Genesis 6–11; Moises 8

May makit-an ka bala nga bisan ano sa paglaragway sang panahon ni Noe nga daw kaanggid sa mga kondisyon sa aton panahon? Labi na, tan-awa sa Moises 8:15–24, 28. Ano nga mga topiko ang imo makita nga ginasulit-sulit?

Isa ka importante nga pagkaanggid nga makita mo amo nga gintawag sang Dios si Noe nga mangin propeta, kag nagtawag man Sia sang propeta sa aton panahon. Pamensara ang paglista sang mga kamatuoran nga imo matun-an parte sa mga propeta halin sa Moises 8:13–30. Paano ang aton buhi nga propeta nangin pareho kay Noe? Siyempre, ang propeta sang Ginuo sa karon wala nagapaandam parte sa Baha ukon nagapangabay sa aton nga magbulig tukod sang arka. Pero ano ang ginapaandam niya sa aton? Kag ano ang ginapangabay niya nga aton himuon?

Si Elder Allen D. Haynie nagtudlo, “Ang perpekto kag mapinalanggaon nga Amay sa Langit nagpili sang sulundan sang pagpahayag sang kamatuoran sa Iya mga anak paagi sa isa ka propeta” (“A Living Prophet for the Latter Days,” Liahona, Mayo 2023, 25). Pamensara nga tun-an ang mensahe ni Elder Haynie, nga ginapangita ang mga rason kon ngaa ang pag-angkon sang isa ka propeta tanda sang pagpalangga sang Amay nga Langitnon. Paano ang pagsunod sa propeta sang Ginuo nagbulig sa imo nga magbatyag sang kasigurohan sa pagkabuhi sa katapusan nga mga adlaw?

1:37

Ang iban nga tawo nagakatingala parte sa hustisya sang Dios sa pagpadala sang Baha agud “laglagon ang tawo” (Genesis 6:7). Si Elder Neal A. Maxwell nagpaathag nga sa tion sang Baha, “ang kagarukan nangin tuman kalala nga ginalimitahan sini ang kahilwayan sang tawo nga mangin matarong kag indi mangin patas nga ipadala ang mga espiritu nga magkabuhi diri tungod sang iya sini tuman nga kalainan” (We Will Prove Them Herewith [1982], 58). Mahimo mo man pamensaron kon paano ang Baha isa ka buhat sang kaluoy. Ano ang imo makita sa Genesis 6:5–13 nga nagapakita sang mapinalanggaon nga kaluoy kag gugma sang Ginuo?

Suno sa Genesis 9:8–17, ano ang mahimo ipadumdom sa imo sang balangaw? Pwede mo man pamensaron ang maglista sang mga butang (pareho sang mga simbolo, mga bagay, ukon ano pa man) nga ginhatag sang Dios sa imo agud padumdumon ka sang imo mga kasugtanan. Ano ang ginatudlo sa imo sining mga butang? Paano ini nagabulig sa imo nga magdumdom?

Ang sugilanon parte sa katawhan sang Babel nga nagapatukod sang tore nagahatag sang makawiwili nga kinalain sa sugilanon parte kay Enoc kag iya katawhan nga nagapatukod sang Sion, nga imo natun-an sang nagligad nga semana. Ang duha ka grupo sang katawhan nagatinguha nga malab-ot ang langit pero sa lainlain nga paagi. Paano nalab-ot sang katawhan sang Sion ang langit? (tan-awa sa Moises 7:18–19, 53, 62–63, 69). Ano ang imo natun-an sa Genesis 11:1–9 kag Helaman 6:26–28 parte sa katawhan sang Babel? Ano ang ginatudlo sini sa aton parte sa aton mga pagpaninguha nga magbalik sa presensya sang Dios? Ano ang ginhatag sa aton sang Dios agud buligan kita nga “maglambot sa langit”? (Genesis 11:4; tan-awa man sa Juan 3:16).

• Kalabanan sang kabataan nanamian sang istorya ni Noe kag sang Arka. Pamensara nga hatagan ang imo kabataan sang mga oportunidad nga iistorya kon ano ang ila nahibal-an parte diri. Agud buligan sila, pwede mo gamiton ang mga larawan sa sining outline, kag “Si Noe kag ang Iya Pamilya” sa Mga Sugilanon sa Daan nga Katipan (22–25). Basi manamian ang imo kabataan nga idrama-drama ang mga bahin sang istorya—halimbawa, mag-akto nga kuno abi nagagamit sang kagamitan sa pagtukod sang arka ukon maglakat nga daw kasapatan nga nagasulod sa arka.

• Samtang ululupod ninyo nga ginaistoryahan ang parte kay Noe, buligi ang imo kabataan nga makita kon daw ano kita nga nabugayan tungod may ara kita sang propeta sang Dios sa karon. Buligi ang imo kabataan nga pangitaon sa Helaman 8:16–24 ang mga gintudlo ni Noe nga ginatudlo pa gihapon sang mga propeta sang Ginuo sa karon. Paano kita ginabugayan kon ginatuman naton ining mga panudlo?

• Basi masadyahan ang imo kabataan nga magdrowing ukon magkolor sang balangaw samtang ginahambal mo kon ano ang ginarepresentar sini. Ano ang gusto sang Dios nga panumdumon ni Noe kag sang iya pamilya tagsa nga makakita sila sang balangaw?

• Pwede ka man magpakita sa imo kabataan sang bagay nga ara sa imo nga nagapadumdom sa imo sang butang nga importante sa imo kabuhi, pareho sang wedding ring, litrato, ukon journal. Tugoti ang imo kabataan nga ihambal ang ila kaugalingon nga mga halimbawa. Mahimo ini magresulta sa paghambalanay parte sa mga butang nga nagabulig sa aton nga madumduman ang aton mga kasugtanan, pareho sang sakramento, nga nagabulig padumdom sa aton sang aton kasugtanan sa bunyag nga sundon si Jesucristo (tan-awa sa Doktrina kag mga Kasugtanan 20:75–79).

• Mahimo nga masadya ang magpatukod sang tore himo sa mga bloke ukon iban pa nga mga bagay upod sa imo kabataan. Samtang ginahimo ninyo ini, ipaathag nga abi sang mga tawo sa Babel nga makalab-ot sila ang langit paagi sa pagpatindog sang mataas nga tore. Dayon pwede kamo ululupod nga magtan-aw sang litrato sang Manluluwas kag pamangkuton ang imo kabataan kon paano Niya kita ginabuligan nga magpalangit. Dayon pwede ninyo hambalan ang parte sa mga butang nga sarang ninyo himuon agud sundon ang Manluluwas.

• Dugang pa sa pagbasa sang istorya parte sa Tore sang Babel sa Genesis 11:1–9, mahimo ninyo basahon sang imo kabataan ang Helaman 6:29. Suno sa sining bersikulo, ngaa ang katawhan sang Babel nagapatindog sang tore? Ngaa ang pagpatindog sining tore sala nga paagi nga makalab-ot sa langit? Dayon pwede ninyo basahon ang 2 Nefi 31:20–21 kag Helaman 3:28 agud makita ang husto nga paagi nga makalab-ot sa langit. Ano nga laygay ang aton ihatag sa katawhan sang Babel?