“Pebrero 2–8. ‘Gintawag sang Ginuo ang Iya Katawhan nga Sion’: Moises 7,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Pebrero 2–8. ‘Gintawag sang Ginuo ang Iya Katawhan nga Sion’,” Dali, Magsunod sa Akon: 2026
Enoch Sees the Meridian of Time [Nakita ni Enoc ang Kasagsagan sang Panahon], ni Jennifer Paget
Pebrero 2–8: “Gintawag sang Ginuo ang Iya Katawhan nga Sion”
Moises 7
Sa bilog nga kasaysayan, gintinguhaan sang mga tawo nga malab-ot ang nalab-ot ni Enoc kag sang iya katawhan: ang magtukod sang modelo nga sosyedad sa diin wala sing kaimulon ukon kagamo. Bilang katawhan sang Dios, amo man sini ang aton gusto. Ginatawag naton ini nga pagtukod sang Sion, kag upod sini—magluwas sa pag-atipan sang mga imol kag pagpauswag sang kalinong—ang paghimo sang mga kasugtanan, pagpangabuhi sing ululupod sa pagkamatarong, kag pag-isa sa kada isa kag kay Jesucristo, “ang Hari sang Sion” (Moises 7:53). Kon ang kalibutan, ang imo komunidad, ukon ang imo pamilya indi gawa pareho sa gusto mo matabo, makabulig ang magpamangkot, Paano ini nahimo ni Enoc kag sang iya katawhan? Paano sila nangin “isa sing tagipusuon kag isa sing panghunahuna” (Moises 7:18) sa pihak sang pag-ilinaway sa ila palibot? Sa madamo nga detalye nga ginahatag sang Moises 7 sa aton parte sa Sion, ang isa nga bilidhon gid sa mga Santos sa Ulihing mga Adlaw amo ini: ang Sion indi lamang isa ka siyudad—isa ini ka kahimtangan sang tagipusuon kag espiritu. Ang Sion, suno sa gintudlo sang Ginuo, amo ang “putli sing tagipusuon” (Doktrina kag mga Kasugtanan 97:21). Gani basi ang pinakamaayo nga paagi sa pagtukod sang Sion amo ang magsugod sa aton mismo mga tagipusuon kag mga puluy-an.
Mga Ideya sa Pagtuon sa Balay kag sa Simbahan
Makabulig ako sa pagtukod sang Sion.
Sang una gid nga natun-an ni Propetang Joseph Smith ang parte kay Enoc kag sa iya Siyudad sang Pagkabalaan, nainspirar sia. Iya “nahibal-an nga nag-abot na ang adlaw nga ipahamtang liwat sang Ginuo ang Sion sa duta” (Saints, 1:108-9), kag ginsugdan niya ang bilog-kabuhi nga pagtinguha nga tukuron ang Sion. Ang pagbasa sang Moises 7 makainspirar sa imo nga padayunon inang pagtinguha sa karon.
Mahimo ka magsugod paagi sa pagbinagbinag sang sabat sa mga pamangkot nga “Ano ang Sion?” kag “Ano ang kinalain sini sa iban sa bilog nga kalibutan?” Hunahunaa ang paglista sang mga sabat nga mapensaran mo samtang ginatun-an mo ang Moises 7, labi na ang mga bersikulo 16-21, 27, 53, 62-69.
Ang imo mga sabat sa sining mga pamangkot mahimo magklaro nga madamo pa kita sang mga dapat obrahon para matukod ang Sion. Gani paano naton ini himuon? Basi makabulig nga panumdumon ang mga tinion sang nabatyagan mo nga ikaw “isa sing tagipusuon kag isa sing panghunahuna” sa isa ka tawo (Moises 7:18). Mahimo nga sa ward ini, sa pamilya, ukon sa grupo sa ulobrahan ukon eskwelahan. Ano ang ginhimo sang mga tawo para malab-ot ang matarong nga pag-isa?
Ari ang iban pa nga mga bulig nga mahimo naton tilawan agud makakita sang mga ideya kag inspirasyon. Magpili sang isa ukon masobra pa nga tun-an, kag dayon isulat ang nabatyagan mo nga himuon agud matukod ang Sion:
-
Mga Taga-Filipos 2:1–4; 4 Nefi 1:15–18; Doktrina kag mga Kasugtanan 97:21; 105:5.
-
Ulisses Soares, “Mag-ululutod kay Cristo,” Liahona, Nob. 2023, 70–73.
-
6:21
We Come Together & Unite As One
Gusto sang Dios nga ang Iya katawhan mangin “isa sing tagipusuon kag isa sing panghunahuna” (Moises 7:18).
Si Jesucristo “ang Hari sang Sion.”
Ano ang kahulugan sa imo nga si Jesucristo amo ang imo Hari? Tandai ang iban pa nga mga titulo ni Jesucristo sa sining bersikulo. Ano ang ginatudlo sang mga ini sa imo parte sa Iya? Ano sa banta mo ang buot silingon nga [magsulod] “sa ganhaan kag [magsaka] paagi sa [Iya]”?
Tan-awa man sa “Come, O Thou King of Kings,” Hymns, num. 59.
Ang Dios nagahibi—kag nagakasadya—para sa Iya mga anak.
May mga tawo nga nagakabig nga ang Dios malayo nga persona nga indi apektado ang balatyagon sang mga nagakatabo sa aton. Si Enoc nakaangkon sang lain nga panulok sa Dios sa panan-awon nga nasulat sa Moises 7. Ano ang iya natun-an parte sa Dios—kag ano ang imo matun-an—sa mga bersikulo 28-40? Ngaa sa banta mo nga si Enoc nakibot nga makita ang Dios nga nagahibi? Ngaa importante sa imo nga mahibal-an nga nagahibi Sia?
Sa pagpadayon sang panan-awon, si Enoc naghibi man. Pero nagpaambit man ang Dios sa iya sang mga rason para magkalipay. Pangitaa ang mga ini sa Moses 7:41–69. Ano ang imo natun-an sa panan-awon ni Enoc nga makabulig sa imo nga “ibayaw ang imo tagipusuon, kag magkasadya,” sa pihak sang “kapait” sa imo kabuhi (bersikulo 44)?
Si Jesucristo magabalik liwat sa katapusan nga mga adlaw.
Ang panan-awon ni Enoc, labi na gid ang nasulat sa Moises 7:59-67, isa sang una nga mga propesiya sa kasaysayan parte sa Ika-duha nga Pagkari sang Manluluwas. Ano ang nanamian mo sa paagi nga ginalaragway sining mga bersikulo ang katapusan nga mga adlaw? Halimbawa, hunahunaa kon paano sa imo pamatyag ang mga propesiya sa bersikulo 62 nagakatuman. Ano ang ginatudlo sa imo sining mga dinalan parte sa buluhaton sang Dios sa ulihing mga adlaw?
Tan-awa man sa Henry B. Eyring, “Mga Utod nga Babayi sa Sion,” Liahona, Nob. 2020, 67–69.
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Gusto sang Dios nga kita mangin “isa sing tagipusuon kag isa sing panghunahuna.”
-
Agud buligan ang imo kabataan nga makatuon parte kay Enoc kag sa Sion, pwede mo gamiton ang “Si Enoc nga Propeta” sa Mga Sugilanon sa Daan nga Katipan ukon ang ika-duha nga bersikulo sang “Follow the Prophet” (Children’s Songbook, 110–11). Dayon pwede mo pangabayon ang imo kabataan nga buligan ka sa pagsugid liwat sang istorya sa ila kaugalingon nga tinaga. Ang mga litrato ni Enoch sa sini nga outline basi makabulig.
-
Ari ang isa ka paagi nga mabuligan ang imo kabataan nga maintiendihan ang kahulugan sang mangin “isa sing tagipusuon kag isa sing panghunahuna” (Moises 7:18): Maghimo sang papel nga heart kag guntingon ini sa magagmay nga bahin nga daw puzzle, igo lang nga may isa ka parte ang tagsa ka bata. Ipasulat sa ila ang ila ngalan sa ila parte kag dayon pabuligi sa ila nga pormahon liwat ang tagipusuon. Samtang ginahimo nila ini, mahimo ka maghambal sang mga butang nga imo nanamian sa tagsa ka bata.
-
Buligi ang imo kabataan nga isipon kon kapila makita ang tinaga nga “Sion” sa Moises 7:18-21, 62-63, 68-69. Tagsa nga makita nila ang tinaga, buligi sila nga diskubrehon kon ano ang ginasiling sang bersikulo parte sa Sion. Paano kita mangin mas pareho sa mga tawo nga ginalaragway sa sining mga bersikulo?
Paisoga ang personal nga pagtuon sang balaan nga kasulatan. Bisan man kon nagatudlo ka sang imo pamilya sa balay ukon sang klase kon Domingo, isa sa pinakamaayo nga paagi nga makabulig ka sa iban nga magtukod sang nagapabilin nga pagtuo kay Jesucristo amo ang buligan sila nga magpahamtang sang pamatasan sang pagpangita sang personal nga eksperiyensya sa balaan nga mga kasulatan. Ipaambit ang imo mga eksperiyensya sa balaan nga mga kasulatan, kag paisoga ang mga miyembro sang pamilya ukon klase nga ipaambit ang ila mga eksperiyensya. Kon makabati kita parte sa kon paano nagabugay ang pagbasa sang balaan nga mga kasulatan sa iban, masami nagakainspirar kita nga pangitaon man ining nga mga bugay halin sa Ginuo. (Tan-awa sa Pagtudlo sa Paagi sang Manluluwas, 25.)
Gusto sang Amay nga Langitnon nga pilion ko nga sundon Sia.
-
Para ipakilala ang Moises 7:32–33 sa imo kabataan, pwede ninyo hambalan ang parte sa isa ka pagpapili nga ginkinahanglan nila himuon sang sini lang. Dayon pwede ninyo basahon ang mga bersikulo sing ululupod agud mahibal-an kon ano ang gusto sang Amay nga Langitnon nga aton pilion. Ano nga mga pagpili ang pwede naton himuon agud ipakita nga ginapili naton Sia? Pwede magbulos-bulos ang imo kabataan sa pagdrama-drama sang isa sining mga pagpili samtang ginapakot sang iban kon ano ang ginarepresentar sinang aksyon.
Si Jesus magabalik sa kalibutan.
-
Sa Moises 7:59, si Enoc nagpamangkot sa Ginuo. Hagara ang imo kabataan nga hibal-on ini kag dayon hambala sila nga pangitaon ang sabat sa bersikulo 60. Pwede man ninyo hambalan upod sa ila ang isa ka tion nga nagapaabot sila sa isa ka tawo nga makapauli. Pamangkota sila kon ano ang ila nabatyagan kag kon ano ang ila ginhimo agud maghanda. Paano naton handaan ang pagbalik ni Jesus?
-
Hunahunaa nga ipakita ang mga litrato sang tinion nga ang Manluluwas nagpakita sa mga tawo (pareho sa Libro sang mga Larawan nga Pang-ebanghelyo, num. 60, 82, 83, kag 84). Ano ang ginahimo sang mga tawo sa mga litrato? Ano ayhan ang nabatyagan sang mga tawo sang nakita nila si Jesus? Pwede man kamo magkanta parte sa Ika-duha nga Pagkari sang Manluluwas, pareho sang “When He Comes Again” (Children’s Songbook, 82–83), kag pamangkota ang kabataan kon ano sa pensar nila ang matabo kon mag-abot liwat si Jesus. Tugoti ang imo kabataan nga iistorya kon ano ang ila mabatyagan kon makita nila si Jesus sa Iya pag-abot liwat.
Para sa dugang nga mga ideya, tan-awa sa isyu sang Abyan nga magasin sini nga bulan.