“26 Jenuware–1 Febwari. ‘Tijim Olgeta Samting Ia long Ol Pikinini blong Yu, mo Yu No Holemtaet Wan Samting’: Jenesis 5; Moses 6,” Kam Folem Mi—Blong Hom mo Jos: OlTesteman 2026 (2026)
“26 Jenuware–1 Febwari. ‘Tijim Olgeta Samting Ia long Ol Pikinini blong Yu, mo Yu No Holemtaet Wan Samting’,” Kam Folem Mi: 2026
Gud Moa bitim Paradaes, i kam long Kendal Ray Jonson
26 Jenuware–1 Febwari: “Tijim Olgeta Samting Ia long Ol Pikinini blong Yu, mo Yu No Holemtaet Wan Samting”
Jenesis 5; Moses 6
Plante samting we oli stap long Jenesis 5 i wan lis blong ol jeneresen bitwin Adam mo Iv mo Noa. Yumi stap ridim plante nem, be yumi no stap lanem tumas samting abaot olgeta. Afta yumi ridim intresting be oli no bin eksplenem gud toktok ia: “Oltaem long laef blong hem, hem i stap fren gud wetem God, nao God i tekemaot hem long wol ya we i laef yet, mo ol man oli no moa luk hem bakegen” (Jenesis 5:24). !Yes, i mas gat wan stori biaen long ol ves ia! Be i no gat wan eksplenesen moa, mo lis long ol jeneresen i gohed bakegen.
Tangkyu tumas, Moses 6 i talemaot ol ditel blong stori long Inok—mo i wan nambawan stori. Yumi lanem se Inok i gat tingting i stap daon, ol samting we hem i no filim sef long hem, wanem paoa we God i luk long hem, mo bigfala wok we hem i bin mekem olsem wan profet blong God. Mo tu, yumi kasem wan moa gud klia pikja blong famli blong Adam mo Iv taem famli ia i progres truaot long ol jeneresen. Yumi rid abaot Setan we “i bin rul bigwan” be tu, ol papa mo mama we oli bin tijim ol pikinini blong olgeta abaot ol “wei blong God” (Moses 6:15, 21). Wanem we i gud tumas, speseli i wanem we yumi lanem abaot doktrin we ol papa mo mama ia oli bin tijim: fet long Jisas Kraes, fasin blong sakem sin, baptaes mo kasem Tabu Spirit (luk long Moses 6:50–52). Doktrin ia, semmak olsem prishud we i kam wetem, “i bin stap stat long stat, bae i stap tu long en blong wol” (Moses 6:7
Ol aedia blong Stap Lanem Samting long Hom mo long Jos
Sin i katemdaon paoa blong mi blong save lukluk, filim mo harem ol samting blong God.
Taem yu stadi long Moses 6:26–36, ?wanem nao yu lanem abaot ol risal blong sin? ?Long wanem wei nao yu bin luk ol risal ia? ?Wanem ol fasin nao we Inok i bin gat we i bin helpem hem blong winim ol risal ia? ?Long wanem wei nao God i blesem hem olsem wan risal?
God i singaotem mi blong mekem wok blong Hem, nomata mi gat ol samting we mi no strong long olgeta.
Sapos yu eva tingting se wanem we God i singaotem yu blong mekem i bigwan tumas, yu no stap yuwan. Iven Inok i bin filim olsem taem we Lod i bin singaotem hem i kam wan profet. Taem yu stap ridim Moses 6:26–36, lukaotem from wanem Inok i bin filim we wok i bigwan tumas, mo wanem we Lod i bin talem i bin givim hem paoa long tingting.
Insaed long ol ves 37–47, lukaotem ol wei we Lod i bin sapotem Inok mo i bin givim paoa long Inok blong i mekem wok blong Hem (luk tu long Moses 7:13). Yu save komperem eksperiens blong Inok wetem hemia blong ol nara profet we oli bin filim se oli no naf, olsem Moses (luk long Eksodas 4:10–16), Jeremaea (luk long Jeremaea 1:4–10), Nifae (luk long 2 Nifae 33:1–4), mo Moronae (luk long Ita 12:23–29). ?Wanem nao yu filim se God i wantem yu blong lanem aot long ol skripja ia abaot wok ia we Hem i bin givim long yu blong mekem?
Lod I Mekem Wan Sia I Girap blong Ol Pipol blong Hem (Moses 6:36), i kam long Eva Timothy
Plante long ol aposol mo profet blong tedei, oli bin talem ol filing blong olgeta we oli semmak long hemia blong Inok taem oli i bin tokbaot wanem oli bin filim taem oli kasem ol koling blong olgeta. Eksampol, luk long testemoni blong Elda Ulisses Soares long “Ol Profet Oli Toktok Tru long Paoa blong Tabu Spirit” (Liahona, Mei 2018, 98–99).
?Wanem nao yu save lanem aot long ol profet mo ol aposol ia abaot ol filing we i kam long yu se yu yu no inaf? ?Wetaem nao yu bin filim help blong Sevya taem Hem i askem yu blong mekem ol had samting? Tingting blong stap raetemdaon sam eksperiens long fiuja laef blong yu, taem bae yu nid blong dipen long help blong Sevya. ?Olsem wanem nao bae yu ansa long ol samting ia we i stap hapen wetem fet long Jisas Kraes?
Luk tu long David A. Bednar, ““Stap Wetem Mi, mo Bae Mi stap Wetem Yu; From Hemia, Wokbaot Wetem Mi”,” Liahona, Mei 2023, 123–25; “I’ll Go Where You Want Me to Go,” Hym, namba 270.
Oli bin tijim gospel blong Jisas Kraes, stat long stat.
From se yumi gat buk blong Moses, yumi save se God i bin stap tijim ol pikinini blong Hem long olsem wanem blong faenem fasin blong pemaot man, stat long taem blong Adam mo Iv. Taem yu stap stadi long Moses 6:48–68, luklukgud blong faenem wanem yumi mas save mo mekem blong Lod i pemaot yumi. Luksave kwestin blong Adam long ves 53. ?Yu bin eva stap tingting long hemia? ?Wanem nao yu lanem long ansa blong Lod long ves 53–65? Maet, yu save tingting long ol ves ia olsem mesej blong Lod long taem blong baptaes seves blong Adam. ?Wanem nao yu lanem abaot baptaes long mesej blong Hem? ?From wanem yu ting se Hem i komperem baptaes olsem blong stap “bon bakegen”? (ves 59). ?Wanem nao yu save mekem blong gohed blong stap “bon bakegen” truaot long laef blong yu?
Lukaotem ol simbol. Insaed long ol skripja, ol samting o ol taem we samting i hapen, oltaem oli ripresentem o oli wan simbol blong ol trutok long saed blong spirit, speseli ol trutok abaot Sevya (luk long Tij Folem Wei blong Sevya, 7). Ol simbol ia, oli save mekem andastaning blong yu abaot Hem mo doktrin blong Hem, i kam bigwan moa. Eksampol, ?wanem nao yu lanem aot long ol simbol blong hat mo ol sora long Moses 6:27, ol ae mo graon Moses 6:35, o wota long Moses 6:59–60?
“Tijim olgeta samting ia long ol pikinini blong yu, mo yu no holemtaet wan samting.”
Afta we oli tijim Adam abaot ol trutok blong gospel blong Jisas Kraes, long Moses 6:51–63, Lod i talem long Adam blong tijim olgeta long ol fiuja jeneresen we oli stap kam antap. Tingting blong stap mekem wan lis blong ol trutok ia. (Maet bae i help blong seraotem sentens ia i go long ol smosmol grup blong ol ves, olsem ol ves 51–52, 53–57, 58–60, 61–63). ?From wanem ol trutok ia oli impoten tumas long jeneresen we i stap kam antap tedei? ?Wanem moa yumi save lanem aot long ol instraksen blong Lod we i go long ol papa mo mama insaed long Mosaea 4:14–15 mo OlTesteman 68:25–28; 93:40–50?
Blong stap rid abaot “buk blong histri” we famli blong Adam mo Iv oli bin kipim, bae i save givim insperesen long yu o famli blong yu blong mekem wan buk blong histri blong yufalawan. ?Wanem nao yu filim we Lod bae i wantem yu blong putum tu insaed long buk blong histri ia? Tingting blong sevem ol infomesen we oli kamaot long buk blong histri blong yu long FamilySearch.org
Luk tu long Dieter F. Uchtdorf, “Jisas Kraes I Paoa blong Ol Papa mo Mama,” Liahona, Mei 2023, 55–59; “Parenting: Touching the Hearts of Our Youth,” “But Why?” (videos), Gospel Laebri.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
God i save helpem mi blong mekem ol had samting.
-
God i singaotem Inok blong prijim gospel, hem i wari se bae hem i no save mekem. Be God i bin helpem hem. Tugeta, ridim stori ia long Moses 6:26–34 (luk tu long “Profet Inok” long Ol Stori long OlTesteman, 19–21). ?From wanem Inok i filim se hem i no save prijim gospel? (luk long Moses 6:31). ?Olsem wanem nao God i helpem Inok? (luk long Moses 6:32–34; 7:13).
-
Maet ol pikinini blong yu bae oli glad blong wantem stap serem o aktemaot ol narafala eksampol blong taem we God i bin helpem ol pipol blong mekem ol had samting—eksampol, Noa, Deved, Amon, o Samuel, Man blong Leman (luk long Gospel Art Buk, ol namba 7, 19, 78, 81). Yu save serem tu wan eksperiens blong yuwan mo letem ol pikinini blong yu oli tokbaot olsem wanem God i helpem olgeta blong mekem ol had samting.
Fet long Kraes, fasin blong sakem sin, baptaes mo kasem Tabu Spirit i mekem mi rere blong gobak stap wetem God.
-
God bin i tijim Adam wanem yumi nid blong mekem blong gobak long Hem—gat fet long Jisas Kraes, sakem sin, kasem baptaes, mo kasem presen ia we i Tabu Spirit. Helpem ol pikinini blong yu blong faenem ol prinsipol ia long Moses 6:52, 57. Afta, yu save helpem olgeta blong raetem wan sot toktok abaot wan long ol prinsipol ia. Blong wanwan toktok, i save gat tu wan skripja aot long Moses 6, wan eksperiens, mo wan testemoni. Letem olgeta blong serem ol toktok blong olgeta wetem wanwan long olgeta.
-
Mo tu, yu save soem ol pikja we oli ripresentem ol fas prinsipol blong gospel (luk long namba fo toktok blong bilif). Putum olgeta long wan laen we i stap lid i go long wan pikja blong Jisas Kraes. Taem yu ridim Moses 6:52, ol pikinini blong yu oli save stanap narasaed long stret pikja taem oli harem ol toktok we pikja i ripresentem.
-
Maet ol pikinini blong yu bae oli glad blong wantem stap singsing ol singsing we oli tijim ol prinsipol long Moses 6:52, olsem “Faith,” “When I Am Baptized,” mo “The Holy Ghost” (Children’s Songbook, 96–97, 103, 105). Helpem olgeta blong faenem ol prinsipol ia long Moses 6:52.
Papa long Heven i wantem ol papa mo mama blong tijim ol pikinini blong olgeta.
-
Blong leftemap ol pikinini blong yu blong sapotem ol papa mo mama blong olgeta long wok blong olgeta olsem ol gospel tija, tingting blong stap askem wan pikinini blong ridim Moses 6:58 mo poenemaot komanmen we God i bin givim long ol papa mo mama. Afta, yu save soem wan pikja blong Adam mo Iv we tufala i stap tijim ol pikinini blong tufala (olsem hemia long en blong aotlaen ia) mo letem ol pikinini blong yu oli tokbaot wanem oli luk long pikja ia. Ol pikinini blong yu oli save droem ol pikja blong ol famli blong olgeta we oli stap ridim ol skripja tugeta, prea tugeta, o stap pleiplei tugeta.
Blong kasem moa aedia, luk long magasin blong Fren blong manis ia.