“5–11 Jenuware. ‘Hemia I Wok mo Glori blong Mi”: Moses 1; Ebraham 3,” Kam Folem Mi—Blong Hom mo Jos: OlTesteman 2026 (2026)
“5–11 Jenuware. ‘Hemia I Wok mo Glori blong Mi”’,” Kam Folem Mi: 2026
5–11 Jenuware: “Hemia I Wok mo Glori blong Mi”
Moses 1; Ebraham 3
Baebol i stat wetem ol toktok ia “Bifo we bifo olgeta, God i mekem skae mo graon” (Jenesis 1:1). ?Be wanem nao i bin stap long ples ia bifo long “Bifo we bifo olgeta”? Mo ?from wanem God i krietem evri samting ia? Tru long Profet Josef Smit, Lod i mekem ol kwestin ia oli gat klia ansa.
Eksampol, Hem bin givim rekod blong visen blong Ebraham we i luk se i gat ol spirit we oli stap “bifo wol i bin stap” (luk long Ebraham 3:22–28). Lod i bin givim long yumi wan translesen we i kam tru long insperesen o wan revisen long ol fasfala sikis japta blong Jenesis, we oli singaotem buk blong Moses—we i no stat wetem “bifo we bifo olgeta.” Be, i stat wetem eksperiens we Moses i gat we i givim hem sam save long stori blong Kriesen we yumi evriwan i save long hem. Tugeta, ol skripja blong ol lata dei ia i wan gud ples blong statem stadi blong yumi blong OlTesteman from se oli tokbaot sam stamba kwestin we i save givim long yumi save ia abaot:?Huia God? ?Huia yumi? ?Wanem nao i wok blong God?, mo ?wanem nao ples blong yumi insaed long wok ia? Ol toktok long stat blong ol japta long Jenesis, yumi save luk ansa blong Lod long wanem Moses i bin askem: “Gat sore long wokman blong yu, O God, mo talemaot long mi long saed blong wol ia,mo ol pipol we oli stap laef long hem, mo tu, long saed blong ol heven” (Moses 1:36).
Ol aedia blong Stap Lanem Samting long Hom mo long Jos
Olsem wan pikinini blong God, mi gat wan tabu wok.
“Sapos we Lod i stap toktok stret wetem yu,” Presiden Russell M. Nelson i bin tijim, “fas samting we Hem bae i mekemsua se yu andastanem i, tru aedentiti blong yu” (“Choices for Eternity” [worldwide devotional for young adults, May 2022], Gospel Laebri). I folem se, Setan bae i traem blong mekem tingting blong yu i fasfas long semmak poen ia. Lukaotem paten ia long mesej blong God we i go long Moses long Moses 1:4, 6 mo abaot mesej blong Setan long Moses 1:12. ?Wanem nao yu lanem aot long ol ves ia abaot wanem we i defren bitwin God mo Setan?
Mo tu, Presiden Nelson i bin tijim se, “Wei we yu tingting abaot huia stret yu, i jenisim kolosap, evri desisen we bae yu stap mekem” (“Choices for Eternity”). Tingting blong stap mekem wan lis blong ol joes we yu mekem, from aedentiti blong yu olsem wan pikinini blong God, i kam bifo ol nara taetol.
?Wanem ol ves mo ol toktok we oli ademap long Moses 1 i helpem yu blong andastanem tabu valiu blong yu? Maet bae yu ridim moa long mesej blong Presiden Nelson long seksen blong “Choices for Eternity” we taetol i “First: Know the truth about who you are.” ?Wanem nao yu filim insperesen blong mekem, blong mekem se aedentiti blong yu olsem wan pikinini blong God, i wanem we i talemaot yu moa?
Luk tu long “Mi Pikinini blong God.”,” STSP (1985), pej 58; “Our True Identity” (vidio), Gospel Laebri; Topics and Questions, “Children of God,” Gospel Laebri.
Our True Identity
Wetem help blong Lod, Mi save stap longwe long temtesen.
Taem we Moses 1 i soem i klia, se ol eksperiens long saed blong spirit oli gat paoa, i no minim se bae yumi neva kasem temtesen bakegen. i tru, wan long ol plan blong Setan i blong temtem yumi blong no tingting strong long ol eksperiens ia. Taem yu stap ridim ansa blong Moses i go long Setan long ves 12–26, ?wanem nao yu lanem we i save helpem yu blong stap strong long testemoni we yu bin kasem? ?Wanem stret nao i helpem Moses long en, blong winim Setan?
Wan nara lesen we i kamaot long eksperiens blong Moses, i we Setan i stap temtem yumi wetem ol giaman kopi blong trutok mo paoa blong God. Tingting long sam giaman o kopi blong ol samting, olsem wan giaman plant o wan bebi doli. ?Olsem wanem nao yu save luksave se oli mekem kopi o oli ol giaman samting? Afta, tingting long ol kopi blong ol samting we Setan i stap yusum tedei blong temtem yu. ?Wanem nao yu lanem aot long Moses 1:13–18 olsem wanem blong luksave mo no akseptem ol kopi o ol giaman samting? ?Olsem wanem nao Lod i save helpem yu? (luk long Moses 1:24–26).
Luk tu long Matiu 4:1–11; Gary E. Stevenson, “Yu No Trikim Mi,” Liahona, Novemba 2019, 93–96; “I Am a Son of God” (vidio), Gospel Laebri.
I Am a Son of God
Blong stap lanem samting long hom oli save mekem plan from be tu i no blong fosem. “Ol janis blong tij insaed long famli, i save stap hapen oltaem, we i no gat plan from, evri taem blong dei—taem yu stap kakae, mekem ol wok long haos, stap pleiplei wan gem, o stap travel.” (Tij Folem Wei blong Sevya, 31). Eksampol, blong ademap long riding blong yu abaot olsem wanem Moses i stap longwe long Setan long Moses 1, maet yu save spenem smoltaem long taem blong kakae, mo stap toktok olsem wan famli abaot olsem wanem blong stap longwe long paoa blong enemi.
Wok mo glori blong God i blong helpem mi kasem laef we i no save finis.
Afta we hem i luk visen blong God abaot Kriesen, Moses i askem wan kwestin long Lod se: “Talem long mi … from wanem ol samting ia oli olsem ia” (Moses 1:30). ?Wanem nao i tajem hat blong yu abaot ansa blong Lod long Moses 1:31–39? ?Wanem nao i defren bitwin bodi we i nomo save ded mo laef we i no save finis? (luk long Topics and Questions, “Eternal Life,” Gospel Laebri). ?Olsem wanem nao Jisas Kraes i help blong mekem tugeta i hapen? Ebraham tu i gat wan visen, we oli raetemdaon long Ebraham 3. ?Wanem nao yu faenem insaed long ol ves 24–26 we i save help blong ansa long kwestin blong Moses?
Mi bin laef olsem wan spirit bifo mi bon i kam long wol.
Yumi save smol nomo abaot laef blong yumi bifo laef long wol ia. Be plante long wanem we yumi save i kamaot long visen blong Ebraham long Ebraham 3:22–28. Taem yu ridim ol ves ia, mekem wan lis blong ol trutok yu faenem—we i tekem tu, ol trutok abaot yuwan mo abaot Jisas Kraes. ?From wanem ol trutok ia oli impoten tumas long yu? ?Wanem nao hemia i save mekem wan samting i defren insaed long laef blong yu?
Luk tu long Topics and Questions, “Premortal Life,”Gospel Laebri.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Mi mi Pikinini blong God.
-
Afta we yufala i ridim tugeta mesej blong Moses long Moses 1:4, tingting blong letem ol pikinini blong yu oli lukluk olgetawan long wan mira mo stap talem long olgeta wanwan wan semmak mesej olsem: “Mi mi pikinini blong God.” Afta, oli save talem semmak mesej ia long wanwan long olgeta “Yu yu wan pikinini blong God.” Maet yu save faenem ol pikja tu blong ol defdefren pipol mo invaetem ol pikinini blong yu blong poen i go long wanwan mo talem, “Hemia i wan pikinini blong God.” Serem wetem wanwan long yufala from wanem yufala i glad blong save se yufala i ol pikinini blong God. ?Olsem wanem nao save ia i jenisim wei we yu tritim yuwan mo ol narawan?
-
Yu mo ol pikinini blong yu i save komperem mesej blong God we i go long Moses long Moses 1:4 wetem mesej blong Setan long ves 12. ?Olsem wanem nao ol pikinini blong yu oli save luksave wanem i defren bitwin ol mesej blong God we i go long olgeta mo hemia blong Setan?
Moses I Stap Luk Jehova, i kam long Joseph Brickey (ditel)
Papa long Heven i gat wan wok blong mi blong mekem.
-
Taem yu ridim Moses 1:6 wetem ol pikinini blong yu, maet yu save toktok long olgeta abaot “wok” we God i bin gat blong Moses. Tingting blong stap yusum Gospel Art Buk, ol namba 13–16, o Ol Stori long OlTesteman, ol pej 64–84, blong helpem ol pikinini blong yu blong luk wanem we Moses i mekem i hapen tru long help blong Papa long Heven. ?Wanem nao wok ia we God i gat blong yumi blong mekem? (luk long, eksampol long, Doktrin mo Ol Kavenan 11:20).
Mi save stap longwe long ol temtesen blong Setan.
-
Taem yu stadi long Moses 1:12–26 wetem ol pikinini blong yu, helpem olgeta blong faenemaot wanem Moses i bin mekem blong stap longwe long Setan (luk long ol ves 13, 15, 18, 20–22, 26). Maet bae i wan gudfala samting long olgeta blong aktem ol samting we oli save mekem blong stap longwe long temtesen (olsem blong stap prea, stap wokbaot i go longwe, o stap askem help).
Mi bin laef olsem wan spirit bifo mi bon i kam long wol.
-
Blong save abaot laef blong yumi bifo laef long wol ia, i save givim insperesen long yumi blong mekem ol joes we i folem ol trutok we i no save finis. Blong helpem olgeta blong lanem abaot hemia, yu save givim sam ki toktok long olgeta mo ol sentens blong faenem long Ebraham 3:22–28, olsem “bifo wol i bin stap,” “ol spirit,” “mekem wan wol,” mo “pruvum.” ?Wanem nao ol ves ia oli tijim long yumi abaot from wanem Papa long Heven i sendem yumi i kam long wol?
-
Wan singsing olsem “I Will Follow God’s Plan” (Children’s Songbook, 164–65) i save sapotem wanem we Ebraham 3 i tijim. Maet yu save askem ol pikinini blong yu blong droem ol pikja we oli go wetem ol toktok ia.
-
Helpem ol pikinini blong yu blong tingting long ol situesen taem oli mas jusum blong mekem o no mekem wanem we God i askem olgeta blong mekem (luk long Ebraham 3:25; Luk tu long Blong Ol Yut Oli kam Strong: Wan Gaed Buk blong Stap Mekem Ol Joes). Letem olgeta oli praktisim ol ansa we i stap i go wetem ol situesen ia. ?Olsem wanem nao Sevya i stap helpem yumi taem yumi mekem wan rong joes?
Blong kasem moa aedia, luk long magasin blong Fren blong manis ia.