Jenesis 33–4; Moses 4–5

Hem i tru se joes blong Adam mo Iv i bin lid i go long plante hadtaem we yumi eksperiensem long laef long wol ia. Be hemia i no minim se yumi rigret from joes blong tufala. Taem yu ridim Jenesis 3 mo Moses 4, yu save askem yuwan se, ?from wanem Foldaon ia i impoten long plan ia blong God?

Folem wanem we i stap long Moses 5:9–12, ?wanem nao Adam mo Iv tufala i filim abaot Foldaon ia? ?Olsem wanem nao yu save yusum ol toktok blong tufala folem ol eksperiens blong yu long wan wol we i bin foldaon? ?Wanem bakegen yu bin lanem aot long 2 Nifae 2:19–25?

Luk tu long Mosaea 3:19; Alma 12:21–37; mo Doktrin mo Ol Kavenan 29:39–43.

Stori blong Adam mo Iv i wan hop mo fasin blong pemaot man we i kam tru long Jisas Kraes. Blong luk se from wanem i olsem, maet yu save stat blong stap lukaotem ol risal blong Foldaon ia insaed long Jenesis 3:1–7; Moses 4:22–31 mo stap makem o mekem lis blong wanem we yu faenemaot. ?Olsem wanem nao ol risal ia oli afektem yu? Afta, yu save lukaotem long Moses 5:4–15, blong stap lukaotem plan blong God blong sevem yumi long ol samting we i afektem yumi. ?From wanem Adam mo Iv tufala i “glad” afta we enjel i visitim tufala? ?Wanem nao yumi lanem aot long tufala mo abaot plan ia blong Papa long Heven?

Luk tu long “Because of Him” (vidio), Gospel Laebri.

2:44

Skripja ves ia samtaem ol man oli andastanem rong. Oli tekem blong minim se i oraet blong wan hasban i save mekem nogud long waef blong hem. Long dei blong yumi, ol profet blong Lod oli bin tijim se, wan hasban mo waef tufala i mas lukluk long tufala wanwan olsem tufala i ikwol patna blong stap mekem i hapen ol tabu responsabiliti blong tufala insaed long famli “Famle: Wan Ofisol Toktok I Go long Wol” [Gospel Laebri]). Elda Dale G. Renlund mo Sista Ruth Lybert Renlund i eksplenem se wan hasban we fasin blong hem i stret mo gud “bae i lukaot blong i givhan, bae hem i luksave rong mo lukaotem fogivnes; bae hem i kwik blong givim pres, bae hem i mas lukaot long wanem ol famli memba oli wantem; bae hem i filim bigfala responsabiliti blong lukaotem, ‘evri samting we oli nidim long laef mo blong protektem’ famli blong hem, bae hem i tritim waef blong hem wetem bigfala respek mo respektem ol tingting mo ol filing blong waef blong hem. … Bae hem i blesem famli blong hem” (The Melchizedek Priesthood: Understanding the Doctrine, Living the Principles [2018], 23).

Elda Dale G. Renlund i bin tijim, “Gol blong Papa long Heven long saed blong rol blong papa mo mama i no blong mekem ol pikinini blong Hem oli mekem wanem i raet; hem i blong ol pikinini blong Hem oli jusum blong mekem wanem i raet mo blong oli kam olsem Hem long en” (“Naoia Yufala I Mas Jusumaot,” Liahona, Novemba 2018, 104). ?From wanem hemia i impoten tumas long plan blong God se yumi jusum blong mekem wanem we i raet?

Taem yu ridim Moses 4:1–4, lukaotem wanem we Papa long Heven mo Jisas Kraes i bin mekem blong protektem raet blong blong yu blong jusum—fasin blong mekem joes blong yu. ?Olsem wanem yu save kasem paoa blong Tufala blong stap kasem proteksen? Blong kasem ol aedia, tingting blong stap stadi long seksen blong “Mekem ol joes tru insperesen” long Blong Ol Yut Oli Kam Strong: Wan Gaed Buk blong Stap Mekem Ol Joes (4–5).

Tingting tu blong stap ridim wanem we Lihae i bin tijim abaot fasin blong mekem joes long 2 Nifae 2:11–20, 25–30. ?From wanem fasin blong go agens i nid blong hapen blong mekem fasin blong mekem joes i hapen? ?Olsem wanem nao yu save soem fasin blong talem tangkyu blong yu long Jisas Kraes, blong mekem yu “fri blong jusum raet o rong”? 2 Nifae 2:27

Luk tu long Dallin H. Oaks, “Opposition in All Things,” Liahona, May 2016, 114–17; Topics and Questions, “Agency,” Gospel Laebri; “Choose the Right,” Hym, namba 239.

Taem yu ridim Moses 4:4–12; 5:13–33, tingting blong stap mekem lis blong ol wei we Setan i traem blong temtem Adam mo Iv mo ol pikinini blong tufala. ?Olsem wanem nao hem i stap traem ol semfala samting ia tedei? ?Long wanem wei nao Papa long Heven i helpem yu blong stap longwe long ol giaman blong Setan?

Afta we tufala i kakae long frut ia we i no blong kakae, Adam mo Iv, tufala i traem blong kavremap neked blong tufala. Afta, Lod i mekem klos wetem skin blong animol mo kavremap tufala long hem. Taem yu ridim Moses 4:13–16, 27, tingting long ol samting ia:

• Tingting hevi long taem we tufala i neked mo ol klos, i save ripresentem insaed long ol skripja (luk long, eksampol, Revelesen 7:9, 13–15; 2 Nifae 9:14; Doktrin mo Ol Kavenan 109:22–26, 76). ?Wanem nao yu lanem aot long eksperiens blong Adam mo Iv wetem fasin blong stap neked mo taem God i mekem klos blong tufala?

• Sapos yu bin kasem endaomen blong yu insaed long tempol, tingting long wanem Adam mo Iv bae tufala i save talem long yu abaot hamas tempol gamen blong yu i impoten tumas mo wanem i ripresentem.

Luk tu long “Sacred Temple Clothing” (vidio), Gospel Laebri.

4:12

Taem yu stadi long Moses 5:4–9, 16–26, tingting long ol fasin blong Adam mo Iv mo tufala pikinini boe blong tufala, Ken mo Ebel, long saed blong mekem sakrifaes. ?From wanem Lod i bin akseptem sakrifaes blong Ebel be i no blong Ken?

?Wanem nao Lod i askem long yu blong mekem sakrifaes from? ?I gat eni samting long ol ves ia we i jenisim wei we yu tingting abaot ol sakrifaes ia?

• Blong helpem ol pikinini blong yu blong andastanem gud moa abaot Foldaon blong Adam mo Iv, yu save kopi ol pikja long “Adam mo Iv” (long Ol Stori long OlTesteman, 13–16) mo katemaot olgeta. Afta yufala i save wok tugeta blong putum ol pikja ia long oda blong toktok raon long eksperiens blong Adam mo Iv. Taem yu mekem olsem, tokbaot from wanem i impoten, long plan ia blong Papa long Heven blong Adam mo Iv i aot long Garen blong Iden.

• Ol pikinini blong yu oli save filim fasin blong talem tangkyu long Atonmen blong Jisas Kraes taem oli andastanem olsem wanem Hem i winim risal blong Foldaon ia. Taem yufala i rid tugeta long Moses 4:25; 6:48; Rom 5:12; 2 Nifae 2:22–23, helpem ol pikinini blong yu blong faenem ol wei blong komplitim sentens ia: “From Foldaon ia, mi …” Afta, taem tugeta yufala i ridim Moses 5:8–11, 14–15; 6:59; Alma 11:42, oli save komplitim sentens ia: “From Jisas Kraes, mi …” Serem wetem wanwan long yufala, fasin blong yufala blong talem tangkyu from Jisas Kraes.

• Tingting long wan simpol samting blong yusum blong introdiusum prinsipol blong fasin blong mekem joes: invaetem ol pikinini blong kalarem aktiviti pej blong wik ia, be givim long olgeta wan kala nomo blong yusum. ?From wanem bae i moa gud blong gat ol joes? Afta, tugeta, yufala i save ridim Moses 4:1–4 mo tokbaot from wanem God i wantem yumi blong save jusum bitwin raet mo rong. ?Olsem wanem nao Papa long Heven mo Jisas Kraes, Tufala i helpem yumi blong mekem ol gudfala joes?

• Helpem ol pikinini blong yu blong tingting long mo droem ol pikja blong ol gudfala joes we oli save mekem blong folem Jisas Kraes. O, yufala i save singsing tugeta long wan singsing abaot stap mekem ol gudfala joes, olsem, “Choose the Right Way” (Children’s Songbook, 160–61). Maet yufala i save talem long wanwan long yufala abaot wan taem we yufala i bin mekem wan gudfala joes mo tokbaot wanem we yufala i bin filim afta long taem ia.

• Taem we Adam mo Iv tufala i mas aot long Garen blong Iden, tufala i nomo save stap wetem Papa long Heven. Ridim wetem ol pikinini blong yu Moses 5:4, 8 mo helpem olgeta blong faenem wanem Adam mo Iv i bin mekem blong filim kolosap long Hem mo harem Hem. ?Wanem sam samting we yumi save talem long Papa long Heven long ol prea blong yumi?