“Disyembre 29–Enero 4. Ang Una nga Testamento ni Jesucristo: Introduksyon sa Daan nga Katipan,” Dali, Magsunod sa Akon—Para sa Balay kag Simbahan: Daan nga Katipan 2026 (2026)
“Introduksyon sa Daan nga Katipan,” Dali, Magsunod sa Akon: 2026
Disyembre 29–Enero 4: Ang Una nga Testamento ni Jesucristo
Introduksyon sa Daan nga Katipan
Kon panumdumon mo nga tun-an mo ang Daan nga Katipan sini ng tuig, ano ang balatyagon mo? Nasadyahan ka bala? Indi sigurado? Nahadlok? Maintiendihan ini tanan nga emosyon. Ang Daan nga Katipan isa sa pinakadaan nga koleksyon sang mga sinulatan sa kalibutan, kag tungod sina pareho ini nga makapalangkag kag makahalangkat. Ining mga sinulatan naghalin sa dumaan nga kultura nga daw lain kag kon kaisa daw indi kinaandan ukon bisan pa gani masaw-a. Pero sa sining mga sinulatan makakita kita sang mga tawo nga may mga eksperiyensya nga daw pamilyar. Makita naton ang mga tema sang ebanghelyo nga nagasaksi sang pagkadiosnon ni Jesucristo kag sang Iya ebanghelyo. Huo, ang mga tawo nga pareho ni Abraham, Sara, Ana, kag Daniel nagkabuhi sang mga kabuhi nga, sa pila ka aspeto, lain kaayo sangsa aton. Pero naeksperiyensyahan man nila ang kalipay sa pamilya kag kagamo sa pamilya, mga tinion sang pagtuo kag tinion sang wala kasigurohan, kag mga kadalag-an kag kapaslawan—pareho sa aton tanan. Ang mas importante, nagpakita sila sang pagtuo, naghinulsol, naghimo sang mga kasugtanan, nag-angkon sang espirituhanon nga mga eksperiyensya, kag wala nag-untat sa pagpati sa ginpromisa nga Manluluwas. Samtang nagatuon kita kon paano ang Dios naghikot sa ila mga kabuhi, makita man naton Sia nga nagahikot sa aton, kag makasiling kita upod sa Salmista: “Ang imo pulong suga sa akon mga tiil kag kapawa sa akon banas. … [Gani] nagahigugma sini ang imo alagad” (Salmo 119:105, 140.)
Mga Ideya sa Pagtuon sa Balay kag sa Simbahan
Ang Daan nga Katipan nagapamatuod kay Jesucristo.
Isa ka paagi nga makasalapo sang bugana nga espirituhanon nga sustansya sa Daan nga Katipan amo ang pagpangita sang Tinapay nga nagahatag sang Kabuhi, si Jesucristo (tan-awa sa Juan 6:48). Halimbawa, paano mo makita ang Manluluwas sa masunod?
-
Mana [Tinapay halin sa langit] (Exodo 16:4, 11–15; Juan 6:35)
-
Cordero (Exodo 12:3-5; Juan 1:29)
-
Saway nga man-og (Numeros 21:4–10; Juan 3:14)
-
Jonas (Jonas 1:4-17; Mateo 12:38–41)
Ano ang ginatudlo sining mga halimbawa parte sa Iya? Ano pa ang iban nga mga pagpatuhoy kay Jesucristo sa Daan nga Katipan nga pamilyar na sa imo?
Sa iya mensahe “Jesus Christ Is the Treasure,” ginapaisog kita ni Elder Dale G. Renlund nga “dumdumon kag pirme magtutok kay Jesucristo” (Liahona, Nob. 2023, 98). Pamensara nga basahon ang iya mensahe, nga ginapangita ang mga butang nga pwede mo himuon para makita si Jesucristo indi lang sa Daan nga Katipan kundi sa imo man nga kabuhi.
Magpangita sang mga simbolo nga nagapamatuod kay Jesucristo. Ang Ginuo nagtudlo kay Adan, “Ang tanan nga butang may ila mga kaangay, kag ang tanan nga butang gintuga kag ginhimo agud magsaksi sa akon” (Moises 6:63). Bisan nagatuon ka man ukon nagatudlo, ang pagtutok kay Jesucristo makabulig sa imo nga makakita sang kahulugan sa balaan nga mga kasulatan kag magdugang sang imo pagpalangga kag pagtuo sa Iya. (Tan-awa sa Pagtudlo sa Paagi sang Manluluwas, 7.)
Si Jesucristo amo si Jehova sa Daan nga Katipan.
Si Pangulong Dallin H. Oaks nagtudlo: “Ang Amay nagpakilala sang Iya Bugtong nga Anak, nga si Jesucristo, bilang ang aton Manluluwas kag Manunubos kag naghatag sa aton sang sugo nga ‘pamatii Sia.’ Halin sa sining sugo makasiling kita nga ang balaan nga sinulatan sang mga pulong nga ginhambal sang ‘Dios’ ukon sang ‘Ginuo’ kalabanan pirme mga pulong ni Jehova, ang aton nabanhaw nga Ginuo nga si Jesucristo” (“Ang mga Pinanudlo ni Jesucristo,” Liahona, Mayo 2023, 102).
The Teachings of Jesus Christ
Sang ginhangkat sang mga lider sang mga Judio si Jesus parte sa Iya pagkatawo, nagsiling Sia, “Sa wala pa matawo si Abraham, amo na ako.” Ining mga pulong nagpaakig sa mga tawo nga nakabati kay Jesus, kag handa sila nga batohon Sia (tan-awa sa Juan 8:58–59). Pamensara nga basahon ang Exodo 3:13–15; 6:3–5 agud tan-awon kon ngaa ang mga Judio grabe gid ang kaakig sa ginhambal ni Jesus.
Ngaa importante sa imo nga mahibal-an nga si Jesucristo amo si Jehova?
Ang Ginuo nagpanumbalik sang “madamo nga maathag kag importante nga butang” paagi kay Joseph Smith.
Sa isa ka panan-awon, ang Ginuo nagpakita kay Nefi sang paggwa sang Biblia, nga nagapaathag nga “madamo nga maathag kag importante nga butang” ang kuhaon halin diri. Pamensara nga basahon ang 1 Nefi 13:21–29, 38–42, nga ginapangita kon paano ang Ginuo nagplano nga “[ipahibalo] ang maathag kag importante nga mga butang.” Suno sa 2 Nefi 3:12, paano ang Biblia kag Libro ni Mormon nagabuligay?
Sa imo pagtuon sang Daan nga Katipan sini nga tuig, matun-an mo man ang pila sang “iban pa nga mga libro” nga nakita na ni Nefi. Upod diri ang:
-
Ang Libro ni Moises, kabahin sang paglubad ni Joseph Smith sang Biblia. Ginapanumbalik sini ang mga kamatuoran kag mga panaysayon nga indi makita sa teksto karon sang Genesis 1–6.
-
Ang libro ni Abraham, nga ginpahayag kay Joseph Smith samtang ginasiyasat niya ang dumaan nga Egiptohanon nga papiro.
-
Nagkalainlain nga mga dinalan halin sa Joseph Smith Translation.
Ari ang pila ka mga halimbawa sang mga panaysayon sa Daan nga Katipan nga ginpanumbalik paagi kay Joseph Smith: Ang siyudad sang Sion ni Enoc (Moises 7:18–19), Ang panan-awon ni Abraham sang konseho sa langit (Abraham 3:22–28), kag ang pag-alagad ni Melquisedec (Joseph Smith Translation, Genesis 14:25-40). Ngaa ining mga panaysayon “maathag kag importante” sa imo?
Adam and Eve Offering Sacrifices [Si Adan kag Eva nga Nagahatag sang mga Halad], ni Keith Larson (detalye)
Ang Daan nga Katipan nagabulig sa akon nga maintiendihan ang akon relasyon sa kasugtanan upod sa Dios.
Ang Daan nga Katipan istorya parte sa Dios nga nagatinguha nga himuon kita nga Iya “katawhan” paagi sa kasugtanan (Exodo 19:5). Sa sina nga rason, isa ka maayo nga paagi agud maghanda sa pagbasa sang Daan nga Katipan amo ang magtuon parte sa mga kasugtanan—labi na gid ang wala katubtuban nga kasugtanan nga gintanyag sang dios sa dumaan nga mga propeta pareho kay Abraham, Isaac, Jacob, kag ila mga kaapohan. Kag isa ka manami gid nga paagi nga makahibalo parte sa mga kasugtanan amo ang tun-an ang mensahe ni Pangulong Russell M. Nelson “Ang Wala Katubtuban nga Kasugtanan” (Liahona, Oktubre 2022, 4-11).
Samtang nagabasa ka, pamangkuta ang imo kaugalingon: “Ngaa ang mga kasugtanan importante sa akon? Ano nga “espesyal nga gugma kag kaluoy” ang akon mabaton sa Dios kon tumanon ko ang akon mga kasugtanan sa Iya? Samtang imo ginabasa ang Daan nga Katipan sini nga tuig, bantayi ang mga butang nga gusto sang Dios itudlo sa imo parte sa imo relasyon sang kasugtanan sa Iya.
Tan-awa man sa Jeremias 31:31–34.
Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.
Mga Ideya para sa Pagtudlo sang mga Kabataan
Makatuon ako parte kay Jesucristo sa Daan nga Katipan.
-
Ang mga pulong kag kultura sang Daan nga Katipan mahimo nga mabudlay maintiendihan sang kabataan, pero pwede mo sila buligan nga makita si Jesucristo sa mga simbolo kag mga sugilanon. Pwede ninyo tan-awon sang imo kabataan ang imahe sa idalom, The Prophet Isaiah Foretells Christ’s Birth [Ginpropesiya ni Propetang Isaias ang Pagkatawo ni Jesucristo]. Ipatudlo sa imo kabataan ang mga detalye nga ila makita. Dal-a ang ila atensyon, labi na, sa lapsag nga si Jesus. Dayon pwede mo basahon upod sa ila ang ginsulat ni Isaias parte sa pagkatawo sang Manluluwas sa Isaias 7:14; 9:6. Iistorya sa imo kabataan ang imo nabatyagan sa imo pagpangita sang Manluluwas sa Daan nga Katipan sini nga tuig.
Isaiah Writes of Christ’s Birth [Si Isaias Nagasulat parte sa Pagkatawo ni Cristo], ni Harry Anderson
-
Pwede ninyo basahon sang imo kabataan ang Salmo 23 ukon Isaias 53:3–9 kag magpangita sang mga tinaga nga nagapahanumdum sa imo kay Jesucristo. Ano ang ginatudlo sa aton sining mga tinaga parte sa Iya kabuhi kag Pagbayad-Sala?
Gusto sang Amay nga Langitnon nga maghimo sang mga kasugtanan sa akon.
-
Ang mga kasugtanan mayor nga tema sa Daan nga Katipan. Agud ipakilala ining tema sa imo kabataan, pwede mo hambalan upod sa ila ang mga promisa nga ila ginahimo kag ginatuman sa pamilya ukon mga abyan kag ngaa ang pagtuman sining mga promisa importante. Pwede kamo dayon magtan-aw sang litrato sang isa ka bunyag kag hambalan ang promisa, ukon kasugtanan, nga ginahimo naton sa Dios kon bunyagan kita (tan-awa sa Mosias 18:10, 13). Pwede ka man magpakita sang litrato sang templo kag ipaambit ang imo mga balatyagon parte sa mga kasugtanan nga ginahimo naton dira.
-
Ang pahina para sa kahiwatan sini nga semana makabulig sa imo kabataan nga malipay sa paghimo kag pagtuman sang mga kasugtanan sa Amay nga Langitnon. Pwede man kamo magkanta sang kanta parte sa paghimo sang mga kasugtanan, pareho sang “When I Am Baptized” (Children’s Songbook, 103).
Si Jesucristo amo si Jehova sa Daan nga Katipan.
-
May kilala bala ang imo kabataan nga may lainlain nga ngalan sa lainlain nga sitwasyon? Mahimo nga lainlain ang pagtawag sa isa ka ginikanan ukon titser sa ulobrahan, sa balay, kag sa simbahan. Hambali ang parte sinang mga ngalan; dayon basaha ang Exodo 6:3 sing ululupod kag hagara ang imo kabataan nga pangitaon ang mga ngalan nga ginatawag kay Jesucristo antes Sia natawo (Ang paglubad ni Joseph Smith sang Exodo 6:3 nagaklaro nga nakilal-an sang mga propeta nga si Abraham, Isaac, kag Jacob ang Ginuo sa sini nga ngalan.
Para sa dugang nga mga ideya, tan-awa sa isyu sang Abyan nga magasin sini nga bulan.