“Mga Dapat Tandaan: Ang Kasugtanan,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Ang Kasugtanan,” Dali, Magsunod sa Akon: 2026
Mga Dapat Tandaan
Ang Kasugtanan
Sa bilog nga Daan nga Katipan, pirme mo mabasahan ang tinaga nga kasugtanan. Sa karon masami naton ginapanumdom ang mga kasugtanan bilang sagrado nga mga promisa sa Dios, pero sa dumaan nga kalibutan, ang mga kasugtanan importante man nga bahin sang inter-aksyon sang mga tawo sa kada isa. Para sa ila proteksyon kag kaluwasan, kinahanglan sang mga tawo nga magsalig sa kada isa, kag ang mga kasugtanan isa ka paagi nga masiguro ang ina nga pagsalig.
Gani sang nakighambal ang Dios kay Enoc, Noe, Moises, kag iban pa parte sa mga kasugtanan, ginaagda Niya sila sa pagsulod sa kaangtanan sang pagsalig upod sa Iya. Ginatawag naton ining kasugtanan nga ang bag-o kag wala katubtuban nga kasugtanan ukon ang kasugtanan kay Abraham—isa ka paghinambit sa kasugtanan nga ginhimo sang Dios kay Abraham kag Sara kag dayon ginpadayon sang ila mga kaliwatan nga sanday Isaac kag Jacob (nga ginatawag man nga Israel). Sa Daan nga Katipan, simple lang ini nga ginatawag “ang kasugtanan.” Makita mo nga ang Daan nga Katipan labaw sa tanan istorya sang katawhan nga nagkabig sa ila mga kaugalingon nga mga manunubli sining kasugtanan—ang katawhan sang kasugtanan.
Ang kasugtanan kay Abraham nagapadayon nga importante sa karon, labi na sa mga Santos sa Ulihing mga Adlaw. Ngaa? Bangud kita katawhan man sang kasugtanan, direkta man kita ukon indi direkta nga mga kaliwat ni Abraham, Isaac, kag Jacob. Sa sining rason, importante nga maintiendihan kon ano ang kasugtanan kay Abraham kag kon paano ini magamit sa aton sa karon.
Ano ang Kasugtanan kay Abraham?
Gusto ni Abraham nga “mangin mas matutum nga sumulunod sang pagkamatarong” (Abraham 1:2), gani gin-agda sia sang Dios nga magsulod sa kaangtanan sang kasugtanan. Indi si Abraham ang una nga may amo sini nga handum, kag indi sia ang una nga nakabaton sang kasugtanan. Kay sa pagkamatuod, isa ini ka wala katubtuban nga kasugtanan. Ginpangayo ni Abraham “ang pagpakamaayo sang mga amay” (Abraham 1:2)—mga bugay nga gintanyag paagi sa kasugtanan kay Adan kag Eva kag sang ulihi sa mga tawo nga nagpangayo sining mga bugay sing matutom.
Ang kasugtanan sang Dios kay Abraham nagpromisa sang matahum nga mga bugay: palanublion nga duta, madamo nga kaliwat, pagbaton sang mga ordinansa sang priesthood, kag ngalan nga pagatahuron sa mga henerasyon nga magaabot. Pero ang tutok sining kasugtanan indi lamang sa mga bugay nga mabaton ni Abraham kag sang iya pamilya kundi sa pagpakamaayo nga sila mangin sa tanan nga mga anak sang Dios. “Mangin pagpakamaayo ikaw,” siling sang Dios, “kag sa imo pakamaayuhon ang tanan nga mga panimalay sang duta” (Genesis 12:2–3).
Naghatag bala ining kasugtanan sang pinasulabi nga estado sa ila ni Abraham, Sara, kag sa ila mga kaliwat sa tunga sang mga anak sang Dios? Sa punto lamang nga ini pribelihiyo sa pagpakamaayo sa iban. Ang panimalay ni Abraham ang “[magadala sining] pag-alagad kag Pagkapari sa tanan nga nasyon,” nga ginapaambit “ang mga bugay sang Ebanghelyo, nga amo ang mga bugay sang kaluwasan, nga amo ang kabuhi nga wala’y katapusan” (Abraham 2:9, 11). Ang mangin katawhan sang kasugtanan wala nagakahulugan nga mas maayo sila sangsa iban; nagakahulugan ini nga may obligasyon sila nga buligan ang iban nga mangin mas maayo.
Ining kasugtanan amo ang bugay nga ginahandum ni Abraham. Pagkatapos nga mabaton ini, siling ni Abraham sa iya tagipusuon, “Ang imo alagad matutum nga nagpangita sa imo; karon nakita ko ikaw” (Abraham 2:12).
Linibo ka tuig na ina nga nagligad, pero ining kasugtanan ginpanumbalik sa aton panahon. Kag karon nagakatuman ini sa mga kabuhi sang katawhan sang Dios. Ang katumanan sang kasugtanan nagakusog sa ulihing mga adlaw samtang nagaprogreso ang buluhaton sang Dios, nga nagabugay sang mga pamilya sa bilog nga kalibutan. Kag ang bisan sin-o, pareho kay Abraham, nga gusto mangin mas matutom nga sumulunod sang pagkamatarong—ang bisan sin-o nga matutom nga nagapangita sang Ginuo—sarang mangin kabahin sini.
Ano ang Kahulugan sa Akon sang Kasugtanan kay Abraham?
Anak ka sang kasugtanan. Nagahimo ka sang kasugtanan sa Dios sang ginbunyagan ka kag kon mag-ambit ka sang sakramento. Kag ginabaton mo ang kabug-osan sang kasugtanan paagi sa mga ordinansa sang templo.
Paagi sining mga kasugtanan kag mga ordinansa, kita mangin katawhan sang Dios. Ginaangot kita sa Iya “sang wala katubtuban nga mga kaangtanan.” “Sa tion nga maghimo kita sang kasugtanan kaupod sa Dios”, tudlo ni Pangulong Russell M. Nelson, “ginabayaan naton ang pagka-neutral sa katubtuban. Indi pagtalikdan sang Dios ang Iya relasyon sa mga naghimo sining kaangtanan upod sa Iya. Ang matuod, ang tanan nga naghimo sang kasugtanan upod sa Dios makabaton sang espesyal nga gugma kag kaluoy. … Tungod sang aton kasugtanan upod sa Dios, indi Sia magkataka sa Iya pagpaninguha nga buligan kita, kag indi naton maubos ang Iya maluluy-on nga pasensya para sa aton.” Makita mo ini sa kasaysayan sang katawhan sa kasugtanan sang Dios sa Daan nga Katipan, kag makita mo ini sa imo kaugalingon nga kabuhi bilang isa sang Iya mga anak sa kasugtanan.
Be Not Afraid [Indi Magkahadlok], ni Dan Wilson
Amo ini ang malahalon nga paghangop nga ginhatag sa aton tungod sa Pagpanumbalik sang kasugtanan kay Abraham paagi sa Propeta nga si Joseph Smith. Gani kon mabasa mo ang parte sa mga kasugtanan sa Daan nga Katipan, indi lang pagpamensara ang relasyon sang Dios kay Abraham, Isaac, kag Jacob. Pamensara man ang Iya relasyon sa imo. Kon imo mabasa ang parte sa promisa sang indi maisip nga kaliwatan, indi lang pagpamensara ang minilyon nga nagatawag karon kay Abraham nga ila amay. Pamensara man ang promisa sang Dios sa imo nga wala katapusan nga mga panimalay kag wala katapusan nga pagtubo. Kon imo mabasa ang parte sa promisa nga duta nga palanublion, indi lang pagpamensara ang duta nga ginpromisa kay Abraham. Pamensara man ang parte sa langitnon nga kapalaran sang duta mismo—isa ka palanublion nga ginpromisa sa “mapainubuson” nga “nagasalig sa Ginuo” (Mateo 5:5; Mga Salmo 37:9, 11). Kag kon imo mabasa ang parte sa promisa nga ang katawhan sang kasugtanan sang Dios magabugay sang “tanan nga mga panimalay sang duta” (Abraham 2:11), indi pagpamensara ang pag-alagad lang ni Abraham ukon sang mga propeta nga naggwa halin sa iya. Pamensara man ang sarang mo himuon—bilang sumulunod sa kasugtanan ni Jesucristo—agud mangin bugay sa mga pamilya sa imo palibot.