang mo himuon agud maagda ang nagapang-ayo nga gahum sang Manluluwas sa sina nga sitwasyon?

Tan-awa man sa Doktrina kag mga Kasugtanan 64:9–11.

8:24

Forgiveness: My Burden Was Made Light

Genesis 49

Si Jacob naghatag sa iya pamilya sang mga bendisyon sang propeta.

Ang mga bendisyon ni Jacob sa iya kabataan nagaunod sang maathag nga mga imahe, pero indi ini mahapos intiendihon. Maayo lang, ang ginpanumbalik nga ebanghelyo nagahatag sa aton sang bulig. Kon basahon mo ang bendisyon kay Jose sa Genesis 49:22–26, basaha man ang masunod nga mga bersikulo, kag tan-awa kon ano nga mga paghangop ang ginahatag sini: 1 Nefi 15:12; 2 Nefi 3:4–5; Jacob 2:25; Doktrina kag mga Kasugtanan 50:44.

Samtang imo ginabasa ang bendisyon kay Juda sa Genesis 49:8–12, tandai nga si Jesucristo apo ni Juda. Ano ang makita mo sa sining mga bersikulo nga nagapahanumdum sa imo sa Manluluwas? (tan-awa man sa Bugna 5:5–6, 9; 1 Nefi 15:14–15; Doktrina kag mga Kasugtanan 45:59; 133:46–50).

Ang pagbasa sining mga bendisyon mahimo mag-inspirar sa imo nga rebyuhon ang imo bendisyon sang patriarka—ukon, kon wala ka pa sini, sa pagbaton sini. Ano nga mga tinaga kag mga dinalan sa imo bendisyon ang nagatoon sang imo panghunahuna kay Jesucristo?

Tan-awa man sa Randall K. Bennett, “Ang Imo Patriarchal Blessing—Inspirado nga Pagtuytoy halin sa Amay nga Langitnon,” Liahona, Mayo 2023, 42–44.

Genesis 50:19–21

Ang Dios makabulig sa akon nga makita ang kapuslanan sang akon mga pagtilaw.

Bisan pa nga daw indi klaro samtang ginaagyan niya ini, ginpanumdum sang ulihi ni Jose ang iya mga kabudlayan sa Egipto kag nakita nga “gintuyo ini sang Dios sa kaayohan” (Genesis 50:20). Kon abi nakabisita ka kayJose samtang ara sia sa buho ukon sa prisohan, paano mo sia paumpawan? Paano makabulig ang Genesis 50:19–21 sa imo sa tinion sang imo pagtilaw?

Tan-awa man sa Doktrina kag mga Kasugtanan 122.

Si Jose sang Egipto nga nakakita sang panan-awon parte kay Joseph Smith nga nagabaton sang bulawan nga mga lamina halin sa anghel Moroni

Joseph Smith among the Prophets [Si Joseph Smith Upod sa mga Propeta], ni Paul Mann (detalye)

Genesis 50:24–25

“Isa ka manugpanan-aw ang bangonon sang Ginuo nga akon Dios.”

Samtang imo ginabasa ang Genesis 50:24–25 kag Paglubad ni Joseph Smith, Genesis 50:24–38 (sa Appendix sang Paglubad ni Joseph Smith), hunahunaa kon ngaa importante kay Jose nga mahibaloan ang parte kay Moises kag Joseph Smith madamo nga siglo antes pa. Paano natuman ni Joseph Smith ang mga propesiya parte sa iya? (tan-awa sa Doktrina kag mga Kasugtanan 1:17–23; 20:7–12; 39:11; 135:3).

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

seksyon sang mga kabataan nga icon 01

Mga Ideya para sa Pagtudlo sang mga Kabataan

Genesis 42–44; 45:4–15

Sarang ako magpalangga kag magpatawad sa akon pamilya.

  • Siguro masadya para sa imo kabataan nga idrama-drama ang istorya sang pag-updanay liwat ni Jose kag sang iya pamilya (tan-awa sa Genesis 42–44). Ukon pwede nila magamit ang “Si Jose kag ang Tiggulutom” (sa Mga Istorya sa Daan nga Katipan, 57–60) ukon ang mga litrato sa sini nga outline para itudlo ang istorya sa isa kag isa. Ari ang pila ka mga pamangkot nga mahimo makabulig sa imo kabataan nga magtuon sa istorya:

    • Ano ang ginhimo ni Jose agud magpakita sang pagpalangga sa iya pamilya? (tan-awa sa Genesis 45:4–15).

    • Ngaa sa banta mo nga ginpatawad ni Jose ang iya mga utod?

    • Ano sa banta mo ang nabatyagan sang mga utod ni Jose sang nahibal-an nila nga ginpatawad na sila ni Jose? Sin-o nga tawo sa imo kabuhi ang nagakinahanglan sang pagpatawad? Paano mo ipakita ang pagpalangga kag pagpatawad?

    2:26

    Joseph and the Famine

Samtang nagahanda ka sa pagtudlo, pamangkota ang imo kaugalingon, “Ano ang himuon sang akon kabataan para makatuon?” Halimbawa, sa sini nga aktibidades drama-dramahon ukon isugid liwat sang imo kabataan ang istorya. Ang paghimo sini magabulig sa ila nga madumduman kon ano ang natabo kag ang mga prinsipyo sang ebanghelyo nga ara sa istorya.

  • Ikaw kag ang imo kabataan basi maluyag magsugid sang eksperiyensya sang ginpatawad nila ang isa ka tawo ukon sila man ang ginpatawad. Pwede dayon kamo magkanta sang kanta pareho sang “Love One Another” (Children’s Songbook, 136) ukon “Help Me, Dear Father” (Children’s Songbook, 99).

Genesis 48:8–9

Ginabuligan ako sang Ginuo paagi sa mga bendisyon sang priesthood.

  • Pwede ninyo tan-awon sang imo kabataan ang litrato ni Jacob nga ginabendisyonan ang iya kabataan sa katapusan sining outline kag hambalan kon ano ang nagakatabo (tan-awa sa Genesis 48:8–9). Kon kinahanglanon, ipaathag nga si Jacob, ang tatay ni Jose, gusto maghatag sang bendisyon sang priesthood sa iya pamilya. Basi pwede man kamo mag-istoryahanay parte sa mga eksperiyensya ninyo sa pagbaton sang bulig halin sa Dios paagi sa bendisyon sang priesthood. Ano ang pila ka mga rason nga mahimo kita magpangayo sang bendisyon sang priesthood?

lamharon nga babayi nga nagabaton sang bendisyon

Genesis 45:5–11

Ginpadala sang Amay nga Langitnon si Jesucristo agud luwason ako.

  • Paano mo buligan ang imo kabataan nga makita ang Manluluwas sa istorya ni Jose nga ginaluwas ang iya pamilya sa tiggulutom? Pamensara nga maghimo sang tsart nga may duha ka bahin nga natig-ulohan Jose kag Jesucristo. Buligi ang imo kabataan nga pangitaon ang masunod nga pares sang balaan nga mga kasulatan kag isulat sa tsart ang mga butang nga pareho ara kay Jose kag Jesus: Genesis 37:3 kag Mateo 3:17; Genesis 37:26–28 kag Mateo 26:14–16; Genesis 45:5–7 kag Lucas 4:18; kag Genesis 47:12 kag Juan 6:35.

  • Pamangkota ang imo kabataan kon ano ang buot silingon nga luwason ukon salbaron ang isa ka tawo. Kon may ara sa ila nga nakaeksperiyensya nga maluwas ukon masalbar sa katalagman, hagara sila nga iistorya ini. Paano ginluwas ni Jose ang iya mga utod? (tan-awa sa Genesis 42:1–3; 45:5–7). Pwede kamo ululupod nga magtan-aw sang litrato sang Manluluwas kag hagaron ang imo kabataan nga hambalan kon paano kita ginaluwas ni Jesus.

Para sa dugang nga mga ideya, tan-awa sa isyu sang Abyan nga magasin sini nga bulan.

Si Israel nga nagahatag sang bendisyon sang priesthood sa iya anak nga lalaki

Jacob Blessing Joseph (Jacob Blessing His Sons) [Si Jacob nga Ginabendisyonan si Jose (Ginabendisyonan ni Jacob ang Iya mga Anak nga Lalaki)], ni Harry Anderson

Pahina sang aktibidades sang Primary: Sarang ako magpatawad