“23–29 Maj. ‘Mi Stap Tingbaot Promes Ya blong Mi Yet’: Eksodas 1–6,” Kam Folem Mi—Blong Hom mo Jos: OlTesteman 2026 (2026)
“23–29 Maj. ‘Mi Stap Tingbaot Promes Ya blong Mi Yet’,” Kam Folem Mi: 2026
Moses mo Tri Wetem Faea, i kam long Jerry Tompson
23–29 Maj: “Mi Stap Tingbaot Promes Ya blong Mi Yet”
Eksodas 1–6
Invitesen ia blong stap laef long Ijip, i sevem famli blong Jekob. Be afta long plante handred yia, ol laen blong olgeta oli bin kam slef mo wan niufala king blong Ijip i bin mekem nogud long olgeta, mo “hem i no bin save Josef” (Eksodas 1:8). Bae i stret nomo long Ol Man Isrel blong askem olgetawan from wanem God i bin letem hemia i hapen long olgeta, ol kavenan pipol blong Hem. ?Hem i bin tingbaot, kavenan ia we Hem i bin mekem wetem olgeta? ?Oli stil stap olsem ol pipol blong Hem ? ?Hem i bin save luk hamas oli bin stap safa ?
Bae i gat ol taem we yu filim blong askem ol semmak kwestin. Maet yu save tingting se: “?God i save wanem nao mi mi stap gotru long hem? ?Hem i save harem ol krae mo prea blong mi blong askem help? Fasin blong sevem Isrel aot long Ijip i ansarem klia ol kaen kwestin ia: God i no stap fogetem ol pipol blong Hem. Hem i stap tingbaot ol kavenan we Hem i bin mekem wetem yumi mo bae i mekem olgeta oli kamtru long taem mo wei blong Hem. Hem i talem: “Mi mi Hae God. Mi bambae mi sevem yufala, mi tekemaot yufala long han blong ol man Ijip ya we oli stap mekem yufala i wok slef, mi mekem yufala i fri. Bambae mi leftemap han blong mi blong panisim olgeta long ol panis we i nogud we i nogud, nao bambae mi sevem yufala, mi mekem yufala i fri. “Mi mi Hae God, mo taem mi tekemaot yufala long han blong olgeta, mi mekem yufala i fri, bambae yufala evriwan i luksave we mi mi God blong yufala” (Eksodas 6:6–7).
Blong ridim wan ful stori long buk blong Eksodas, luk long “Exodus, book of” insaed long Bible Dictionary.
Ol aedia blong Stap Lanem Samting long Hom mo Jos
Eksodas 1–2
God i save wok tru long mi blong mekem ol stamba tingting blong Hem i hapen.
?Wanem filing i tajem yu abaot ol woman we oli tokbaot insaed long Eksodas 1–2? ?Olsem wanem nao oli help blong mekem plan ia blong God i hapen long ol pipol blong Hem? ?Wanem nao ol hadwok blong olgeta i tijim yu abaot seves long wok blong God?
Eksodas 1–3
Jisas Kraes i Sevya blong mi.
Bifo yu stat blong stap ridim Eksodas, maet yu tingbaot wan hadtaem we yu stap go tru long hem—wan samting we yu hop se Lod bae i sevem yu aot long hem. ?Wanem ol toktok mo ol sentens insaed long Eksodas 1–3 i saon semmak long fasin blong stap wan prisena long saed blong spirit o ol narafala samting we yumi fesem tedei? Luksave tu olsem wanem ol pikinini blong Isrel oli lukaotem fasin blong kam fri mo olsem wanem Lod i stap ansa (luk long, eksampol ia, Eksodas 2:23–25; 3:7–8). ?Olsem wanem nao Lod i bin “i bin kamdaon blong mekem [yu] fri”?
Truaot long buk blong Eksodas, maet bae yu luksave sam samting we i semsemmak bitwin Moses mo Jisas Kraes (luk long Dutronome 18:18–19; 1 Nifae 22:20–21). Eksampol, ?wanem ol samting we yu luk i semsemmak bitwin Eksodas 1:22; 2:1–10 mo Matiu 2:13–16? ?O bitwin Eksodas 24:18 mo Matiu 4:1–2? ?Wanem nao yu filim we Lod i wantem yu blong andastanem abaot Hemwan mo paoa blong Hem?
Lukaotem ol saen we oli testifae abaot Jisas Kraes. “Yu save faenem semmak stori long laef blong Sevya long laef blong ol profet blong yumi mo ol narafala man mo woman we oli fetful, we oli tokbaot olgeta insaed long ol skripja. [Long wei ia], yu save luksave ol trutok abaot Sevya long ol narafala ples we yu no lukluk long hem.” (luk long Tij Folem Wei blong Sevya, 7; Luk tu long Hosea 12:10).
Fet long En blong Wota, i kam long Anne Marie Oborn
Eksodas 3:1–6
Yumi save soem respek long ol tabu samting mo ol tabu ples.
?Yu save tingting long wan taem, taem we wan samting i fulumap yu wetem sapraes? ?Wanem nao yu mekem? ?Olsem wanem nao bae yu tokbaot ol filing we yu bin filim?
Wetem hemia long maen, ridim Eksodas 3:1–6. ?Wanem filing nao i tajem yu abaot eksperiens blong Moses we i givim insperesen? ?Wanem nao Moses i mekem blong soem respek long God? ?Wanem ol koneksen we yu luk bitwin ol aksen blong hem mo fasin blong gat respek long ol tabu samting?
Blong stap ridim ol ves ia, maet bae i givim insperesen long yu blong tingbaot ol tabu samting mo ol tabu ples long laef blong yu. ?From wanem oli tabu long yu? ?Long wanem wei nao yu tritim olgeta i defren aot long ol samting we oli stap hapen oltaem? Blong lidim tingting hevi blong yu, yu save lukluk long seksen taetol “Remembering the Promises” long mesej blong Elda David A. Bednar “Exceeding Great and Precious Promises” (Liahona, Novemba 2017, 91–93). Mo tu, yu save singsing o lisin long wan hym we i givim insperesen blong filing blong sapraes, olsem “Mi Sapraes Tumas We Jisas Hem I Lavem Mi” (Hym, pej 22) mo tingting hevi long wanem singsing ia i tokbaot we i mekem yu sapraes.
Yes, iven taem yumi gat ol naesfala eksperiens long saed blong spirit, i gat denja blong taem yumi tekem ol tabu samting i laet tumas. ?Olsem wanem nao yumi save stopem hemia? Hemia i tu [2] mesej we i tokbaot problem ia; jusum wan, mo lukaotem ol toktok we bae i helpem yu: Ulisses Soares, “We I Sapraes long Kraes mo Gospel blong Hem” (Liahona, Mei 2022, 115–17); Gérald Caussé, “Is It Still Wonderful to You?” (Liahona, May 2015, 98–100).
Luk tu long Doktrin mo Ol Kavenan 6:10–12; 63:64.
Eksodas 3–4
God i givim paoa long ol pipol we Hem i singaotem olgeta blong mekem wok blong Hem.
Tedei, yumi save Moses olsem wan bigfala profet mo lida. Be Moses i no bin luk hemwan long wei ia taem we Lod i bin singaotem hem faswan. Taem yu ridim Eksodas 3–4, mekem lis blong ol wari blong Moses mo olsem wanem Lod i ansa long wanwan wari ia. ?Wanem nao yu faenem insaed long ol japta ia we i givim insperesen long yu taem yu no filim i stret o tingting se yu no save mekem wan samting? ?Wetaem nao yu bin luk God i givim paoa long yu o ol narawan blong mekem wok blong Hem?
Luk tu long “The Church Gives Us Opportunities to Assist in God’s Work” long “Church Organization” in Topics and Questions, Gospel Library.
Eksodas 5–6
Ol stamba tingting blong Lod bae oli kamtru long taem we Hem i wantem.
Tingting i save kam slak taem we ol tru hadwok blong yumi blong mekem gud samting, i luk olsem se i no stap wokaot—taem yumi stap traem blong mekem tingting blong Lod be yumi no stap luk ol risal we yumi wantem. Blong lanem abaot wan semmak eksperiens we Moses i bin gat, ridim Eksodas 5:4–9, 20–23. ?Olsem wanem nao Lod i stap helpem Moses blong winim ol filing blong hem we hem i wantem givap? (luk long Eksodas 6:1–13 ?Olsem wanem nao Lod i bin helpem yu blong stap strong blong mekem tingting blong Hem?
Luk tu long Jeffrey R. Holland, “Stap Wet long Lod,” Liahona, Novemba 2020, 115–17.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
From Sandei ia hem i nambafaef Sandei blong manis, oli leftemap tingting blong ol Praemeri tija blong yusum ol aktiviti blong stap lanem samting long “Apendiks B: Stap Mekem Rere Ol Pikinini from wan Laeftaem long Kavenan Rod blong God
Eksodas 1–2
God i save wok tru long mi blong mekem ol stamba tingting blong Hem i hapen.
-
Moses i gat wan bigfala wok blong karemaot ol pipol blong Isrel long slef i go fri. Be bae hem i no save mekem hemia i hapen sapos mama blong hem, sista blong hem, gel blong king blong Ijip mo ol narafala fetful woman oli no bin protektem mo kea long hem. Helpem ol pikinini blong yu blong lanem abaot ol woman ia long Eksodas 1:15–20; Eksodas 2:2–10 (luk tu long Ol Namba 26:59); mo Eksodas 2:16–21. Mo tu, yufala save yusum aktiviti pej blong wik ia mo “Bebi Moses” (long Ol Stori long OlTesteman, 61–63) blong talem ol stori blong olgeta. ?Olsem wanem nao ol woman ia oli help blong mekem plan blong God i hapen? Toktok wetem wanwan long olgeta abaot ol narafala pipol we yu laekem we oli help wetem wok blong God, we i tekem tu, ol smol mo simpol wei. ?Olsem wanem nao yumi save folem eksampol blong olgeta?
1:36Baby Moses
Eksodas 3:1–5
Mi save tritim ol tabu ples wetem respek.
-
Afta we yufala i ridim tugeta Eksodas 3:1–5 , askem ol pikinini blong yu blong talem i sot ol ves ia long toktok blong olgetawan (luk tu long “Profet Moses” long Ol Stori long OlTesteman, 64–66). ?Long wanem wei nao Moses i soem respek long ples we Lod i stap long hem? ?Long wanem wei nao Lod i wantem yumi blong soem respek? Mo tu, yu save askem ol pikinini blong yu blong helpem yu blong faenem (o dro) ol pikja blong ol tabu ples o ol aktiviti we yumi mas soem respek long olgeta. ?Wanem nao yumi save mekem blong mekem se hom blong yumi i wan tabu ples?
1:26Moses the Prophet
-
Tugeta, singsing wan singsing abaot fasin blong stap kwaet o stap soem respek, olsem “Reverence Is LoveChildren’s Songbook, 31). Taem yu mekem hemia, ol pikinini blong yu oli save faenem ol toktok mo ol sentens we oli eksplenem wanem i minim blong stap kwaet o soem respek. Sapos yumi stap tekem wan fren i kam long jos blong fastaem, ?olsem wanem nao bae yumi eksplenem wanem i minim blong stap kwaet o soem respek?
Moses mo Eron, Tufala I Toktok long Ol Pipol, i kam long James J. Tissot
Eksodas 3–4
Taem we Lod i askem mi blong mekem wan samting, Hem bae i helpem mi blong mekem.
-
Yusum stori ia long Eksodas 3; 4:1–17, letem wanwan pikinini i mekem olsem se hem nao i Moses. Maet bae i wan gudtaem blong yusum tu ol samting o ol simpol samting blong sapot, olsem wan toj mo wan plant blong ripresentem wan tri wetem faea. Helpem ol pikinini blong yu blong faenemaot wanem filing nao Moses i bin filim abaot asaenmen we Lod i bin givim long hem (luk long Eksodas 3:11; 4:1, 10). Maet yu save serem wetem wanwan long yufala, ol taem we yu bin gat ol semmak filing ia. ?Wanem advaes nao bae yumi serem wetem Moses blong helpem hem? Rid abaot olsem wanem Lod i leftemap tingting blong Moses long Eksodas 3:12; 4:2–9, 11–12. Talem long ol pikinini, olsem wanem Sevya i bin helpem yu blong mekem gud wan koling blong yu, folem kwaet toktok blong Spirit, o mekem wan narafala samting we i bin had long yu.
Blong kasem moa aedia, luk long magasin blong Fren blong manis ia.