“Pebrero 16–22. ‘Mangin Mas Matutum nga Sumulunod sang Pagkamatarong’: Genesis 12-17; Abraham 1–2,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Pebrero 16–22. ‘Mangin Mas Matutum nga Sumulunod sang Pagkamatarong’,” Dali, Magsunod sa Akon: 2026
Melchizedek Blesses Abram [Ginabendisyunan ni Melquisedec si Abram], ni Walter Rane (detalye)
Pebrero 16–22: “Mangin Mas Matutum nga Sumulunod sang Pagkamatarong”
Genesis 12–17; Abraham 1–2
Bangud sang kasugtanan nga ginhimo sang Dios sa iya, gintawag si Abraham nga “ang amay sang mga tampad” (Doktrina kag mga Kasugtanan 138:41) kag “ang Abyan sang Dios” (Santiago 2:23). Minilyon sa karon ang nagatahod sa iya bilang ila direkta nga katigulangan, kag ang iban gin-adoptar sa iya pamilya paagi sa pagkahaylo sa ebanghelyo ni Jesucristo. Pero si Abraham mismo naghalin sa problemado nga pamilya—ang iya nga tatay, nga nagtalikod sa matuod nga pagsimba sa Dios, nagtinguha nga ihalad si Abraham sa mga dios-dios. Sa pihak sini, ang handum ni Abraham nga “mangin mas matutum nga sumulunod sang pagkamatarong” (Abraham 1:2), kag ang kasaysayan sang iya kabuhi nagapakita nga ginhatag sang Dios ang iya handum. Ang kabuhi ni Abraham nagatindog bilang testimonya nga bisan ano ang kasaysayan sang pamilya sang isa ka tawo, ang palaabuton sarang gid mapun-an sang paglaum.
Mga Ideya sa Pagtuon sa Balay kag sa Simbahan
Bugayan ako sang Dios bangud sang akon pagtuo kag matarong nga mga handum.
“Ginaimpluwensyahan kita tanan sang aton mga pamilya [kag] aton kultura,” tudlo ni Elder Neil L. Andersen, “pero nagapati ako nga may lugar sa sulod naton nga kita lang gid ang makakontrolar kag makatuga. … Sa kadugayan, ang aton mga handum ginahatagan kabuhi kag makita ang mga ini sa aton mga pagpili kag sa aton mga aksyon” (“Educate Your Desires, Elder Andersen Counsels,” ChurchofJesusChrist.org). Pamensara sing maayo kon paano ginapakita sa Abraham 1:1–19 ang gintudlo ni Elder Andersen. Mahimo nga makabulig ang mga pamangkot pareho sini:
-
Ano ang ginhandum ni Abraham? Paano ang iya mga handum makita sa iya mga aksyon? Paano ginsuportahan sang Dios ang iya mga handum?
-
Ano ang imo mga handum? Paano ang mga ini makita sa imo mga aksyon? Paano ka ginasuportahan sang Dios?
-
Ano ang mensahe sining mga bersikulo sa mga tawo nga ang mga miyembro sang pamilya indi gusto sang pagkamatarong?
Isa sang pinakadaku nga handum ni Abraham kag Sara—ang makaangkon sang anak—wala natuman sa madamo nga tinuig (tan-awa sa Genesis 15:1–6). Ano ang imo natun-an sa Mga Hebreo 11:8–13 kon paano gin-atubang ni Abraham kag Sara ining pagtilaw? Paano ka ginabuligan sang Manluluwas nga “[maabiabi]” ang Iya mga promisa, bisan pa ang mga ini ara “sa malayo”?
Deliverance of Abraham
Genesis12:1–3; 13:15–16; 15:1–6; 17:1–8, 15–22; Abraham 2:6–11
Gusto sang Dios nga maghimo kag magtuman ako sang mga kasugtanan sa Iya.
Ngaa importante nga imo mahibal-an ang parte sa kasugtanan nga ginhimo sang Ginuo kay Abraham? Tungod gusto sang Dios nga maghimo sang pareho nga mga kasugtanan sa imo. Ginpromisa Niya nga ining kasugtanan magapadayon sa kabataan ni Abraham, ukon “kaliwatan,” kag nga “ang tanan nga magbaton sining Ebanghelyo paga … kabigon nga imo kaliwatan” (tan-awa sa Abraham 2:10–11). Kon sayuron, ang kasugtanan nagapadayon sa imo—sang ginbunyagan ka kag mas lubos sang naghimo ka sang mga kasugtanan sa templo (tan-awa sa Mga Taga Galacia 3:26–29; Doktrina kag mga Kasugtanan 132:30–32).
Sa sina nga rason, basi gusto mo tun-an ang Abraham 2:6–11 kag ilista kon ano gid ang ginpromisa sang Dios kay Abraham kag Sara (tan-awa man sa Genesis 12:1–3; 13:15–16; 15:1–6; 17:1–8, 15–22). Paano ayhan ining mga bugay magamit sa imo?
Ang iban sining mga promisa may kaanggid sa mga promisa sa wala katapusan. Paano ang mga promisa pareho sang duta nga palanublion ukon daku nga kaliwatan matuman sa wala katapusan? (tan-awa sa Doktrina kag mga Kasugtanan 131:1–4; 132:20–24, 28–32).
Wala labot sa ginpromisa nga mga bugay, ginhambalan si Abraham sang Dios nga “mangin pagpakamaayo” (Genesis 12:2; emphasis gindugang). Ano sa banta mo ang kahulugan sina? Paano ka mangin pagpakamaayo? (tan-awa sa Abraham 2:11).
Agud itudlo ang parte sa mga kasugtanan, si Elder Dale G. Renlund nag-istorya parte sa higante nga mga balod sa Amazon River (tan-awa sa “Paglab-ot sa Gahum sang Dios Paagi sa mga Kasugtanan,” Liahona, Mayo 2023, 35–37. Magpangita sa sining mensahe sang mga dinalan nga nagabulig sabat sang pamangkot “Ngaa gusto sang Dios nga maghimo ako sang mga kasugtanan sa Iya?”
Agdaha ang mga tawo nga tudloan ang isa kag isa. Kon nagatudlo ka sa imo pamilya ukon sa klase sa Simbahan parte sa mga kasugtanan, panumduma ang paghatag sa tagsa ka tawo sang isa ka bahin sang mensahe ni Elder Renlund agud tun-an. Pwede nila dayon iistorya sa iban sa pamilya ukon sa klase ang ila natun-an. Ginatugtan sini ang mga tawo nga magpamatuod kag magtuon sa isa kag isa, kag nagaimbitar ina sang Espiritu. (Tan-awa sa Pagtudlo sa Paagi sang Manluluwas, 26.)
Tan-awa sa “Mga Dapat Tandaan: Ang Kasugtanan,” sa sining manwal).
The Abrahamic Covenant [Ang Kasugtanan kay Abraham], ni Dilleen Marsh (detalye)
Genesis 14:18–19; Paglubad ni Joseph Smith, Genesis 14:25–40
“Si Melquisedec tawo nga may pagtuo.”
Hunahunaa nga kuno abi ginapakilala mo si Melquisedec sa isa ka tawo nga wala makakilala sa iya. Ano ang imo ihambal? Magpangita sang mga ideya sa Paglubad ni Joseph Smith, Genesis 14:26–27, 33–38 (sa Paglubad ni Joseph Smith appendix); Alma 13:13–19; Doktrina kag mga Kasugtanan 107:1–4. Ano nga Cristohanon nga mga kinaiya ang makita mo sa sining mga paglaragway kay Melquisedec? Paano ang imo pagtuon sang kabuhi ni Melquisedec nagaapekto sang imo panan-aw sa Melchizedek Priesthood?
Genesis 14:18–24; Paglubad ni Joseph Smith, Genesis 14:36–40
Nagbayad si Abraham sang ika-pulo.
Ano ang matun-an mo parte sa panimuot ni Abraham tuhoy sa manggad sa Genesis 14:18–24 kag Paglubad ni Joseph Smith, Genesis 14:36–40 (Paglubad ni Joseph Smith appendix)? Halimbawa, talupangda ining iya sabat sa hari sang Sodoma sa Genesis 14:23. Paano ang pagtuman sang layi sang ika-pulo nagaapekto sa imo panan-aw sa kuwarta?
Genesis 16
Ang Dios nagapamati sa akon.
Samtang imo ginabasa ang Genesis 16, basi pwede mo panumdumon ang parte sa isa ka tion nga wala ka gintrato sing patas pareho kay Hagar. Tandai nga ang “Ismael” nagakahulugan nga “ang Dios nagapamati.” Paano ginpakita sang Ginuo sa imo nga nabatian ka Niya?
Tan-awa man sa “Secret Prayer,” Hymns, no. 144.
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Giyahan ako ni Jesucristo nga may pag-ulikid kag pagpalangga.
-
Samtang ginabasa ninyo sang imo kabataan ang Abraham 1:18 kag 2:8, mahimo mo sila agdahon nga magpamati para sa ginamitlang nga mga bahin sang lawas sa duha ka bersikulo. Ukon pwede kamo maghampang nga piyongon sang isa ka bata ang iya mga mata kag tuytuyan mo ang bata sa kamot kag dal-on sa isa ka lugar. Dayon pwede ninyo hambalan kon ano ang balatyagon kon tuytuyan kita ni Jesucristo sa kamot ukon protektahan kita.
Genesis 13:5–12
Sarang ako mangin makigdaeton.
-
Basi masadyahan ang imo pamilya nga idrama-drama ang istorya sa Genesis 13:5–12, nga kuno abi sila si Abraham, Lot, kag ang mga manugbantay sang kasapatan. Paano naton sundon ang ehemplo ni Abraham sang pagkamakigdaeton sa aton pamilya ukon mga abyan? Tilawi nga ipadrama-drama ang ila mga sabat.
Lot’s Choice [Ang Ginpili ni Lot], ni William Fredericks © Providence Collection/lisensyado sa goodsalt.com
Genesis 13:16; Genesis 15:1–6; 17:1–8; Abraham 2:9–11
Gusto sang Amay nga Langitnon nga maghimo ako sang mga kasugtanan sa Iya.
-
Pamensara nga patan-awon ang imo kabataan sang balas sa isa ka suludlan, ang mga bituon sa langit kon gab-i, ukon ang litrato sa katapusan sining outline. Makabulig ini sa ila nga maintiendihan ang mga promisa sang Dios sa Genesis 13:16; 15:1–6. Hambali kon paano ninyo natun-an nga saligan ang mga promisa sang Dios, bisan pa nga daw imposible ang mga ini.
-
Para tudloan ang imo kabataan parte sa mga kasugtanan, pangabaya sila nga iistorya sa imo ang parte sa isa ka tion nga naghimo sila sang promisa ukon may naghimo sang promisa sa ila. Kon makabulig, magpakigbahin sang pila sang imo kaugalingon nga mga halimbawa—dala na ang mga kasugtanan nga ginhimo mo sa Dios sa tion sang bunyag ukon sa templo. Paano ang imo mga kasugtanan nag-apekto sang imo relasyon sa Dios? Magpili sang pila ka mga dinalan sa Genesis 15:1–6; 17:1–8; Abraham 2:9–11 para iistorya ang pila sang mga bugay nga ginpromisa sang Dios kay Abraham kag Sara.
-
Para buligan ang imo kabataan nga maghanda sa paghimo sang kasugtanan sa Dios kon mabunyagan sila, pwede mo gamiton ang pila ka mga ideya sa aktibidades nga ginapanugyan sa Appendix A ukon Appendix B.
Abraham 1:12–17; Genesis 16:7–11
Ang Dios nagapamati sa akon.
-
Sang ara sa katalagman ang kabuhi ni Abraham, nagpanawag sia sa Dios. Sang nagaisahanon si Hagar sa kamingawan, nahibal-an niya nga nabatian sia sang Dios. Pamensara nga iistorya ining duha ka sugilanon sa imo kabataan: “Si Abraham kag si Sara” kag “Si Hagar” sa Mga Sugilanon sa Daan nga Katipan, 28–31, 32–33. Ano ang aton matun-an parte sa Dios sa sining mga istorya? Dayon pwede mo iistorya sa isa kag isa ang mga eksperiyensya sang nabatyagan mo nga nabatian ka sang Dios. Ang kanta pareho sang “A Child’s Prayer” (Children’s Songbook, 12–13) makapabakod sining prinsipyo.
Abraham and Sarah
Hagar
Para sa dugang nga mga ideya, tan-awa sa isyu sang Abyan nga magasin sini nga bulan.