“23 Febwari–1 Maj. ‘?Yufala I ting se I Gat Samting I Stap we I Strong Tumas, Mi Mi No Save Mekem?,” Kam Folem Mi—Blong Hom mo Jos: OlTesteman 2026 (2026)
“23 Febwari–1 Maj. ‘?Yufala I ting se I Gat Samting I Stap we I Strong Tumas, Mi Mi No Save Mekem?’,” Kam Folem Mi: 2026
Sara mo Aesak, i kam long Scott Snow
23 Febwari–1 Maj: “?Yutufala I Ting se I Gat Samting I Stap we I Strong Tumas, Mi Mi No Save Mekem?”
Jenesis 18–23
Laef blong Ebraham mo Sara, we i fulap long ol taem we i save brekem hat mo i save tajem hat, i pruf ia blong wan trutok we Ebraham i bin lanem long wan visen—se yumi stap long wol ia blong oli testem yumi blong “luk sapos bae [yumi] mekem evri samting we Lod blong [yumi] bae i givim oda long [yumi]” (Ebraham 3:25). ?Yu ting se bae oli pruvum se Ebraham mo Sara i stap fetful? ?Bambae tufala i gohed blong gat fet long promes ia blong God se bae tufala i kasem wan bigfala famli laen afta long hem, iven we hem mo Sara i no gat yet pikinini, be tufala i olfala finis? Mo taem bae Aesak i bon, ?bae bilif blong tufala i save stap strong tru long wan samting we man i no ting nating long hem—oda ia blong givim boe blong hem olsem sakrifaes, mo tru long boe ia nao God i promesem blong mekem kavenan ia i kamtru?
Ebraham mo Sara tufala i trastem God mo Hem u trastem tufala (luk long Jenesis 15:6; Rom 4:3). Long Jenesis 18–23, yumi faenem ol stori aot long laef blong Ebraham mo ol narawan, we oli save pusum yumi blong tingting long paoa blong yumiwan blong stap bilivim ol promes blong God, blong ronwe long fasin nogud mo neva lukluk i gobak, mo blong trastem God i nomata long wanem sakrifaes blong mekem. Blong stap pruvum yumi, God tu bae i mekem yumi kam moa gud.
Ol aedia blong Stap Lanem Samting long Hom mo long Jos
Jenesis 18:9–14; 21:1–7
Lod i mekem ol promes blong Hem oli kamtru long stret taem we Hem i wantem.
Lod i bin mekem ol bigfala promes long olgeta fetful, be samtaem, ol situesen blong laef blong yumi i save mekem se yumi save askem yumiwan olsem wanem ol promes ia bae oli save kamtru. Ebraham mo Sara, maet tufala i bin filim olsem plante taem. ?Wanem nao yu lanem aot long eksperiens blong olgeta? Bae i save help blong statem stadi blong yu taem yu luklukbak long wanem we Lod i bin promesem long Ebraham long Jenesis 17:4, 15–22. ?Wanem nao Ebraham mo Sara i mekem? (Luk tu long Josef Smit Translesen, Jenesis 17:23 [insaed long Jenesis 17:17, futnot b]; Jenesis 18:9–12). ?Olsem wanem nao Lod i bin ansa blong helpem olgeta blong gat moa bigfala bilif long ol promes blong Hem? (Luk long Jenesis 18:14).
?Wanem nao yu faenem insaed long ol ves ia we i helpem yu blong bildimap fet blong yu? ?Wanem ol narafala eksperiens—long laef blong yu o laef blong wan narawan—we i bin mekem fet blong yu i kam strong moa se, Lod bambae i mekem ol promes blong Hem oli kamtru long yu long wan taem mo wan wei we i blong Hem? Maet yu save tingting hevi tu long olsem wanem yu save sapotem fet blong yu, taem we ol promes blesing oli no kam long laef ia ?Wanem kaonsel nao yu faenem insaed long Hibrus 11:8–13 mo long mesej blong Presiden Russell M. Nelson“Kraes I Girap Finis; Bilif long Hem bae I Muvumaot Ol Bigfala Hil”? (Liahona, Mei 2021, 101–4).
Luk tu long Doktrin mo Ol Kavenan 88:68.
Jenesis 19:12–29
Lod i givim oda long mi blong ronwe long fasin nogud mo no lukluk i gobak.
?Wanem lesen nao yu yu lanem abaot fasin blong ronwe long fasin nogud taem yu stap ridim abaot Lot mo famli blong hem? Eksampol: ?wanem i kam long maen blong yu abaot wanem ol enjel oli bin talem mo mekem, blong helpem Lot mo famli blong hem blong ronwe long taem we Lod bae i prapa spolem ples? (Luk long Jenesis 19:12–17). ?Olsem wanem nao Lod i helpem yu mo famli blong yu blong ronwe, o faenem wan sef ples aot long ol rabis paoa insaed long wol ia? Tingting abaot ol situesen we, maet yu kasem temtesen blong “[lukluk] bak” (ves 26) taem yu nid blong stap lukluk i go fored wetem bilif long Sevya. ?Wanem nao Luk 9:62 i ademap long andastaning blong yumi abaot kaen tingting ia?
Luk tu long Josef Smit Translesen, Jenesis 19:9–15 (insaed long Baebol apendiks).
Jenesis 19:26
?Wanem nao waef blong Lot i bin mekem we i rong?
Elda Jeffrey R. Holland i tijim:
“I luk se, wanem i bin rong wetem waef blong Lot, i we, hem i no bin jes stap lukluk i gobak; insaed long hat blong hem, hem i bin wantem gobak. I luk se bifo hem i bitim ol baondri blong siti ia, hem i stap misim wanem we Sodom mo Kumora i stap givim long hem.
“Hem i posibol blong waef blong Lot i bin lukluk i gobak wetem harem nogud agensem Lod from samting ia we Hem i bin stap askem hem blong lego i stap biaen. … So, i no nomo from se hem i lukluk i gobak; hem i bin lukluk i gobak wetem wan tingting long hat blong hem. Long sot toktok, hem i hang strong long laef blong hem we i pas finis, mo hemia i bin moa hevi bitim tras blong hem long fiuja. Hemia, olsem we i klia, i bin pat blong sin blong hem.
“Mi plis long yufala blong yufala i no stastap wetem ol dei we oli pas finis, mo no stap wantem tumas wanem we i blong yestedei, nating se ol yestedei ia oli bin gud tumas. Ol samting blong bifo, oli blong yumi lanem samting aot long hem, be i no blong yumi stap laef insaed long hem. Yumi lukbak blong karem ol jakol we oli laetem ol eksperiens we oli laef i stap, be i no blong karem ol asis. Mo taem yumi lanem wanem we yumi nid blong lanem mo tekem wetem yumi wanem i bes we yumi bin gotru long hem, nao yumi lukluk i go long fored, yumi tingbaot se fet, oltaem i poen i go fored i go long fiuja.
“Blong stastap wetem wanem we i bin hapen long laef bifo, we i tekem ol mistek blong yumi tu, !i jes no raet nating! Hem i no gospel blong Jisas Kraes.
“Long evri pipol blong evri jeneresen, mi singaot i go: ‘Tingbaot waef blong Lot’ [Luk 17:32]. Fet, hem i blong fiuja. Fet, i blong bildimap yu antap long wanem we i pas finis, be i no blong wantem stastap long wanem we i pas finis. Fet i trastem se God i gat ol bigfala samting i stap blong wanwan long yumi, mo we, i tru we Kraes i Hae Pris we i tekem ol gudgudfala samting ya oli kamtru’ (Hibrus 9:11)” (“The Best Is Yet to Be,” Ensign, Jan. 2010, 24, 26–27).
Ebraham mo Aesak, i kam long Harold Copping
Jenesis 22:1–19
Fasin ia, we Ebraham i glad blong givim Aesak olsem sakrifaes, i semmak olsem God mo Pikinini blong Hem.
Nomata se yumi no save evri risen from wanem God i bin givim komanmen long Ebraham blong givim Aesak olsem wan sakrifaes, yumi save nomo se i bin wan tes blong testem bilif blong hem long God. Mo tu, yumi save se hemia i “ripresentem God mo Wan Stret Pikinini Ia Nomo blong hem” (Jekob 4:5). Mo taem yu ridim Jenesis 22:1–19, yu save lukaotem ol simbol o ol samting we i semmak wetem Aesak we Ebraham i givim olsem wan sakrifaes mo Jisas Kraes we Papa blong Hem i givim olsem wan sakrifaes. Tingting blong stap raetemdaon wanem yu faenem long wan jat olsem hemia:
|
Ebraham mo Aesak |
Papa long Heven mo Jisas Kraes |
|---|---|
Ebraham mo Aesak Aesak i wan stret pikinini ia nomo blong Ebraham mo Sara (Jenesis 22:2; luk tu long Hibrus 11:17) | Papa long Heven mo Jisas Kraes Jisas i Wan Stret Pikinini Ia Nomo blong Papa (Jon 3:16) |
Ebraham mo Aesak Oli givim Aesak olsem wan sakrifaes long ples blong wan smol sipsip (Jenesis 22:7–9) | Papa long Heven mo Jisas Kraes Jisas Kraes i Smol Sipsip blong God (Jon 1:29) |
?Wanem ol simbol mo ol semmak samting aot long atonmen mo sakrifaes blong Sevya we yu luk se i gat moa mining long yu? Tingting blong stap singsing o stap ridim ol toktok blong wan hym we i soem lav blong Papa long Heven long yumi, olsem “God Loved Us, So He Sent His Son,” Hym, namba 187. Maet yu save raetemdaon tu ol filing blong yu abaot Papa long Heven mo Jisas Kraes mo sakrifaes blong Tufala from yu.
Sapos yu wantem blong stadi moa abaot sakrifaes blong Sevya blong yumi, tingting blong stap ridim mesej blong Presiden Jeffrey R. Holland “Luk Smol Sipsip blong God” (Liahona, Mei 2019, 44–46). ?From wan wan smol sipsip i wan simbol we i gat paoa blong soem Pikinini blong God? ?Wanem nao Presiden Holland i tijim we i mekem respek blong yu long presen blong Papa long Heven i kam antap moa?
Luk tu long “Akedah (The Binding)” (vidio), Gospel Library.
Akedah (The Binding)
Yusum ol samting we man i save luk, blong tij. Blong ademap ol defren samting long taem blong stap tij, maet yu save yusum wan o moa long ol pikja we i stap insaed long aotlaen ia taem yu stadi long ol stori long Jenesis 18–23. Eksampol, yu mo famli blong yu i save tekem not long o infomesen insaed long ol pikja blong Ebraham mo Aesak. Tokbaot from wanem ol infomesen ia oli impoten long stori, mo faenem ol infomesen ia insaed long ol skripja. ?Olsem wanem nao ol simbol insaed long stori oli impoten tumas abaot sakrifaes blong Pikinini blong God?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jenesis 17:15–21; 18:14; 21:1–7
Mi save trastem God blong kipim ol promes blong Hem.
-
Blong lanem abaot tras blong Ebraham mo Sara, yu mo ol pikinini blong yu save tokbaot wan taem we oli mas wet from wan samting we oli wantem tumas. Afta, yufala save lukluk long pikja blong Sara mo Aesak long stat blong aotlaen ia mo tokbaot ol promes we God i bin mekem long hem mo Ebraham (luk tu long “Ebraham mo Sara,” long Ol Stori long OlTesteman, 28–31). Helpem ol pikinini blong yu blong oli tingting long ol samting we God i promes long yumi sapos yumi stap fetful. Leftemap tingting blong olgeta blong gat fasin blong save wet longtaem mo trastem se God bae i kipim ol promes blong Hem.
2:20Abraham and Sarah
-
Blong helpem ol pikinini blong yu blong lanem impoten trutok insaed long Jenesis 18:14, yu save raetem wanwan toktok long fas sentens blong ves ia long ol seperet pis blong pepa. Afta miksim ol pepa, mo invaetem ol pikinini blong yu blong stretem ol toktok ia mo putum olgeta long stret oda. Afta, yu mo ol pikinini blong yu save ridim Jenesis 17:15–21; 21:1–7 blong faenem wan eksampol blong wan samting we Lod i mekem, we i no posibol nomo. Serem wetem ol pikinini blong yu, abaot fet blong yu se Lod bae i mekem i hapen ol promes blong Hem, iven sapos i luk olsem bae i no posibol o bae i tekem tumas taem bifo i hapen.
Jenesis 19:15–26
Mi save ronwe long fasin nogud.
-
Askem ol pikinini blong yu abaot ol situesen we wan i save invaetem olgeta blong mekem wan samting we oli save se i no stret. ?Olsem wanem yumi save “ronwe” long ol situesen ia? Mekem i kam sot stori long Jenesis 19:15–26 mo eksplenem se famli blong Lot i bin stap laef long wan siti we i nogud, mo ol enjel oli wonem olgeta blong aot long ples ia. Tugeta, taem yu mo ol pikinini blong yu i ridim ol ves 15–17, 26, askem olgeta se i minim wanem long yumi tedei blong “yufala i resis” longwe long ivel mo “mo no lukbak long ples ia” (ves 17).
Sodom, i kam long Julius Schnorr von Carolsfeld
Jenesis 22:1–14
Ebraham i obei long Lod.
-
Yusum ol pikja blong Ebraham mo Aesak mo blong taem Jisas I Hang long Kros (luk long Gospel Art Buk, ol namba 9, 57) i save helpem ol pikinini blong yu blong luk wanem i semmak o defren long stori insaed long Jenesis 22 wetem sakrifaes blong Sevya (luk long Matiu 27:26–37). ?Wanem nao yumi save lanem abaot Papa long Heven mo Jisas Kraes aot long stori blong Ebraham mo Aesak mo long saed blong taem we Jisas i hang long kros? (Luk tu long “Ebraham mo Aesak,” long Ol Stori long OlTesteman, 34–37.)
2:0Abraham and Isaac
-
?Yu save tingting long wan simpol gem blong plei wetem ol pikinini blong yu we bae i nidim olgeta blong folem ol daereksen? Maet ol daereksen bae i save lid i go long wan pikja blong Sevya we i haed i stap. Gem ia i save givim insperesen blong storian abaot ol samting we Papa long Heven i givim oda long yumi blong mekem se yumi save laef wetem Hem mo Jisas Kraes bakegen. Tingting blong stap singsing wan singsing olsem “Keep the Commandments” (Children’s Songbook, 146–47). Aktiviti pej blong wik ia tu i save help.
Blong kasem moa aedia, luk long magasin blong Fren blong manis ia.