“Ol Tingting blong Kipim long Maen: Kavenan Ia,” Kam Folem Mi—Blong Hom mo Jos: OlTesteman 2026 (2026)
“Kavenan Ia,” Kam Folem Mi: 2026
Ol Tingting blong Kipim long Maen
Kavenan Ia
Truaot long OlTesteman, oltaem bae yu ridim toktok ia kavenan. Tedei, yumi stap tingting long ol kavenan olsem ol tabu promes yumi mekem wetem God, be long wol blong bifo, kavenan i wan pat blong ol pipol oli wok tugeta. Blong oli save stap sef mo blong save stap laef, pipol oli nidim blong trastem olgeta wanwan, mo ol kavenan i wan wei blong mekem tras ia i sef i stap.
Mekem se, taem God i toktok long Inok, Noa, Moses mo ol narawan abaot ol kavenan, Hem i invaetem blong olgeta blong gat wan rilesensip blong tras wetem Hem. Yumi singaotem kavenan we i niu mo i no gat en o kavenan blong Ebraham—wan toktok we i tokbaot kavenan blong God we i bin mekem wetem Ebraham mo Sara, mo afta, i mekem i kam niu bakegen wetem ol pikinini blong Aesak mo Jekob (we oli singaotem tu, Isrel). Long OlTesteman, i simpol mo oli save long hemia olsem “kavenan ia.” Bae yu luk se OlTesteman i stamba stori blong pipol we oli luk olgetawan olsem ol man we olgeta nao oli gat raet blong kasem kavenan ia—ol kavenan pipol.
Kavenan blong Ebraham i gohed blong stap impoten tedei, speseli long ol Lata‑dei Sent. ?From wanem? From se yumi tu, yumi ol kavenan pipol, i nomata se yumi ol stret o no stret laen blong Ebraham, Aesak, mo Jekob. From risen ia nao, hem i impoten blong andastanem se kavenan blong Ebraham i wanem, mo olsem wanem i aplae long yumi tedei.
?Wanem Ia i Kavenan blong Ebraham?
Ebraham i wantem “stap olsem wan moa bigfala disaepol blong stret mo gud fasin” (Ebraham 1:2), mekem se God i invaetem hem long wan kavenan rilesensip. Ebraham i no faswan blong wantem hemia, mo hem i no faswan blong kasem wan kavenan. Hem i bin, aot long evri samting, wan kavenan we i no gat en. Ebraham i lukaotem “ol blesing blong ol papa blong hem (Ebraham 1:2)—ol blesing we oli givim tru long kavenan blong Adam mo Iv mo afta long olgeta, oli givim long ol pipol we oli lukaotem ol blesing ia wetem hadwok.
Kavenan blong God wetem Ebraham i promesem ol naesfala blesing: graon we i kam long papa, ol pikinini blong hem bae oli plante, gat raet long ol odinens blong Prishud, mo wan nem we bae oli givim ona long hem long ol jeneresen we bae i kam. Be stamba lukluk blong kavenan ia i no stap nomo long ol blesing we Ebraham mo ol famli blong hem bae oli kasem, be tu, bae oli stap long ol blesing blong ol narafala pikinini blong God. “Bambae yu kam olsem wan rod blong mi blong mi blesem plante man,” God i talemaot, “Mi bambae mi yusum yu blong blesem ol man blong olgeta narafala kantri long wol” (Jenesis 12:2–3)
?Kavenan ia, i givim o i no givim long Ebraham, Sera, mo laen blong tufala, wan spesel ples long medel blong ol pikinini blong God? Yes, be nomo sapos yumi lukluk long wei ia se hem i wan spesel janis blong blesem ol narawan. Famli blong Ebraham oli stap blong save “tekem seves ia mo prishud ia i go long evri nesen,” blong serem “ol blesing blong Gospel, we oli ol blesing blong fasin blong sevem man, we i laef we i no save finis.” (Ebraham 2:9, 11). Blong stap olsem ol kavenan pipol, i no minim se oli moa gud bitim ol narawan; i minim se oli gat wan diuti blong helpem ol narawan blong kam moa gud.
Kavenan ia i blesing ia we Ebraham i bin wantem tumas. Afta we hem i kasem ol blesing ia, insaed long hat blong hem, Ebraham i talem: “Wokman blong yu i bin lukaotem yu wetem strong tingting, mo naoia mi faenem yu” (Ebraham 2:12).
Hemia i bin taosen yia i pas finis, be kavenan ia, oli putumbak finis long dei blong yumi. Mo naoia i stap hapen long laef blong ol pipol blong God. Kavenan ia we i bin hapen i stap kam moa strong long ol las dei ia taem wok blong God i stap progres, i stap blesem ol famli truaot long wol. Mo eniwan we, olsem Ebraham, i wantem blong kam wan bigfala disaepol blong stret mo gud fasin—eniwan we i wantem blong lukaotem Lod wetem tru hat—i save kam pat blong hem.
?Kavenan blong Ebraham I Minim Wanem long Mi?
Yu yu wan pikinini blong kavenan. Yu mekem wan kavenan wetem God taem yu kasem baptaes mo taem yu tekpat long sakramen. Mo yu kasem kavenan we i fulwan wetem ol tabu odinens blong tempol.
Tru long ol kavenan mo ol odinens ia, yumi kam ol pipol blong God. Yumi kam joen wetem Hem “rop we i no gat en.” “Long taem ia we yumi mekem kavenan wetem God,” Presiden Russell M. Nelson i bin tijim se, “yumi lego graon ia blong oltaem. God bae i no lego rilesensip we Hem i gat wetem olgeta we oli traehad blong joen wetem Hem. Be, olgeta we oli bin mekem wan kavenan wetem God oli save kasem wan spesel wei blong lavem mo gat sore From kavenan blong yumi wetem God, Hem bae i neva taed long ol efot blong Hem blong helpem yumi, mo bae yumi neva save taed long sore mo longfala tingting blong Hem we hem i gat long yumi.” Bae yu luk hemia long histri blong ol kavenan pipol blong God long OlTesteman, mo bae yu luk hemia long laef blong yuwan olsem wan long ol kavenan pikinini blong Hem.
Yufala I No Fraet, i kam long Dan Wilson
Hemia i save ia we i gud tumas, we oli givim i kam long yumi from kavenan ia blong Ebraham we i bin kambak tru long Profet Josef Smit. Mekem se, taem yu rid abaot ol kavenan ia insaed long OlTesteman, no tingting nomo long rilesensip blong God wetem Ebraham, Aesak, mo Jekob. Tingting tu abaot rilesensip blong Hem wetem yu. Taem yu rid abaot promes blong ol pikinini we bae i plante tumas, yu no tingting nomo long ol milian we oli singaotem Ebraham tedei, olsem papa blong olgeta. Tingting tu abaot promes blong God we i go long yu abaot ol famli blong yu we i no save finis mo fasin blong kam antap, we i no save finis. Taem we yu rid abaot promes blong wan graon we i kam long papa, yu no tingbaot nomo graon ia nomo we God i promesem Ebraham. Tingting tu abaot selestial fiuja blong wol ia hemwan—wan samting blong kasem we oli promesem long olgeta we oli “gat tingting i stap daon” we oli bin “wet long Lod” (Matiu 5:5; Ol Sam 37:9, 11). Mo taem yu rid abaot promes we ol kavenan pipol blong God bae oli blesem “ evri famli blong wol” (Ebraham 2:11), yu no tingting nomo abaot ministri blong Ebraham o ol profet we oli laen blong hem. Tingbaot wanem yu save mekem—olsem wan kavenan disaepol blong Jisas Kraes—blong kam wan blesing long ol famli raon long yu.