“9–15 Febwari. ‘Noa I Kasem Gladhat long Ae blong Lod’: Jenesis 6–11; Moses 8,” Kam Folem Mi—Blong Hom mo Jos: OlTesteman 2026 (2026)
“9–15 Febwari. ‘Noa I Kasem Gladhat long Ae blong Lod’,” Kam Folem Mi: 2026
Jehova I Kipim wan Promes, i kam long Sam Lawlor
9–15 Febwari: “Noa I Kasem Gladhat long Ae blong Lod”
Jenesis 6–11; Moses 8
Blong stap laef long ol las dei ia, yumi nid blong lukluk moa long stori blong Bigfala Ren we i bin Draonem ol Samting. Taem we Jisas Kraes i bin tijim olsem wanem blong yumi stap rere from Seken Kaming blong Hem, Hem i bin talem: “Olsem we i bin hapen long ol taem blong Noa, bae i olsem tu long taem we Pikinini blong Man bae i kam” (Joseph Smith—Matiu 1:41). Antap long hemia, ol toktok we oli tokbaot taem blong Noa, olsem “kam nogud tumas” mo “stap fulap wetem faet”,” i tokbaot stret taem blong yumi tedei (Jenesis 6:12–13; Moses 8:28). Stori blong Taoa blong Babel, i luk tu se i blong taem blong yumi tedei, wetem ol toktok we i tokbaot hae tingting, we afta i gat tingting i fasfas, mo afta, oli bin seraot.
Ol stori ia blong bifo, oli impoten tumas, i no from nomo se oli soem yumi se fasin nogud i stap kambak bakegen truaot long histri. Moa impoten, oli tijim yumi wanem blong mekem abaot ol fasin ia. Noa “i kasem gladhat long ae blong Lod” (Moses 8:27). Mo ol famli blong Jared mo brata blong hem oli tanem olgeta i go long Lod, mo oli kasem proteksen aot long ol tingting we i fasfas mo seraot we i bin hapen long Babel (luk long Ita 1:33–43). Sapos yumi stap askem yumiwan olsem wanem blong kipim yumiwan mo ol famli blong yumi oli stap sef long taem blong yumi tedei from ol fasin nogud mo fasin blong faet, ol stori insaed long japta ia, bae oli tijim yumi plante samting.
Ol Aedia blong Stap Lanem Samting long Hom mo long Jos
Jenesis 6; Moses 8
I gat sefti long saed blong spirit, taem yumi stap folem profet blong Lod.
?Yu luk eni samting we oli tokbaot long dei blong Noa we i luk semmak long ol situesen long dei blong yumi? Blong kasem wan stret ansa, luk long Moses 8:15–24, 28. ?Wanem nao stamba toktok we yu luk oli ripripitim?
Wan impoten samting we bae yu luk se i semmak i we, God i singaotem Noa blong kam wan profet, mo tu Hem i bin singaotem wan profet tedei. Tingting blong mekem wan lis blong ol trutok we yu lanem abaot ol profet, insaed long Moses 8:13–30. ?Long wanem wei nao, profet blong yumi we i stap laef tedei, i semmak olsem Noa? Yes, profet blong Lod tedei i no stap wonem yumi abaot wan bigfala ren we i draonem ol samting o stap invaetem yumi blong help bildim wan ak. ?Be, wanem nao hem i stap wonem yumi abaot? ?Mo wanem nao hem i stap invaetem yumi blong mekem? Blong help ansarem ol kwestin ia, yu save luklukbak long wan japta blong Teachings of Presidents of the Church long Gospel Laebri, speseli, “Invitations and Promised Blessings” seksen. Maet yu save jusum wan woning mo wan invitesen we yu luk se i impoten, speseli long yu.
Elda Allen D. Haynie i bin tijim se, “Wan Papa long Heven we i stret gud evriwan mo gat lav, i bin jusum fasin blong stap talemaot trutok tru long revelesen, long ol pikinini blong Hem, i tru long wan profet,” (“Wan Profet we I Stap Laef blong Ol Las Dei,” Liahona, Mei 2023, 25). Tingting blong stap stadi long mesej blong Elda Haynie, stap lukaotem ol risen blong stap gat wan profet, i wan saen blong lav blong Papa long Heven. ?Olsem wanem nao taem yu stap folem profet blong Lod, i helpem yu blong filim sef blong stap laef long ol las dei ia?
Luk tu long Topics and Questions, “Prophets,” Gospel Laebri; “Why Do We Have Prophets?” (vidio), Gospel Laebri.
Why Do We Have Prophets?
Jenesis 6:5–13
Bigfala Wota we i Draonem Ol Samting, i wan aksen we God i soem sore blong Hem.
Sam pipol oli stap askem olgetawan abaot jastis blong God taem Hem i sendem bigfala Ren we i Draonem Ol Samting blong “spolem ol man” (Jenesis 6:7). Elda Neal A. Maxwell i bin eksplenem se, long taem blong Bigfala Ren We I Draonem Ol Samting, “korapsen i bin kasem wan poen we i spolem fridom blong joes, mo oli no save sendem ol spirit i kam long wol tru long jastis” (We Will Prove Them Herewith [1982], 58). Maet yu save tingting tu long olsem wanem Bigfala Ren we i Draonem Ol Samting i wan aksen blong sore. ?Wanem nao yu faenem insaed long Jenesis 6:5–13 we i soem bigfala sore mo lav blong Lod long ol pipol?
Jenesis 9:8–17
Ol token o simbol , oli helpem mi blong tingbaot ol kavenan blong mi wetem Lod.
Folem wanem we i stap insaed long Jenesis 9:8–17, wanem nao wan renbo i save mekem yu yu tingting long hem? ?Wanem nao Josef Smit Translesen, Jenesis 9:21–25 (insaed long Baebol apendiks) i ademap long andastaning blong yu? Maet yu save tingting tu blong stap mekem wan lis blong ol narafala samting (olsem, ol simbol, ol samting o eni narafala samting bakegen) we God i bin givim long yu blong rimaenem yu long ol kavenan blong yu. ?Wanem nao ol samting ia oli stap tijim long yu? ?Olsem wanem nao oli helpem yu blong tingbaot?
Luk tu long Gerrit W. Gong, “Always Remember Him,” Liahona, May 2016, 108–11; “Reverently and Meekly Now,” Hym, namba 185.
Taoa blong Babel, i kam long David Green
Jenesis 11:1–9
Blong stap folem Jisas Kraes i wan wei ia nomo i go long Papa long Heven.
Stori blong ol pipol blong Babel we oli stap bildim wan taoa i givim wan intresting fasin blong komperem samting wetem stori blong Inok mo ol pipol blong hem we oli stap bildim Saeon, we yu bin stadi long hem long las wik. Tugeta grup blong ol pipol ia i stap traem blong kasem heven, be long ol defren wei. ?Olsem wanem nao ol pipol blong Saeon oli bin kasem heven? (luk long Moses 7:18–19, 53, 62–63, 69). ?Wanem nao yu lanem aot long Jenesis 11:1–9 mo Hileman 6:26–28 abaot ol pipol blong Babel? ?Wanem nao hemia i tijim yumi abaot ol hadwok blong yumiwan blong gobak mo stap wetem God? ?Wanem nao God i bin givim blong helpem yumi blong “go kasem long heven”? (Jenesis 11:4; luk tu long Jon 3:16).
Glad blong lanem samting. Blong stap lanem samting, i tekem moa bitim blong stap rid mo stap lisin nomo. Eksampol, blong stap lanem abaot Taoa blong Babel, yu mo famli o klas blong yu, i save raet long ol pis blong pepa, ol samting we oli tekemaot yumi i go longwe long God. Afta, long ol narafala pis blong pepa, yu save raetem ol samting we i tekem yumi i kam moa kolosap long God. Putum gud ol fas grup blong pepa long sep blong wan taoa mo afta nambatu grup blong ol pepa long sep blong wan tempol.
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jenesis 6:14–22; 7–8; Moses 8:16–24
Blong stap folem profet blong Lod, bae i blesem mi mo famli blong mi.
-
Plante ol pikinini oli laekem stori blong Noa mo ak. Tingting blong stap givim janis long ol pikinini blong yu blong serem wanem oli save abaot stori ia. Blong helpem olgeta, yu save yusum ol pikja long aotlaen ia, “Noa mo Famli blong Hem” long Ol Stori long OlTesteman (22–25), mo nambatri ves blong singsing ia “Follow the Prophet” (Children’s Songbook, 110–11). Ol pikinini blong yu bae oli glad blong aktem ol pat blong stori—eksampol, aktem blong yusum wan tul blong bildim bigfala sip o wokabaot olsem ol animol we oli stap go insaed long bigfala sip.
-
Taem, yufala i tokbaot Noa tugeta, helpem ol pikinini blong yu blong luk olsem wanem yumi gat blesing ia blong gat wan profet blong God tedei. Helpem ol pikinini blong yu blong lukaotem long Moses 8:16–24 blong faenem ol samting we Noa i bin tijim we ol profet blong Lod tedei, oli stap tijim yet. ?Olsem wanem nao yumi kasem blesing taem yumi stap obei ol tijing ia?
Jenesis 9:15–16
God bae i kipim ol promes blong Hem long mi.
-
Maet bae ol pikinini oli laekem blong droem o kalarem wan renbo taem yu stap tokbaot wanem nao renbo i ripresentem Josef Smit Translesen, Jenesis 9:21–25 [insaed long Baebol apendiks]). ?Wanem nao God i wantem Noa mo famli blong hem blong oli tingbaot taem oli luk wan renbo?
-
Yu save soem tu long ol pikinini blong yu, wan samting we yu gat we i rimaenem yu long wan samting we i impoten long laef blong yu, olsem wan ring blong mared, wan pikja o wan jenol. Letem ol pikinini blong yu oli serem ol eksampol blong olgetawan. Maet bae yufala i wantem toktok raon tu long ol samting we oli stap helpem yumi tingbaot ol kavenan blong yumi, olsem sakramen, we i stap helpem yumi tingbaot kavenan blong baptaes blong stap folem Jisas Kraes OlTesteman 20:75–79).
God i bin talem long famli blong Noa se renbo bae i wan “saen blong promes ya blong mi, we mi mekem long yufala” (Jenesis 9:12).
Jenesis 11:1–9
Blong stap folem Jisas Kraes, i wan wei ia nomo blong go long heven.
-
Bae i wan gudtaem blong bildim wan taoa long ol pleplei brikis o ol narafala samting we yu save yusum wetem ol pikinini blong yu. Taem yu mekem olsem, eksplenem se, ol pipol blong Babel oli ting se bae oli save kasem heven taem oli stap bildim wan taoa we i longfala i go antap. Afta, tugeta, yufala i save lukluk long wan pikja blong Sevya mo askem ol pikinini blong yu, olsem wanem nao Hem i helpem yumi blong go kasem heven. Afta, yu save toktok wetem wanwan long olgeta abaot ol samting we yu save mekem blong folem Sevya.
-
Blong ademap long stori blong taoa blong Babel long Jenesis 11:1–9, yu mo ol pikinini blong yu i save ridim Hileman 6:28. Folem wanem we i stap long ves ia, ?from wanem ol pipol blong Babel oli bildim taoa? ?From wanem blong bildim taoa ia i wan rong wei blong kasem heven? Afta yu save lukaotem 2 Nifae 31:20–21 mo Hileman 3:28 blong faenem stret rod blong kasem heven. ?Wanem advaes bae yumi save givim long ol pipol blong Babel?
Blong kasem moa aedia, luk long magasin blong Fren blong manis ia.