Fas Toktok blong OlTesteman

Wan wei blong faenem rij kaekae long saed blong spirit insaed long OlTesteman i blong lukaotem Kakae ya blong givim Laef, Jisas Kraes (luk long Jon 6:48). Eksampol. ?olsem wanem nao yu luk Sevya long ol samting ia?

• Mana (Eksodas 16:4, 11–15; Jon 6:35)

• Sipsip we oli sakrifaesem (Eksodas 12:3–5; Jon 1:29)

• Snek we oli wokem wetem bras (Ol Namba 21:4–9; Jon 3:14)

• Jona (Jona 1:4–17; Matiu 12:38–41)

?Wanem nao ol eksampol ia oli tijim abaot Hem? ?Wanem ol narafala samting we i minim Jisas Kraes insaed long OlTesteman we yu save finis abaot olgeta?

Long mesej blong hem “Jisas Kraes I Tresa Ia,” Elda Dale G. Renlund i leftemap tingting blong yumi blong “tingbaot mo oltaem lukluk nomo long Jisas Kraes.” (Liahona, Novemba 2023, 98). Tingting blong stap ridim mesej blong hem, lukaotem ol samting we yu save mekem blong faenem Jisas Kraes, i no long OlTesteman nomo, be tu, long laef blong yu.

Luk tu long “Types or Symbols of Christ” long Guide to the Scriptures, “Jesus Christ,” Gospel Library; “Seek the Lord Early,” Children’s Songbook, 108.

Presiden Dallin H. Oaks i tijim: “Papa i introdiusum stret Pikinini blong Hem we Hem i lavem tumas, Jisas Kraes, olsem Sevya mo Ridima blong yumi, mo i givim oda long yumi blong “lisingud long Hem.’ Folem daereksen ia, yumi save talem se ol rekod blong skripja blong ol toktok we “God” o “Lod” i talem, kolosap oltaem oli ol toktok blong Jehova, Lod blong yumi we i girap long ded, Jisas Kraes” (“Ol Tijing blong Jisas Kraes,” Liahona, Mei 2023, 102).

14:7

Taem we ol lida blong Ol Jiu oli askem kwestin long Jisas abaot huia Hem, Hem i talem se, “Taem we Ebraham i no bon yet, be mi mi stap finis.” Ol toktok ia i mekem ol pipol we oli harem Jisas, oli sek bigwan mo oli rere blong stonem Hem (luk long Jon 8:58–59). Tingting blong ridim Eksodas 3:13–15; 6:3–5 blong luk se from wanem sam long Ol Jiu oli no glad nating long wanem we Jisas i talem.

?From wanem i impoten long yu blong save se Jisas Kraes i Jehova?

Long wan visen, Lod i soem long Nifae abaot Baebol we bae i kam, mo eksplenem se “plante trutok we oli klia mo oli gudfala” bae oli kam tru long hem. Tingting blong stap ridim 1 Nifae 13:21–29, 38–42, blong lukaotem olsem wanem nao Lod i mekem plan blong “soem ol samting we i klia mo gudgudfala.” Folem wanem we i stap long 2 Nifae 3:12, ?olsem wanem nao Baebol mo Buk blong Momon i wok tugeta?

Taem yu stadi long OlTesteman long yia ia, bae yu stadi tu long sam “nara buk” we Nifae i bin luk finis. Olgeta ia, i gat:

• Buk blong Moses, i pat blong blong Baebol we Josef Smit i kasem insperesen blong transletem. I gat insaed ol trutok mo ol stori we oli no stap naoia insaed long Jenesis 1–6.

• Buk blong Ebraham, we oli bin soem long Josef Smit taem hem i stap lukluk gud long Papri (Pepa blong bifo), (luk long Topics and Questions, “Buk blong Ebraham,” Gospel Library).

• Ol Defdefren toktok we i kam long Josef Smit Translesen, sam long olgeta i stap insaed long ol futnot, long apendiks blong Baebol mo Gaed long Ol Skripja.

Hemia sam long ol eksampol blong ol stori insaed long OlTesteman we Josef Smit i bin putumbak: Siti blong Saeon blong Inok (Moses 7:18–19), Visen blong Ebraham abaot kaonsel long heven (Ebraham 3:22–28), mo wok blong Melkesedek (Josef Smit Translesen, Jenesis 14:25–40). ?From wanem ol stori ia “oli klia mo oli gudgudfala” long yu?

OlTesteman i stori blong God we i stap lukaotem blong mekem yumi kam ol “nambawan man blong [Hem]” tru long kavenan (Eksodas 19:5). From risen ia, wan gudfala wei blong rere blong ridim OlTesteman i blong lanem abaot ol kavenan—speseli kavenan we i no gat en we God i mekem long ol profet blong bifo olsem Ebraham, Aesak, Jekob mo ol pikinini blong olgeta. Mo wan gudfala wei blong lanem abaot ol kavenan i blong stadi long mesej blong Presiden Russell M. Nelson “Kavenan Ia We I No Gat En” (Liahona, Oktoba 2022, 4–11).

Taem yu ridim, askem yuwan: ?From wanem ol kavenan oli impoten long mi? ?Wanem “spesel kaen lav mo sore” nao mi kasem we i kam long God taem mi kipim ol kavenan blong mi wetem Hem? Taem yu ridim OlTesteman long yia ia, stap wajem ol samting we God i wantem blong tijim long yu abaot kavenan rilesensip blong yu wetem Hem.

Lanem tu long Jeremaea 31:31–34.

• Maet ol toktok mo kalja blong OlTesteman bae i had blong ol pikinini oli andastanem, be yu save helpem olgeta blong luk Jisas Kraes long ol simbol (saen) mo ol stori. Mo tu, yu mo ol pikinini blong yu i save lukluk long pikja andanit ia, Profet Aesea I Profesae Abaot Taem We Kraes Bae I Bon I Kam long Wol. Letem ol pikinini blong yu oli poenemaot infomesen we oli luk. Mekem tingting blong olgeta i stap nomo long bebi Jisas. Afta, yu save rid wetem olgeta wanem we Aesea i bin raetem abaot taem we Sevya bae i bon i kam long wol insaed long Aesea 7:14; 9:6. Serem wetem ol pikinini blong yu wanem yu filim abaot taem yu stap lukaotem Sevya insaed long OlTesteman long yia ia.

  

• Yu mo ol pikinini blong yu i save rid tu insaed long Ol Sam 23 o Aesea 53:3–9 mo faenem ol toktok we oli rimaenem yu abaot Jisas Kraes. ?Wanem nao ol toktok ia oli tijim long yu abaot laef mo Atonmen blong Hem?

• Ol kavenan, oli wan stamba toktok insaed long OlTesteman. Blong introdiusum stamba toktok ia long ol pikinini blong yu, yu save toktok wetem olgeta abaot ol promes we oli mekem wetem famli o ol fren mo from wanem i impoten blong kipim ol promes ia. Afta, yufala i save lukluk long wan pikja blong baptaes mo tokbaot ol promes, o kavenan, we yumi mekem wetem God taem yumi kasem baptaes (luk long Mosaea 18:10, 13). Mo tu, yu save soem wan pikja blong tempol mo serem ol filing blong yu abaot ol kavenan we yumi mekem long ples ia.

• Aktiviti pej blong wik ia i save helpem ol pikinini blong stap glad blong mekem mo kipim ol kavenan wetem Papa long Heven. Mo tu, yufala i save singsing wan singsing abaot stap mekem ol kavenan, olsem “When I Am Baptized” (Children’s Songbook, 103).

• ?Ol pikinini blong yu oli save eniwan we oli save defren nem blong hem long ol defdefren ples? Maet oli singaotem nem blong wan papa o mama o tija long wan defren nem long wok, long hom mo long jos. Tokbaot ol nem ia; afta, tugeta ridim Eksodas 6:3 mo askem ol pikinini blong yu blong faenem ol nem blong Jisas Kraes, we oli save long hem bifo i bon i kam long wol (luk tu long Josef Smit Translesen long futnot c).