“2–8 Febwari. ‘Lod I Bin Singaotem Pipol blong Hem, Saeon’: Moses 7,” Kam Folem Mi—Blong Hom mo Jos: OlTesteman 2026 (2026)
“2–8 Febwari. ‘Lod I Bin Singaotem Pipol blong Hem, Saeon’,” Kam Folem Mi: 2026
Enoch Sees the Meridian of Time, by Jennifer Paget
2–8 Febwari: “Lod I Bin Singaotem Pipol blong Hem, Saeon”
Moses 7
Truaot long histri, ol pipol oli bin traem blong kasem wanem we Inok mo ol pipol blong hem oli bin mekem: blong bildim wan sosaeti we i no gat fasin blong stap pua mo i no gat vaelens long hem. Olsem ol pipol blong God, yumi tu, yumi wantem sem samting ia. Yumi singaotem se yumi stap bildimap Saeon, mo i tekem tu—antap long fasin blong stap kea long pipol we i stap long nid stap promotem pis—blong mekem ol kavenan, blong stap laef tugeta long stret mo gud fasin, mo stap kam wan wetem wanwan long yumi, mo wetem Jisas Kraes, “King blong Saeon” (Moses 7:53). Sapos wol, komuniti blong yu, o famli blong yu i no wanem stret we yu stap wantem blong oli stap olsem, bae i help bigwan blong askem, olsem wanem nao Inok mo ol pipol blong hem, oli save mekem? ?Olsem wanem nao oli bin kam blong gat “wan hat mo wan maen” (Moses 7:18) i nomata fasin blong raorao we i bin stap raon long olgeta? Long medel blong ol plante ditel we oli stap long Moses 7 abaot Saeon, i gat wan we i blong ol Lata-dei Sent: Saeon i no jes wan siti—hem i weaples nao hat mo spirit blong yu i stap. Saeon, olsem we Lod i bin tijim, hem i “olgeta we hat blong olgeta i klin gud” (Doktrin mo Ol Kavenan 97:21). So maet bes wei blong bildimap Saeon, hem i blong stat wetem hat blong yumiwan mo ol hom blong yumi.
Ol aedia blong Stap Lanem Samting long Hom mo long Jos
Mi save help blong bildim Saeon.
Taem we Profet Josef Smit i lanem fastaem abaot Inok mo Bigtaon blong Tabu Fasin blong hem, we i Saeon, hem i kasem insperesen. Hem i “save dei ia i bin kam we Lod bae i stanemap bakegen Saeon long wol” (Saints, 1:108–9), mo hem i statem wan wok we i no gat en blong bildim Saeon. Blong stap ridim Moses 7 i save givim insperesen long yu blong gohed long hadwok ia tedei.
Maet, yu save stat taem yu stap lukluk tru long ol kwestin olsem “?Wanem i Saeon?” mo “?Olsem wanem hem i defren long ful wol?” Tingting blong stap mekem lis blong ol ansa we i kam long yu taem yu stadi long Moses 7, speseli ol ves 16–21, 27, 53, 62–69.
Ol ansa blong yu long ol kwestin ia, maet i save mekem i klia se, yumi gat plante wok yet blong mekem blong bildim Saeon. ?Olsem wanem nao bae yumi mekem? Maet bae i help blong tingbaot ol taem we yu bin filim we yu bin gat “wan hat mo wan maen” wetem wan narawan (Moses 7:18). Maet hem i long wan wod, famli o wan grup long wok o skul. ?Wanem nao ol pipol oli mekem blong krietem wan yuniti we i stret mo gud?
Hemia i sam long ol narafala risos we yu save lukluk long olgeta blong faenem ol aedia mo insperesen. Jusum wan o moa blong stadi, mo afta, raetemdaon wanem yu filim we i kam tru long insperesen blong mekem, blong bildim Saeon:
-
Filipae 2:1–4; 4 Nifae 1:15–18; Doktrin mo Ol Kavenan 97:21; 105:5.
-
Ulisses Soares, “Ol Brata mo Sista long Kraes,” Liahona, Novemba 2023, 70–73.
-
D. Todd Christofferson, “Wan long Kraes,” Liahona, Mei 2023, 77– 80.
God i wantem ol pipol blong Hem blong gat “wan hat mo wan maen” (Moses 7:18).
Jisas Kraes i “King ia blong Saeon.”
?Wanem nao i minim long yu blong gat Jisas Kraes olsem King blong yu? Luksave ol narafala taetol blong Jisas Kraes insaed long ves ia. ?Wanem nao oli tijim long yu abaot Hem? ?Wanem nao yu ting se hemia i minim, blong kam “tru long get mo [klaem] i kam antap, tru long [Hem]”?
Luk tu long “Come, O Thou King of Kings,” Hym, namba 59.
God i krae—mo stap glad—from ol pikinini blong Hem.
Sam pipol oli luk God olsem wan man we i stap longwe, we i no save harem nogud long filing blong Hem from ol samting we oli stap hapen long yumi. Inok i kasem wan defren lukluk abaot God long visen we oli raetemdaon insaed long Moses 7. ?Wanem nao Hem i lanem abaot God—mo wanem nao yu lanem—long ol ves 28–40? ?From wanem yu ting se Inok i bin sapraes blong luk God i krae? ?From wanem i impoten long yu blong save se Hem i save mekem olsem?
Taem we visen i gohed, Inok i krae tu. Be God i bin serem tu wetem hem ol risen blong glad. Lukaotem olgeta insaed long Moses 7:41–69. ?Wanem nao yu lanem aot long visen blong Inok we i save helpem yu blong “leftemap hat blong yu, mo stap glad,” nomata “bigfala konkon” long laef blong yu (ves 44)?
Luk long Jeffrey R. Holland, “The Grandeur of God,” LiahonaNovemba 2003, 70–73.
Jisas Kraes bae i kambak bakegen long ol las dei ia.
Visen blong Inok, speseli wanem we oli raetemdaon insaed long Moses 7:59–67, i wan long ol fas profesi blong histri abaot Seken Kaming blong Sevya. ?Wanem nao i tajem yu abaot wei we ol ves ia oli tokbaot ol las dei? Eksampol, tingting long wanem yu filim abaot ol profesi long ves 62 we oli bin kam tru. ?Wanem nao ol sentens ia oli tij abaot wok blong God long ol las dei?
Luk tu long Henry B. Eyring, “Ol Sista long Saeon,” Liahona, Novemba 2020, 67–69.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
God i wantem yumi blong gat “wan hat mo wan maen.”
-
Blong helpem ol pikinini blong yu blong lanem abaot Inok mo Saeon, yu save yusum “Profet Inok” long Ol Stori long OlTesteman (19–21) o nambatu ves blong “Follow the Prophet” (Children’s Songbook, 110–11). Afta, yu save askem ol pikinini blong yu blong talem bakegen stori ia long toktok blong olgetawan. Ol pikja blong Inok long aotlaen ia i save help.
-
Hemia i wan wei blong helpem ol pikinini blong yu blong andastanem wanem i minim blong stap gat “wan hat mo wan maen” (Moses 7:18): Mekem wan pepa we i sep blong wan hat mo katem long ol pisis, blong mekem se i gat inaf blong wanwan pikinini i gat wan pis. Letem oli raetem nem blong olgeta long pis pepa blong olgeta, mo wok tugeta blong putum evri pis ia blong mekem sep blong hat ia bakegen. Taem oli mekem hemia, maet yu save tokbaot ol samting we yu laekem tumas long wanwan long pikinini.
-
Askem ol pikinini blong kaontem hamas taem toktok ia: “Saeon” i kamaot long Moses 7:18–21, 62–63, 68–69. Evri taem we oli faenem toktok ia, helpem olgeta blong faenemaot wanem ves ia i talem abaot Saeon (luk tu long Gaed long Ol Skripja, “Saeon,” Gospel Laebri). ?Olsem wanem yumi save kam moa olsem ol pipol we oli tokbaot insaed long ol ves ia?
Leftemap tingting ia blong mekem skripja stadi blong olgeta wanwan. Nomata se yu stap tijim famli blong yu long hom o wan klas long Sandei, wan long ol bes wei we yu save helpem ol narawan bildim fet long Jisas Kraes, i blong helpem olgeta blong developem wan fasin blong stap lukaotem ol eksperiens blong olgeta wanwan wetem ol skripja. Serem ol eksperiens we yu stap kasem wetem ol skripja, mo leftemap tingting blong famli o ol memba blong klas blong serem ol eksperiens blong olgeta. Taem yumi ridim abaot olsem wanem ol narawan oli kasem blesing taem oli stap ridim ol skripja, oltaem yumi kasem insperesen blong lukaotem ol semmak blesing ia long Lod. (Luk long Teaching in the Savior’s Way, 25.)
Papa long Heven i wantem mi blong jusum blong folem Hem.
-
Blong introdiusum Moses 7:32–33 long ol pikinini blong yu, maet yu save toktok long olgeta abaot wan joes we oli mas mekem, i no longtaem i pas. Afta, tugeta, yufala save ridim ol ves ia, blong faenemaot wanem Papa long Heven i wantem yumi blong jusum. ?Wanem nao ol joes we yumi save mekem blong soem se yumi jusum Hem? Maet ol pikinini blong yu oli save gat wanwan janis blong aktem wan long ol joes ia, taem ol narawan oli traem blong talem wanem ol aksen ia i ripresentem.
Jisas bae i kambak long wol ia.
-
Long Moses 7:59, Inok i askem Lod wan kwestin. Invaetem ol pikinini blong yu blong faenem mo afta, askem olgeta blong faenem ansa long ves 60. Maet yu save toktok wetem olgeta abaot wan taem we oli stap tingting se wan bae i kambak hom. Askem olgeta wanem oli bin filim mo wanem oli mekem blong stap rere. ?Olsem wanem nao yumi stap rere from taem we Jisas bae i kambak?
-
Tingting blong stap soem ol pikja blong ol taem we Jisas i kamkamaot long ol pipol (olsem long Gospel Art Buk, ol namba 60, 82, 83, mo 84). ?Wanem nao ol pipol oli stap mekem long ol pikja ia? ?Olsem wanem nao maet ol pipol oli filim taem oli bin mitim Jisas? Singim wan singsing abaot Seken Kaming blong Sevya olsem “When He Comes Again” (Children’s Songbook, 82–83), mo askem ol pikinini wanem bae i hapen taem Jisas bae i kam bakegen. Letem ol pikinini blong serem olsem wanem oli filim abaot Jisas taem we bae Hem i kam bakegen?
Blong kasem moa aedia, luk long magasin blong Fren blong manis ia.