Genesis 18–23

Naghimo ang Ginuo sang mahimayaon nga mga promisa sa mga matinuohon, pero kon kaisa ang mga sirkumstansya sa aton mga kabuhi nagatulod sa aton nga manghunahuna kon paano ayhan ining mga promisa matuman. Siguro amo man sina ang nabatyagan ni Abraham kag Sara. Ano ang imo matun-an sa ila mga eksperiyensya? Basi makabulig nga sugdan ang imo pagtuon paagi sa pagrebyu sang ginpromisa sang Ginuo sa Genesis 17:4, 15–22. Ano ang reaksyon ni Abraham kag Sara? (tan-awa sa Genesis 18:9–12). Paano nagsabat ang Ginuo para buligan sila nga mag-angkon sang mas dako nga pagtuo sa Iya mga promisa? (tan-awa sa Genesis 18:14).

Ano ang imo makita sa sining mga bersikulo nga nagapatubo sang imo pagtuo? Ano pa nga mga eksperiyensya—sa imo kabuhi ukon sa iya sang iban—ang nagpabakod sang imo pagtuo nga ang Ginuo magatuman sang Iya mga promisa sa Iya kaugalingon nga tion kag paagi? Pwede mo man binagbinagon kon paano mo masustiner ang imo pagtuo kon ang ginapromisa nga mga bugay indi mabaton sa sini nga kabuhi. Ano nga laygay ang makita mo sa Mga Hebreo 11:8–13 kag sa mensahe ni Pangulong Russell M. Nelson nga “Si Cristo Nabanhaw; Ang Pagtuo sa Iya Magasaylo sang mga Bukid”? (Liahona, Mayo 2021, 101–4).

Tan-awa man sa Doktrina kag mga Kasugtanan 88:68.

Ano nga mga leksyon ang imo matun-an parte sa pagpalagyo sa kalainan samtang imo ginabasa ang parte kay Lot kag sa iya pamilya? Halimbawa, ano ang nanamian mo sa ginhambal kag ginhimo sang mga anghel para buligan si Lot kag ang iya pamilya nga makapalagyo sa kalaglagan? (tan-awa sa Genesis 19:12–17). Paano ang Ginuo nagabulig sa imo kag sa imo pamilya nga makapalagyo ukon maproteksyonan batok sa malain nga mga impluwensya sang kalibutan? Panumduma ang mga sitwasyon nga mahimo ka matentar nga “magbalikid” (bersikulo 26) imbes nga magpaabot kuntani nga may pagtuo sa Manluluwas. Ano ang ginadugang sang Lucas 9:62 sa imo paghangop sining panudlo?

Gintudlo ni Elder Jeffrey R. Holland:

“Maathag, ang sayop sang asawa ni Lot amo nga wala lamang sia nagbalikid; sa iya tagipusuon gusto niya nga magbalik. Makita nga wala pa gani sia maglampuwas sa dulonan sang siyudad, nahidlaw na sia sa gintanyag sang Sodoma kag Gomorra sa iya. …

“Posible nga nagbalikid ang asawa ni Lot nga may hinakit sa Ginuo sa Iya ginpangayo nga iya biyaan. … Gani indi lang nga nagbalikid sia; nagbalikid sia nga may kahidlaw. Sa malip-ot, ang iya kahamuot sa nagligad mas mabug-at sangsa iya kompiyansa sa palaabuton. Maathag nga, sa pinakanubo, ina bahin sang iya sala.

“… Nagapangabay ako sa inyo nga indi mag-ukot sa mga adlaw nga naglipas na ukon wala kapuslanan nga handumon ang kahapon, bisan ano pa kanami inang mga kahapon. Ang nagliligad dapat kuhaan sang leksyon pero indi dapat magpangabuhi diri. Nagabalikid kita para tipunon ang mga mapuslan sa manami nga mga eksperiyensya pero indi ang mga indi mapuslan. Kag kon matun-an na naton ang aton kinahanglan tun-an kag madala upod sa aton ang pinakamaayo nga aton naeksperiyensyahan, sa sina makatulok kita sa palaabuton kag madumduman nga ang pagtuo pirme gid nagatudlo sa palaabuton. …

“… Ang pag-ukot sa nagligad nga mga pagkabuhi, lakip na ang nagligad nga mga sayop, indi gid husto! Indi ini ang ebanghelyo ni Jesucristo. …

“Sa tanan nga [katawhan] sang tanan nga henerasyon, ginapanawagan ko, ‘Dumduma ang asawa ni Lot’ [Lucas 17:32]. Ang pagtuo para sa palaabuton. Ang pagtuo nagatubo sa nagligad pero wala ini nagahandum nga magpabilin didto. Ang pagtuo nagasalig nga ang Dios may dalagko nga mga butang nga ginhanda para sa kada isa sa aton kag si Cristo amo matuod ang ‘pinakamataas nga pari sang maayong mga butang nga [maabot pa]’ (Mga Hebreo 9:11.)”

Bisan wala naton mahibal-i ang tanan nga rason nga ginsugo sang Dios si Abraham nga ihalad si Isaac, nahibal-an naton nga isa ato ka pagtilaw sang iya pagtuo sa Dios. Nahibal-an man naton nga ato “kaanggid sang iya sang Dios kag iya Bugtong nga Anak” (Jacob 4:5). Samtang imo ginabasa ang Genesis 22:1–19, mahimo mo pangitaon ang mga simbolo ukon mga pagkaanggid sang paghalad ni Abraham kay Isaac kag sang paghalad sang Amay sang Iya Anak nga si Jesucristo. Pamensara nga isulat ang imo makita sa isa ka tsart pareho sini:

Ano nga mga simbolo ukon mga pagkaanggid sa nagabayad-sala nga sakripisyo sang Manluluwas ang pinakamakahulugan sa imo? Pamensara ang pagkanta ukon pagbasa sang mga tinaga sa himno nga nagapakita sang pagpalangga sang Amay nga Langitnon para sa aton, pareho sang “God Loved Us, So He Sent His Son,” Hymns, no. 187. Pwede mo man isulat ang imo mga balatyagon parte sa Amay nga Langitnon kag kay Jesucristo kag sa ila sakripisyo para sa imo.

Ngaa ang carnero tama kabaskog nga simbolo sang Anak sang Dios?

12:57

• Para hibaluon ang pagsalig ni Abraham kag Sara sa mga promisa sang Dios, pwede ninyo hambalan sang imo kabataan ang isa ka tion nga ginkinahanglan nila maghulat para sa isa ka butang nga gusto gid nila. Dayon pwede ninyo tan-awon ang larawan ni Sara kag Isaac sa umpisa sining outline kag hambalan ang promisa nga ginhimo sang Dios sa iya kag kay Abraham (tan-awa sa “Si Abraham kag si Sara,” sa Mga Sugilanon sa Daan nga Katipan, 28–31). Buligi ang imo kabataan nga magpanumdom sang mga butang nga ginapromisa sang Dios sa aton kon matinuohon kita. Paisoga sila nga mangin pasensyoso kag magsalig nga tumanon sang Dios ang Iya mga promisa.

  

  2:20

• Para buligan ang imo kabataan nga tun-an ang importante nga kamatuoran sa Genesis 18:14, pwede mo isulat ang kada tinaga halin sa una nga dinalan sa sinang bersikulo sa lainlain nga panid sang papel. Dayon balasaha ang mga papel, kag hagara ang imo kabataan nga iplastar ang mga tinaga sa husto nga pasunod. Pwede ninyo dayon basahon sang imo kabataan ang Genesis 17:15–21; 21:1–7 para magpangita sang ehemplo sang ginhimo sang Ginuo nga daw kaimposible. Ipakigbahin sa imo kabataan ang imo pagtuo nga tumanon sang Ginuo ang Iya mga promisa, bisan pa daw imposible ukon madugayan.

• Pamangkota ang imo kabataan parte sa mga sitwasyon nga may naghagad sa ila nga maghimo sang isa ka butang nga nahibal-an nila nga indi husto. Paano naton “palagyohan” ining mga sitwasyon? Isaysay sing malip-ot ang Genesis 19:15–26 paagi sa pagpaathag nga ang pamilya ni Lot nag-istar sa tama kalain nga siyudad kag ginpaandaman sila sang mga anghel nga maghalin. Samtang ululupod ninyo nga ginabasa sang imo kabataan ang mga bersikulo 15–17, 26, pamangkota sila kon ano ayhan ang kahulugan para sa aton sa karon nga “magpalagyo” sa kalainan kag “indi magbalikid” (bersikulo 17).

• Ang paggamit sang mga larawan ni Abraham kag Isaac kag sang Paglansang sa Krus (tan-awa sa Libro sang mga Larawan nga Pang-ebanghelyo, num, 9, 57) makabulig sa imo kabataan nga ikumparar ang istorya sa Genesis 22 sa sakripisyo sang Manluluwas (tan-awa sa Mateo 27:26–37). Ano ang matun-an naton parte sa Amay nga Langitnon kag kay Jesucristo sa mga panaysayon parte kay Abraham kag Isaac kag sa Paglansang sa Krus? (Tan-awa man ang “Si Abraham kag si Isaac,” sa Mga Sugilanon sa Daan nga Katipan, 34–37.)

  

  2:0

• Makapamensar ka bala sang simple nga hampang upod sa imo kabataan nga nagakinahanglan nga magsunod sa mga direksyon? Ang mga direksyon mahimo nga magtudlo sa ila sa tinago nga litrato sang Manluluwas. Ang hampang pwede nga magbukas sang paghinambalanay parte sa mga butang nga ginsugo sa aton sang Amay nga Langitnon para makapangabuhi kita liwat upod sa Iya kag kay Jesucristo. Pamensara ang pagkanta sang kanta pareho sang “Keep the Commandments” (Children’s Songbook, 146–47). Mahimo man makabulig ang pahina sang aktibidades sini nga semana.