Stap Ridim OlTesteman

Wanem kaen jalenj we maet yu mo famli blong yu i stap fesem, oltaem ansa hem i Jisas Kraes. So, blong faenem ol ansa insaed long OlTesteman, lukaotem Hem. Bae i no isi oltaem. Bae yu mas tingting hevi wetem fasin blong save wet longtaem mo lukaotem daereksen we i kam tru long spirit. Samtaem ol stori abaot Hem i go stret long poen, olsem long wanem Aesea i talem “!Wan pikinini boe bambae i bon long mifala! , !Pikinini ya, bambae yu yu givim long mifala: …nem blong hem bambae oli singaot hem se … Pikinini ya blong King we Hem i Stamba blong Pis” (Aesea 9:6). Long ol narafala ples, Sevya i ripresentem wan samting we i moa naes, tru long ol saen mo ol samting we i ripresentem—eksampol, tru long wanem oli soemaot olsem ol sakrifaes blong animol o stori blong Josef we i fogivim ol brata blong hem mo sevem olgeta long taem we i nogat kakae.

Be sapos yu stap lukaotem bigfala fet long Sevya taem yu stap stadi long OlTesteman, bambae yu faenem. Bae hemia i gol blong stadi blong yu long yia ia. Prea se bae Spirit i lidim yu blong faenem mo lukluk moa long ol toktok, ol stori mo ol profesi we bae i save karem yu i kam kolosap moa long Jisas Kraes

Yu no ting se OlTesteman bae i givim wan ful mo stret histri abaot ol man mo woman. Hemia i no wanem ol stret man we oli raetem storian ia mo olgeta we i putum tugeta oli traem blong mekem. Bigfala lukluk blong olgeta i blong tijim ol samting abaot God—abaot plan ia blong Hem blong ol pikinini blong Hem, abaot wanem i minim blong stap olsem ol kavenan pipol blong Hem, mo abaot olsem wanem blong faenem fasin blong pemaot man taem we yumi no folem ol kavenan we yumi mekem. Samtaem oli mekem i go wetem ol bigfala taem we i hapen long bifo olsem we oli andastanem olgeta—wetem ol stori blong ol laef blong ol gudfala profet. Jenesis i wan eksampol blong hemia, mo semmak tu olsem ol buk blong Josua, Jajes, mo Fas mo Seken King. Be ol narafala man we oli raetem OlTesteman oli no traem nating blong storian long saed blong histri. Be, oli tij tru long wok blong art olsem raetem wan poem mo raetem ol toktok. Ol Sam mo Ol Proveb i stret gud long lis ia. Mo afta i gat ol naesfala toktok blong ol profet, olsem Aesea mo Malakae, we oli tokbaot ol toktok blong God i go long Isrel blong bifo—mo, tru long merikel blong Baebol, oli stap gohed blong toktok long yumi tedei.

?Evri profet ia, ol man blong raetem poem, mo olgeta we oli putum tugeta ol buk ia, oli bin save se taosen yia afta, bae ol pipol raon long wol bae oli ridim ol toktok blong olgeta? Yumi no save. Be yumi sapraes se hem i wanem we i hapen stret. Ol nesen oli girap mo foldaon, oli winim ol siti, ol king oli laef mo afta oli ded, be OlTesteman i stap longtaem long olgeta evriwan, stat long wan jeneresen i go long wan nara jeneresen, long wan man blong raet i go long wan nara man blong raet, long wan translesen i go long nara translesen. I tru, sam samting i bin lus mo oli bin jenisim sam samting, be yet long sam wei tru long merikel oli bin sevem gud.

Hemia i sam nomo long ol samting blong putum long maen blong yu taem yu stap ridim OlTesteman long yia ia. God i sevem gud ol raeting ia blong bifo from se Hem i save yu mo wanem yu stap go tru long hem. Hem i bin rere long wan mesej blong yu long saed blong spirit long ol toktok ia, we bae i mekem yu kam moa kolosap long Hem, mo bildim fet blong yu long plan ia blong Hem mo Pikinini blong Hem we Hem i Lavem. Bae Hem i lidim yu i go long wan ves o wan tingting we bae i blesem wan man we yu save long hem—wan mesej we yu save serem wetem wan fren, wan memba blong famli, o wan memba blong Jos. I gat plante wei. ?Hemia i no wan gud samting blong tingting long hem?

Nifae i talem, “Sol blong mi i glad long ol skripja” (2 Nifae 4:15). Maet bae yu filim semmak wei taem yu ridim plante long ol semmak toktok we Nifae i bin ridim—wanem we naoia yumi singaotem OlTesteman.