“16–22 Maj. ‘God I Kapsaetem Plan Ya blong Yufala, I Mekem we Gudfala Samting I Kamaot long Hem’: Jenesis 42–50,” Kam Folem Mi—Blong Hom mo Jos: OlTesteman 2026 (2026)
“16–22 Maj. ‘God I Kapsaetem Plan Ya blong Yufala, I Mekem we Gudfala Samting I Kamaot long Hem’,” Kam Folem Mi: 2026
Fasin blong Fogiv, i kam long Megan Rieker
16–22 Maj: “God I Kapsaetem Plan Ya blong Yufala, I Mekem we Gudfala Samting I Kamaot long Hem”
Jenesis 42–50
Hem i bin kolosap 22 yia i pas taem we ol brata blong Josef oli bin salem hem i go prisena. Josef i bin safa plante tes blong laef, we i tekem tu, ol giaman toktok we i kam agensem hem mo fasin blong stap prisena. Taem we hem i bin luk ol brata blong hem bakegen, Josef i bin gavna blong ful Ijip, hem i nambatu long king blong Ijip. Bae i isi nomo long hem blong givimbak long ol brata blong hem, mo blong yumi stap skelem wanem we oli bin mekem long Josef, hemia bae yumi andastanem. Be yet, Josef i bin fogivim olgeta. I no hemia nomo, be hem i bin helpem olgeta blong oli luk tabu stamba tingting blong safaring blong hem. “God i kapsaetem plan ya blong yufala, i mekem we gudfala samting i kamaot long hem” (Jenesis 50:20), hem i bin talem long olgeta, from se hemia nao i bin putum hem long wan posisen blong hem i save sevem “ful haos blong papa blong Hem” (Jenesis 47:12) aot long bigfala taem blong hanggri we i stap.
Long plante wei, Josef i bin semmak long Jisas Kraes. I nomata we ol sin blong yumi i mekem se Jisas i safa bigwan, Hem i givim fogivnes, i mekem yumi evriwan i fri aot long wan samting we i mowas bitim blong stap hanggri. I nomata sapos yumi nidim blong kasem fogivnes o blong givim fogivnes—long wan poen, yumi evriwan i nidim blong mekem tugeta—eksampol blong Josef i poenem yumi i go long Sevya, wan tru ples blong kasem hiling mo stretem ol samting.
Ol Aedia blong Stap Lanem Samting long Hom mo long Jos
Jenesis 45:5–7; 47:12
“Hemia i no wok blong yufala, i wok blong God ya, we hem i sanem mi mi kam fastaem long yufala long ples ya, blong mi save sevem laef blong ol man.”
?Yu bin luksave eni samting we i semmak bitwin laef blong Josef mo misin blong atonmen blong Jisas Kraes? Blong luk sam long ol eksampol blong ol samting we i semmak ia, traem blong stap komperem:
-
Jenesis 37:3 wetem Matiu 3:17.
-
Jenesis 37:26–28 wetem Matiu 26:14–16.
-
Jenesis 45:5–7 wetem Luk 4:18.
-
Jenesis 47:12 wetem Jon 6:35.
?Wanem ol filing we yu kasem abaot Sevya mo misin blong Hem taem yu ridim ol sentens ia?
Jenesis 45; 50:15–21
Fasin blong fogiv i tekem fasin blong hiling i kam.
Blong stap ridim abaot Josef we i fogivim ol brata blong hem from ol rabis samting we oli bin mekem long hem, i save givim insperesen long yu blong tingbaot wan we yu stap traehad blong fogivim hem naoia. Ol kwestin ia oli save help taem yu traehad blong yusum prinsipol ia:
-
?From wanem, bae i bin had long Josef blong fogivim ol brata blong hem? (blong luklukbak long wanem we oli bin mekem long hem, luk long Jenesis 37). ?Wanem ol eksperiens o fasin nao maet i bin givim paoa long Josef blong gat fogivnes? (eksampol, luk long, Jenesis 45:1–15 o 50:15–21
-
?Wanem nao ol blesing we i kam taem we Josef i fogivim ol brata blong hem? Eksampol, komperem ol rilesensip long famli blong Jekob long stat blong stori (eksampol, luk long Jenesis 37:3–11) wetem ol rilesensip long en (luk long Jenesis 45:9–15; 50:15–21). ?Bae i olsem wanem taem ol samting oli tanem i go defren sapos Josef i no bin wantem blong fogiv?
-
Tingting blong stap raetemdaon nem blong wan we maet i nidim fogivnes blong yu—nomata sapos oli bin askem o no askem yu blong fogivim olgeta. ?Wanem nao yu save mekem blong invaetem hiling paoa blong blong Sevya i kam long situesen ia? Sapos fasin blong fogiv i had tumas, tingting blong stap luklukbak long kaonsel blong Elda Gerrit W. Gong long ol las sikis paragraf blong mesej blong hem “Hapi mo blong Oltaem” (Liahona, Novemba 2022, 85). ?Wanem nao yu faenem we i givim hop long yu blong yu save fogiv?
Luk tu long Doktrin mo Ol Kavenan 64:9–11; “Forgiveness: My Burden Was Made Light” (vidio), Gospel Library.
Forgiveness: My Burden Was Made Light
Jenesis 49
Jekob i givim profet blesing long famli blong hem.
Ol blesing blong Jekob i go long ol pikinini blong hem we i tekem tu, ol pikja we i givim ol gudfala filing blong tingting long hem, be oli no isi blong andastanem. Bigfala Tangkyu se, gospel we i kambak i givim sam help long yumi. Taem we yu ridim ol blesing blong Josef long Jenesis 49:22–26, ridim olgeta ves ia tu, mo luk wanem ol niu tingting oli givim i kam: 1 Nifae 15:12; 2 Nifae 3:4–5; Jekob 2:25; Doktrin mo Ol Kavenan 50:44.
Taem yu rid abaot blesing blong Juda long Jenesis 49:8–12, tingbaot se Jisas Kraes i wan laen blong Juda. ?Wanem nao yu fanem long ol ves ia we oli rimaenem yu long Sevya? (luk tu long Revelesen 5:5–6, 9; 1 Nifae 15:14–15; Doktrin mo Ol Kavenan 45:59; 133:46–50).
Blong stap ridim ol blesing ia, i save givim insperesen long yu blong luklukbak long petriakel blesing blong yu—o sapos yu no gat wan, i blong helpem yu blong kasem wan. ?Wanem ol toktok mo ol sentens insaed long blesing blong yu we i tanem ol tingting blong yu i go long Kraes?
Luk tu long Randall K. Bennett, “Petriakel Blesing blong Yu—Daereksen we i kam long Papa long Heven,” Liahona, Mei 2023, 42–44.
Jenesis 50:19–21
God i save helpem mi blong faenem mining blong from wanem mi gat ol tes long laef blong mi.
I nomata we i no bin klia taem we hem i bin stap gotru long ol had tes ia, be long en, Josef i bin save lukbak long wanem i bin kam agensem hem long Ijip, mo luk se “God i kafsaedem plan ya blong [hem], i mekem we gudfala samting i kamaot long Hem” (Jenesis 50:20). Sapos yu bin save visitim Josef taem hem i bin stap long wan hol o insaed long kalabus, ?olsem wanem nao bae yu leftemap tingting blong hem? ?Olsem wanem nao Jenesis 50:19–21 i helpem yu long ol taem blong tes long laef blong yu?
Luk tu long Doktrin mo Ol Kavenan 122; “Tijing blong Jisas oli stamba blong yumi,” STSP, pej 6.
Josef Smit long medel blong Ol Profet, i kam long Paul Mann (ditel)
Jenesis 50:24–25
“Lod we i God blong mi bae i resemap wan sia.”
Taem yu ridim Jenesis 50:24–25 mo Josef Smit Translesen, Jenesis 50:24–38 (long Baebol apendiks), tingting hevi se from wanem bae i bin impoten long Josef blong save abaot Moses mo Josef Smit, plante handred yia bifo. ?Olsem wanem nao Josef Smit i mekem i hapen, ol profesi blong Josef abaot hem? (luk long Doktrin mo Ol Kavenan 1:17–23; 20:7–12; 39:11; 135:3).
Blong kasem moa aedia, luk long magasin blong manis ia Liahona mo Blong Ol Yut Oli Kam Strong magasin.
Sam Aedia blong Tijim Ol Pikinini
Jenesis 42–44; 45:4–15
Mi save soem lav mo fasin blong fogiv long famli blong mi.
-
Bae i wan gudtaem blong ol pikinini blong yu blong aktem bakegen stori blong Josef we i stap mekem famli blong hem i kam tugeta bakegen (luk long Jenesis 42–44). O, oli save yusum “Josef mo Hadtaem blong Kasem Kaekae” (insaed long Ol Stori blong OlTesteman, 57–60) o ol pikja long aotlaen ia blong tijim stori long wanwan long olgeta. Hemia sam kwestin we oli save helpem ol pikinini blong yu blong lanem samting long stori ia:
-
?Wanem nao Josef i mekem blong soem lav long famli blong hem? (luk long Jenesis 45:4–15).
-
?From wanem yu filim se Josef i bin fogivim ol brata blong hem?
-
?Wanem filing nao yu ting se ol brata blong Josef oli bin filim taem oli faenemaot se Josef i bin fogivim olgeta? ?Huia nao long laef blong yu we i nidim fogivnes? ?Olsem wanem nao yu save soem lav mo fasin blong fogiv?
2:26Joseph and the Famine
-
Taem yu stap rere blong tij, askem, “?Wanem nao ol pikinini blong mi bae oli mekem blong lanem samting?” Eksampol, long aktiviti ia, ol pikinini blong yu oli stap aktem o stap talemaot bakegen stori ia. Blong stap mekem hemia, bae i helpem olgeta blong tingbaot wanem i bin hapen mo wanem nao ol gospel prinsipol we i stap insaed long stori ia.
-
Yu mo ol pikinini blong yu, bae i wantem blong serem wan eksperiens taem we oli bin fogivim wan o taem we wan i bin fogivim olgeta. Afta, yufala i save singsing wan singsing olsem “Love One Another” (Children’s Songbook, 136) o “Help Me, Dear Father” (Children’s Songbook, 99).
Jenesis 48:8–9
Lod i helpem mi tru long ol blesing blong prishud.
-
Yu mo ol pikinini blong yu i save lukluk long pikja blong Jekob we i stap givim blesing long ol pikinini boe blong hem long en blong aotlaen ia mo toktok raon long wanem we i stap hapen (luk long Jenesis 48:8–9). Sapos i gat nid, eksplenem se Jekob, papa blong Josef, i bin wantem blong givim ol prishud blesing long famli blong hem. Maet yu save serem wetem wanwan long olgeta eni eksperiens we yu bin gat taem yu stap kasem help we i kam long God tru long wan prishud blesing. ?Wanem sam risen we maet yumi gat, mekem se yumi askem wan prishud blesing?
Jenesis 45:5–11
Papa long Heven i sendem Jisas Kraes i kam blong i sevem mi.
-
?Olsem wanem nao yu save helpem ol pikinini blong yu oli luk Sevya insaed long stori blong Josef we i stap sevem famli blong hem long taem we i gat hadtaem blong kasem kaekae? Tingting blong stap mekem wan jat wetem tu kolom mo raetem Josef mo Jisas Kraes. Helpem ol pikinini blong yu blong lukluk long tu skripja mo raetem long bod ol samting we Josef mo Jisas i gat we i semsemmak: Jenesis 37:3 mo Matiu 3:17; Jenesis 37:26–28 mo Matiu 26:14–16; Jenesis 45:5–7 mo Luk 4:18; mo Jenesis 47:12 mo Jon 6:35.
-
Askem ol pikinini blong yu se i minim wanem blong helpem o sevem wan long denja. Sapos eni wan long olgeta i bin gat wan eksperiens we wan man i bin sevem hem o karemaot hem long denja, invaetem olgeta blong serem. ?Olsem wanem nao Josef i sevem ol brata blong hem? (luk long Jenesis 42:1–3; 45:5–7). Afta, tugeta, yufala i save lukluk long wan pikja blong Sevya mo askem ol pikinini blong yu blong tokbaot olsem wanem Jisas i sevem yumi.
Blong kasem moa aedia, luk long magasin blong Fren blong manis ia.