Moises 1; Abraham 3

“Kon ang Ginuo direkta nga nagahambal sa imo, tudlo ni Pangulong Russel M. Nelson, “ang una gid nga himuon Niya amo ang sigurohon nga naintiendihan mo ang imo diosnon nga pagkatawo” (“Choices for Eternity” [worldwide devotional for young adults, Mayo 2022], Gospel Library). Tungod sini magatinguha si Satanas nga tublagon kamo sa sina mismo nga punto. Pangitaa ang halimbawa sini sa mensahe sang Dios kay Moises sa Moises 1:4, 6 kag sa mensahe ni Satanas sa Moises 1:12. Ano ang imo natun-an sa sining mga bersikulo parte sa kinalain sang Dios kay Satanas?

Gintudlo pa gid ni Pangulong Nelson, “Ang panan-aw mo kon sin-o ka nagaapekto sa halos tanan nga desisyon nga imo himuon” (“Choices for Eternity”). Pamensara ang pag-obra sang lista sang mga pagpili nga imo ginahimo tungod ang imo pagkatawo bilang anak sang Dios mas importante sangsa ano pa man nga pagkilala sa imo.

Ano nga dugang nga mga bersikulo ukon mga dinalan sa Moises 1 ang nagabulig sa imo nga maintiendihan ang imo diosnon nga bili?

3:39

Sa maathag nga ginapakita sang Moises 1, ang mabaskog nga mga espirituhanon nga mga eksperiyensya wala nagakahulugan nga indi na gid kita matentar liwat. Ang matuod, isa sang mga taktika ni Satanas amo ang tentaron kita nga dudahan ining mga eksperiyensya. Samtang imo ginabasa ang sabat ni Moises kay Satanas sa mga bersikulo 12–26, ano ang imo natun-an nga makabulig sa imo nga magpabilin nga tampad sa testimonya nga imo nabaton? Ano ang nagbulig kay Moises sang ulihi nga pierdihon si Satanas?

Isa pa ka leksyon halin sa eksperiyensya ni Moises amo nga ginatentar kita ni Satanas paagi sa pagpeke sang kamatuoran kag gahum sang Dios. Magpanumdum sang pila ka peke nga mga butang pareho sang artipisyal nga tanum ukon monyika. Paano mo mahibal-an nga peke ang mga ini? Dayon pamensara ang mga pagpameke nga ginagamit ni Satanas sa karon nga panahon agud tentaron ka. Ano ang imo natun-an sa Moises 1:13–18 kon paano makilal-an kag isikway ang iya mga pagpameke? Paano ka mabuligan sang Ginuo? (tan-awa sa Moises 1:24–26).

Tan-awa man sa Mateo 4:1–11.

6:31

Pagkatapos nga makakita sang panan-awon sang mga gintuga sang Dios, siling ni Moises sa Ginuo: “Sugiri ako … sang rason ngaa amo sini” (Moises 1:30). Ano ang nanamian mo sa sabat sang Ginuo sa Moises 1:31–39? Ano ang kinalain sang imortalidad kag kabuhi nga wala katapusan? Paano kita ginabuligan ni Jesucristo nga ipahanabo ang duha? May panan-awon man si Abraham nga narekord sa Abraham 3. Ano ang imo nakita sa mga bersikulo 24–26 nga makabulig sabat sang pangabay ni Moises?

Diutay gid lang katama ang aton nahibal-an parte sa aton kabuhi antes sa duta. Pero madamo sang aton nahibal-an karon naghalin sa panan-awon ni Abraham sa Abraham 3:22–28. Sa pagbasa nimo sining mga bersikulo, maghimo sang lista sang mga kamatuoran na imo nakita—dala na ang mga kamatuoran parte sa imo kaugalingon kag parte kay Jesucristo. Ngaa malahalon ining mga kamatuoran sa imo? Ano ang kinalain nga ginahimo sini sa imo kabuhi?

• Pagkatapos ninyo basahon sing ululupod ang mensahe sang Dios kay Moises sa Moises 1:4, pamensara nga tugotan ang imo kabataan nga tan-awon ang ila itsura sa espeho kag ihambal sa ila mga kaugalingon ang amo man nga mensahe: “Anak ako sang Dios.” Dayon mahimo sila maghatag sang pareho man nga mensahe sa isa kag isa: “Anak ka sa Dios.” Mahimo ka gani magpangita sang mga litrato sang lainlain nga mga tawo kag hagaron ang imo kabataan nga itudlo ang kada isa kag magsiling, “Anak ini sang Dios.” Ipakigbahin sa isa kag isa kon ngaa nalipay kamo nga mahibal-an nga mga anak kamo sang Dios. Paano ginabag-o sining ihibalo ang paagi nga ginatrato mo ang imo kaugalingon kag ang iban?

• Mahimo ninyo nga ikumparar sang imo kabataan ang mensahe sang Dios kay Moises sa Moises 1:4 sa mensahe ni Satanas sa bersikulo 12. Paano mo buligan ang imo kabataan nga mahibal-an ang kinalain sang mensahe sang Dios sa ila kag inang iya ni Satanas?

• Samtang ginabasa mo ang Moises 1:6 sa imo kabataan, pwede ninyo hambalan ang parte sa “buluhaton” nga ipahimo sang Dios kay Moises. Pamensara ang paggamit sang Libro sang mga Larawan nga Pang-Ebanghelyo, num. 13–16, ukon Mga Sugilanon sa Daan nga Katipan, mga pahina 64–84, para buligan ang imo kabataan nga makita kon ano ang nahimo ni Moises sa bulig sang Amay nga Langitnon. Ano ang buluhaton nga ipahimo sang Dios sa imo? (tan-awa halimbawa, sa Doktrina kag mga Kasugtanan 11:20).

• Samtang ginatun-an mo ang Moises 1:12–26 upod sa imo kabataan, buligi sila nga diskubrehon kon ano ang ginhimo ni Moises agud pakigbatoan si Satanas (tan-awa sa mga bersikulo 13, 15, 18, 20–22, 26). Basi masadyahan sila nga idrama-drama ang mga pwede nila himuon agud pakigbatoan ang tentasyon (pareho sang pagpangamuyo, pagpalayo kag pagpangayo sang bulig).

• Ang paghibalo parte sa aton kabuhi antes sa duta makainspirar sang imo kabataan nga maghimo sang mga pagpili nga nabase sa wala katapusan nga mga kamatuoran. Para buligan sila nga matun-an ini, pwede mo sila hatagan sang pila ka yabi nga mga tinaga kag mga dinalan nga makita sa Abraham 3:22–28, pareho sang “antes ginhimo ang kalibutan,” “mga espiritu,” “[maghimo] sang duta,” kag “tilawan.” Ano ang ginatudlo sa aton sining mga bersikulo kon ngaa ginpadala kita sang Amay nga Langitnon sa kalibutan?

• Pwede mo hagaron ang imo kabataan nga magdrowing sang mga litrato nga nagabagay sa mga tinaga.

• Buligi ang imo kabataan nga magpanumdum sang mga sitwasyon nga kinahanglan nila magpili kon bala himuon nila ukon indi ang ginapangayo sang Dios sa ila (tan-awa sa Abraham 3:25; tan-awa man sa Para sa Kusog sang mga Lamharon: Giya sa Paghimo sang mga Pagpili). Ipapraktis sa ila ang posible nga mga reaksyon sa sining mga sitwasyon. Paano makabulig sa aton ang Manluluwas kon makahimo kita sang sala nga pagpili?