“Enero 19–25. Ang Pagkahulog sa Sala ni Adan kag Eva: Genesis 3–4; Moises 4–5,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Enero 19–25. Ang Pagkahulog sa Sala ni Adan kag Eva,” Dali, Magsunod sa Akon: 2026
Adam and Eve [Si Adan kag si Eva], ni Douglas M. Fryer
Enero 19–25: Ang Pagkahulog sa Sala ni Adan kag Eva
Genesis 3–4; Moises 4–5
Sang primero, ang istorya sang Pagkahulog sa Sala ni Adan kag Eva daw makabig nga isa ka trahedya. Gintabog sanday Adan kag Eva pagwa sa matahum nga Hardin sang Eden. Gintapok sila sa kalibutan kon sa diin ang kasakit, kasubo, kag kamatayon ara pirme (tan-awa sa Genesis 3:16–19). Kag naseparar sila sa ila Amay nga Langitnon. Pero ang mga kamatuoran nga ginpanumbalik paagi sa Propetang Joseph Smith sa libro ni Moises nagahatag sa aton sang pinasahi nga panan-aw sa Pagkahulog.
Huo, matahum ang Hardin sang Eden. Pero kinahanglan ni Adan kag Eva sang masobra pa sangsa matahum nga palibot. Kinahanglan nila—kag kinahanglan naton tanan—sang oportunidad sa pagtubo. Ang pagbiya sa Hardin sang Eden amo ang kinahanglanon nga una nga tikang padulong sa pagbalik sa Dios kag sa ulihi mangin pareho sa Iya. Nagakahulugan ina sang pag-atubang sang oposisyon, pagpili, paghimo sang mga kasaypanan, pagtuon nga maghinulsol, kag pagsalig sa Manluluwas, nga ang Iya Pagbayad-Sala nagpatigayon sang pag-uswag kag sang “kalipay sang pagtubos sa aton” nga mangin posible (Moises 5:11). Gani sa imo pagbasa parte sa Pagkahulog sa Sala ni Adan kag Eva, indi lang pagtutoki ang dawsa hayag nga trahedya kundi ang mga posibilidad—indi ang paraiso nga nadula sa ila ni Adan kag Eva kundi ang himaya nga ginatugot sang ila pagpili nga aton mabaton.
Mga Ideya sa Pagtuon sa Balay kag sa Simbahan
Genesis 3; Moises 4
Ang Pagkahulog kinahanglanon nga bahin sang plano sang Dios.
Matuod nga ang pagpili ni Adan kag Eva nagdala sang madamo nga mga kabudlayan nga aton ginaagyan sa sini nga kabuhi. Pero wala ina nagakahulugan nga ginakasubo naton ang ila ginpili. Samtang ginabasa mo ang Genesis 3 kag Moises 4, mahimo mo pamangkoton ang imo kaugalingon, ngaa ang Pagkahulog importante sa plano sang Dios?
Suno sa Moises 5:9–12, ano ang balatyagon ni Adan kag Eva parte sa Pagkahulog? Paano mo idapat ang ila mga pulong sa imo mga eksperiyensya sa sining nahulog nga kalibutan? Ano pa gid ang imo natun-an halin sa 2 Nefi 2:19–25?
Tan-awa man sa Mosias 3:19; Alma 12:21–37; Doktrina kag mga Kasugtanan 29:29–43.
Leaving Eden [Ang Pagbiya sa Eden], ni Annie Henrie Nader
Genesis 3:1–7; Moises 4:22–31; 5:4–15
Si Jesucristo nagatanyag sang paglaum kag pagtubos.
Ang istorya ni Adan kag Eva isa ka istorya sang paglaum kag pagtubos paagi kay Jesucristo. Para makita kon ngaa, mahimo ka magsugod paagi sa pagpangita sang mga resulta sang Pagkahulog sa Sala sa Genesis 3:1–7; Moises 4:22–31 kag sa pagmarka ukon paglista sang imo makita. Paano nagaapekto sa imo ining mga resulta? Dayon pwede mo basahon ang Moises 5:4-15, nga ginapangita ang plano sang Dios nga tuboson kita halin sa sining mga epekto. Ngaa “nagkasadya” sila ni Adan kag Eva pagkatapos nga ginbisitahan sila sang anghel? Ano ang imo matun-an sa ila parte sa plano sang Amay nga Langitnon?
Because of Him
Genesis 3:16; Moises 4:22
Ano ang buot silingon sang si Adan “magagahum” kay Eva?
Ining dinalan sa balaan nga kasulatan kon kaisa nagakasal-an nga ang bana may rason sa pagmaltrato sa iya asawa. Sa aton panahon, ang mga propeta sang Ginuo nagatudlo nga dapat kabigon sang bana kag asawa ang isa kag isa bilang patas nga katuwang sa pagtuman sang ila diosnon nga responsibilidad sa pamilya (tan-awa sa “Ang Panimalay: Isa ka Proklamasyon sa Kalibutan” [Librarya sang Ebanghelyo]). Si Elder Dale G. Renlund kag si Sister Ruth Lybbert Renlund nagpaathag nga ang matarong nga bana “magatinguha sa pag-alagad; magabaton sang iya sayop kag magapangayo sang kapatawaran; mangin maabtik sa pagdayaw; may pasunaid sa mga luyag sang mga miyembro sang pamilya; magabatyag sang dako nga responsibilidad sa paghatag sang ‘mga kinahanglanon sa kabuhi kag pag-amlig’ para sa iya pamilya; magatratar sang iya asawa nga may labi nga respeto kag pagtahod. … Pagabugayan niya ang iya pamilya” (The Melchizedek Priesthood: Understanding the Doctrine, Living the Principles [2018], 23).
Kinahanglan ko ang kahilwayan sa pagpili kag oposisyon para magtubo.
Sa gintudlo ni Elder Dale G. Renlund, “Ang katuyoan sang aton Amay nga Langitnon sa pagkaginikanan indi agud nga ipahimo sa Iya mga anak ang husto; kundi agud nga papilion ang Iya mga anak nga himuon ang husto kag sa ulihi mangin pareho sa Iya” (“Choose You This Day,” Liahona, Nob. 2018, 104). Ngaa tama kaimportante sa plano sang Amay nga Langitnon nga pilion naton ang husto?
Samtang ginabasa mo ang Moises 4:1-4, pangitaa kon ano ang ginhimo sang Amay nga Langitnon kag ni Jesucristo para protektahan ang imo diretso nga magpili—ang imo kahilwayan sa pagpili. Paano mo matigayon ang ila nagaamlig nga gahum? Para sa mga ideya, pamensara nga tun-an ang seksyon “Maghimo sang inspirado nga mga pagpili” sa Para sa Kusog sang mga Lamharon: Giya sa Paghimo sang mga Pagpili (4–5).
Pamensara nga isulat ang gintudlo ni Lehi parte sa kahilwayan sa pagpili sa 2 Nefi 211–20, 25–30. Ngaa kinahanglanon ang oposisyon para sa kahilwayan sa pagpili? Paano mo ipakita ang imo pagpasalamat kay Jesucristo sa paghimo sa imo nga “hilway sa pagpili”? (2 Nefi 2:27).
Dugangi ang partisipasyon. Madamo nga mga aktibidades sa pagtuon ang pwede himuon bilang indibidwal, pamilya, ukon klase; sa magagmay nga mga grupo; ukon pinares-pares. Maggamit sang lainlain nga mga pamaagi agud makapartisipar ang mga tawo nga sa kinaandan wala sang tsansa nga magpartisipar. Para sa sining aktibidades, pwede mo hagaron ang isa ka tawo ukon grupo nga basahon ang Moises 4 kag ang Para sa Kusog sang mga Lamharon nga giya samtang ginatun-an sang isa pa gid ka grupo ang mga bersikulo sa 2 Nefi 2. Pwede nila dayon itudlo sa isa kag isa ang ila natun-an sa ila partikular nga seksyon.
Si Satanas nagahandum nga “patalangon kag bulagon” ako.
Samtang ginabasa mo ang Moises 4:4–12; 5:13–33, pamensara nga ilista ang mga paagi nga gintinguhaan ni Satanas nga tentaron si Adan kag Eva kag ila mga kabataan. Paano sia nagatinguha nga himuon ang amo man nga mga butang sa karon nga panahon? Paano ka ginabuligan sang Amay nga Langitnon nga mabatoan ang mga pagpatalang ni Satanas?
“Ako, nga Ginuong Dios … ginbayoan sila.”
Pagkatapos nga magkaon sang ginadilian nga bunga, gintinguhaan ni Adan kag Eva nga tabunan ang ila pagkahublas. Sang ulihi, nagtanyag ang Ginuo nga pabayoan sila. Samtang imo ginabasa ang Moises 4:13–16, 27, panumduma sing maayo ang masunod:
-
Panumduma sing maayo kon ano ayhan ang ginarepresentar sang pagkahublas kag panapton sa balaan nga mga kasulatan (tan-awa, halimbawa sa Bugna 7:9, 13–15; 2 Nefi 9:14; Doktrina kag mga Kasugtanan 109:22–26, 76). Ano ang imo matun-an sa eksperiyensya ni Adan kag Eva parte sa pagkahublas kag panapton?
-
Kon na-endow ka sa templo, pamensara kon ano ayhan ang ihambal ni Adan kag Eva sa imo parte sa importansya sang imo temple garment kag kon ano ang iya sini ginarepresentar.
Sacred Temple Clothing
Batunon sang Dios ang akon mga halad kon itanyag ko ini nga may handa kag masinulundon nga tagipusuon.
Sa imo pagtuon sang Moises 5:4–9, 16–26, pamensara sing maayo ang mga panimuot ni Adan kag Eva kag sang ila duha ka bata nga lalaki nga sila ni Cain kag Abel parte sa halad. Ngaa nga ginbaton sang Ginuo ang halad ni Abel pero ang kay Cain wala?
Ano ang ginapangayo sang Ginuo nga imo ihalad? May bisan ano bala sa sining mga bersikulo nga nagaimpluwensya sang imo panan-aw parte sinang mga halad?
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Ginaluwas kita ni Jesucristo sa Pagkahulog sa Sala.
-
Para buligan ang imo kabataan nga mas maintiendihan ang Pagkahulog sa Sala ni Adan kag Eva, pwede mo kopyahon ang mga litrato sa “Si Adan kag si Eva” (sa Mga Sugilanon sa Daan nga Katipan, 13–16) kag pangguntingon ang mga ini. Dayon pwede ninyo bululigan sa pagpasunod ang mga litrato samtang inyo ginahambalan ang mga eksperiyensya nila ni Adan kag ni Eva. Sa paghimo sini, hambali kon ngaa importante sa plano sang Amay nga Langitnon, nga si Adan kag Eva magbiya sa Hardin sang Eden.
-
Ang imo kabataan sarang magbatyag sang kapasalamatan sa Pagbayad-Sala ni Jesucristo kon ila maintiendihan ang paagi nga gindaug Niya ang mga epekto sang Pagkahulog sa Sala. Samtang inyo ginabasa sing ululupod ang Moises 4:25; 6:48; Mga Taga Roma 5:12; 2 Nefi 2:22–23, buligi ang imo kabataan nga magpangita sang mga paagi nga kumpletuhon ining pahayag: “Tungod sang Pagkahulog sa Sala, ako …” Dayon, samtang ginabasa ninyo sing ululupod ang Moises 5:8–11, 14–15; 6:59; Alma 11:42, pwede nila kumpletuhon ining dinalan: “Tungod kay Jesucristo, ako …” Ipakigbahin sa isa kag isa ang inyo kapasalamatan para kay Jesucristo.
Pwede ko pilion ang husto.
-
Hunahunaa ang isa ka simple nga object lesson (leksyon nga nagagamit sang isa ka bagay) para ipakilala ang prinsipyo sang kahilwayan sa pagpili: hagara ang imo kabataan nga koloran ang pahina sang aktibidades sini nga semana, pero hatagi sila sang isa lang ka kolor nga gamiton. Ngaa mas maayo nga may ara sang mga pilian? Dayon pwede ninyo basahon sing ululupod ang Moises 4:1–4 kag hambalan kon ngaa gusto sang Dios nga makapili kita sa tunga sang husto kag sala. Paano kita ginabuligan sang Amay nga Langitnon kag ni Jesucisto nga maghimo sang maayo nga mga pagpili?
-
Buligi ang imo kabataan nga mamensar kag magdrowing sang mga larawan sang maayo nga mga pagpili nga pwede nila himuon para sundon si Jesucristo. Ukon pwede kamo magkanta sang kanta parte sa paghimo sang husto nga pagpili, pareho sang “Choose the Right Way” (Children’s Songbook, 160–61). Pwede ninyo sugiran ang isa kag isa parte sa isa ka tion sang naghimo kamo sang maayo nga pagpili kag hambali kon ano ang nabatyagan ninyo pagkatapos.
The Fall [Ang Pagkahulog sa Sala], ni Robert T. Barrett
Makapangamuyo ako sa Amay nga Langitnon.
-
Sang nagbiya sanday Adan kag Eva sa Hardin sang Eden, indi na nila makaupod ang Amay nga Langitnon. Basaha ang Moises 5:4, 8 upod sa imo kabataan, kag buligi sila nga pangitaon kon ano ang ginhimo ni Adan kag Eva para makabatyag sang kalapit sa Iya kag mapamatian Sia. Ano ang pila ka mga butang nga mahimo naton isiling sa Amay nga Langitnon sa aton mga pangamuyo?
Para sa dugang nga mga ideya, tan-awa sa isyu sang Abyan nga magasin sini nga bulan.
In Similitude of the Sacrifice of the Only Begotten of the Father [Kaangay sang Sakripisyo sang Bugtong nga Anak sang Amay], ni Mike Malm (tan-awa sa Moises 5:5–9)