Ang Panimalay sang Israel

Sa isa ka bahin sang kamingawan sa nasidlangan sang Canaan, ginakulbaan nga ginhulat ni Jacob ang pagkit-anay nila sang iya kapid nga si Esau. Ang ulihi nga nakita ni Jacob si Esau, mga 20 ka tuig na ang nagligad, gusto sia patyon ni Esau. Nagpaligad si Jacob sang bilog nga gab-i nga nagpakigdumog, nga nagapangayo sang bendisyon halin sa Dios. Bilang resulta sang pagtuo, pagkapursigido, kag determinasyon ni Jacob, ginsabat sang Dios ang iya mga pangamuyo. Sadto nga gab-i gin-islan ang ngalan ni Jacob sa Israel, ngalan nga buot silingon “sia nga nagpadayon upod sa Dios”.1

Ini ang una nga tion nga ang ngalan nga Israel makit-an sa Biblia, kag isa ini ka ngalan nga nagapadayon sa bilog nga libro kag sa bilog nga kasaysayan. Ang ngalan sang ulihi nagatumod sa masobra sangsa isa lang ka tawo. Si Israel may 12 ka anak nga lalaki, kag ang ila mga kaapohan sa kabilugan ginkilala nga “panimalay sang Israel,” ang “mga tribo sang Israel,” ang “mga anak sang Israel,” ukon ang “mga Israelnon.”

Sa kasaysayan, ang mga anak sang Israel nag-angot sang dako nga bili sa ila ginhalinan bilang isa sa dose ka mga tribo sang Israel. Ang ila kaliwatan importante nga bahin sang ila pagkakilala sa kasugtanan. Si Apostoles Pablo nagpakilala nga sia halin “sa tribo ni Benjamin” (Mga Taga-Roma 11:1). Isa ka rason nga ginpabalik ni Lehi ang iya mga anak nga lalaki sa Jerusalem para kuhaon ang mga lamina nga saway, amo nga ang mga lamina nagaunod sang “lista sang kaliwatan sang iya mga katigulangan” (1 Nefi 5:14). Nadiskubrehan ni Lehi nga kaliwat sia ni Jose, kag ang paghibalo sang iya kaliwat sang ila koneksyon sa panimalay sang Israel nangin importante sa ila sa mga tinuig nga nagsunod.

Sa Simbahan sa karon, mahimo nga makabati ka parte sa Israel sa mga pahayag pareho sang “pagtipon sang Israel.” Nagakanta kita parte sa “Manunubos sang Israel,” ang “Paglaum sang Israel,” kag “Mga Elder sang Israel.” Sa sining mga halimbawa, wala kita nagahambal ukon nagakanta parte sa dumaan nga ginharian sang Israel ukon sang moderno nga nasyon nga ginatawag Israel. Kundi, ginatumod naton ang mga tawo nga ginpangtipon halin sa mga nasyon sang kalibutan pasulod sa Simbahan ni Jesucristo. Ginatumod naton ang mga tawo nga nagapadayon upod sa Dios, nga sinsero nga nagapangita sang Iya mga bugay, kag paagi sa bunyag, nangin Iya katawhan sa kasugtanan. Sa ginsiling ni Pangulong Russell M. Nelson, ang mangin iya sang Israel nagakahulugan nga “tugotan ang Dios nga magpangibabaw sa aton mga kabuhi, … nga tugotan ang Dios nga mangin pinakaimportante nga impluwensya sa aton mga kabuhi.”

Ang imo bendisyon sang patriarka nagapahayag sang imo koneksyon sa isa sang mga tribo sa panimalay sang Israel. Masobra pa ina sangsa isa ka makawiwili nga bahin sang imo family history. May kaangtanan man ini sa imo kabuhi sa karon kag sa palaabuton. Ang mangin bahin sang panimalay sang Israel nagakahulugan nga may ara ka sang kaangtanan sa kasugtanan upod sa Amay nga Langitnon kag kay Jesucristo. Nagakahulugan ini nga ikaw, pareho kay Abraham, gintigana nga “mangin pagpakamaayo” sa mga anak sang Dios (Genesis 12:2; Abraham 2:9–11). Nagakahulugan ini, sa mga pulong ni Pedro, nga “[ikaw] pinili nga kaliwatan, harianon nga pagkapari, balaan nga pungsod, katawhan nga iya sang Dios; agud nga mapakita [mo] ang gamhanan nga mga buhat sang nagtawag sa [imo] gikan sa kadudulman pakadto sa iya kalatingalahan nga kapawa” (1 Pedro 2:9). Nagakahulugan ini nga ikaw “(nagatugot) sa Dios nga magpangibabaw”—nga isa ka nga “nagapadayon upod sa Dios” samtang imo ginatahod ang imo mga kasugtanan sa Iya.