Genesis 1–2; Moises 2–3; Abraham 4–5

Bisan nga wala naton nahibal-an ang tanan parte sa kon paano gintuga ang kalibutan, makawiwili nga talupangdon kon ano ang ginpili sang Dios nga ipahayag parte sa Pagtuga. Ano ang ginatudlo sang Dios sa imo parte diri sa Genesis 1:1–25; Moises 2:1–25; kag Abraham 4:1–25? Ngaa gusto Niya nga mahibal-an mo ining mga butang? Samtang ginabinagbinag mo ining mga panaysayon, mahimo mo man pamensaron sing maayo kon ano ang ginatudlo sang mga ini sa imo parte sa Amay nga Langitnon, kay Jesucristo, sa kalibutan, kag sa imo kaugalingon.

Agud pauswagon ang imo pagtuon, pamensara nga basahon ining mga bersikulo samtang ara sa gwa upod sa mga gintuga sang Dios ukon samtang nagapamati sa kanta pareho sang “All Creatures of Our God and King” (Hymns, no. 62). Mahimo ka man magpangita sang mga litrato sang Iya mga gintuga nga nagabulig sa imo nga makabatyag sang pagtahod sa Tagtuga. Pamensara nga ipakigbahin ining mga litrato, upod sang imo testimonya, sa iban.

Tan-awa man sa Doktrina kag mga Kasugtanan 101:32–34.

Samtang imo ginabasa ang Genesis 1:26–27; Moises 2:26–27; kag Abraham 4:26–27, pamensara sing maayo ang buot silingon sang gintuga sa “dagway” ukon “kaanggid” sang Dios, babayi kag lalaki. Ngaa importante sa imo nga mahibal-an ang mga kamatuoran sa sining mga bersikulo? Halimbawa, paano nagaapekto ining mga kamatuoran sa panan-aw mo sa imo kaugalingon, sa iban, kag sa Dios? Paano ini makabulig sa imo kon may negatibo ka nga mga balatyagon parte sa imo kaugalingon?

Agud buligan ka sa pagbinagbinag sining mga pamangkot, tilawi nga kumpletuhon ang dinalan nga pareho sini: “Tungod nakahibalo ako nga gintuga ako sa dagway sang Dios, ginapili ko nga …” Makabulig ang pagrebyu sang “Ang imo lawas sagrado” sa Para sa Kusog sang mga Lamharon: Giya sa Paghimo sang mga Pagpili (mga pahina 22–29). Pamensara ang pagpili sang isa ka butang nga himuon mo agud ipakita sa Dios nga ang imo lawas sagrado.

2:51

Ang iban nga tawo mahimo magsiling nga ang matuga sa dagway sang Dios nagakahulugan nga ang tanan naton nga hunahuna, balatyagon, kag mga handum aprobado Niya kag kita indi na kinahanglan (ukon indi na) mag-uswag. Ano ang mahambal mo sina? Ano nga paghangop ang makuha mo halin sa Mosias 3:19 kag Eter 12:27?

“Sanday Adan kag Eva ginhugpong sa kasal para sa katuigan kag wala’y katapusan paagi sa gahum [sang] wala’y katubtuban nga pagkapari” (Russell M. Nelson, “Lessons from Eve,” Ensign,, Nob. 1987, 87). Binagbinaga ini samtang imo ginabasa ang Genesis 1:27–28; 2:18–25; Moises 3:18, 21–25; kag Abraham 5:14–19. Paano mo tratuhon ang pag-asawahay nga may kasagrado nga ginhatag sang Dios?

Tan-awa man sa 1 Mga Taga-Corinto 11:11; “Ang Pamilya: Isa ka Proklamasyon sa Kalibutan,” Librarya sang Ebanghelyo.

Ano ang ginapanugyan sang Genesis 1:28; Moises 2:28; kag Abraham 4:28 parte sa aton responsibilidad tuhoy sa mga gintuga sang Dios? Ano ang ginadugang sa imo pag-intiendi sang Doktrina kag mga Kasugtanan 59:16–21 kag 104:13–8?

Ginhimo sang Dios ang Adlaw nga Inugpahuway nga balaan, kag ginapangayo Niya sa aton nga padayon naton ini nga pakabalaanon. Samtang ginabasa mo ang Genesis 2:2–3; Moises 3:2–3; kag Abraham 5:2–3, pamensara kon ano ang nagahimo sang Adlaw nga Inugpahuway nga “ginpakamaayo” sa imo.

Tan-awa man sa Doktrina kag mga Kasugtanan 59:9–13.

0:50

• Paano mo himuon nga masadya ang pagtuon parte sa Pagtuga para sa imo kabataan? Pwede mo sila dalhon sa gwa agud magpangita sang mga klase sang mga butang nga ginhimo sa tagsa ka tion sa istorya sang Pagtuga. Mahimo man magtan-aw ang imo kabataan sang mga litrato sang mga butang nga ginhimo ni Jesus (tan-awa sa “Ang Pagtuga sang Duta” sa Mga Sugilanon sa Daan nga Katipan, 8–12). Dayon pwede ninyo hambalan sang imo kabataan kon ano ang inyo nabatyagan parte kay Jesucristo pagkatapos basahon ang parte sa Pagtuga.

• Pamensara ang pagkanta sing ululupod sang kanta parte sa aton matahum nga kalibutan, pareho sang “My Heavenly Father Loves Me” (Children’s Songbook, 228–29). Basi makadugang ang imo kabataan sang iban pa nga butang nga ginhimo sang Dios nga nagabulig sa ila nga mabatyagan ang Iya pagpalangga.

• Ang imo kabataan sarang magpatubo sang balatyagon sang pagtahod kag respeto para sa ila lawas kag sa iya sang iban kon ila matun-an nga tanan kita ginhimo sa imahe sang Dios. Agud buligan sila nga mahangpan ang kahulugan sini, pwede mo patan-awon ang imo kabataan sang ila hitsura sa espeho ukon sa litrato samtang ginabasa mo sa ila ang Moises 2:26–27. Pwede mo man ipakita sa ila kon paano ang bata nga mga sapat masami “kaanggid” sang ila mga ginikanan (halimbawa, tan-awa ang litrato sa sini nga outline). Mahimo nga magabukas ini sang pag-istoryahanay kon ngaa importante sa inyo nga ginhimo kamo sa imahe sang inyo Amay nga Langitnon.

  

• Mahimo nga masadyahan kamo sang imo kabataan sa pagdrowing sang lawas sang tawo kag gunting-guntingon ang mga ini sa mga puzzle. Samtang ginaplastar ninyo sang imo kabataan ang mga puzzle, pwede nila hambalan ang mga paagi nga mapakita nila sa Amay nga Langitnon nga nagapasalamat sila sa ila mga lawas.

• Samtang ginabasa ninyo ang Moises 3:2–3, pangabaya ang imo kabataan nga pamatian kon ano ang ginhimo sang Dios sa ika-pito nga adlaw. Buligi ang imo kabataan nga magpangita ukon magdrowing sang mga larawan sang mga butang nga sarang nila mahimo kon Domingo agud himuon ini nga balaan nga adlaw kag lain sangsa iban nga mga adlaw. Iistorya sa isa kag isa kon ngaa importante sa inyo nga padayon nga pakabalaanon ang Adlaw nga Inugpahuway.

• Buligi ang imo kabataan nga idrama-drama ang pagpaathag sa isa ka abyan kon ngaa ginapili nila nga maghimo sang mga butang nga nagatahod sa Amay nga Langitnon kag kay Jesus kon Domingo. Ipanugyan nga gamiton nila ang Genesis 2:2–3 sa ila mga paathag. Paano ang padayon nga pagpakabalaan sang Adlaw nga Inugpahuway nagapakita sang imo pagpalangga sa Amay nga Langitnon kag kay Jesucristo?