“2–8 Maj. ‘Letem God I Win’,” Kam Folem Mi—Blong Hom mo Jos: OlTesteman 2026 (2026)
“2–8 Maj. ‘Letem God I Win’,” Kam Folem Mi: 2026
Esao I Salem Fasbon Raet blong Hem, i kam long Glen S. Hopkinson
2–8 Maj: “Letem God I Win”
Jenesis 24–33
?Olsem wanem nao yu save lukaot gud yuwan i sef i stap, blong kasem wan blesing we i kam long God? Maet bae yu talem se stori blong Jekob, apuboe blong Ebraham mo Sara, i wan stori blong wan man we i bin lanem ansa blong kwestin ia. Long wan kalja, we ol fas bon oli kasem wan blesing blong raet blong fasbon, Jekob i bon olsem nambatu pikinini, mo stap gat fasin blong giaman long twin brata blong hem, Esao. Nem ia “Jekob” i minim “tekova”—wan we i riplesem wan narawan. Jekob i laef folem nem ia taem hem i stap traem, moa bitim wan taem, blong tekova long Esao olsem wan we bae i kasem blesing blong raet blong fasbon from se Esao i no bin klin inaf from, (luk long Jenesis 25:30–34; 26:34–35; 27:36). Olsem wan risal, famli i no agri, mo Jekob i mas ronwe from laef blong hem, i go long waelples.
Sam yia i pas, God i givim oda long Jekob blong gobak long hom. Long rod blong hem, Jekob, wetem fasin blong putum tingting i stap daon, i lukaotem wan blesing long God. Ol skripja oli tokbaot taem ia olsem wan “traehad” blong Jekob, mo hem i talemaot se bae hem i no save givap “yu mas blesem mi” (Jenesis 32:26). Afta, lesen i kam—mo blesing ia. God i jenisim nem blong Jekob i kam Isrel—minim, long medel blong evri samting, “letem God i win.” Isrel i lanem se blong kasem ol blesing we i gat moa valiu, ol kavenan blesing blong Hem, i no nid blong tekova long wan narawan. Ol blesing blong Hem, man i no save pem, stopem o winim. Hem i givim long olgeta i fri nomo long evriwan we oli laef blong kasem nem blong Isrel—we oli letem God i win long laef blong olgeta.
Ol aedia blong Stap Lanem Samting long Hom mo long Jos
Jenesis 24
Kavenan mared i wan mas insaed long plan blong God.
Taem yu stap rid Jenesis 24, askem yuwan, from wanem Ebraham i tingting se mared blong boe blong hem, Aesak, i impoten tumas. ?From wanem mared i impoten long God?
?Wanem ol fasin we yu luk long Rebeka we i help blong mekem wan strong mared mo famli? (luk long speseli ol ves 15–28, 57–61).
Luk tu long Topics and Questions, “Marriage,” Gospel Laebri.
Jenesis 25:29–34
Mi mekem ol samting we i no save finis i moa impoten, bitim ol samting we i blong sot taem nomo.
Long kalja blong Rebeka mo Aesak, fasbon pikinini nao i gat blong raet blong fasbon, we i minim bae i kasem bigfala samting we oli gat, folem wetem ol bigfala responsabiliti blong stap lukaot long famli. Taem yu stap ridim Jenesis 25:29–34, tingting hevi long from wanem Esao bae i wantem salem raet blong hem blong kasem wan supsup kaekae. ?Wanem lesen yu faenem se oli blong yu insaed long stori ia? Maet bae i help blong mekem tu lis: (1) ol blesing we i no save finis we God i wantem blong givim long yu (2) ol samting blong wol we maet i save pulumaot tingting blong yu. Afta, yu save ridim sentens mo riplesem “raet blong fasbon” wetem wan samting we i stap long fasfala lis, mo riplesem “supsup” wetem wan samting we i stap long nambatu lis. ?Olsem wanem nao bae yu lukluk nomo long Sevya mo ol blesing blong gospel blong Hem we i no save finis?
Luk tu long Matiu 6:19–33; M. Russell Ballard, “Tingbaot Wanem I Impoten Moa,” Liahona, Mei 2023, 105–7.
Jekob long Betel, i kam long James Smetham
Jenesis 28
Ol kavenan blong haos blong Lod, i tekem paoa blong God i kam insaed long laef blong mi.
Taem we hem i stap silip long wan pilo blong ol ston, Jekob i kasem wan drim we i jenisim laef blong hem. Hem i bin wan tabu eksperiens we i mekem Jekob i putum nem blong ples ia Betel o “ples blong God,” mo stap talemaot se, “Tru, ples ya, Hae God i stap long hem” (Jenesis 28:16).
Taem yu ridim Jenesis 28, maet bae yu askem yuwan se, wanem nao i mekem eksperiens ia i tabu tumas long Jekob. ?Wanem nao hem i stap fesem long taem ia? ?Wanem nao hem i bin stap filim? Yu save lukaotem tu ol toktok mo ol sentens insaed long ol ves 10–22 we i rimaenem yu abaot haos blong Lod. ?Wanem ol filing nao yu kasem abaot God, haos blong Hem mo ol kavenan blong Hem?
Long en blong aotlaen ia, i gat wan peinting we i ripresentem drim blong Jekob; maet yu save luklukbak long hem taem yu stap rid. Sapos bae yu krietem wan pikja blong yuwan we i ripresentem drim blong hem, ?wanem nao bae yu mekem? ?Wanem ol trutok long stori nao we bae yu traem blong peintem?
Hym ia, “Nearer, My God, to Thee” (Hym, namba 100) i kam tru long insperesen ia blong drim blong Jekob. ?Wanem ol koneksen nao yu luk bitwin singsing ia mo Jenesis 28:10–22? ?Olsem wanem nao tempol i helpem yu blong filim kolosap moa long God? Tingting blong stap lukaotem ol ansa blong kwestin ia long mesej blong Presiden Russell M. Nelson “Tempol mo Fandesen blong Yu long Saed blong Spirit” (Liahona, Novemba 2021, 93–96). Maet yu wantem tu blong luklukbak long ol kavenan mo ol blesing blong haos blong Lod insaed long Jeneral Hanbuk, 27.2 (Gospel Laebri). ?Olsem wanem nao taem yu stap kipim ol kavenan ia, i tekem paoa blong God i kam insaed long laef blong yu?
Fasin blong krietem samting. I gat plante wei blong lanem samting aot long ol skripja, be i no blong stap ridim olgeta nomo. Sam pipol oli faenemaot se oli andastanem moa gud ol skripja taem oli dro ol pikja blong ol stori. Ol narawan ol faenem ol niu tingting long saed blong spirit insaed long tabu miusik we i go wetem ol skripja. Yu no stopem yuwan long wan wei blong stap lan; stap open blong stap traem ol defdefren wei blong lan.
Jenesis 29:31–35; 30:1–24
Lod i tingbaot mi long ol tes blong mi.
Taem yu stap ridim Jenesis 29:31–35 mo 30:1–24, lukaotem ol toktok we oli tokbaot sore we God i gat long Rejel mo Lea. Tingting hevi long wei we God i bin lukluk long ol hadtaem [blong yu] mo i bin “tingbaot” yu (Jenesis 29:32; 30:22).
Jenesis 32–33
Sevya ia i save helpem famli blong mi.
Taem we Jekob i bin gobak long Kenan, hem i bin “fraet bigwan mo tingting blong hem i fasfas” abaot wei we bae Esao i welkamem hem (Jenesis 32:7). Taem yu ridim Jenesis 32–33, tingting hevi long ol famli rilesensip blong yuwan—speseli, wan we i nidim hiling. Ating stori ia, i save givim insperesen long yu blong go toktok long wan. Ol kwestin olsem oli save help blong lidim yu taem yu stap rid:
-
?Olsem wanem Jekob i bin rere blong mitim Esao?
-
?Wanem nao i kamaot klia long yu abaot prea blong Jekob we i stap long Jenesis 32:9–12?
-
?Wanem nao yumi lanem abaot fogivnes aot long eksampol blong Esao?
-
?Olsem wanem Sevya i helpem yumi blong hilim ol famli rilesensip?
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jenesis 24:10–21
Mi save stap kaen long ol narawan.
-
Blong tokbaot hamas eksampol blong fasin ia blong stap kaen blong Rebeka i gud tumas, yu save soem pikja andanit ia long ol pikinini blong yu o aktiviti pej blong wik ia taem yu stap talem sot stori long Jenesis 24:10–21. Maet ol pikinini blong yu bae oli glad tumas blong stap aktem stori ia. Hemia i save lid i go long storian abaot ol aksen blong soemaot fasin blong stap kaen, we yu mo ol pikinini blong yu i bin luk.
-
Tugeta, tingting blong stap singsing long wan singsing abaot fasin blong stap kaen, olsem “Kindness Begins with Me” (Children’s Songbook, 145). Ol pikinini blong yu oli save lisin long ol toktok ia “fasin blong stap kaen” (o wan toktok we i semmak) mo stanap taem oli harem. ?Olsem wanem nao yumi save stap kaen olsem Rebeka?
Ol Hiro blong OlTesteman, i kam long Dilleen Marsh
Jenesis 25:21–34
Ol samting we i no save finis oli moa impoten bitim ol samting blong wol.
-
tingting blong stap yusum “Jekob mo Esao” (long Ol Stori long OlTesteman, 38–41) blong helpem ol pikinini blong yu blong andastanem stori insaed long Jenesis 25:21–34. Maet ol pikinini blong yu oli save pikjarem long maen blong olgeta, se Esao i bin askem advaes long olgeta abaot, sapos hem bae i givim fasbon raet blong hem blong kasem wan bol glas supsup o no. ?Wanem nao bae oli talem long hem?
2:5Jacob and Esau
-
?Wanem ol samting we i no save finis we oli moa impoten long yu mo ol pikinini blong yu? Maet yu mo ol pikinini blong yu i save faenem ol pikja mo ol samting we i ripresentem ol samting ia. ?Olsem wanem nao yumi save soem long Lod se ol samting ia oli impoten long yumi?
Jenesis 28:10–22
Ol kavenan i helpem mi blong gobak long Papa long Heven.
-
Tugeta, taem yufala i ridim Jenesis 28:10–22 , yu save yusum wan lada o wan step blong lada insaed long haos (o wan pikja olsem wan long en blong aotlaen ia) blong tokbaot olsem wanem ol kavenan blong yumi oli olsem wan lada. Maet ol pikinini blong yu, oli save mekem se oli stap klaem long wan lada mo wetem evri step we oli stanap long hem, tokbaot ol taem we yumi promes blong obei long God olsem taem ia we yumi baptaes, tekem sakramen o blong go long tempol. ?Olsem wanem nao ol kavenan blong yumi oli tekem yumi kam kolosap moa long God?
Jenesis 32:6–11; 33:1–4
Papa long Heven mo Jisas Kraes oli save helpem mi blong lavem famli blong mi.
-
Blong introdiusum ol ves ia, maet yu save eksplenem se, afta long plante yia blong gat ol nogud filing, Jekob bae i stap go blong mitim Esao bakegen. Ridim tugeta Jenesis 32:6–11. ?Jekob i bin filim olsem wanem? ?Wanem nao hem i bin mekem blong kasem help? Ridim tugeta Jenesis 33:1–4 blong faenemaot olsem wanem Lod i ansarem prea blong Jekob? Sapos Jekob mo Esao, tufala i save toktok long yumi tedei, ?wanem nao bae tufala i talem blong stap helpem yumi taem we i gat smol raorao insaed long famli blong yumi?
Blong kasem moa aedia, luk long magasin blong Fren blong manis ia.