Genesis 5; Moises 6

Samtang imo ginatun-an ang Moises 6:26–36, ano ang imo natun-an parte sa mga epekto sang sala? Paano mo nakita ining mga epekto? Ano ang mga kinaiya ni Enoc nga nagbulig sa iya nga malampuwasan ining mga epekto? Paano sia ginbugayan sang Dios bilang resulta sini?

Kon pamatyag mo indi ka makasarang sang ginapaobra sa imo sang Ginuo, wala ka nagaisahanon. Bisan si Enoc amo man sina ang nabatyagan sang gintawag sia sang Ginuo nga mangin propeta. Samtang imo ginabasa ang Moises 6:26–36, pangitaa kon ngaa pamatyag ni Enoc indi sia makasarang kag kon ano ang ginhambal sang Ginuo para paisogon sia.

Sa mga bersikulo 37–47, pwede ka magpangita sang mga paagi nga ginsuportahan sang Ginuo si Enoc kag ginhatagan sang gahum para himuon ang Iya buluhaton (tan-awa sa Moises 7:13). Mahimo mo man ikumparar ang eksperiyensya ni Enoc sa eksperiyensya sang iban nga mga propeta nga nakabatyag sang kakulangan, pareho kay Moises (tan-awa sa Exodo 4:10–16), Jeremias (tan-awa sa Jeremias 1:4–10), Nefi (tan-awa sa 2 Nefi 33:1–4), kag Moroni (tan-awa sa Eter 12:23–29). Ano sa pamatyag mo ang gusto sang Ginuo nga imo matun-an sa sining balaan nga mga kasulatan parte sa buluhaton nga Iya ginhatag sa imo?

Madamo nga moderno nga apostoles kag mga propeta ang nagpabutyag sang pareho nga mga balatyagon kay Enoc sang ginlaragway nila ang ila mga balatyagon sa pagbaton sang ila mga tawag.

Ano ang imo matun-an halin sa sining mga propeta kag mga apostoles parte sa imo mga balatyagon sang kakulangan? San-o mo nabatyagan nga ginbuligan ka sang Manluluwas sang ginpangabay ka Niya nga maghimo sang mabudlay nga mga buluhaton? Pamensara ang pagsulat sang pila ka mga eksperiyensya sa imo palaabuton nga kinahanglan mo magsalig sa bulig sang Manluluwas. Paano mo atubangon ining mga hitabo nga may pagtuo kay Jesucristo?

Tungod may ara kita sang libro ni Moises, nahibal-an naton nga ginatudloan sang Dios ang Iya mga anak kon paano matubos humalin pa kay Adan kag Eva. Samtang imo ginatun-an ang Moises 6:48–68, pangitaa ang dapat naton mahibal-an kag himuon para matubos. Pat-ini ang pamangkot ni Adan sa bersikulo 53. Nakapanumdum ka bala sina? Ano ang imo natun-an sa sabat sang Ginuo sa mga bersikulo 53–65? Pwede mo kabigon ining mga bersikulo bilang mensahe sang Ginuo sa bunyag ni Adan. Ano ang imo matun-an parte sa bunyag halin sa Iya mensahe? Ngaa sa banta mo nga ginakumparar Niya ang bunyag sa “pagkabun-ag liwat”? (bersikulo 59). Ano ang pwede mo himuon para dalayon nga “mabun-ag liwat” sa bilog mo nga kabuhi?

Pagkatapos gintudloan si Adan sang mga kamatuoran sang ebanghelyo ni Jesucristo, ang Ginuo naghambal kay Adan sa Moises 6:51–63, nga itudlo ang mga ini sa palaabuton pa nga mga henerasyon. Pamensara nga ilista ining mga kamatuoran. (Basi makabulig nga tungaon ang dinalan sa mas magagmay nga grupo sang mga bersikulo, pareho sang mga bersikulo 51–52, 53–57, 58–60, 61–63). Ngaa mapuslanon ining mga kamatuoran sa mga ulihing tubo sa karon nga panahon? Ano pa gid ang matun-an mo sa instruksyon sang Ginuo sa mga ginikanan sa Mosias 4:14–15 and Doktrina kag mga Kasugtanan 68:25–28; 93:40–50?

Ang pagbasa parte sa “libro sang handumanan” nga gintipigan sang pamilya ni Adan kag Eva mahimo nga makainspirar sa imo ukon sa imo pamilya nga maghimo man sang inyo kaugalingon nga libro sang handumanan. Ano sa pamatyagan mo ang gusto sang Ginuo nga imo isulat? Pamensara sing maayo ang pag-save sang impormasyon halin sa inyo libro sang handumanan sa FamilySearch.org.

• Sang gintawag si Enoch nga magwali sang ebanghelyo, nabalaka sia nga mapaslawan sia. Pero ginbuligan sia sang Dios. Basaha sing ululupod ining istorya sa Moises 6:26–34 (tan-awa man ang “Si Enoc nga Propeta” sa Mga Sugilanon sa Daan nga Katipan, 19–21). Ngaa nagbatyag si Enoc nga indi niya mawali ang ebanghelyo? (tan-awa sa Moises 6:31). Paano ginbuligan sang Dios si Enoc? (tan-awa sa Moises 6:32–34; 7:13).

• Basi masadyahan ang imo kabataan nga iistorya ukon idrama-drama ang iban nga halimbawa sang tinion nga ginbuligan sang Dios ang mga tawo nga maghimo sang mabudlay nga mga butang—halimbawa, si Noe, David, Amon, ukon si Samuel nga Lamanhon (tan-awa sa Libro sang mga Larawan nga Pang-ebanghelyo, num. 7, 19, 78, 81). Mahimo ka man mag-istorya sang imo kaugalingon nga eksperiyensya kag tugoti ang imo kabataan nga maghambal parte sa kon paano sila ginabuligan sang Dios nga maghimo sang mabudlay nga mga butang.

• Gintudloan sang Dios si Adan kon ano ang kinahanglan naton himuon agud makabalik sa Iya—magtuo kay Jesucristo, maghinulsol, magpabunyag, kag batonon ang regalo sang Balaan nga Espiritu. Buligi ang imo kabataan nga makita ining mga prinsipyo sa Moises 6:52, 57. Dayon pwede mo sila buligan nga magsulat sang malip-ot nga talk parte sa isa sang mga prinsipyo. Ang tagsa ka talk mahimo nga may ara sang isa ka balaan nga kasulatan halin sa Moises 6, isa ka eksperiyensya, kag testimonya. Tugoti sila nga ipakigbahin ang ila mga talk sa isa kag isa.

• Pwede ka man magpakita sang mga litrato nga nagarepresentar sang una nga mga prinsipyo sang ebanghelyo (tan-awa sa ika-apat nga artikulo sang pagtuo). Iplastar ang mga ini sa isa ka linya nga nagapakadto sa larawan ni Jesucristo. Samtang imo ginabasa ang Moises 6:52, pwede magtindog ang imo kabataan sa tupad sang husto nga litrato kon mabatian nila ang mga tinaga nga ginarepresentar sang litrato.

• Basi masadyahan ang imo kabataan sa pagkanta sang mga kanta nga nagatudlo sang mga prinsipyo sa Moises 6:52, pareho sang “Faith,” “When I Am Baptized,” kag “The Holy Ghost” (Children’s Songbook, 96–97, 103, 105). Buligi sila nga makita ining mga prinsipyo sa Moises 6:52.

• Para paisogon ang imo kabataan nga suportahan ang ila mga ginikanan sa ila papel bilang mga manunudlo sang ebanghelyo, pamensara nga pangabayon ang isa ka bata nga basahon ang Moises 6:58 kag pangitaon ang kasugoan nga ginhatag sang Dios sa mga ginikanan. Dayon pwede mo ipakita ang litrato ni Adan kag Eva nga ginatudloan ang ila kabataan (pareho sang ara sa katapusan sining outline) kag ipaistorya sa imo kabataan kon ano ang makita nila sa litrato. Pwede magdrowing ang imo kabataan sang mga litrato sang ila mga pamilya nga nagabasa sang balaan nga mga kasulatan sing ululupod, nagapangamuyo sing ululupod, ukon nagahampang sing ululupod.