“12–18 Jenuware ‘Bifo We Bifo Olgeta, God I Mekem Skae mo Graon’: Jenesis 1–2; Moses 2–3; Ebraham 4–5,” Kam Folem Mi—Blong Hom mo Jos: OlTesteman 2026 (2026)
“12–18 Jenuware ‘Bifo We Bifo Olgeta, God I Mekem Skae mo Graon’,” Kam Folem Mi: 2026
12–18 Jenuware: “Bifo We Bifo Olgeta, God I Mekem Skae mo Graon”
Jenesis 1–2; Moses 2–3; Ebraham 4–5
From se wol raon long yumi i naes tumas, i had tumas blong tingbaot taem wol ia i “stap nating nomo, we i nogat wan samting,” mo i “emti mo i nogat man long hem” (Jenesis 1:2; Ebraham 4:2). Wan samting we stori blong Kriesen i tijim yumi long hem i we, folem taem, God i save mekem wan samting we i naes tumas long wan samting we i no oganaes. Hemia i save help blong tingbaot taem laef i stap long trabol. Papa long Heven wetem Jisas Kraes oli ol Krieta, mo wok blong kriesen blong Tufala wetem yumi i no finis yet. Oli save mekem laet i saen long taem blong tudak long laef blong yumi. Oli save fulumap laef blong yumi wetem wanem we yumi no gat. Oli save jenisim yumi i kam ol tabu man mo woman we yumi sapos mas kam olsem. Hemia wanem i minim blong oli krietem yumi long pikja blong God, folem fasin blong Hem (luk long Jenesis 1:26). Yumi gat evri samting blong mekem yumi kam olsem Hem: kam olsem ol god, gat glori, stap long heven.
Blong wan sot stori blong Jenesis, luk long “Jenesis” insaed long Bible Dictionary.
Ol Aedia blong Stap Lanem Samting long Hom mo long Jos
Jenesis 1: 1–2; Moses 2: 2–25; Ebraham 4: 4–25
“Tru long Wan Stret Pikinini Ia Nomo blong mi, mi bin krietem olgeta samting ia.”
Nomata yumi no save evri samting abaot olsem wanem oli krietem wol ia, i gud tumas blong tekem not abaot, wanem God i bin jusum blong talemaot abaot Kriesen. ?Wanem nao God i tijim long yu abaot hemia long Jenesis 1:1–25; Moses 2:1–25; mo Ebraham 4:1–25? ?From wanem Hem i wantem yu blong save ol samting ia? Taem yu tingting hevi long ol stori ia, maet bae yu tingting tu long wanem ol samting ia oli tijim yu abaot Papa long Heven, Jisas Kraes, wol mo yuwan.
Blong mekem stadi blong yu i kam moa gud, tingting blong stap ridim ol ves ia taem yu stap aot long medel blong ol kriesen blong God o taem yu stap lisin long wan singsing olsem “All Creatures of Our God and King” (Hym, namba 62). Yu save faenem ol pikja blong ol kriesen blong Hem we bae i helpem yu blong gat filing blong respektem Krieta. Tingting blong stap serem ol pikja ia, folem wetem testemoni blong yu, wetem ol narawan.
Luk tu long Doktrin mo Ol Kavenan 101:32–34.
Garen blong Iden, i kam long Grant Romney Clawson
Jenesis 1:26–27; Moses 2:26–27; Ebraham 4:26–27
Oli bin krietem mi folem fasin mo bodi blong God.
Taem yu ridim Jenesis 1:26–27; Moses 2:26–27; mo Ebraham 4:26–27, tingting hevi long wanem i minim blong, oli krietem yumi olsem “pikja” o “we i semmak olsem hem,” man mo woman. ?From wanem i impoten long yu blong save ol trutok insaed long ol ves ia? Eksampol, ?Olsem wanem nao ol trutok ia oli jenisim wei we yu stap lukluk long yuwan, ol narawan, mo God? ?Olsem wanem nao oli save helpem yu taem yu gat ol nogud filing abaot yuwan?
Blong helpem yu tingbaot ol kwestin ia, traem blong komplitim wan sentens olsem hemia ia: “From se, mi save se oli krietem mi folem pikja blong God, mi jusum blong …” Luklukbak long “Bodi blong yu i tabu.” long Blong Ol Yut Oli Kam Strong: Wan Gaed blong Stap Mekem Ol Joes (ol pej 22–29) i save help. Tingting blong stap jusum wan samting we bae yu mekem blong soem long God se yu save se bodi blong yu i tabu.
Long vidio blong “God’s Greatest Creation” (Gospel Library), Presiden Russell M. Nelson i talem testemoni abaot bodi blong ol man mo woman se, i wan bigfala merikel. Taem yu wajem vidio ia, askem yuwan, “?Wanem nao Papa long Heven i wantem mi blong filim abaot bodi blong mi?” ?Olsem wanem nao hemia i defren long ol mesej we maet yu harem long ol narafala man?
God's Greatest Creation
Maet sam pipol bae oli talem se, blong God i krietem yumi long pikja blong Hem i minim se, evri tingting, filing mo ol tingting blong hat blong yumi, Hem nao bae i apruvum mo se yumi no nidim blong (o no save) kam moa gud. ?Wanem nao bae yu talem abaot hemia? ?Wanem ol niu tingting we yu kasem insaed long Mosaea 3:19 mo Ita 12:27?
Luk tu long Russell M. Nelson, “Your Body: A Magnificent Gift to Cherish,” Liahona, Aug. 2019, 50–55.
Jenesis 1:27–28; 2:18–25; Moses 3:18, 21–24; Ebraham 5:14–18
Mared bitwin wan man mo wan woman, God nao i odenem.
“Adam mo Iv i joen tugeta long mared blong wan taem we i no save finis tru long paoa [blong] prishud we i no save finis” (Russell M. Nelson, “Lessons from Eve,” Ensign, Novemba 1987, 87). Tingting hevi long hemia taem yu stap rid insaed long Jenesis 1:27–28; 2:18–25; Moses 3:18, 21–25; mo Ebraham 5:14–19. ?Olsem wanem nao yu save tritim mared wetem tabu fasin we God i bin givim abaot mared?
Luk tu long 1 Korin 11:11; “Famle: Wan Ofisiol Toktok I Go long Wol,” Gospel Laebri.
Jenesis 1:28; Moses 2:28; Ebraham 4:28
Mi mi responsibol blong stap lukaot long ol kriesen blong God.
?Wanem nao Jenesis 1:28; Moses 2:28; mo Ebraham 4:28 i talem abaot responsabiliti blong ol kriesen blong God? ?Wanem nao Doktrin mo Ol Kavenan 59:16–21 mo 104:13–18 i ademap long andastaning blong yu?
Luk tu long Gérald Caussé, “Wok blong Yumi blong Lukaotem Gud Wol ia,” Liahona, Novemba 2022, 57–59; Topics and Questions, “Environmental Stewardship and Conservation,” Gospel Library.
Jenesis 2: 2–3; Moses 3: 2–3; Ebraham 5: 2–3
God i bin blesem mo mekem Sabat dei i tabu.
God i mekem Sabat dei i tabu, mo Hem i askem yumi blong holem i tabu. Taem yu ridim Jenesis 2:2–3; Moses 3:2–3; mo Ebraham 5:2–3, tingting abaot wanem i mekem Sabat olsem “blesing” long yu.
Luk tu long Doktrin mo Ol Kavenan 59:9–13; “The Sabbath Is a Delight” (video), Gospel Library.
Highlight: The Sabbath Is a Delight
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jenesis 1: 1–2; Moses 2: 2–25; Ebraham 4: 4–25
Jisas I bin mekem wol ia
-
?Olsem wanem nao bae yu mekem, blong lanem abaot Kriesen, i kam wan gud taem blong ol pikinini blong yu? Yu save tekem olgeta i go aotsaed blong stap lukaotem ol kaen samting we oli mekem long wanwan taem blong Kriesen. Mo tu, ol pikinini blong yu oli save lukluk tu long ol pikja blong ol samting we Jisas i bin krietem (luk long “Kriesen blong Wol Ia” long Ol Stori long OlTesteman, 8–12). Afta, yu mo ol pikinini blong yu i save tokbaot wanem yu filim abaot Jisas Kraes, afta we yufala i rid abaot Kriesen.
-
Tingting blong singsing wan singsing tugeta abaot naesfala wol blong yumi, olsem“My Heavenly Father Loves Me” (Children’s Songbook, 228–29). Maet ol pikinini blong yu oli save ademap ol narafala samting we God i krietem i go long singsing ia, we i helpem olgeta blong filim lav blong Hem.
Letem ol pikinini oli soem wanem oli krietem. “Taem yu invaetem ol pikinini blong dro, bildim, kala o raetem wan samting we i go wetem wan prinsipol blong gospel, yu stap helpem olgeta blong andastanem gud moa prinsipol ia, mo yu givim olgeta wan samting we oli save holem blong tingbaot wanem we oli bin lanem.” (Tij Folem Wei blong Sevya, 32).
Jenesis 1:26–27; Moses 2:26–27; Ebraham 4:26–27
Oli bin krietem mi folem fasin mo pikja blong God.
-
Ol pikinini blong yu oli save developem wan filing blong kipim i tabu mo gat respek long bodi blong olgetawan mo long ol narawan, taem oli lanem se, yumi evriwan, God i krietem folem pikja blong Hem. Blong helpem olgeta oli andastanem wanem hemia i minim, yu save letem ol pikinini blong yu blong luk pikja blong olgeta long wan mira, o pikjarem long maen blong olgeta, taem yu ridim Moses 2:26–27 long olgeta. Yu save soem tu long olgeta, olsem wanem, oltaem ol bebi animol oli “semmak” long ol papa mo mama blong olgeta (luk long pikja long aotlaen ia, blong kasem wan eksampol). Hemia i save lid i go long wan storian abaot from wanem hem i impoten long yu blong save se, oli krietem yu folem pikja blong Papa long Heven.
-
Maet yu mo ol pikinini blong yu i save glad blong stap droem wan bodi blong man o woman, mo katem ol droing ia blong mekem wan pasel. Taem ol pikinini blong yu oli putum ol pasel blong olgeta tugeta, oli save tokbaot ol wei we oli save soem long Papa long Heven se, oli talem tangkyu from ol bodi blong olgeta.
Jenesis 2: 2–3; Moses 3: 2–3; Ebraham 5: 2–3
Sabat dei, i tabu.
-
Taem yu ridim Moses 3:2–3, askem ol pikinini blong yu blong lisin long wanem we God i bin mekem long namba seven dei. Helpem ol pikinini blong yu blong faenem o dro ol pikja blong ol samting we oli save mekem long Sandei, blong mekem i wan tabu dei mo i defren long ol narafala dei. Serem wetem wanwan long yufala, from wanem i impoten blong kipim Sabat dei i tabu.
-
Helpem ol pikinini blong yu blong mekem wan rolplei, we oli eksplenem long wan fren from wanem oli jusum blong mekem ol samting we i givim ona long Papa long Heven mo Jisas. Askem olgeta blong yusum skripja ia Jenesis 2:2–3 long eksplenesen blong olgeta. ?Olsem wanem nao taem yu kipim Sabat dei i tabu, i soem lav blong yumi long Papa long Heven mo Jisas Kraes?
Blong kasem moa aedia, luk long magasin blong Fren blong manis ia.