Pagbasa sang Daan nga Katipan

Ano man nga mga hangkat ang ginaatubang mo kag sang imo pamilya, ang sabat pirme gid si Jesucristo. Gani agud makakita sang mga sabat sa Daan nga Katipan, pangitaa Sia. Indi ini mangin mahapos pirme. Mahimo nga kinahanglan mo magbinagbinag nga may pasensya kag magpangayo sang espirituhanon nga giya. Kon kaisa direkta kaayo ang mga pagtumod sa Iya, pareho sa pahayag ni Isaias “Sa aton natawo ang isa ka bata, sa aton ginhatag ang isa ka anak nga lalaki: … kag tawgon ang iya ngalan … Prinsipe sang Paghidaet” (Isaias 9:6). Sa iban nga mga bahin, indi gawa hilmunon ang pagrepresentar sa Manluluwas, paagi sa mga simbolo kag mga paanggid—halimbawa, paagi sa paglaragway sang halad nga mga sapat ukon sa kasaysayan ni Joseph nga ginapatawad ang iya kauturan kag ginaluwas sila sa tiggulutom.

Kon nagapangita ka sang mas dako nga pagtuo sa Manluluwas samtang ginatun-an mo ang Daan nga Katipan, makita mo ini. Basi pwede nga amo ini ang imo lalab-uton sa imo pagtuon sini nga tuig. Magpangamuyo nga giyahan ka sang Espiritu sa pagpangita kag pagtutok sa mga dinalan, mga istorya, kag mga propesiya nga magapalapit pa gid sa imo kay Jesucristo.

Indi ka magpaabot nga ang Daan nga Katipan magapresentar sang maid-id kag detalyado nga kasaysayan sang katawhan. Indi ina ang ginatinguhaan nga obrahon sang orihinal nga mga manunulat kag mga manugtipon. Ang mas dako nila nga tuyo amo ang magtudlo parte sa Dios—parte sa Iya plano para sa Iya mga anak, kon ano ang kahulugan sang mangin Iya katawhan sa kasugtanan, kag kon paano masalapoan ang pagtubos kon magkulang kita. Kon kaisa ginahimo nila ini paagi sa pagsaysay sang mga hitabo sa kasaysayan suno sa ila pag-intiendi, dala na ang mga istorya sa kabuhi sang dungganon nga mga propeta. Ang Genesis isa ka halimbawa sini, kag amo man ang mga libro nga Josue, Mga Hukom, kag 1 kag 2 Mga Hari. Pero ang iban nga mga manunulat sa Daan nga Katipan wala gid magtutok sa kasaysayan. Kundi, nagtudlo sila paagi sa arte pareho sang binalaybay kag literatura. Ang Mga Salmo kag Mga Hulubaton igo sa sining kategorya. Kag dayon ara ang bilidhon nga mga pulong sang mga propeta, pareho kay Isaias kag Malaquias, nga naghambal sang pulong sang Dios sa dumaan nga Israel—kag, paagi sa milagro sang Biblia, nagahambal sa aton sa gihapon sa karon.

Nakahibalo bala ining tanan nga mga propeta, mamalaybay, kag manugtipon nga ang ila mga pulong mabasahan sang mga tawo sa bilog nga kalibutan linibo ka tuig pagkatapos? Wala kita makahibalo. Pero nagadayaw kita nga amo gid ina ang natabo. Ang mga nasyon nagbangon kag napugday, ang mga siyudad ginsakop, ang mga hari nabuhi kag napatay, pero ang Daan nga Katipan padayon nga nagapabilin, henerasyon sa henerasyon, eskriba sa eskriba, paglubad sa paglubad. Siyempre may pila nga nadula ukon naliwat, pero bisan paano madamo kaayo ang milagroso nga natipigan.

Pila lang ini sa mga dapat tandaan samtang imo ginabasa ang Daan nga Katipan sini nga tuig. Ginhalungan sang Dios ining dumaan nga mga sinulatan bangud kilala ka Niya kag nahibal-an ang imo ginaagyan. Mahimo nga may ginhanda Sia nga espirituhanon nga mensahe para sa imo sa sining mga pulong, nga mas magapalapit sa imo sa Iya kag magpatubo sang imo pagtuo sa Iya plano kag sa Iya Hinigugma nga Anak. Ayhan giyahan ka Niya sa isa ka dinalan ukon paghangop nga magabugay sang tawo nga imo kilala—mensahe nga pwede mo ipaambit sa isa ka abyan, miyembro sang pamilya, ukon sa isigka-Santos. Kadamo sang mga posibilidad. Indi bala kasadya sina hunahunaon?

Si Nefi nagsulat, “Ang akon kalag nagakalipay sa balaan nga mga kasulatan” (2 Nefi 4:15). Siguro amo man sina ang imo batyagon sa imo pagbasa sang madamo nga pareho nga mga pulong nga ginbasa ni Nefi—nga ginatawag naton karon nga Daan nga Katipan.