“16–22 Febwari. ‘Blong Mi Stap Olsem Wan Moa Bigfala Disaepol blong Stret mo Gud Fasin’: Jenesis 12–17; Ebraham 1–2,” Kam Folem Mi—Blong Hom mo Jos: OlTesteman 2026 (2026)
“16–22 Febwari. ‘Blong Mi Stap Olsem Wan Moa Bigfala Disaepol blong Stret mo Gud Fasin’,” Kam Folem Mi: 2026
Melkesedek I Blesem Ebram, i kam long Walter Rane (ditel)
16–22 Febwari: “Blong Mi Stap Olsem Wan Moa Bigfala Disaepol blong Stret mo Gud Fasin”
Jenesis 12–17; Ebraham 1–2
From kavenan ia we God i bin mekem wetem hem, God i bin singaotem Ebraham “papa blong olgeta we oli fetful” (Doktrin mo Ol Kavenan 138:41) mo “Fren blong God” (Jemes 2:23). Plante milian man mo woman tedei oli stap givim ona long hem olsem stret bubu blong olgeta, mo sam narawan, oli bin adoptem olgeta insaed long famli blong hem tru long fasin blong jenisim laef long gospel blong Jisas Kraes. Yet, Ebraham i wan man we i kamaot long famli we i gat trabol—papa blong hem, we i bin lego tru wosip long God, i bin traem blong mekem Ebraham i mekem sakrifaes long ol giaman god. I nomata long hemia, Ebraham i wantem “stap olsem wan moa bigfala disaepol blong stret mo gud fasin” (Ebraham 1:2), mo histri blong laef blong hem i soem se God i bin givim ona long wanem hem i bin wantem. Laef blong Ebraham i stap olsem wan testemoni se, i nomata wanem i famli histri blong wan, be fiuja blong hem i save fulap wetem hop.
Ol aedia blong Stap Lanem Samting long Hom mo long Jos
God bambae i blesem mi from bilif blong mi mo stret mo gud tingting blong hat blong mi.
“Yumi evriwan i bin jenis tru ol famli [mo] kalja blong yumi,” Elda Neil L. Andersen i bin tijim, “be yet, mi bilivim se i gat wan ples insaed long yumi we wanwan long yumi i spesel from, we yumi save kontrolem mo krietem Long en, insaed ol filing blong yumi oli kasem laef mo oli man i luk tru ol joes mo ol aksen blong yumi” (“Educate Your Desires, Elda Andersen Counsels,” ChurchofJesusChrist.org). Tingting long olsem wanem Ebraham 1:1–19 i soem wanem we Elda Andersen i bin tijim. Ol kwestin olsem oli save help:
-
?Wanem nao Ebraham i wantem tumas? ?Olsem wanem nao ol aksen blong hem i ol pruf blong ol tingting blong hat blong hem? ?Olsem wanem nao God i sapotem ol tingting blong hat blong hem?
-
?Wanem nao yu wantem tumas, insaed long hat blong yu? ?Olsem wanem nao ol aksen blong yu oli wan pruf blong ol tingting blong hat blong yu ia? ?Olsem wanem nao God i sapotem yu?
-
?Wanem mesej nao ol ves ia oli gat blong ol pipol we ol memba blong famli blong olgeta oli no wantem stret mo gud fasin?
Wan long ol bigfala tingting blong hat blong Ebraham mo Sara—blong gat wan pikinini—i no bin hapen blong plante yia (luk long Jenesis 15:1–6). ?Wanem nao yu lanem aot long Hibrus 11:8–13 abaot olsem wanem Ebraham mo Sara i bin fesem tes ia? ?Olsem wanem nao Sevya i helpem yu blong “holemtaet” ol promes blong Hem, iven sapos oli stap “longwe long olgeta”?
Luk tu long “Deliverance of Abraham” (vidio), Gospel Laebri.
Deliverance of Abraham
Jenesis 12:1–3; 13:15–16; 15:1–6; 17:1–8, 15–22; Ebraham 2:6–11
God i wantem mi blong mekem mo kipim ol kavenan wetem Hem.
?From wanem i impoten long yu blong save abaot kavenan we God i bin mekem wetem Ebraham? From se God i wantem mekem wan semmak kavenan olsem wetem yu. Hem i bin promesem se kavenan ia bambae i gohed long laen blong Ebraham we bae oli kam afta long hem, o bae i stap wetem “laen” blong hem, mo “hamas long olgeta we bae oli akseptem Gospel ia, bae … [Hem i ] kaontem olgeta olsem laen blong [Ebraham]” (luk long Ebraham 2:10–11). Long ol nara toktok, kavenan ia i gohed long yu—taem yu kasem baptaes mo i kam moa komplit taem yu mekem ol kavenan insaed long tempol (luk long Galesia 3:26–29; Doktrin mo Ol Kavenan 132:30–32).
From risen ia, maet yu wantem blong stadi long Ebraham 2:6–11 mo mekem wan lis blong wanem stret nao, God i promesem long Ebraham mo Sara (luk tu long Jenesis 12:1–3; 13:15–16; 15:1–6; 17:1–8, 15–22). ?Olsem wanem nao olgeta blesing ia oli blong yu tu?
Sam long ol promes ia oli gat ol samting we i no save finis we i folem. ?Olsem wanem nao ol promes oli olsem wan graon we i kam long ol papa o wan we bae ol pikinini blong hem bae oli plante, we bae i hapen blong taem we i no save finis? (luk long Doktrin mo Ol Kavenan 131:1–4; 132:20–24, 28–32).
Folem ol promes blesing, God i bin talem long Ebraham blong “stap wan blesing” (Jenesis 12:2; oli ademap italik). ?Yu yu ting se hemia i minim wanem? ?Long wanem wei nao bae yu stap wan blesing? (luk long Ebraham 2:11).
Blong tij abaot ol kavenan, Elda Dale G. Renlund i tokbaot ol Taetol wef long Amazon River, mo Presiden Emily Belle Freeman i tokbaot, blong stap wokbaot long wan rod we i gat plante ston wetem angkol blong leg we i brok (luk long “Stap Gat Akses long Paoa blong God tru long Ol Kavenan,” Liahona, Mei 2023, 35–37; “Stap Wokbaot long Kavenan Rilesensip Wetem Kraes,” Liahona, Novemba 2023, 76–79). Lukaotem wan o tugeta ol mesej ia, blong faenem ol sentens we i save help blong ansarem kwestin ia, “?From wanem God i wantem mi blong mekem kavenan wetem Hem?”
Invaetem ol pipol blong tijim wanwan long olgeta. Sapos yu stap tijim famli blong yu o wan Jos klas abaot ol kavenan, tingting blong stap givim long wanwan man o woman wan pat blong mesej blong Elda Renlund o Presiden Freeman, blong oli stadi long hem. Afta, oli save serem wetem evriwan long famli o klas, wanem we oli bin lanem. Hemia i letem ol pipol blong testifae long mo lanem samting tru long olgeta wanwan, mo hemia bae i invaetem Spirit. (Luk long Tij Folem Wei blong Sevya, 26.)
Luk tu long Topics and Questions, “Abrahamic Covenant,” Gospel Laebri; “Thoughts to Keep in Mind: The Covenant,” long lesenbuk ia.
Kavenan blong Ebraham, i kam long Dilleen Marsh (ditel)
Jenesis 14:18–19; Josef Smit Translesen, Jenesis 14:25–40
“Melkesedek i bin wan man we i gat fet.”
Pikja long maen se yu stap introdiusum Melkesedek long wan we i no save hem. ?Wanem nao bae yu talem? Ol samting we oli talem, maet oli ol samting we oli bin ridim long Josef Smit Translesen, Jenesis 14:26–27, 33–38 (insaed long Baebol apendiks); Alma 13:13–19; Doktrin mo Ol Kavenan 107:1–4. ?Wanem nao Ol Fasin olsem Hemia blong Kraes we yu faenem insaed long toktok ia we i tokbaot Melkesedek? ?Olsem wanem nao stadi blong yu abaot laef blong Melkesedek i jenisim wei we yu luk Melkesedek Prishud?
Jenesis 14:18–24; Josef Smit Translesen, Jenesis 14:36–40
Ebraham i bin pem taeting.
?Wanem nao yu lanem abaot fasin blong Ebraham abaot ol rij samting long Jenesis 14:18–24 mo Josef Smit Translesen, Jenesis 14:36–40 (long Baebol apendiks)? Eksampol, lukluk long ansa blong hem we i go long king blong Sodom long Jenesis 14:23. ?Olsem wanem nao fasin blong obei long loa blong taeting i bin jenisim lukluk blong yu abaot mane?
Jenesis 16
God i harem mi.
Taem yu ridim Jenesis 16, maet yu save tingting abaot wan taem we yu bin filim se oli bin tritim yu i no fea, olsem Hega. Tekem not se “Ishmael” i minim “God i harem.” ?Long wanem wei nao God i bin soem long yu se Hem i bin harem yu?
Luk tu long “Secret Prayer,” Hym, namba 144.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jisas Kraes bae i lidim mi wetem han blong Hem.
-
Taem yu mo ol pikinini blong yu i ridim Ebraham 1:18 mo 2:8, yu save invaetem olgeta blong lisin blong harem wan pat blong bodi we oli talem insaed long tugeta ves. Maet yufala save plei wan gem we, wan pikinini bae i sarem ae blong hem mo yu lidim hem i go long wan ples wetem han blong yu. Afta, yufala save tokbaot wanem yufala i filim, blong gat Jisas Kraes i lidim yumi wetem han o protektem yumi.
Jenesis 13:5–12
Mi save stap olsem wan we i putum pis.
-
Maet ol pikinini blong yu bae oli glad tumas blong aktem stori long Jenesis 13:5–12, aktem se, wan i Ebraham, Lot mo ol man blong olgeta. ?Olsem wanem nao yumi save folem eksampol blong Ebraham blong stap wan man blong putum pis wetem famli mo ol fren blong yumi? Traem blong mekem wan drama wetem ol ansa blong olgeta.
Joes blong Lot, i kam long William Fredericks © Providence Collection/licensed from goodsalt.com
Jenesis 13:16; Jenesis 15:1–6; 17:1–8; Ebraham 2:9–11
God i wantem mi blong mekem ol kavenan wetem Hem.
-
Tingting blong stap soem wan kontena blong sanbij long ol pikinini blong yu, ol sta long naet skae, o pikja long en blong aotlaen ia. Hemia i save helpem olgeta blong andastanem ol promes blong God long Jenesis 13:16; 15:1–6. Tokbaot olsem wanem yu bin lanem blong trastem ol promes blong God, iven taem yu luk olsem se i no posibol.
-
Blong tijim ol pikinini blong yu abaot ol kavenan, askem olgeta blong talem long yu abaot wan taem we oli bin mekem wan promes o wan i bin mekem wan promes long olgeta. Sapos i help bigwan, serem sam eksampol blong yuwan—we i tekem tu, ol kavenan we yu bin mekem wetem God taem yu baptaes o insaed long tempol. ?Olsem wanem nao ol kavenan blong yu jenisim rilesensip blong yu wetem God? Jusum sam sentens insaed long Jenesis 15:1–6; 17:1–8; Ebraham 2:9–11 blong serem sam long ol blesing we God i promesem long Ebraham mo Sara.
-
Blong helpem ol pikinini blong yu blong rere blong mekem wan kavenan wetem God, yu save yusum sam long ol aedia blong aktiviti we i stap long apendiks A o apendiks B.
Ebraham 1:12–17; Jenesis 16:7–11
God i harem mi.
-
Taem we laef blong Ebraham i stap long denja, hem i singaot long God. Taem Hega i stap hemwan long waelples, hem i lanem se God i bin harem hem. Tingting blong stap serem tufala stori ia wetem ol pikinini blong yu: “Ebraham mo Sara” mo “Hega” long Ol Stori long OlTesteman, 28–31, 32–33. ?Wanem nao yumi lanem abaot God long ol stori ia? Afta, yu save serem wetem wanwan long olgeta, ol eksperiens blong yu abaot taem we yu bin filim se God i bin harem yu. Wan singsing olsem “A Child’s Prayer” (Children’s Songbook, 12–13) i save sapotem prinsipol ia.
Abraham and Sarah
Hagar
Blong kasem moa aedia, luk long magasin blong Fren blong manis ia.